Read KIMERU BIBLE PROTESTANT EDITION Kûg 9 Bible Online

Kûg 9 - KIMERU BIBLE PROTESTANT EDITION bible

Kûg 9

¹Mûraîka wa batano araringa tarumbeta yaawe. Ndîroona njota îrîa yaagwîte nthîgûrû yumîte bwa îgûrû nayo îranenkerwa rûbungûro rwa kûrugûra îrinya rîrîa rîoorokeru mono.

² Njota îîu îrarugûra îrinya rîu na toogi îraitia yumîte îrinyeene rîu îkari ta toogi ya riiko rîrînene. Weerû bwa riûa na manganyoni biragea muundu tontû bwa toogi îîu yaumaga îrinyeeene rîu.

³ Nyuma ngigî ireeja nthîgûrû ciumîte toogiine îîu. Ngigî iu iranenkerwa inya ta ya tûng'aurî twa nthîgûrû.

⁴ Ireerwa itîkaringithie nyaki kana matî jameethî kana mûtî jwa mûthemba kinya jûrîkû. Ireetîkîîrua kûrûmanga antû akî barîa bataarî na rwano rwa mûûri jwa Mûrungu moothiûûne jaao.

⁵Ngigî iu cietîkîrîtue kûthangîkia antû mîeri îtaano na rwakaî îtîkûbooraga. Rwakaî rûu rwakari ta rûrîa muntû aigagua arûmi nî kang'aurî.

⁶ Îgiita rîu, antû bagacwaa gûkua îndî batîkua. Bakeethîrwa bakîendaga gûkua îndî gîkuû kîbamatûke.

⁷ Ngigî iu ciaakari ta mbarathi ithuranîri gwîta ndweene. Ciaarî na thirû yaathithîtue na thaabu mîtwe. Moothiû jaacio najo jakari ta ja antû,

⁸ nchiûri ciaacio ciaakari ta cia aka na ningî maîgo jaacio jaakari ta ja ngatûnyi.

⁹ Ngigî iu ciaarî na mathendû jakari ta nguû ya kwigîra kîbara ya chuuma. Naju mûrurumo jwa mathagu jaacio jwakari ta jwa mbarathi na ngarî cia ndwaa ciîtîte ndweene.

¹⁰Ningî ciaarî na mînyiritha na mîgwî ta ya kang'aurî. Mîgwî îîu yaarî mînyiritheene yaarî na inya ya gûtûma antû baakana nî ûrûrû îgiita rîa mîeri îtaano.

¹¹Ciaarî na mûnene ûrîa waciathaga. Nawe mûnene ûu aarî mûraîka ûrîa waathanaga îrinyeene rîrîa rîoorokeri mono. Riîtwa rîa mûraîka ûu na Kîhibirania nî Abadoni, na Kîgriiki eetagwa Apolioni, na ûu nî ta kuuga “Mwînyangia.”

¹²Mpûûrwa ya mbere îkûthirîîra au. Gûtigarîte mpûûrwa ingî ijîîrî irîa ciîjîte.

¹³ Rîu mûraîka wa batantatû araringa tarumbeta yaawe. Ndîraigua kajû kuuma koneene cio inya cia kîritîro kîa igongwana kîa thaabu kîrîa kîaarî mbere ya Mûrungu.

¹⁴Kajû kau kareera mûraîka ûu wa batantatû waarî na tarumbeta atîrî, “Thaûra araîka barîa bana barîa batheeki mûuroone jûrîa mûnene jwîtagwa Eufurate.”

¹⁵Tontû bûû mûraîka ûu arathaûra araîka bau bo bana barîa baathuranîri nîûntû bwa îthaa rîu na ntukû îîu na mweri jûu na mwaka jûu nîkenda bakooraga gîchunchî kîmwe kîrî bithatû kîa antû.

¹⁶Ndîraigua ntari ya asikarî bau ba mbarathi baarî milioni magana jaîrî. Nî ndaigîrue gûkîrwa baarî bang'ana.

¹⁷Kîonekiine gîaakwa ndonere mbarathi îkari ûûjû: Barîa baciîtithîtie beekîrîte nguû ya îthaga ya kwigîra kîbara îrîa yaarî ya rangi întuune ta mwanki na ya wiirû bwa îgûrû ja kaiga ka goro geetagwa Saafa, na ya yerû ja ûbiriti. Mbarathi ciaarî na biongo ta bia ngatûnyi. Natu tûnyua twaacio nî twaumaga mwanki na toogi na mwanki jwa ûbiriti.

¹⁸Gîchunchî kîmwe kîrî bithatû kîa antû kîrooragwa nî ikanûkia bithatû birîa biaumaga tûnyueene twa mbarathi; tabio mwanki na toogi na rûmûrî rwa ûbiriti.

¹⁹Nîkwîthîrwa inya ya mbarathi iu îkaraga tûnyueene na mînyiritheene yaacio. Mînyiritha yaacio îkari ta njoka irîa îrî biongo bibinene, birîa îrûmanaga nabio.

²⁰ Kîrîndî kîu kîngî kîonthe kîrîa gîatigarîte gîtîûragi nî ikanûkia biu, gîtairirîre na gîtiga kûthaathayia into birîa baathithîtie bongwa. Bataatigîre kûthaathayia roho inthûûku na mîrungu ya mîng'uanano îrîa yaathithîtue na thaabu na fetha na îturutia na maiga na mîtî, îrîa îtîûmba kwona kana kwigua kana gwîtaîta.

²¹Ningî antû bau batairira meeyia jaao ja kûûragana na ja kûrogana na ja kûthûngîîra kana ja kwiyia.