Read KIMERU BIBLE PROTESTANT EDITION Ruth 1 Bible Online

Ruth 1 - KIMERU BIBLE PROTESTANT EDITION bible

Ruth 1

¹Îgiita rîrîa agambi baathanaga, nî kwagîîre mpara nthî ya Israeli. Tontû bûu muntû ûmwe wa kuuma Bethlehemu ya Juda areeta nthîgûrû ya Moabu gûtûûra ku arî na mwekûrû waawe na ataana baawe baîrî.

²Muntû ûu eetagwa Elimeleki na mwekûrû waawe eetagwa Naomi. Ataana baawe beetagwa Mahaloni na Kilioni. Aarî wa mwîrîga jwa Efiratha kuuma Bethlehemu ya Juda. Nî beetîre nthîgûrû ya Moabu na baratûûra ku.

³Elimeleki, mûkûrû wa Naomi, nî aakuîre na Naomi aratigwa na ataana baawe bobaîrî.

⁴Nabo baragûra aka Amoabu, ûmwe weetagwa Oripa na ûngî Ruthu, baratûûra ku îgiita ta rîa mîaka îkûmi.

⁵Ningî Mahaloni na Kilioni barakua. Tontû bûu Naomi aratigwa atî na mûkûrû kana ataana.

⁶Rîu Naomi araigua arî kûu Moabu atî MWATHANI nî atharimîte antû baawe na biakûrîa. Tontû bûu aragwata rûgendo amwe na aka ba ataana baawe nîkenda acoka kwaao kuuma bûûrîîne ya Moabu.

⁷Nawe arauma gûntû kûu aatûûraga, arî amwe na aka ba ataana, baragwata njîra bacokeete nthîgûrû ya Juda.

⁸Naomi areera aka bau ba ataana atîrî, “Cokeeni, o muntû eete kwa ng'ina. MWATHANI arobûthithîria bwega o ta ûrîa bûthithîrîtie barîa bathirîtie gûkua na kinya ûûni.

⁹MWATHANI arobûtharima na atûme o ûmwe weenu oone ntomûrûme wa kûmûgûra na agîe na nja yaawe.” Aracoka arabacûnca, nabo bararîra na tûjû tûtûnene.

¹⁰Baramwîra atîrî, “Arî tuî! Ga tûgaacokania naagwe kîrî antû beenu.”

¹¹Îndî Naomi arabeera atîrî, “Cokeeni, aarî baakwa. Nîmbi bûkanthingatîra? Ntîûmba kwona aana bangî ba kwîja kwaa akûrû beenu.

¹²Cokeeni itû aarî baakwa bûciîtîre, nîûntû ndî ntindiri na ntîûmba kûgûrwa. Îndî kinya gûkoombîka nkagûrwa naarua na ngaciara tûîjî rî,

¹³bwoomba gûtweteera mwanka rîrîa tûgaakûra? Kana rî, bwoomba kwirigîîria kûgûrwa nîûntû bwaao? Arî, aana baakwa, nî nkwigua ûrûrû mono nîûntû bweenu nî ûrîa MWATHANI ambutatîrîte.”

¹⁴Nabo barauga mbu na bararîra kaîrî. Oripa aracûnca ng'ina wa nthaka aracoka kwaao, îndî Ruthu ararega gûtiga Naomi.

¹⁵Naomi aramwîra, “Tega, mûka wa mûtaana wa nyakwe aagûcoka kwa antû baao na kwa mîrungu yaao. Coka kinya gwe ûmûthingate.”

¹⁶Îndî Ruthu aramûcokeria atîrî, “Tiga kûmberenca ncoka ntiga gûkûthingata; o kûrîa gwe ûgeeta nî ku ngeeta, o arîa ûgaatûûra nîo naani ngaatûûra; antû baaku bakaa antû baakwa, Mûrungu waaku ae Mûrungu waakwa.

¹⁷Kûrîa ûgaakuîra nî ku ngaakuîra, na kûu nîo ku nkaathikwa. MWATHANI arombona këethîra gîntû kîngî gîgaantigithania naagwe tiga gîkuû.”

¹⁸Rîrîa Naomi oonere atî Ruthu nî agiitîte gwîtania nawe araikirîra.

¹⁹Nabo bareetania bobaîrî mwanka barakinya Bethlehemu. Rîrîa baakûrûkaga ku, antû bonthe bararigara nîûntû bwaao. Nabo eekûrû baroorania atîrî, “A ûûjû nî Naomi?”

²⁰Nawe arabacokeria arabeera atîrî, “Tigeeni kûmbîta Naomi, mbîteeni ‘Mara,’ tontû Mweneinya nî anthithîrîtie mantû ja kûmbigithia ûrûrû bûbwingî.

²¹Ndeetîre ndî na bionthe, îndî MWATHANI aagûncokia ntî na gaantû; nîmbi bûkûmbîtîra Naomi o rîrîa MWATHANI Mweneinya ambîrûkîrîte ndîa thîîna?”

²²Ûu nîu Naomi aacokîre kwaao barî na Ruthu, Mûmoabu ûrîa waarî mûka wa mûtaana waawe. Baumîre nthî ya Moabu barakinya Bethlehemu kîambîrîîria kîa maketha ja mûnyaki.