Read KIMERU BIBLE PROTESTANT EDITION Ruth 2 Bible Online

Ruth 2 - KIMERU BIBLE PROTESTANT EDITION bible

Ruth 2

¹Naomi nî aarî na muntû wa ndûgû cia ba mûkûrû waawe, Elimeleki. Muntû ûu eetagwa Boazi na aarî gîtonga gîkînene mono na aarî na îgweta.

² Ruthu ûrîa wa kuuma Moabu areera Naomi atîrî, “Ka mbîte miuundeene nkaringe rûûa ndî nyuma ya muntû o ûrîa ûkaambigîîrua kîaao.” Nawe aramwîra, “Îta, mwana waakwa.”

³Nawe araumagara, areeta, arakinya miuundeene na araambîrîîria kûringa rûûa arî nyuma ya akethi. Naju muunda jûrîa aatonyere jûreethîrwa jûrî jwa Boazi ûu waarî wa mwîrîga jwa Elimeleki.

⁴Kûrakara atîrî, Boazi areeta aumîte Bethlehemu arakeethia akethi, arabeera, “MWATHANI arokara naabuî!” Nabo baracokia, “MWATHANI arokûtharima!”

⁵Rîu Boazi arooria nthûûmba yaawe îrîa yaarûngamagîîra akethi atîrî, “Mwarî ûûjû nî waaû?”

⁶Nayo nthûûmba îîu îramûcokeria, “Nî mwarî ûrîa Mûmoabu Naomi areejanîrie nawe kuuma nthî ya Moabu.

⁷Nîka aambîrîre atîrî, ‘Itû mbîtîkîîria ndinge rûûa ndî nyuma ya akethi nkîojanagia birîa bigûtigwa nthî gatîgatî ka imaanja.’ Nawe aambîrîîrie kuuma rûkîîrî kainda na atîranogoka mwanka o rîu eeta mûgunyeene.”

⁸Boazi areera Ruthu atîrî, “Rîu thikîîra, mwarî waakwa, menya uuma aja wîta kûringa rûûa muundeene jûngî. Îndî ûkarage akuî na aarî baakwa ba ngûgî.

⁹Karaga ûtegeete arîa bagûketheera naagwe ûkabathingata. Naani ndîgûkaania nthaka ciaakwa itîgakûthaange. Rîrîa wanyoonta rî, îtaga arîa mîtûngi îîki ûkanyua rûûjî rûrîa nthaka itaîte.”

¹⁰Ruthu arairinga nthî aratiirithia ûthiû bwaawe nthi aramûûria atîrî, “Nîatîa ndoona wega ûjû meethoone jaaku na wambigîîrua kîaao o rîrîa ndî mûgeni?”

¹¹Boazi aramûcokeria atîrî, “Nî mbîîri mantû jonthe jarîa ûthithîrîtie ng'ina wa nthaka waaku kuuma rîrîa mûkûrû waaku aakuîre, na ûrîa waatigîre abaagu na nyakwe na nthî îrîa waciarîrwe ûreeja gwa antû barîa ûtaaijî mbere.

¹²MWATHANI arokûrîaa kûringana na ngûgî îrîa ûritîte. Ningî ûroeewa îtuui rîrîng'anu nî MWATHANI Mûrungu wa Israeli ûrîa wîjîte gûciîka ûkarieene bwaawe.”

¹³Ruthu arauga atîrî, “Ûkûmbonia wega bûbûnene gwe mwathi waakwa, nîûntû ûûkûmboreria na biugo biaaku birîa biandingithia nkoro ni nthûûmba yaaku, kinya këethîra ntî ûmwe wa nthûûmba ciaaku.”

¹⁴Îgiita rîa kûrîa rîgûkinya, Boazi areera Ruthu atîrî, “Njû aja ûrîe mûgaate na ûtombeke kîng'enyua gîaaku ndibeiine.” Ruthu arakara nthî amwe na akethi, na Boazi aramûnenkeeria mpîndî irîa nkarange ararîa, aranyira, na aratigaria imwe.

¹⁵Rîrîa ookîrîîre eeta kûringa rûûa, Boazi areera nthaka ciaawe atîrî, “Mûrekageni aringage rûûa kinya imanjeene na bûkámûûria.

¹⁶Ningî bûmûcinûragîre mbarî kuuma imanjeene na bûkamûrekeria nthî nîkenda aringaga rûûa na bûkamûgiria.”

¹⁷Ruthu araringa rûûa muundeene mwanka ûgoro, nawe araûûra mûnyaki jûrîa aaringîte rûûa jûrauma ta ndebe îmwe.

¹⁸Arajûjûkia, areeta naju ntûûreene, na aroonia ng'ina wa nthaka kîrîa aaringîte rûûa. Ningî aracoka ararita biakûrîa birîa aatigarîîtie aramûnenkera.

¹⁹Nawe ng'ina wa nthaka aramûûria atîrî, “Nîkû ûkûringaga rûûa naarua? Nîkû waatinda kûrita ngûgî? Arotharimwa muntû ûu ûkwonîre akwigîîrua kîaao.” Ruthu aramûcokeria atîrî, “Naarua ndatinda kûrita ngûgî muundeene jwa muntû ûgwîtwa Boazi.”

²⁰ Naomi areera mûka wa mûtaana atîrî, “Muntû ûu arotharimwa nî MWATHANI, we ûrîa ûtîebagia kîaao kîaawe kîrî barîa barî mwoyo na barîa bakuîte!” Naomi aramwîra atîrî, “Muntû ûu nî wa ndûgû cieetû. Nî ûmwe wa barîa barî arîa ûkua beetû.”

²¹Ruthu, Mûmoabu, aramwîra atîrî, “Ningî nî ambîîrîre atîrî, ‘Îtanagia na ariti baakwa ba ngûgî mwanka rîrîa bakaathiria gûketha maketha jaakwa.’”

²²Naomi areera Ruthu mûka wa mûtaana atîrî, “Nî bwega mwana waakwa wîtanagie na aarî baawe ba ngûgî ûtîkeeje kûthangîrwa miuundeene îngî.”

²³Tontû bûû, Ruthu arakarania na aarî ba Boazi ba ngûgî akîringaga rûûa mwanka rîrîa maketha ja mûnyaki na nkano jaathirîre; na areeta na mbere gûkarania na ng'ina wa nthaka.