Read KIMERU BIBLE PROTESTANT EDITION Ruth 3 Bible Online

Ruth 3 - KIMERU BIBLE PROTESTANT EDITION bible

Ruth 3

¹Nyumeene Naomi areera Ruthu atîrî, “Mwarî waakwa, tî kaaba ngûcûîre mûkûrû nîkenda ûkara bwega.

²Boazi ûrîa mwene aarî barîa bûkaranagia nabo nî muntû wa ndûgû cieetû. Atîrî, naarua ûgoro akeethîrwa akîeraga mûnyaki îtîîriine.

³Tontû bûû, rî, thaamba na ûciake maguta, ûcoke wîkîre nguû inthongi wîname wîîte îtîîriine, îndî ûkáreka akûmenya mwanka rîrîa akathiria kûrîa na kûnyua.

⁴Rîrîa ageeta kûmama ûtege bwega woone arîa akamama; ûcoke wîîte o ûmûguûre magûrû, ûmame o. Nawe agakwîra ûrîa ûkaathithia.”

⁵Nawe aramûcokeria atîrî, “Nkaathithia jau jonthe wambîîra.”

⁶Ruthu areenama areeta îtîîriine arathithia o ûrîa ng'ina wa nthaka aamwîrîte.

⁷Rîrîa Boazi aathirîrie kûrîa na kûnyua na nkoro yaawe îragwîrua, areeta kûmama rûteere rwa kîthûmba kîa mûnyaki. Ruthu areeta aceemeete, aramûguûra magûrû aramama o.

⁸Ûtukû gatîgatî Boazi araindûkîra na aragarûka. Aroona mûka amami magûrûûne jaawe.

⁹Boazi arooria atîrî, “Nîgwe ûû?” Ruthu aramûcokeria, “Nî ni Ruthu nthûûmba yaaku. Nîkwîthîrwa nîgwe mûrîaûkua wa ndûgû cieetû, nîgwe ûbuîri kûmenyagîîra. Tontû bûu, itû ngûra mpee mwekûrû waaku.”

¹⁰Nawe aramwîra atîrî, “MWATHANI arokûtharima mwarî waakwa. Weega bûrîa wathithia rîu nî bûkûrûkîte bûrîa ûthithîrîtie ng'ina wa nthaka, nîûntû ûkûrega gwîta gûcwa nthaka, irî nkîa kana itonga, ikûgûra.

¹¹Nandî rî, mwana waakwa, ûkámaka. Bûrîa bunthe ûkwenda ngaakûthithîria, nîûntû antû bonthe ba ntûûra yeetû nî baijî atî ûrî mûka ûmwega.

¹² Nî mma atî ûûni ndî muntû wa ndûgû cieenu na ndî mûrîaûkua wa nja yeenu, îndî kûrî na mûrîaûkua ûngî wa ndûgû cieenu ûrî mbere yaakwa.

¹³Raara naarua, na gwakea rûkîîrî rî, këethîra akeenda gûkûgûra, akûgûre; îndî akëeja kwîthîrwa atîkwenda rî, ndîgûciîtia na riîtwa rîa MWATHANI ûrîa ûtûûraga mwoyo atî ngakûgûra. Rîu mama mwanka gûkîe.”

¹⁴Nawe aramama au magûrûûne jaawe mwanka rûkîîrî, îndî arookîîra kûrî na kaundu, rîrîa muntû atîûmba kûmenya ûngî. Boazi aramwîra atîrî, “Ûkáreka kûmenyekana atî kûrî mûka ûreere îtîîriine.”

¹⁵Ningî aramwîra atîrî, “Tambûrûkia nguû îîu ya îgûrû na wambîîrie nayo.” Ruthu araambîrîria, nawe Boazi aramûtaîra kilo mîrongo îîri (20) cia mûnyaki, aramwaîkia, nawe araana ntûûreene.

¹⁶Rîrîa aakinyîre nja, ng'ina wa nthaka aramûûria “Kûrakarîre atîa mwana waakwa?” Nawe aramwîra mantû jonthe jarîa Boazi aamûthithîrîtie.

¹⁷Ningî aramwîra atîrî, “Nî ambîîrîre atî ntîcoka njara intheri kîrî ng'ina wa nthaka waakwa, na ambîkîîra kilo mîrongo îîrî cia mûnyaki.”

¹⁸Naomi aramwîra atîrî, “Rîu eteera mwana waakwa woone ûrîa gûgûkara. Boazi atînogoka naarua atîthirîtie ûntû bûbû.”