Read KIMERU BIBLE PROTESTANT EDITION Ruth 4 Bible Online

Ruth 4 - KIMERU BIBLE PROTESTANT EDITION bible

Ruth 4

¹Boazi areeta mpingîroone ya ntûûra arakara nthî o. Rîu muntû ûrîa mûrîaûkua, ûrîa Boazi aarîîtie mantû jaawe, arakûrûkîîra o. Boazi aramwîra atîrî, “Îjîîra aja, ûkarakare nthî.” Nawe areeta o na arakara nthî.

²Rîu Boazi areeta akûrû îkûmi ba ntûûra îîu arabeera bakare nthî, nabo barakara nthî o.

³Nawe areera muntû ûu mûrîaûkua atîrî, “Naomi ûrîa ûracokîre kuuma nthî ya Moabu nî akwendia rûthanju rwa kîthaka rûrîa rwaarî rwa Elimeleki, muntû wa ndûgû cieetû.

⁴Nîka ndîroonîre nî mbwîrîte gûkûmenyithia, na gûkûûrîria mbere ya antû baba bakari aja, na mbere ya akûrû, ûgûre rûthanju rûu. Këethîra ûkoomba kûrwonokia rî, ûrwonokie; na ningî wëethîrwa ûtîûmba, ûmbîîre. Gûtî muntû ûngî ûûmba kûrwonokia tiga ûgwe, kana ûûni.” Nawe arauga atîrî, “Nkaarwonokia.”

⁵Boazi nawe arauga ûjû, “Ntukû îrîa ûkagûra muunda jûu kuuma kîrî Naomi rî, ûmenye ûkeethîrwa ûkîgûraga kinya Ruthu, mûka ûrîa ntigwa Mûmoabu, nîkenda ûgatûûria riîtwa rîa ûrîa wakuîre rûgaiine rwaawe.”

⁶Nîrîo muntû ûu wa ndûgû ciaao augîre atîrî, “Ntîûmba kûrwonokia ni, ntîkeeje kûthûûkia rûgai rwaakwa. Rwonokie gwe antû aakwa, nîûntû ni ntîûmba kûrwonokia.”

⁷ Nî bwaarî wîîthîre ndeene ya Israeli magiita ja karaaja atî rîrîa antû bagûkûûra na gûcokanîria into, ûmwe nî aaritaga kîraatû kîaawe akanenkera ûngî, nîkenda kûgîa na ûkûûjî. Îîu nîyo yaarî njîra ya kûrikithia kîrîkanîro ndeene ya Israeli.

⁸Tontû bûû, rîrîa muntû ûu wa ndûgû cia Boazi aamwîrîre, arûgûre, nî aritîre kîraatû kîaawe aramûnenkera.

⁹Boazi areera akûrû na antû barîa baarî o atîrî, “Naarua bûrî akûûjî atî ndîkûgûra kuuma kîrî Naomi birîa bionthe biraarî bia Elimeleki na bia ataana baawe, Kilioni na Mahaloni.

¹⁰ Kinya Ruthu Mûmoabu, ûrîa ntigwa ya Mahaloni, ndîkûmûgûra, aa mwekûrû waakwa, nîkenda tûgatûûria riîtwa rîa ûrîa waakuîre rûgaiine rwaawe, na nîkenda riîtwa rîaawe rîtîkoorîrie gatîgatîîne ga ataana ba îthe na ntûûreene yaao. Naabuî bûkwaa akûûjî ba ûntû bûbû naarua.”

¹¹ Nabo antû bonthe barîa baarî au mpingîroone na kinya akûrû barauga, “Tûrî akûûjî! MWATHANI arootûma mûka ûu wîjîte nja yaaku akara ta Raeli na Lea, barîa baakîre nja ya Israeli bobaîrî. Ûrogîa na ûtonga gûkû Efiratha, na riîtwa rîaaku rîkamenyekana Bethlehemu.

¹² Nayo nja yaaku îrokara ta nja ya Perezi, ûrîa Tamari aaciarîre Juda, nîûntû bwa nchiarwa irîa MWATHANI agaakwa kuumania na mûka ûûjû.”

¹³Tontû bûu, Boazi aragûra Ruthu, araa mwekûrû waawe. Aramûthengeera, nawe MWATHANI aratûma agîa îu, araciara kaîjî.

¹⁴Nabo eekûrû bangî bareera Naomi atîrî, “MWATHANI arokaathwa, we watûma ûciarîrwa mwana wa mûtaana, mûrîaûkua, naarua, nawe arogîa na îgweta ndeene ya Israeli!

¹⁵Ningî arokwerûîria ûtûûro bwaaku, na agakûmenyeera ûkûrûûne bwaaku; nîûntû mûka wa mûtaanagu ûrîa ûkwendeete nîwe wagûciarîra kaîjî gaka. Nawe mûka ûûjû wa mûtaana waaku nî akûrûkîte ataana mûgwanja.”

¹⁶Naomi arajûkia kaana kau arageekîra kîbara kîaawe araa mûgwati waako.

¹⁷Nabo eekûrû ba ntûûra yaao baraa kaana kau riîtwa barageeta Obedi, bakiugaga atîrî, “Naomi aagûciarîrwa mûtaana.” Nawe nîwe waeere îthe wa Jesii ûrîa îthe wa Daudi.

¹⁸Iji nacio nîcio nchiarwa cia Perezi:

¹⁹Perezi nîwe waarî îthe wa Hezironi, Hezironi nawe aarî îthe wa Ramu, na Ramu aarî îthe wa Aminadabu.

²⁰Aminadabu aarî îthe wa Nahashoni, Nahashoni nawe aarî îthe wa Salomoni.

²¹Salomoni aarî îthe wa Boazi. Boazi nîwe waarî îthe wa Obedi,

²²Obedi nawe araa îthe wa Jesii, na Jesii araa îthe wa Daudi.