Read KIMERU BIBLE PROTESTANT EDITION 1Sam 1 Bible Online

1Sam 1 - KIMERU BIBLE PROTESTANT EDITION bible

1Sam 1

¹Nî kwaarî na muntû ûmwe weetagwa Elikana wa mwîrîga jwa Efuraimu wa ntûûra ya Rama nthîgûrûûne ya irîma ya Efuraimu. Elikana aarî mûtaana wa Jerohamu na Jerohamu aarî mûtaana wa Elihu na Elihu aarî mûtaana wa Tohu nawe Tohu aarî mûtaana wa Zufu.

²Elikana agûrîte eekûrû baîrî. Ûmwe eetagwa Hana na ûngî eetagwa Penina. Penina nî aarî na twaana, îndî Hana gûtî twaana aarî natu.

³O mwaka o mwaka Elikana nî aaumaga Rama ageeta kûthaathayia na kûritîra MWATHANI Mweneinya kîgongwana Shilo. Kûu Shilo nîku Hofini na Fineasi, ataana ba Eli baarî athînjîri-Mûrungu.

⁴Îgiita rîonthe rîrîa Elikana aaritaga kîgongwana nî aanenkagîra mwekûrû waawe Penina na ataana na aarî baawe o muntû gîchunchî kîaawe kîa nyama.

⁵Îndî aneekagîra Hana gîchunchî mwanya nîûntû nî amwendeete kinya këethîra MWATHANI atamûtharimîte na aana.

⁶Mwîru waawe nî aakaraga akîmûkurungaga na kûmûcikûûra nîkenda athûûra nîûntû bwa ûrîa MWATHANI atamûtharimîte na aana.

⁷Mwîru waawe aathithagia ûu o mwaka o mwaka îgiita rîonthe rîrîa Hana eetaga nyomba ya MWATHANI. Nî amûcikûûraga mwanka akarîra na akarega kûrîa.

⁸Elikana mûkûrû waawe nî aamûûragia, “Hana, nîmbi îgûtûma ûrîra na nîmbi îgûtûma ûrega kûrîa? Nîmbi îgûtûma nkoro yaaku îthangîka ûjû? Ka ûûni ntîkûrûkîte ataana îkûmi kîrî gwe?”

⁹Bakûthiria kûrîa na kûnyua au Shilo, Hana nî ookîrîîre areeta nyomba ya MWATHANI. Rîu mûthînjîri-Mûrungu Eli nî akari nthî gîtîîne rûteere rwa mwari jwa kîûrû kîa MWATHANI.

¹⁰Hana arî na kwithikîîra gûkûnene araromba MWATHANI akîrîraga mono,

¹¹ na araciîtia arauga atîrî, “Î gwe MWATHANI Mweneinya, ûkëeja kûraithîîria mîthangîko ya nthûûmba yaaku, ûkandirikana na ûkárega kûûrîrua nî ni ûgampa kaîjî, rîu naani ngakaeejana kîrî gwe ntukû cia ûtûûro bwaako bunthe na gatîkoroenjwa kîongo gîaako.”

¹²O ûrîa eetîte na mbere kûromba MWATHANI, Eli nî aaraithîîrîtie mîromo yaawe.

¹³Hana nî arombaga na nkoro na mîromo yaawe îkîebaebaga îndî kajû kaawe gataigîgîkanaga. Tontû bûû, Eli arathûgaania nîka oogiti.

¹⁴Eli aramûûria, “Nî mwanka rî ûgakara woogiti? Ndibei yaaku nî îgwe.”

¹⁵Îndî Hana aracokia, “Ntîogiti itû mwathi waakwa. Ni ndî mwekûrû ûkûthangîka mono nkoroone. Ntînyuîte ndibei kana gîntû kîngî kîrîa kîogîtanagia îndî nîka nkwîraga MWATHANI mathîîna jaakwa.

¹⁶Ûkáthûgaania ni nthûûmba yaaku ka ndî mûka mûmaramari. Îgiita rîrî rîonthe ndîaragia ndî na kwithikîîra nîûntû bwa gûcikûûrwa kûrîa ncikûûri.”

¹⁷Rîu Eli aramûcokeria, “Îta na thîîrî, na Mûrungu wa Israeli arokwaa kîrîa wamûromba.”

¹⁸Nawe aracokia, “Kûrokara ja ûu wauga!” Rîu araciîtîra na ararîa biakûrîa, nawe atacoka kwithikîîra kaîrî.

¹⁹Rûûnene rûkîîrî kainda, Elikana na antû ba mûciî jwaawe nî bookîrîre na bareeta kûthaathayia MWATHANI. Rîu baraana kwaao Rama. Elikana arathengeera mwekûrû waawe Hana, na MWATHANI aracokia îromba rîa Hana.

²⁰Rîu Hana aragîa îu na araciara kaîjî arageeta Samueli, akiugaga, “Nîka ndaarombere ko kuuma kîrî MWATHANI.”

²¹Rîrîa Elikana na antû ba mûciî jwaawe junthe beetîre kûritîra MWATHANI kîgongwana kîrîa kîaritagwa o mwaka o mwaka amwe na kûûjûria mûciîtio jwaawe,

²²Hana ateetanîrie nabo. Eerîre mûkûrû waawe atîrî, “Rîrîa mwana agatiga gwonka nîrîo nkamûjûkia mwikie nyomba ya MWATHANI, nîkenda akaraga ku îgiita rîonthe.”

²³Elikana aramûcokeria, “Nîu, thithia ûrîa ûkwona kwagîrîte. Eteera mwanka mwana atige gwonka, na MWATHANI arorikia mûciîtio jwaaku.” Hana arakara, aroonkia mwana waawe mwanka aratiga gwonka.

²⁴Nyuma ya mwana agûkûra atiga gwonka, Hana nî aamûjûkîrie na arajûkia ndeegwa ya mîaka îthatû na kîtheti kîa mûtu na gîkiri kîa ndibei bareeta nyomba ya MWATHANI kûu Shilo. Samueli arî mwana ûmûnini.

²⁵Baathiria kûûraga ndeegwa, baraikia mwana kîrî Eli.

²⁶Hana aramwîra, “Îgwe, mwathi waakwa nî ûkûndirikana? Mwathi waakwa, nî ni mûka ûrîa warûngi mbere yaaku akîrombaga MWATHANI.

²⁷Ndarombere MWATHANI ampe mwana ûûjû, nawe nî ampeere we kûringana na ûrîa ndamûrombere.

²⁸Tontû bûû naani ndîkûmweejana kîrî MWATHANI. Îgiita rîonthe rîrîa agatûûra mwoyo nî aeejani kîrî MWATHANI.” Rîu barathaathayîria MWATHANI au.