Read KIMERU BIBLE PROTESTANT EDITION 1Sam 10 Bible Online

1Sam 10 - KIMERU BIBLE PROTESTANT EDITION bible

1Sam 10

¹Rîu Samueli arajûkia gacuuba kanini ka maguta aretûûrîria Saûlû mûtwe, na aramûcûnca na aramwîra, “MWATHANI agûgwîtûûrîria maguta wee mûnene wa antû baawe ba Israeli. Ûkaatha antû ba MWATHANI na ûkaboonokia kuuma kîrî anthû baao barîa babathiûrûkîte. Gîkî nîkîo gîgakûmenyithia atî MWATHANI nî agwîtûûrîrîtie maguta waathage antû baawe.

²Rîrîa ûkauma kîrî ni naarua, ûgatirimana na arûme baîrî akuî na mbîrîra ya Raeli kûu Zeliza ndeene ya nthîgûrû ya Benjamini, na bagakwîîra, Ntigiri irîa weetîre gûcwaa nî iroonorere, na nandî abaagu nî atigîte kûthûgaania mantû jaacio na ambîrîria kûbûmakîra, akîûragia, ‘Nkathithia atîa nîûntû bwa mûtaana waakwa?’

³Bûgeeta na mbere kuuma au mwanka bûkinye muuruune jwa Tabori arîa bûgatirimana na arûme bathatû baitîtie Betheli kûritîra Mûrungu kîgongwana. Ûmwe waao akeethîrwa akamatîte tûbûûri tûthatû na ûngî akamatîte mîgaate îthatû na ûngî akamatîte kîgîîna kîa ndibei.

⁴Nabo bagagûkeethia na bakûnenkere mîgaate îîrî, îrîa gwe ûkajûkia kuuma kîrî bo.

⁵Rîu ûgeeta karîmeene ka Mûrungu Gibea, arîa kûrî na kambî ya Afilisti. Ûgîkûrûka ntûûreene ûgatirimana na gîkundi kîa iroria kiumîte antû arîa kûritagîrwa igongwana. Iroria biu bikeethîrwa bikîringaga inanda na tamburini na mîtûrirû na wandîîndî bakîroragia.

⁶Rîu Roho wa MWATHANI agakwîjîîra na inya, naagwe ûkagwatana nabo wambîîrie kûroria na ûgarûke wee muntû ûngî.

⁷Rîrîa mantû jaja jagakarîka, thithia o jarîa ûkoomba nîkwîthîrwa MWATHANI arî amwe nagwe.

⁸Rîu wîîname Giligali ûrî mbere yaakwa, naani nkeeja nkwîthîre, ndite kîgongwana gîa gwakîîria na kîgongwana kîa thîîrî. Weteere ntukû mûgwanja mwanka rîrîa nkeeja nkwîîre ûrîa ûkathithia.”

⁹Rîrîa Saûlû aatigaga Samueli, Mûrungu nî aagarûrîre nkoro ya Saûlû. Mantû jonthe jarîa Samueli aamwîrîte jarakarîka ntukû îîu.

¹⁰Saûlû na nthûûmba yaawe bagûkinya Gibea nî baatirimanîre na gîkundi kîa iroria na Roho wa Mûrungu aramwîjîîra na inya na Saûlû arambîria kûroria amwe nabo.

¹¹Rîrîa antû bonthe barîa baamwijî mbere boonere ûrîa akûroria amwe na iroria bingî, antû barambîrîria kûûrania, “Nîatîa mûtaana wa Kishi atua gûkara, ga kinya Saûlû arî ûmwe wa iroria?”

¹² Muntû wa gûntû kûu arooria, “Nûû îthe waao?” Tontû bûû îraa njuno, “Ga kinya Saûlû arî ûmwe wa iroria?”

¹³Rîrîa aathirîrie kûroria araitia karîmeene antû arîa kwaritagîrwa igongwana.

¹⁴Nawe îthe-mwanake wa Saûlû arooria Saûlû na nthûûmba yaawe, “Nîkû bwetîre?” Aramûcokeria, “Nî gûcwaa ntigiri, na rîrîa twaciagîre tûreeta kwona Samueli.”

¹⁵Îthe-mwanake wa Saûlû aramwîra, “Itû mbîîra ûrîa Samueli arakwîrîre.”

¹⁶Saûlû areera îthe-mwanake, “Aratwîrîre ntigiri nî iroonorere.” Îndî Saûlû ateerîre îthe-mwanake no atîa mantû jegiî kwaa mûnene jarîa Samueli arîrie.

¹⁷Samueli nî eetîre antû barothûûrana amwe kûu Mizipa mbere ya MWATHANI.

¹⁸Samueli arabeera atîrî, “MWATHANI Mûrungu wa Israeli ariuga ûjû, ‘Ndaaritîre Aisraeli Misri, na ndîrabatunyûkia kuuma kîrî Amisri na moonene jonthe jarîa jaabwinyîrîtie.’

¹⁹Naabuî naarua bûkûrega Mûrungu weenu ûrîa ûbwonokagia kuuma mîthangîkoone na mathîînene na bwauga, ‘Tûthuurîre mûnene wa gûtwaathaga.’ Nîu nandî rûngameni mbere ya MWATHANI kûringana na mîîrîga yeenu na nja cieenu.”

²⁰Rîu Samueli nî aaumîrîîrie o mwîrîga jûmwe jûmwe jwa Israeli, na mwîrîga jwa Benjamini jûragwîîrwa nî kuura.

²¹Rîu Samueli araumîria o mûciî o mûciî jwa mwîrîga jwa Benjamini na mûciî jwa Matri jûragwîîrwa nî kuura. Mûthieene araumîria o ntomûrûme wa mûciî jwa Matri, na Saûlû mûtaana wa Kishi aragwîîrwa nî kuura. Îndî bamûcwaa baramwaga.

²²Rîu barooria MWATHANI kaîrî atîrî, “Muntû ûu aakwîja aja?” MWATHANI arabacokeria, “Tîwe ûrîa wiciithîte gatîgatî ka mîrigo.”

²³Nabo baroogîa na baramûgîîra kuuma o. Rîrîa aarûngamîre gatîgatî ga antû, areethîrwa arî ûmûraaja nkûrûki ya antû bonthe, kuuma ituro biaawe gwitia.

²⁴Samueli areera antû bonthe atîrî, “Nî bûkwona muntû ûrîa MWATHANI athuurîte? Gûtî ûngî ûkari tawe gatîgatî ga antû bonthe.” Rîu antû bonthe barauga na kajû gakanene atîrî, “Mûnene arotûûra matukû jamaingî!”

²⁵Samueli areera antû mantû jarîa jakeejania na ûnene na arajaandîka jonthe yukuune ararîîka mbere ya MWATHANI. Rîu areera antû baane o muntû kwaawe.

²⁶Saûlû kinya we nî aanîre kwaao Gibea, na nchamba imwe irîa Mûrungu aaringithîrîe nkoro ireetania nawe.

²⁷Îndî antû bamwe bacebûku barooria, “Nîatîa muntû ûûjû oomba gûtwonokia?” Tontû bûu baramûmena na bararega kûmwikîria kîewa noo kîrîkû. Îndî Saûlû araikirîra.