Read KIMERU BIBLE PROTESTANT EDITION 1Sam 11 Bible Online

1Sam 11 - KIMERU BIBLE PROTESTANT EDITION bible

1Sam 11

¹Nyuma ya ta ûû mweri jûmwe, Nahashi ûrîa Mûamoni nî eetîre na aracîgîîria ntûûra ya Jabeshi-gileadi. Antû ba Jabeshi baramwîra atîrî, “Îka kîrîkanîro natuî, natuî tûgakwathîkagîra.”

²Nahashi ûjû Mûamoni arabeera atîrî, “Ngeeka kîrîkanîro naabuî, këethîra nkabûkûûra bwinthe riitho rîa ûrîo nîkenda Israeli yonthe îcokerwa nî nthao.”

³Akûrû ba Jabeshi baramwîra atîrî, “Twee ntukû mûgwanja tûtûmane nthî yonthe ya Israeli. Rîu, twaaga wa gûtûteethia tûkainenkanîra kîrî gwe.”

⁴Rîrîa barîa baatûmi baakinyîre Gibea arîa Saûlû atûûraga baramenyithania nteto iu, na antû bonthe barambîrîria kûrîra.

⁵Rîu Saûlû aaumîîte muundeene na ndeegwa ciaawe cia mûraû, arooria atîrî, “Nîatîa gûkarîkîte tontû antû bonthe bakûrîra?” Baramwîra ûrîa antû ba kuuma Jabeshi baugîte.

⁶Rîrîa Saûlû aaigîrue mantû jau, Roho wa Mûrungu aramwîjîîra na inya, arathûûra mono.

⁷Arajûkia ndeegwa ijîîrî araigitanga manuku na aratûma antû bajaikia nthîgûrûûne yonthe ya Israeli bakîugaga: “Ûrîa ûtiumagara athingata Saûlû na Samueli, ûjû nîu ndeegwa ciaawe ikathithua!” MWATHANI aratûma antû ba Israeli bagwatwa nî ûguaa na tontû bûû baraumagara bonthe barî gîntû kîmwe.

⁸Rîrîa Saûlû aboothûranîrie amwe kûu Bezeki, arûme ba Israeli baarî ngiri magana jathatû (300,000) na ba Juda baarî ngiri mîrongo îthatû (30,000).

⁹Bareera antû barîa baatûmi kuuma Jabeshi-gileadi, “Ûjû nîu bûkeera arûme ba Jabeshi, ‘Rûûjû, riûa rîrûngi, bûkoonokua.’” Rîrîa antû ba Jabeshi baakinyîrwe nî ntûmwa îîu, baragwîrua mono.

¹⁰Rîu bareera Nahashi atîrî, “Rûûjû tûkainenkanîra kîrî gwe, naagwe ûtûthiithîrie ûrîa ûkoona kwagîrîte.”

¹¹Rûûnene Saûlû aragaania antû ikundi bithatû. Gûgûkîa, baraithûkîra kambî ya Aamoni na barabooraga mwanka mûthenya gatîgatî. Aamoni barîa batîgarîre baraaragana bamatûkîte o muntû rûteere rwaawe.

¹²Rîu antû bareera Samueli, “Barîkû bo barîa baugîre Saûlû atîbuîri kwîthîrwa arî mûnene weetû? Bareete nîkenda tûbooraga!”

¹³Îndî Saûlû arauga, “Gûtî muntû ûkooragwa naarua, tontû îîjî nîyo ntukû îrîa MWATHANI oonokia Israeli.”

¹⁴Rîu Samueli areera antû, “Twîteni Giligali tûkarikithie ûnene bwa Saûlû.”

¹⁵Rîu antû bonthe bareeta Giligali na baraethia Saûlû mûnene barî au mbere ya MWATHANI. Bararita igongwana bia thîîrî au mbere ya MWATHANI, na Saûlû na antû bonthe ba Israeli baragwîrua mono.