Read KIMERU BIBLE PROTESTANT EDITION 1Sam 13 Bible Online

1Sam 13 - KIMERU BIBLE PROTESTANT EDITION bible

1Sam 13

¹Saûlû aarî muntû ûrî na mîaka ...[4]

²Saûlû aathuurîre antû ngiri ithatû (3,000) ba Israeli; ngiri ijîîrî (2,000) irakara nawe Mikimashi na nthî ya irîma ya Betheli na ngiri îmwe (1,000) îreeta na Jonathani mûtaana wa Saûlû kûu Gibea nthî ya Benjamini. Rîu Saûlû areera antû barîa bangî baane.

³Jonathani nî aarûîre na Afilisti barîa baarî kambîîne ya Geba na araboomba. Afilisti bonthe nî baigîrue mantû jau. Saûlû nî aaringîre tarumbeta nthîgûrûûne ya Israeli akiugaga, “Ahibirania bonthe nî baigue.”

⁴Aisraeli bonthe rîrîa baigîrue atî Saûlû akûûraga mbûûtû ya Afilisti na atî nî bamenereetue nî Afilisti, Aisraeli nî beetîrwe nîkenda bathingata Saûlû kûu Giligali.

⁵Nabo Afilisti baroothûrana barwaa na Aisraeli. Baarî na ngaarî cia ndwaa ngiri mîrongo îthatû (30,000) na eetithia ba mbarathi ngiri îthanthatû (6,000) na asikarî babaingî ta mûthanga jûrîa jûrî nteere cia îria. Nabo bareeta baraamba kambî Mikimashi rûteere rwa gaiti rwa Bethiaveni.

⁶Rîrîa arûme ba Israeli boonere atî nî baarî antû athûûku na nî baatîki ûrîa batîngîûmba kûrwaa, baraiciitha ikurunguune na marinyeene na mbatûkeene na rungu rwa maiga na mbîrîreene na ithimeene bia rûûjî.

⁷Ningî bangî barauna mûuro jwa Jorodani bareeta nthîgûrû ya Gadi na ya Gileadi. Saûlû no aarî Giligali na antû barîa baarî amwe nawe baamûthingatîte bakinainaga nî ûguaa.

⁸ Nawe areteera Samueli ntukû mûgwanja o ta ûrîa Samueli aamwîrîte, îndî Samueli ateetîre Giligali. Antû barambîrîria kwîrûkîra Saûlû.

⁹Tontû bûû Saûlû arauga, “Ndetereeni kîgongwana gîa gwakîîria na gîa gûcwaa thîîrî.” Rîu ararita kîgongwana kîu kîtheru gîa gwakîîria.

¹⁰Kûrakara atîrî, o kagiita karîa Saûlû athiragia kûrita kîgongwana kîu gîa gwakîîria, Samueli arakinya. Saûlû araumagara kûmûthagaana na kûmûkeethia.

¹¹Samueli aramûûria, “Nîatîa wathithia?” Saûlû aramûcokeria, “Ndîîrîa mbonere antû bambîrîria kûmbîrûkîra, naagwe ûtîgûkarî ûgûkinya ta ûrîa ûrambîrîte, na tontû Afilisti batirimene Mikimashi,

¹²nîrîo mbugîre Afilisti bakëeja kwîja kîrî ni aja Giligali, naani mbîthîrwa ntîraromba MWATHANI. Tontû bûû, ndaikinyîîria ndarita kîgongwana gîa gwakîîria.”

¹³Samueli areera Saûlû atîrî, “Ûkûthithia waa; ûtîramenyeera rîathana rîrîa MWATHANI Mûrungu waaku aakwathîre, tontû arîngî gûtûûria waathani bwaaku ndeene ya Israeli mwanka kenya.

¹⁴ Îndî nandî ûnene bwaaku bûtîrûngama, MWATHANI nî aicwîrîte muntû ûrîa ûkamwathîkîra na nî amûthuurîte ae mûnene wa antû baawe tontû ûtîathîkîrîte mantû jarîa MWATHANI aakwathîre.”

¹⁵Samueli arauma Giligali araciîtîra. Nabo antû bangî barathingata Saûlû eetîte narîa asikarî baawe baarî. Barauma Giligali bareeta Gibea ya Benjamini, na Saûlû agûtara antû barîa aarî nabo aroona baarî arûme magana jatantatû (600).

¹⁶Saûlû na Jonathani mûtaana waawe na antû barîa baarî amwe nabo barakara Geba ndeene ya nthîgûrû ya Benjamini, îndî Afilisti baraamba kambî Mikimashi.

¹⁷Asikarî ba Afilisti baithûkîre barî ikundi bithatû kuuma kambîîne yaao. Gîkundi kîmwe kîragarûka kîreeta bwa Ofura nthî ya Shuali.

¹⁸Kîngî kîreeta bwa Bethihoroni na kîngî kîragarûka kîreeta bwa mûgwanthî jwa Zeboimu kwerekera bûûrîîne.

¹⁹Gûtaarî na mûturi wa chuuma Israeli kunthe nîûntû Afilisti nî baugaga, “Ahibirania bakéeja gwiturîra nchiû na matumo.”

²⁰Îndî o muntû wonthe Israeli eetaga kîrî Afilisti kûnoora mûraû jwaawe kana nthitangi kana ntûûru kana gachiû ka gûketha.

²¹Marîi ja kûnoora mûraû kana nthitangi jaarî shekeli 0.6 kana pimu îmwe. Ningî kûnoora tûûru na tûchiû twa gûketha biarîagua shekeli 0.3 kana nusu pimu.

²²Tontû bûû, ntukû ya ndwaa gûtî we kîrî antû barîa baarî amwe na Saûlû na Jonathani waarî na rûchiû kana îtumo. Îndî Saûlû na Jonathani mûtaana waawe nî baarî nabio.

²³Asikarî bamwe ba Afilisti bareeta gûkaria njîra îrîa yaakûrûkagîîra mûcîcîbîroone jwa Mikimashi.