Read KIMERU BIBLE PROTESTANT EDITION 1Sam 14 Bible Online

1Sam 14 - KIMERU BIBLE PROTESTANT EDITION bible

1Sam 14

¹Ntukû îmwe Jonathani mûtaana wa Saûlû nî eerîre mûthaka ûrîa wamûkamatagîra mathaga ja ndwaa atîrî, “Njû tûgiitanie twîte kambîîne ya Afilisti rwongo rûrîa rûngî.” Îndî ateerîre îthe.

²Saûlû aakari mwambîrioone jwa karîma rungu rwa mûkukumanga jûrîa jwaarî Migironi. Nabo antû barîa baarî amwe nawe baarî ta magana jatantatû (600).

³Ahija mûtaana wa Ahitubu nîwe wakamatîte efodi. Ahija aarî mûtaana wa Ahitubu ûrîa waarî mûtaana wa ng'ina wa Ikabodi. Ahitubu aarî mûtaana wa Fineasi. Fineasi aarî mûtaana wa Eli ûrîa waarî mûthînjîri-Mûrungu wa MWATHANI kûu Shilo. Antû nabo bataamenyete këethîra Jonathani nî aarî agwîîta.

⁴Mûcîcîbîroone[5] jwa Mikimashi arîa Jonathani endaga gûkûrûkîîra eetîte kambîîne ya Afilisti, nî kwaarî na ngejû cia maiga nteere cio-ijîîrî. Rûgejû rûmwe rwetagwa Bozezi na rûngî Sene.

⁵Rûmwe rwokîrîte rûteere rwa ûrîo rwa gîkûrûkîîro kîu rwerekerete Mikimashi na rûngî rûteere rwa ûmotho rwerekerete Geba.

⁶Jonathani areera mûthaka ûrîa wamûkamatagîra mathaga ja ndwaa atîrî, “Njû tûgiitanie twîte kambîîne ya antû ba batîtaani. Kwombîka MWATHANI agatûteethia nîkwîthîrwa gûtîkîo kîgirîkia MWATHANI oonokania kûrî na antû babaingî kana babakai.”

⁷Mûkamati wa mathaga jaawe aramûcokeria, “Thithia o jarîa ûkwenda, ni ndî amwe naagwe kûringana na ûrîa ûkwona.”

⁸Rîu Jonathani aramwîra atîrî, “Njû nandî tûgiitanie na tûcionithanie kîrî bo.

⁹Bakëeja gûtwîra, ‘Eteereni mwanka twîîje kîrî buî,’ tûkaarûngama antû arîa tûrî, tûtîîta kîrî bo.

¹⁰Îndî bakëeja kuuga, ‘Njûûni kîrî tuî,’ rîu tûgeeta tontû kîu nî kîonereeria gîa gûtwonia atî MWATHANI aakûbanenkanîra kîrî tuî.”

¹¹Nabo bobaîrî nî baacionithanîrie kîrî Afilisti na Afilisti barauga, “Tegeeni, Ahibirania nî bakuumîra marinyeene kûrîa baiciithîte!”

¹²Nabo akaria bau barabeera, “Itieni naaja, tûbwonie ûntû.” Jonathani areera mûkamati wa mathaga jaawe ja ndwaa atîrî, “Nthingata tontû MWATHANI akûbanenkanîra kîrî Aisraeli.”

¹³Rîu Jonathani araitia akuîîte nawe mûkamati wa mathaga jaawe ja ndwaa amûthingatîte. Jonathani areeta akîbaringaga nthî nawe mûkamati wa mathaga jaawe ja ndwaa aramûthingata akîbatûmbûraga.

¹⁴Ithûka rîu rîa mbere Jonathani na mûkamati wa mathaga jaawe ja ndwaaa booragîre antû ta ûû mîrongo îîrî antû ang'ana ta nusu îka.

¹⁵Afilisti bonthe nthî îu nî bagwatîrwe nî ûguaa mono. Asikarî barîa beetîte kwithûka na barîa barî kambîîne nî baaînainîre mono nî ûguaa. Nthî îrainaina na kûrethîrwa kûrî na kîmako gîkînene mono.

¹⁶Achûnkûûni ba Saûlû barîa beeki Gibea nthîgûrûûne ya Benjamini, bararaithîîria baroona Afilisti bakîangaanga kunthe, bangaratanîtue.

¹⁷Rîu Saûlû areera antû barîa baarî amwe nawe atîrî, “Tareeni antû bwoone nûû ûtî amwe naatuî.” Bagûtara baroona nî Jonathani na mûkamati wa mathaga jaawe ja ndwaa bataarî o.

¹⁸Saûlû nîrîo eerîre Ahija, “Reete Îthandûkû rîa kîrîkanîro kîa MWATHANI aja.”[6] Nîkwîthîrwa îgiita rîu Îthandûkû rîa kîrîkanîro kîa MWATHANI gîetanagia na Aisraeli.

¹⁹Rîrîa Saûlû aaragia na mûthînjîri-Mûrungu, gîtuma kîraingîa kambîîne ya Afilisti mono, rîu Saûlû aramwîra, “Tigana narîo, tûtî na kagiita ga kwaranîria na Mûrungu.”

²⁰Rîu Saûlû na antû barîa baarî amwe nawe baroothûrana bareeta kûrwaa na Afilisti. Afilisti nabo barangaratana na baraambîrîria gûtemangana bongwa.

²¹Rîu Ahibirania barîa baagwatanîrîte na Afilisti na bareeta kambîîne yaao, nî baagarûkîre bareeta rûtere rwa Saûlû na Jonathani.

²²Rîrîa antû ba Israeli barîa baiciithîte nthîgûrû ya irîma ya Efuraimu baigîrue Afilisti bakûmatûka, kinya bo bareengana nabo bakîbooragaga.

²³MWATHANI araa Aisraeli ûûmbani ntukû îîu. Ndwaa îreeta na mbere mwanka ntûûra ya Bethaveni. Asikarî bonthe ba Saûlû baarî ûû ta ngiri îkûmi (10,000). Ndwaa îrataamba nthîgûrû yonthe ya irîma bia Efuraimu.

²⁴Antû bau ba Israeli bataarî na inya nîûntû bwa mpara ntukû îîu tontû Saûlû nî aanyuithîtie antû muuma akiugaga atîrî, “Nî arumi muntû ûrîa ûkarîa irio gûtîratuka naani mbîthîrwa ndîkûûmba anthû baakwa.” Tontû bûû, gûtî we warûmîre gantû.

²⁵Antû bonthe bagûkinya mwitûûne, bareethîra nainchû îîtîkîte nthî.

²⁶Rîrîa baatonyere mwitûûne nkûrûki, baroona igwaa bia nainchû bicuracuurîte na nainchû îgîîtîkaga nthî. Îndî gûtî muntû waamîcema tontû nî baakîraga muuma.

²⁷Îndî Jonathani ataarî akwigua mantû jegiî muuma jûrîa îthe aarî akûnyuithia antû. Tontû bûû, aramunta kîgwaa kîa nainchû na kamûthia ka rûturo rûrîa aagwete na ararîa ûûkî bûu na aragea inya.

²⁸Ûmwe wa antû bau aramwîra. “Abaagu nî anyuithîtie antû muuma auga atîrî, ‘Nî arumi muntû ûrîa ûkarîa irio naarua,’ na nîkîo gîtûmi antû batî na inya.”

²⁹Jonathani arabeera, “Baaba nî athangîkîtie antû mono. Tegeeni bwoone nkûgea inya ndîkûrûma nainchû.

³⁰Këethîra naarua antû nî barîîre into birîa bataîte kuuma kîrî anthû baao, batîngîûraga Afilisti babaingî mono?”

³¹Ntukû îîu Aisraeli nî booragîre Afilisti kuuma Mikimashi mwanka Aijaloni. Kagiita kau antû nî baarî bakwaaga inya nîûntû bwa mpara.

³²Tontû bûû, baroogea kûjûkia into birîa baataîte na barajûkia ng'ondu na ndeegwa na tûjaû. Barathînja o au na antû bararîa nyama irî na tharike.

³³ Saûlû nî eerîrwe ûjû, “Tega ûcionere! Antû nî bakwîîyîria MWATHANI nîûntû bwa kûrîa nyama irî na tharike.” Saûlû arabeera atîrî, “Bûrî akunyanîri! Ingiritieni iiga rînene mwanka aja ndî.

³⁴Îteeni kîrî antû bonthe bûbeere ûjû, ‘O muntû nî areete ndeegwa kana ng’ondu yaawe, na bûciûragîre iigeene rîrî na bûrîe. Bakárea nyama irî na tharike bëeja kwîyîîria MWATHANI.” Tontû bûû, antû bonthe baraikia o muntû ndeegwa yaawe ûtukû bûu na baraithînjîra au.

³⁵Saûlû araakîra MWATHANI kîritîro kîa igongwana, nakîo nîkîo kîaarî kîaawe kîa mbere gwaakîra MWATHANI.

³⁶Rîu Saûlû arabeera atîrî, “Twîteeni tûkaithûkîre Afilisti ûtukû na tûtae into biaao mwanka rûkîîri na tûgátigaria muntû waao kinya ûmwe.” Nabo baramûcokeria baramwîra, “Thithia ûrîa ûkwona kwagîrîte.” Îndî mûthînjîri-Mûrungu arauga ûjû, “Twambeni tûûrie Mûrungu ûntû bûû.”

³⁷Saûlû arooria Mûrungu, “Mbîthûkîre Afilisti? Ûkabanenkanîra kîrî Aisraeli?” Îndî Mûrungu atamûcokeria ntukû îîu.

³⁸Tontû bûû Saûlû arabeera, “Njûûni aja buî atongeeria, tûcûnkûûne twoone nî îîyia rîrîkû twîyîîrîtie MWATHANI naarua.

³⁹Ndîciîtia na MWATHANI ûrîa ûtûûraga mwoyo, we ûrîa wonokagia Israeli, atî kinya këethîra nî mûtaana waakwa Jonathani wîîtie ga akooragwa.” Gûtî muntû no ûmwe kîrî antû bonthe wamûcokeria.

⁴⁰Rîu Saûlû areera antû atîrî, “Kareni rûteere rûmwe, naani na mûtaana waakwa Jonathani tûkare rûngî.” Antû baracokeria Saûlû barauga, “Thithia ûrîa ûkwona kwagîrîte.”

⁴¹ Tontû bûû, Saûlû arauga, “Îgwe MWATHANI Mûrungu wa Israeli, nîkî gîatûma ûrega gûncokeria ni nthûûmba yaaku naarua? Gûkëeja kwîthîrwa ûthûûku bûbû nî kîrî ni bûrî kana kîrî mûtaana waakwa Jonathani, itû MWATHANI Mûrungu wa Israeli cokia na Urimu. Îndî ûthûûku bûbû bûkëeja kwîthîrwa bûrî ndeene ya antû ba Israeli, cokia na Thumimu.” Îcokio rîroonania atî nî Jonathani na Saûlû baarî na ûthûûku na tî antû bau bangî.

⁴²Rîu Saûlû arauga, “Ringeeni kuura gatîgatî gaakwa na mûtaana waakwa Jonathani.” Kuura îragwîîra Jonathani.

⁴³Rîu Saûlû arooria Jonathani atîrî, “Mbîîra ûrîa ûthithîtie.” Jonathani aramwîra, “Nîka ncemere nainchû îrîa ndingithîrie na mûthia jwa rûturo rûrîa ngûkarî narû, nandî ndî aja, nî nkue.”

⁴⁴Saûlû arauga, “Mûrungu nî ambûrage kinya ni warega gûkua, gwe Jonathani.”

⁴⁵Îndî antû barooria Saûlû atîrî, “Nîatîa Jonathani akooragwa, na nîwe ûreterete Israeli ûûmbani bûbûnene ûjû? Gûtîûmbîka! Nî tûgûciîtia na MWATHANI ûrîa ûtûûraga mwoyo atî gûtî rûchiûri rwa mûtwe jwaawe kinya rûmwe rûkagwa nthî; tontû ûrîa athithîtie naarua Mûrungu arî amwe nawe.” Antû barakûûra Jonathani atîkooragwe.

⁴⁶Rîu Saûlû aratiga kûthingatana na Afilisti, na Afilisti baracoka kwaao.

⁴⁷Rîrîa Saûlû aaere mûnene wa Israeli, nî aarwîre na anthû baawe bonthe kuuma nteere cionthe. Nî aarwîre na Amoabu na Amoni na Aedomu na Afilisti na anene ba Zoba. Nî oombanaga o kunthe kûrîa eetaga kûrwaa.

⁴⁸Nî aarwîre na ûchamba, aroomba Amaleki na aratunyûkia Aisraeli kuuma kîrî barîa baabatuunyaga into.

⁴⁹Ataana ba Saûlû baarî Jonathani na Ishivi na Malikishua. Aarî na aarî baîrî: ûrîa mûkûrû eetagwa Merabu na ûrîa mûnini ageetwa Mikali.

⁵⁰Mwekûrû wa Saûlû eetagwa Ahinoamu na aarî mwarî wa Ahimaazi. Mûtongeeria wa njûûrî ya Saûlû eetagwa Abuneri. Abuneri aarî mûtaana wa Neri ûrîa waarî îthe mwanake wa Saûlû.

⁵¹Kishi aarî îthe wa Saûlû na Neri aarî îthe wa Abuneri. Kishi na Neri baarî ataana ba Abieli.

⁵²Kwaarî na ndwaaa itîkûthira matukûûne gatîgatîîne ka Saûlû na Afilisti matukûûne jaawe jonthe. Tontû bûû rîrîa Saûlû oonaga muntû ûrî na inya kana ûrî na ûchamba, nîka aamwethagia ûmwe wa njûûrî yaawe.