Read KIMERU BIBLE PROTESTANT EDITION 1Sam 15 Bible Online

1Sam 15 - KIMERU BIBLE PROTESTANT EDITION bible

1Sam 15

¹ Samueli nî eerîre Saûlû atîrî, “MWATHANI nîwe wantûmîre ngwîtûûrîria maguta waa mûnene wa antû baawe Israeli. Tontû bûû, thikîîra ûrîa MWATHANI akuuga.

² Ûjû nîu MWATHANI Mweneinya akuuga, ‘Ngakanûkia Amaleki nîûntû nî baarigîrîîrie Israeli njîreene rîrîa baaumîte Misri.

³Rîu îta ûkaithûkîre Amaleki na ûthirie buru bionthe birîa barî nabio. Ûkábacaîîra îndî ûûrage arûme na aaka na twaana na tûkeenke. Ningî ûûrage ng'ombe na ng'ondu na nkamîîra na ntigiri.’”

⁴Tontû bûû, Saûlû nî eetîre antû arabatarîra kûu Telaimu. Nabo asikarî ba magûrû baarî ngiri magana jaîrî (200,000), na ngiri îkûmi (10,000) kuuma Juda.

⁵Rîu Saûlû areeta na asikarî baawe ntûûreene ya Amaleki arakara amiciithîrîte arî mûuro.

⁶Saûlû areera antû ba Keni atîrî, “Ciathûraneni na Amaleki na bûciîtîre ntîkeeje kûbûthiranîria amwe nabo. Tontû buî nî bwathithîîrie antû ba Israeli mantû jameega rîrîa baaumîte Misri.” Rîu antû ba Akeni bareeta barauma kîrî Amaleki.

⁷Saûlû aroomba Amaleki ndweene kuuma Havila mwanka Shuri rûteere rwa gaiti ka Misri.

⁸Nawe aragwata Agagi mûnene wa Amaleki arî mwoyo îndî arathiria antû bangî bonthe na rûcîu.

⁹Îndî Saûlû na antû baawe baracaîîra Agagi na kinya ng'ondu irîa nthongi na ng'ombe na njaû na tûng'ondu tûrîa tûnoru na o kîrîa kîonthe boonaga nî gîkîega baracaîîra batîthirie. Îndî kîonthe kîrîa baamenaga na gîtaarî na gîtûmi barathiria buru.

¹⁰MWATHANI areera Samueli atîrî,

¹¹“Nî nkwiirira nîûntû bwa ûrîa ndaeetherie Saûlû mûnene. Nîkwîthîrwa nî atigîte kûnthingata na atîathîkîrîte maathana jaakwa.” Samueli araithikîîra na ararîrîîra MWATHANI ûtukû bunthe.

¹²Samueli arookîîra rûkîîrî kainda areeta gûcwaa Saûlû. Nîrîo eerîrwe atîrî, “Saûlû agwîta Karimeli arîa aciakîrîte gîntû gîa gûtûma aririkanagwa, rîu acoke eete Giligali.”

¹³Rîu Samueli arakinya kîrî Saûlû na Saûlû aramûkeethia akiugaga, “MWATHANI arokûtharima! Nî nthithîtie jonthe jarîa MWATHANI aathanîte!”

¹⁴Samueli aramûûria, “A nîmbi îîu nkwiigua îkîaania? Tî ng'ondu na ng'ombe?”

¹⁵Saûlû aramûcokeria, “Nî asikarî barareetere kuuma kîrî Amaleki. Baratigarîrie ng'ondu na ng'ombe irîa njega nîkenda baritîra MWATHANI Mûrungu waaku kîgongwana. Îndî bingî bionthe nî tûreenyangîrie buru.”

¹⁶Rîu Samueli areera Saûlû, “Kira nkwîîre ûrîa MWATHANI arambîrîre ûtukû.” Saûlû aramwîra atîrî, “Nîu mbîîra.”

¹⁷Samueli aramûûria, “Anga gwe ûtacionaga ûrî ûmûnini mbere ya waa mûtongeeria wa mîîrîga ya Israeli? Îndî amwe na bûu, MWATHANI nî aakûthuurîre na njîra ya gwîtûûrîrua maguta ûraa mûnene wa Israeli.

¹⁸Rîu MWATHANI aragûtûma kûrita ngûgî yaawe arakwîîra ûjû, ‘Îta ûthirie eeyia buru, tabo Amaleki na ûrwee nabo mwanka rîrîa ûkabathiria.’

¹⁹Nandî-rî, nîkî ûraregere kwathîkîra kajû ka MWATHANI? Nîkî tontû ûrathithîrie ûntû bûbûthûûku mbere ya MWATHANI”

²⁰Saûlû aramûcokeria atîrî, “Nî ndîrathîkîîre kajû ka MWATHANI na ndarita ngûgî îrîa arantûmîte kûrita. Ndareeta Agagi mûnene wa Amaleki na ndathiria Amaleki bangî bonthe buru.

²¹Îndî antû nî barataîre ng'ondu na ng'ombe na into bionthe birîa birabuîri kwînyangua nîkenda baritîra MWATHANI Mûrungu waaku kîgongwana aja Giligali.”

²²Samueli aramûûria, “Ka MWATHANI agwîragîrua biewa bibitheru bia gwakîîrua na igongwana ta ûrîa agwîragîrua kwaathîkîrwa? Kwathîka nîku kwega nkûrûki ya kîgongwana, na kûmwigua nî gûkûrûkîte kîgongwana kîa maguta ja ntûrûme.

²³Tontû îrema nî ta îîyia rîa ûrogi, na kûûmia mûtwe nî ta wîyîa bwa kûthaathayia mîrungu ya mîng'uanano. Tontû nî ûregete rûteto rwa MWATHANI, kinya we agûkûrega waa mûnene.”

²⁴Saûlû areera Samueli atîrî, “Nî mbîîtie nîûntû ntîrathîkîîre maathana ja MWATHANI na nteto ciaaku. Nîkwîthîrwa nî ndîrakîrîre antû na ndaabathîkîra.

²⁵Nandî itû ndekera meeyia jaakwa na ûcokanie naani nîkenda nthaathayia MWATHANI.”

²⁶Samueli aracokeria Saûlû, “Ntîcokania naagwe, tontû nî ûregete rûteto rwa MWATHANI na MWATHANI agûkûrega waa mûnene wa Israeli.”

²⁷ Rîrîa Samueli aagarûkaga aciîtîra, Saûlû aragwata rwambambio rwa Samueli naru rûratambûka.

²⁸Samueli aramwîra atîrî, “MWATHANI agûtambûra ûnene bwa Israeli kuuma kîrî gwe kuuma naarua na abûnenkanîra kîrî mûtûûri waaku ûrîa ûrî ûmwega nkûrûki yaaku.

²⁹Mûrungu we ûrîa ûrî ûkumio bwa Israeli atîûmba kwaria ûrongo kana agarûka. We tî muntû auugûka ûrîa augîîte.”

³⁰Rîu Saûlû aracokia, “Nî mbîîtie. Îndî ngwatîra nthoni mbere ya akûrû na antû ba Israeli na ûcokanie naani nîkenda nkathaathayia MWATHANI Mûrungu waaku.”

³¹Rîu Samueli aracokania na Saûlû Giligali na Saûlû arathaathayia MWATHANI.

³²Rîu Samueli arauga atîrî, “Ndetereeni Agagi mûnene wa Amaleki aja.” Agagi areeta agwîrîtue akiugaga, “Nî mma ûrûrû bwa gîkuû nî bûkûrûkîte.”

³³Samueli aramwîra atîrî, “O ta ûrîa rûchiû rwaaku rûtûmîte eekûrû babaingî batigwa batî twaana, nîu nyakwe agatigwa atî mwana.” Samueli aragitanga Agagi îchunchî ichunchî arî mbere ya MWATHANI kûu Giligali.

³⁴Rîu Samueli areeta Rama, na Saûlû araana kwaawe Gibea.

³⁵Kuuma ntûkû îîu mwanka gûkua gwa Samueli, Samueli atoona Saûlû kaîrî. Îndî we nî aithikîrîîre nîûntû bwa Saûlû. MWATHANI nî airirîre nîûntû bwa kweethia Saûlû mûnene wa Israeli.