Read KIMERU BIBLE PROTESTANT EDITION 1Sam 16 Bible Online

1Sam 16 - KIMERU BIBLE PROTESTANT EDITION bible

1Sam 16

¹MWATHANI arooria Samueli atîrî, “Nî mwanka rî ûkaithikîîra nîûntû bwa Saûlû? Nî mûregeete eeta na mbere kwatha Israeli? Ûjûria rûgoji rwaaku maguta na wîîte kîrî Jesii wa ntûûra ya Bethlehemu, tontû nî ndiithuurîrîte mûnene kuuma kîrî ataana baawe.”

²Samueli arooria, “Nîatîa ngeeta? Saûlû aaigua nteto iu, akambûraga.” MWATHANI aramûcokeria, “Jûkia mwari ya ng'ombe, rîu uuge, ‘Nîka ndeeja kûritîra MWATHANI kîgongwana.’

³Naagwe wîîte Jesii kîgongwaneene, naani ngakwîîra ûrîa ûkathithia. Ningî ûrîa ngakwîrîra nîwe ûgetûûrîria maguta.”

⁴Samueli arathithia ûrîa MWATHANI aamwîrîte na areeta Bethlehemu. Akûrû ba ntûûra îîu bareeta kûmûthagaana bagîteetemaga na baramûûria atîrî, “Wîjîte na thîîrî?”

⁵Nawe arabacokeria, “Mbîjîte na thîîrî kûritîra MWATHANI kîgongwana. Itherieni twîtanie kîgongwaneene.” Îndî aratheria Jesii na ataana baawe na arabeeta kîgongwaneene.

⁶Kûrakara atîrî, rîrîa baakinyîre, Samueli araithîîria Eliabu arathûgaania, “Nî mma ûûjû ûrî mbere yaakwa nîwe MWATHANI athuurîte eetûrîrua maguta.”

⁷Îndî MWATHANI areera Samueli atîrî, “Ûkáraithîîria ûrîa akari kana ûraithîîria ûraaja bwaawe tontû ndîkûmûrega. MWATHANI atîonaga ta ûrîa muntû oonaga. Nîkwîthîrwa muntû ategaga ûrîa muntû akari bwa oome, îndî MWATHANI ategaga nkoroone.”

⁸Rîu Jesii areeta Abinadabu na aramûkûrûkîîria mbere ya Samueli. Samueli arauga, “MWATHANI atîthuurîte kinya ûûjû.”

⁹Rîu Jesii arakûrûkîîria Shaama au, nawe Samueli arauga, “Kinya ûûjû MWATHANI atîramûthuura.”

¹⁰Jesii araikia ataana baawe mûgwanja mbere ya Samueli, îndî Samueli aramwîra atîrî, “Gûtî we wa baba MWATHANI athuurîte.”

¹¹Rîu Samueli arooria Jesii, “Ataana baaku bonthe barî aja?” Nawe aramûcokeria, “Nî atigeere ûrîa mûnini buru, îndî nî arîthîtie ng'ondu.” Rîu Samueli aramwîra, “Tûmana ageetwe, tontû tûtîkara nthî mwanka rîrîa akeeja aja.”

¹²Jesii aramûtûmanîra areeja. Mûtaana ûu aarî ûmûthongi na ûrî na inya ya mwîrî na meetho jamathongi. MWATHANI areera Samueli atîrî, “Ûkîîra ûmwîtûûrîrie maguta, tontû nîwe ûûjû.”

¹³Samueli nawe arajûkia rûgoji rwaawe rûrîa rwaarî na maguta, areetûûrîria mûtwe jwa Daudi maguta, ataana ba îthe bakîonaga. Roho wa MWATHANI aarejîîra Daudi na inya mono kuuma ntukû îîu. Rîu Samueli aracoka Rama.

¹⁴Roho wa MWATHANI areerûkîra Saûlû, na roho înthûûku îratûmwa nî MWATHANI kûmûthangîkia.

¹⁵Saûlû areerwa nî nthûûmba ciaawe atîrî, “Nî tûkûmenya atî nî roho înthûûku îrîa îtûmi nî Mûrungu îgûkûthangîkia.

¹⁶Îtû Mwathi weetû twîtîkîîrie tuî nthûûmba ciaaku, tûgacûe muntû ûrîa wiijî kûringa wandîîndî bwega; nîkenda roho înthûûku yaatûmwa nî MWATHANI kîrî gwe gûkûthangîkia, akaringaga wandîîndî naagwe ûkabua.”

¹⁷Rîu Saûlû areera nthûûmba ciaawe atîrî, “Ncwîreni muntû ûrîa ûringaga wandîîndî bwega bûndeetere.”

¹⁸Ûmwe wa nthaka ciaawe arauga atîrî, “Nî mboneete mûtaana wa Jesii kuuma ntûûra ya Bethlehemu akîringa wandîîndî bwega; nî nchamba îng'entu ndweene, na nî muntû ûmûthongi, na nî aragia bwega, na ningî MWATHANI arî amwe nawe.”

¹⁹Saûlû aratûma antû kîrî Jesii bamwîra ûjû, “Ntûmîra mûtaana waaku Daudi, ûrîa ûrîîthagia ng'ondu.”

²⁰Jesii aranenkanîra Daudi amwe na kabûri na ntigiri îrîa yakamatithetue mîgaate na kîgîîna kîa ndibei biraikîrua Saûlû.

²¹Daudi areeta kîrî Saûlû na arambîria kûmûtumîkagîra. Saûlû aramwenda mono na aramweethia mûkamati wa mathaga jaawe ja ndwaa.

²²Saûlû aracoka aratûmana kîrî Jesii aramwîra atîrî, “Îtîkîîria Daudi atumîkagîre tontû nî mwendeete mono.”

²³Îgîîta rionthe rîrîa roho înthûûku yatûmagwa nî Mûrungu kîrî Saûlû, Daudi nî ajûkagia wandîîndî yaawe akamîringa, roho înthûûku ikamwîrûkîra nawe Saûlû akaigua bwega.