Read KIMERU BIBLE PROTESTANT EDITION 1Sam 17 Bible Online

1Sam 17 - KIMERU BIBLE PROTESTANT EDITION bible

1Sam 17

¹Rîu Afilisti baroothûrania njûûrî ciaao kûu Sokoh, ntûûra îrîa yaarî nthîgûûrû ya Juda nîkenda beeta kûrwaa. Baraamba kambî gatîgatî ga Sokoh na Azeka antû eetagwa Efesi-damimu.

²Saûlû na antû ba Israeli baroothûrana na baraamba kambî kîgwanthîîne kîa Ela, baraibanga ûrîa bakarwaa na Afilisti.

³Afilisti bararûngama rwongo rûmwe rwa kîrîma na Aisraeli bararûngama rwongo rûu rûngî, baankenue nî kîguuru.

⁴Rîu kuuma kambîîne ya Afilisti, nchamba îmwe yeetagwa Goliathû kuuma ntûûra ya Gathi, îrairita. Goliathû aarî na ûraaja ta bwa mita ithatû (3m).

⁵Ningî nî eekîrîte nkobia ya ndwaa ya îturutia na ageekîra nguû ya ndwaa ya îturutia kîbara. Nguû îîu yaarî ya ûrito bwa kilo mîrongo îtaano na mûgwanja (57).

⁶Nî aacikundîkîte îthaga rîa kwigîra magûrû na nî aarî na mûthîrî jwa îturutia gîturoone kîaawe.

⁷Îtumo rîaawe rîamati ta mûgaamba jwa mwîîndi wa ndigi cia nguû, na ng'ûûra ya chuuma ya îtumo rîu yaarî na ûrito bwa kilo mûgwanja. Nawe mûkamati wa rong'o yaawe eetîte arî mbere yaawe.

⁸Goliathû ararûngama aragondokera njûûrî ya Israeli akiugaga, “Nîatîa bûkûthithia au? Ka bwîjîte kûrwaa? Ûûni ndî Mûfilisti, naabuî bûrî nthûûmba cia Saûlû. Thuureni muntû ûmwe weenu eeje tûrwee.

⁹Akëethîrwa akoomba kûrwaa naani na ambûrage, rîu tûkaa nkombo cieenu. Îndî nkëeja kûmûûmba na nkamûûraga, rîu naabuî bûkaa nkombo cieetû na bûtûtumîkagîre.”

¹⁰Mûfilisti ûu arauga, “Riteeni kamuntû ka njûûrî yeenu, keeje tûrwee nako.”

¹¹Rîrîa Saûlû na arûme bonthe ba Israeli baigîrue nteto cia Mûfilisti ûu, nî baatemûkîre na baraguaa mono.

¹²Daudi aarî mûtaana wa Jesii. Jesii arî wa kuuma Efiratha ya Bethlehemu îrîa yaarî Juda. Nawe aarî na ataana banaana. Ningî aarî muntû ûmûkûrû mono îgiiteene rîa waathani bwa Saûlû.

¹³Ataana ba Jesii barîa akûrû bo-bathatû baarî bakûthingata Saûlû ndweene: wa kîranga eetagwa Eliabu na mûruna waawe eetagwa Abinadabu na wa bathatû eetagwa Shaama.

¹⁴Daudi nawe aarî wa maturango. Nabo ataana ba ng'ina bau akûrû bo-bathatû baathingatanaga na Saûlû.

¹⁵Îndî Daudi nî eetaga kûrîîthia ng'ondu cia îthe kûu Bethlehemu na agacoka kaîrî kîrî Saûlû.

¹⁶Rîu Mûfilisti ûu Goliathû nî aathangaga na agacikûûra Aisraeli rûkîîrî o na ûgoro antû a ntukû mîrongo îna.

¹⁷Ntukû îmwe Jesii areera Daudi mûtaana waawe, “Jûkia kilo îkûmi cia mpîndî inkarange na mîgaate îîjî îkûmi wîîte na mpwîî wiikîrie ataana ba nyakwe kambîîne.

¹⁸Ningî ûjûkie ing'enyua îkûmi bia maguta ja kûthuka jamoomo wiikîrie mûtongeeria wa njûûrî. Ningî ûraithe ataana ba nyakwe na ûndetere gantû kuuma kîrî bo ga kûmbonia nî babeega.”

¹⁹Saûlû na arûme ba Israeli bonthe nî baarî kîguuruune kîa Ela bakîrûjaga na Afilisti.

²⁰Daudi arookîîra kainda rûûnene, aratigîra mûkaria ûngî ng'ondu. Arajûkia birîa eerîri, araciîtîra o ta ûrîa Jesii aamwîrîte. Nawe arakinya kambîîne o rîrîa mbûûtû yaumîrîte ndweene îgîkuuraga nîkenda îrwaa.

²¹Nacio njûûrî cia Israeli na Afilisti ireerekanîra nîkenda barwaa.

²²Daudi aranenkera mûkaria wa into mûrigo jûrîa aarî naju, aroogîa kîrî njûûrî areeta gûkeethia ataana ba ng'ina.

²³Akîaragia nabo, nchamba îîu ya Afilisti kuuma Gathi yeetagwa Goliathû, îrauma njûûrîîne yaao îracikûûra Aisraeli o ta ûrîa yathithagia, Daudi akiigagua.

²⁴Rîrîa njûûrî ya Israeli yoonere muntû ûu îramatûka yonthe nîûntû bwa ûguaa.

²⁵Aisraeli barauga atîrî, “Nî bûkwona muntû ûûjû waumîra? Gûtî nkaanja nîka aumîra nîkenda acikûûra Aisraeli. Muntû ûrîa ûkamûûraga, akaewa ûtonga bûbwingî nî mûnene Saûlû, na agûre mwarî waawe na nja ya îthe îtîtua kûreaga ûgoti.”

²⁶Daudi araaria na barîa barûûngami akuî nawe arabooria ûjû, “Nîatîa muntû ûrîa ûkooraga Mûfilisti ûûjû na eebie rûmena kuuma kîrî Israeli akathithîrua? Ka arî ûû Mûfilisti ûûjû ûtîtaani, ûgûcikûûra njûûrî cia Mûrungu ûrîa ûtwîîre mwoyo?”

²⁷Antû baramwîra ûrîa muntû ûrîa ûkooraga Goliathû akathithîrua.

²⁸Nawe mûtaana wa ng'ina ûrîa mûkûrû Eliabu araigua rîrîa aaragia na arûme bau, araakana nî mûthûûro nîûntû bwa Daudi na aramûûria, “Nîkî tontû weeja? Watigîra ûû ng'ondu irîa nkai bûûrîîne? Nî nkûmenya wikumia na ûthûûku bwa nkoro yaaku, tontû wîîjîte gûtegeera ndwaa!”

²⁹Daudi arooria, “Nandî nîatîa ndagîta? Uga tî kûûria ndooria akî?”

³⁰Daudi aramuutatîra areerekera muntû ûngî aramûûria ûrîa akûûrîîtie mbere. Nabo antû baramûcokeria o ta ûrîa agûcokeretue.

³¹Antû bamwe bakwigua ûrîa Daudi ooragia, nî baamenyithîrie mûnene Saûlû, nawe Saûlû aramûtûmanîra.

³²Daudi areera Saûlû atîrî, “Gûkágîta muntû no ûmwe ûkua nkoro, ni nthûûmba yaaku ngeeta kûrwaa na Mûfilisti ûûjû!”

³³Rîu Saûlû aracokeria Daudi atîrî, “Ûtîûmba kûrwaa na Mûfilisti ûûjû tontû ûrî muntû ûmwîthî nawe Mûfilisti ûû atwîîre kûrwaa kuuma wîthî bwaawe!”

³⁴Îndî Daudi areera Saûlû atîrî, “Ni nthûûmba yaaku ndîîthagia ng'ondu cia baaba. Rîrîa ngatûnyi kana ndûû yeeja na îkajûkia kang'ondu kuuma ndîîthieene,

³⁵nî mîthingataga, nkamîringa na ngagatunyûkia kuuma kanyueene kaayo. Îkëeja kûnthûngûthîra, mîgwataga mûmero, nkamîringania nthî na nkamîûraga.

³⁶Nthûûmba yaaku nî yûragîte ngatûnyi na yooraga ndûû. Mûfilisti ûûjû ûtîtaani agakara ta îmwe yaacio, nîkwîthîrwa nî acikûûrîte njûûrî cia Mûrungu ûrîa ûtwîîre mwoyo.”

³⁷Daudi aracoka arauga atîrî, “MWATHANI ûrîa wantunyûkîrie kuuma nkunyûûne cia ngatûnyi na cia ndûû agantunyûkia kîrî Mûfilisti ûûjû.” Saûlû nawe aramwîra atîrî, “Îta, na MWATHANI arokara naagwe.”

³⁸Rîu Saûlû areekîra Daudi mathaga jaawe ja kwigîra mwîrî tajo nkobia ya îturutia, na nguû ya chuuma ya kwigîra kîbara na mûgongo.

³⁹Daudi agûcioga rûchiû îgûrû rîa nguû, nî aagererie gwîtaîta îndî araremwa tontû ataamenyeretie gwîkîra mathaga jau. Tontû bûu Daudi areera Saûlû atîrî, “Ntîûmba gwîta na mathaga jaja, tontû ntîjamenyeretie.” Rîu Daudi arajarita.

⁴⁰Arajûkia rûturo na araitaarîra twiga tûtaano tûûtenderu kuuma kamûurone aratwîkîra koondoone karîa aatumagîra arîthîtie. Nîngî nî aagwete gîkûtha, areeta akuî na Mûfilisti.

⁴¹Mûfilisti ûu atongeretue nî mûkamati wa rong'o yaawe, areetaîta akuî na Daudi.

⁴²Rîrîa Mûfilisti aaraithîrîrie Daudi bwega, aramûmena tontû aarî muntû ûmwîthî na ûmûthongi.

⁴³Mûfilisti ûu areera Daudi atîrî, “Ka ndî kurû tontû ûmbîjîrîte na karûturo?” Areeta na mbere kûruma Daudi agîciîtagia na mîrungu yaao.

⁴⁴Mûfilisti ûu areera Daudi, “Njû aja, nenkere nyomoo na nyoni cia îgûrû kiimba gîaaku.”

⁴⁵Rîu Daudi aracokeria Mûfilisti atîrî, “Ûmbîjîrîte na rûchiû na îtumo na mûthîrî, îndî ni nkwîjîrîte riîtweene rîa MWATHANI Mweneinya, Mûrungu wa njûûrî cia Israeli, ûrîa ûcikûûrîte.

⁴⁶Ntukû îîjî ya naarua MWATHANI agakûnenkanîra kîrî ni, nkûûrage na nkûgiite kîongo. Ningî nenkanîre biimba bia njûûrî cia Afilisti naarua îîjî kîrî nyoni cia îgûrû na nyomoo cia kîthaka,

⁴⁷nîkenda kîûthûrano gîkî kîonthe kîmenye atî MWATHANI atîonokagia na rûchiû kana îtumo. Tontû ndwaa nî ya MWATHANI na akabûnenkanîra kîrî tuî.”

⁴⁸Rîrîa Mûfilisti ûu eetaîtîre akuî nîkenda arwaa na Daudi, Daudi aroogîanga na mpwîî eetîte arîa kwarûjagîrwa gûtirimana na Mûfilisti.

⁴⁹Rîu Daudi araikia njara kîondoone kîaawe ararita kaiga arakagera na gîkûtha, araringa Mûfilisti ntong'o, nako kaiga karatonya ntong'oone. Mûfilisti aragwa ûthiû bûtiirîte nthî.

⁵⁰ Rîu Daudi agîtûmagîra gîkûtha na kaiga, araringa Mûfilisti na aramûûraga. Gûtî rûchiû aarî naru.

⁵¹ Daudi aroogîa arakinya Mûfilisti îgûrû. Aracinûra rûchiû rwa Goliathû kîûgeene, aramûtumbûra na aramûgiita mûtwe. Rîrîa Afilisti boonere atî nchamba yaao îgûkua, baramatûka.

⁵²Njûûrî cia Israeli na Juda irookîîra igîkuuraga ireengana na Afilisti mwanka Gathi na mpingîroone cia Ekironi. Afilisti barîa beekîri ngûma ndweene baragwa njîreene kuuma Sharaimu, Gathi mwanka Ekironi.

⁵³Aisraeli bakuuma kwîngana na Afilisti, nî baacokere barataa kambî ya Afilisti.

⁵⁴Rîu Daudi arajûkia kîongo kîa Goliathû aragiikia Jerusalemu, îndî areeka mathaga ja Goliathû îemeene rîaawe.

⁵⁵Rîrîa Saûlû oonere Daudi aumîrîte kûrwaa na Goliathû nî oorîrie Abuneri mûtongeeria wa njûûrî atîrî, “Mûthaka ûûjû nî waaû?” Abuneri nawe aramwîra, “Itû ni mûnene, ntîkûmenya nî waaû.”

⁵⁶Mûnene aramwîra atîrî, “Îta ûkoorithîrie nî waaû.”

⁵⁷Rîrîa Daudi aacokîre kambîîne akûthiria kûûraga Goliathû, Abuneri nî aamûjûkîrie aramwikia kîrî Saûlû. Daudi no aakamatîte kîongo kîa Goliathû.

⁵⁸Saûlû aramûûria, “Mûthaka, ûrî waaû?” Daudi aramûcokeria, “Ûûni ndî mûtaana wa nthûûmba yaaku Jesii wa kuuma Bethlehemu.”