Read KIMERU BIBLE PROTESTANT EDITION 1Sam 19 Bible Online

1Sam 19 - KIMERU BIBLE PROTESTANT EDITION bible

1Sam 19

¹Saûlû araaria na mûtaana waawe Jonathani na nthûûmba ciaawe cionthe mantû jeegiî mûbango jwa kûûraga Daudi. Îndî Jonathani mûtaana wa Saûlû nî eendeete Daudi mono.

²Rîu Jonathani areera Daudi atîrî, “Baaba nî akwenda gûkûûraga. Tontû bûû rûûjû rûûkîîrî wimenyeere na wiciithe antû amwe.

³Naani ngeeta ndûngame rûteere rwa baaba akuî na arîa ûkeethîrwa wîciithîte na mbarie nawe mantû jakwegiî. Nkëeja kûmenya ûntû, ngakumenyithia.”

⁴Jonathani arakathîîrîria Daudi kîrî îthe Saûlû, akîmwîraga atîrî, “Mûnene, ûkáthithîria nthûûmba yaaku Daudi ûntû bûbûthûûku tontû we atakûthithîria ûntû no bûrîkû bûbûthûûku. We nî mantû jameega akî akûthithîrîtie.

⁵Nîka aacieejanîre areeta kûrwaa na Mûfilisti, na MWATHANI araa Aisraeli ûûmbani bûbûnene mono. Naagwe nî waabwoonere na ûrabûgwîrîrua. Nîkî tontû ûkwenda kûthithîria muntû ûtî na îyaatia ûthûûku, ûûraga Daudi ûtheri?”

⁶Tontû bûû Saûlû arathikîîra Jonathani, na araciîtia akiugaga atîrî, “O ta ûrîa MWATHANI atûraga mwoyo, Daudi atîûragwa.”

⁷Jonathani areeta Daudi, na aramûmenyithia mantû jau jonthe. Aaracoka aramwikia kîrî Saûlû, nawe Daudi aareta na mbere gûtumîkîra Saûlû o ta mbere.

⁸Nyuma ya kagiita gagakai, ndwaa îratûrîka kaîrî gatîgatî ka Aisraeli na Afilisti. Daudi areeta ararwaa na Afilisti arabooraga mbûrago înene, mwanka baramûmatûka.

⁹Rîu roho înthûûku îtûmi nî MWATHANI îrejîîra Saûlû, akari nthî nyomba yaawe agwete îtumo na njara, nawe Daudi nî aamûrîngagîra wandîîndî.

¹⁰Saûlû nî aagererie kûmunta Daudi na îtumo amûmuntithania na rûthingo îndî Daudi ararîebera rîramunta rûthingo. Daudi nawe araûra ûtukû bûu na aramatûka.

¹¹ Rîu Saûlû aratûma antû beeta nyomba ya Daudi bamûkaria nîkenda rûûnene rûkîîrî bamûûraga. Îndî mwekûrû wa Daudi, Mikali aramwîra atîrî, “Ûkärega kûûra naarua ûtukû, rûûjû ûkooragwa.”

¹²Rîu Mikali araumagarîîria Daudi ndiricheene aramatûka na araûra.

¹³Mikali arajûkia mûrungu jwa mûng'uanano na arajûmamia gîtandeene, na aramamia kîongo kîaaju pirûûne îrîa yathithîtue na guee ya mbûri na arajûgwîîkîra.

¹⁴Saûlû agûtûma antû bagîîra Daudi, Mikali arabeera, “Nî ajîtue.”

¹⁵Rîu Saûlû aratûma antû kaîrî beeta kwona Daudi. Arabeera atîrî, “Mûreteeni kîrî ni arî gîtandeene, nîkenda mûûraga.”

¹⁶Rîrîa antû barîa baatûmî baatonyere nyomba ya Daudi, nî beethîîre nî mûrungu jwa mûng'uanano jwamamîtue gîtandeene, na kîongo kîaaju kîrîkîîri pirûûne îrîa yathithîtue na guee ya mbûri.

¹⁷Saûlû arooria Mikali atîrî, “Nîkî wampaîîria bûng'ana ûjû, watûma mûnthû waakwa amatûka?” Mikali aramûcokeria, “Nîka ambîîrîre mûrekeerie amatûke, kana këethîra tî ûû, ambûrage.”

¹⁸Daudi akûmatûka, nî eetîre kîrî Samueli kûu Rama na aramwîra mantû jonthe jarîa Saûlû aamûthithîrîtie. Rîu Daudi na Samueli bareeta gûkara Naiothi.

¹⁹Saûlû nî eerîrwe Daudi arî Naiothi kûrîa Rama.

²⁰Tontû bûu, Saûlû aratûmana Daudi eeta kûgwatwa. Îndî rîrîa barîa baatûmi boonere ntundu ya iroria bikîroragia, na Samueli abitongeeretie, Roho wa Mûrungu nî eejîrîre bau baatûmi nî Saûlû, na kînya bo barambîrîria kûroria.

²¹Rîrîa Saûlû eerîrwe ûrîa gwakara, nî atûmîre antû bangî na kinya bo bagwîta barambîrîria kûroria. Ningî aratûmana rîa jathatû, na kinya bo bagwîta barambîrîria kûroria.

²²Rîu we wengwa nî eetîre Rama, na agûkinya kîthimeene kîrîa kînene gîa Seku, nî oorithîrîrie kûrîa Samueli na Daudi baarî. Muntû ûmwe aramûmenyithia atî baarî Naiothi kûu Rama.

²³Saûlû eetîte kûu Naiothi ya Rama, Roho wa Mûrungu nî aamwîjîîrîre na arambîrîrîa kûroria mwanka arakinya Naiothi ya Rama.

²⁴ Agûkinya, nî aaritîre nguû aratigwa kîthûnû na araambîrîria kûroria arî mbere ya Samueli. Nî aamamîre au arî kîthûnû mûthenya junthe na ûtukû bunthe. Tontû bûû antû barambîrîria kûrîa, “Kinya Saûlû ka arî amwe na iroria?”