Read KIMERU BIBLE PROTESTANT EDITION 1Sam 2 Bible Online

1Sam 2 - KIMERU BIBLE PROTESTANT EDITION bible

1Sam 2

¹ Hana nawe araromba arauga: “Nkoro yaakwa nî îkûgwîrua ndeene ya MWATHANI nî nkûgonga MWATHANI inya yaakwa. Rîu ndoomba kûthekera anthû baakwa, nîûntû nî gwîrîrîtue wonokio bwaaku.

²Gûtî we ûmûtheru ta MWATHANI tontû gûtî ûngî tiga gwe, gûtî Iiga rîngî rîa gwitiira ta Ûûgwe.

³Bûkáingîyieni mîgambo ya gwîkumia, bûkáreka tûnyua tweenu tuuma rwikumio, tontû MWATHANI nî Mûrungu wa ûmenyo, na nî athimaga mathithio.

⁴Moota ja nchamba irîa irî inya nî jaunîkangaga na barîa batî inya nî bagîtaga inya.

⁵Barîa batwîîre nyiroone nandî ka bakûrîmia nîkenda boona biakûrîa, îndî barîa batwîîre mpareene, barî na nyiro. Mûka nthaata nî aciarîte twaana mûgwanja, na ûrîa ûroonaga twaana gûtî ko atigi nako.

⁶MWATHANI ooragaga na akariûkia, eenîkanaga nthî mwanka gîkaroone kîa akuû na agokîîria kaîrî.

⁷MWATHANI aeethagia antû nkîa na akabaeethia itonga, eenîkaga bamwe na akathûngûûra bangî.

⁸Ookagîîria nkîa kuuma tîîriine na akarita thebe ûkîeene bwaayo. Agatûma bakaranîra na anene na agatûma batîîwa. Nî mma itugî birîa birikîîtie nthî nî bia MWATHANI, na nîwe ûmîrîîkîrîte îgûrû rîabio.

⁹Amenyagîîra barîa bamwîtîkîtie na barîa baaî bakagitarîra muunduune.

¹⁰Anthû ba MWATHANI bakathetherangwa, Ûrîa Ûrî Îgûrû buru abagondokere ta ngorogoro kuuma îgûrû. MWATHANI akagambithia nthî yonthe; eekîre mûnene waawe inya na athûngûûre inya ya mwîtûrîrua maguta waawe.”

¹¹Rîu Elikana aracoka nja yaawe Rama. Îndî kaîjî kau Samueli karatigwa Shilo, kararitîra MWATHANI ngûgî gatongeeretue nî Eli, mûthînjîri-Mûrungu.

¹²Ataana ba Eli baarî na mîtîre îmîthûûku mono. Batakîraga MWATHANI

¹³kana bathingata wîthîre bûrîa bwathingatagwa nî athînjîri-Mûrungu bakîrita igongwana. Rîrîa muntû akûrita kîgongwana, bo batûmaga nthûûmba yaao îrî na ûûma ya maîgo jathatû,

¹⁴yeeta îkamîtombeka nyongûûne ya nyama ikîtherûkaga. Nyama îrîa îkamunta îkaa ya mûthînjîri-Mûrungu. Ûu nîu bathithagîria Aisraeli bonthe barîa beetaga Shilo kûrita kîgongwana.

¹⁵Amwe na bûu kinya mbere ya maguta jatîraakîîrua, nthûûmba ya mûthînjîri-Mûrungu nî yeejaga îkeera ûrîa ûkûrita kîgongwana atîrî, “Nenkanîra nyama cia mûthînjîri-Mûrungu agaakîrue, tontû atîîtîkîîria nyama itherûkîtue kuuma kîrî gwe, arîenda imbîthî.”

¹⁶Muntû ûu arîngî kûmûcokeria akamwîra, “Ga twambe twakîîrie maguta, rîu ûjûkie irîa ûkwenda.” Nthûûmba yacokagia atîrî, “Arî! No mwanka ûnenkere nandî, na këethîra tîu, nkajûkia kwa inya!”

¹⁷Tontû bûû, îîyia rîa ataana ba Eli rîaarî rîrînene mono kîrî MWATHANI, nîûntû nî baatengûraga kîgongwana kîrîa kîritîri MWATHANI.

¹⁸Samueli nî eetîre na mbere gûtumîkîra MWATHANI arî mwana mûnyi, eekagîra nguû ya efodi.

¹⁹O mwaka o mwaka ng'ina nî aamûtumagîra karwambambio akamwikîria rîrîa beetaga na mûkûrû waawe kûrita kîgongwana kîa o mwaka.

²⁰Eli nî aatharimaga Elikana na mwekûrû waawe, akauga, “MWATHANI arotûma mwekûrû ûûjû waaku agûciarîra twaana tûngî nîûntû bwa kîewa kîrîa aaritîîre MWATHANI.” Rîu bakaana kwaao.

²¹Nî mma MWATHANI nî aatharimîre Hana aragîa na ataana bangî bathatû na aarî baîrî. Samueli nî aakûrîre arî mbere ya MWATHANI.

²²Rîu Eli nî aarî agûkûra mono. Nawe nî aigagua jonthe jarîa ataana baawe baathithagîria Aisraeli bonthe na ûrîa baathengagîîra aka barîa baritaga ngûgî mwîrîga jwa îema rîa gûtirimanîra na Mûrungu.

²³Nawe arabeera, “Nî mbigîîtue nteto cia mathithio jeenu ikîarua nî antû bonthe. Nîmbi îgûtûma bûthithia mantû jaja?

²⁴Tigeni kûthithia mantû jau ataana baakwa. Tî mantû jameega jau nkwigua antû ba MWATHANI bagîtaambia!

²⁵Muntû akëeja kwîîria muntû ûngî, no eerencanîîrwe kîrî Mûrungu, îndî muntû akëeja kwîîria MWATHANI rî, nûû eerencanîîrwa kîrî we?” Nabo batathîkîîre îthe, tontû bwaarî wendi bwa MWATHANI kûbooraga.

²⁶ Samueli nî eetîre na mbere aranenea na areethîrwa arî ûmwega mbere ya MWATHANI na mbere ya antû.

²⁷Muntû wa Mûrungu nî eetîre kîrî Eli, aramwîra, “MWATHANI ariuga ûjû, ‘Rîrîa Aaroni kîûjûjû kîeenu, na antû ba mûciî jwaawe baarî nkombo Misri waathoone bwa mûciî jwa Farao, nî ndacionanîrie kîrî Aaroni.

²⁸ Nî ndaamûthuurîre kuuma kîrî mîîrîga yonthe ya Israeli nîkenda aa mûthînjîri-Mûrungu waakwa na nîkenda eetaga kîritîroone kîa igongwana gîaakwa kwîîthia ubaani na nîkenda eekagîra nguû ya efodi mbere yaakwa. Ningî nî ndaanenkeere mûciî jwa kîûjûjû gîaaku igongwana bia mwanki bionthe birîa antû ba Israeli banditagîra.

²⁹Nîmbi rîu, îgûtûma bwigîîrua igongwana biaakwa na biewa biaakwa bitheru birîa mbugîîte antû baakwa baanditagîre rûriitho? Nîmbi îtûmîte wîkîîra ataana baaku nkûrûki yaakwa, ûkareka bainoragia na îchunchî birîa biega akî bia biewa birîa nditagîrwa nî antû baakwa ba Israeli?’

³⁰Tontû bûû, MWATHANI Mûrungu wa Israeli ariuga ûjû, ‘Nî ni ndaciîtîrie atî mûciî jwaaku na mûciî jwa kîûjûjû gîaaku jûkarita ngûgî yaakwa magiita jonthe,’ îndî nandî, MWATHANI ariuga atîrî: Gûtîkara ûu. Barîa bambîkagîîra nîbo ngeekîîra, na barîa bamenaga nkaabamena.

³¹Atîrî, îgiita nî rîîjîte rîrîa nkaathiria inya yaaku na inya ya mûciî jwa kîûjûjû gîaaku, ûrîa gûtîkarîonekana muntû ûmûkûrû mûciî jwaaku.

³²Mîthangîkoone yaaku ûkaraithagîîria na kwirîrîîria itharimo bionthe birîa bikanenkerwa Israeli, îndî gûtîkarîonekana muntû ûmûkûrû mûciî jwaaku kenya na kenya.

³³Ndëeja gûtigaria muntû wa chiarwa ciaaku kîritîroone kîa igongwana gîaakwa, akaa wa gûtûma ûrîraga na withikagîîra. Nchiarwa ciaaku cionthe ikooragîrwa ndweene.

³⁴ Ûrîa gûgakarîka kîrî ataana baaku bobaîrî, Hofini na Fineasi, nîkîo gîkaa kîonanîîria kîrî gwe, tontû bobaîrî bagakua ntukû îmwe.

³⁵Naani nkaithuurîra mûthînjîri-Mûrungu mwîtîkua, ûrîa ûkathithagia kûringana na jarîa jarî nkoroone yaakwa na mûtwe jwaakwa, na nkamwakîra nja ya gûtûûra kenya. We akaritaga ngûgî mbere ya mwîtûûrîrua maguta waakwa kenya na kenya.

³⁶Muntû wonthe wa mûciî jwaaku ûrîa ûgatigara, akeejaga kûmwerenca amwaa tûbeecha kana tûirio akîmwîraga, ‘Itû mbîtîkîîria nditage ngûgî ya mûthînjîri-Mûrungu nîkenda mbonaga noo gîakûrîa.’”