Read KIMERU BIBLE PROTESTANT EDITION 1Sam 20 Bible Online

1Sam 20 - KIMERU BIBLE PROTESTANT EDITION bible

1Sam 20

¹Daudi aramatûka arauma Naiothi ya Rama, areeta kîrî Jonathani, aramûûria, “Nîatîa nthithîtie? Nî ûthûûku bûrîkû nthithîtie? Nî îîatia rîrîkû nthithîrîtie abaagu tontû agûncwaa ambûraga?”

²Nawe aramûcokeria aramwîra atîrî, “Gûkorokarîka ûu! Ûtîkua! Gûtî ûntû baaba athithagia bûbûnene kana bûbûnini atîmbîîrîte. Nîmbi îtûmîte ambitha ntîkamenye bûu? Bûu bûtîo!”

³Rîu Daudi aramûcokeria atîrî, “Abaagu nî akûmenya bwega atî nî ûmpendeete. Nawe arîthûgaania atî wamenya ûntû bûû, ûkagea kîeba mono. Îndî ga ngûciîtia na mma o ta ûrîa MWATHANI atwîîre mwoyo na o ta ûrîa ûtwîîre mwoyo, ûûni ndî beco gûkua!”

⁴Jonathani aramwîra atîrî, “Bûrîa ûkauga ngakûthithîria.”

⁵ Daudi areera Jonathani, “Rûûjû nî ntukû ya mambura ja mweri jûkîguûka. Mbuîri kwîthîrwa nkîrîjanagîra na mûnene meetheene. Îndî ûkëeja kûmbîtîkîîria, ngeeta mbiciithe kîeniine mwanka ûgoro bwa ntukû ya ithatû.

⁶Abaagu akëeja kûûria narîa ndî, ûmwîîre atîrî, ‘Daudi nî amberencere mwaa rûûtha rwa kûmatûkanga ntûûra yaao Bethlehemu, tontû kûrî na kîgongwana kîrîa kîritagwa o rîmwe mwaka kîa nja yaao yonthe.’

⁷Akëeja gwîtîkîîria ûntû bûu, nkeethîrwa ntî na thîîna, îndî akëeja kûthûûra, ûmenye ndî thîîneene.

⁸Tontû bûû, thithîria nthûûmba yaaku bwega wiigue kîaao tontû nîgwe weeka wîrane bûbûtheru na nthûûmba yaaku. Îndî nkëethîrwa ndî na ûthûûku, mbûraga gwengwa, tontû rî, nîkî gîgatûma ûmbikia kîrî abaagu ambûraga?”

⁹Jonathani aramûcokeria, “Gûkorokarîka ûu kîrî gwe! Ndîngî kûmenya atî baaba nî akûthûgaanîrîtie gûkûreteera ûthûûku, ntîngî gûkwîîra?”

¹⁰Rîu Daudi aramûûria atîrî, “Nûû ûkambîîra këethîra abaagu agûgûcokeria na ûng'eentu?”

¹¹Jonathani aramwîra atîrî, “Njû, twîte kîeniine.” Rîu bobaîrî bareeta kîeniine.

¹²Jonathani areera Daudi atîrî, “MWATHANI Mûrungu wa Israeli nî ae mûkûûjî weetû! Rîrîa nkaaria na baaba thaa ta iji rûûjû kana aûke, akëethîrwa atî na ûthûûku naagwe, ngatûmana ûmenyithue.

¹³Îndî baaba akëeja kwîthîrwa athûgaanîtie gûkûthithîria ûntû bûbûthûûku na nkärega gûkwîra, nîkenda wiciitha uuma ûgwatiine, MWATHANI nî anthithîrie bu. MWATHANI arokarania naagwe o ta ûrîa arakaranagia na baaba!

¹⁴Nkëeja gwîta na mbere gûtûûra mwoyo, mbonagia wendo bwa MWATHANI, na nkëeja gûkua;

¹⁵ ûkorogiita wendo bûû kuuma kîrî nja yaakwa mwanka kenya, kinya rîrîa MWATHANI akathiria anthû bonthe ba Daudi kuuma nthîgûrûûne.”

¹⁶Rîu Jonathani areeka kîrîkanîro na mûciî jwa Daudi akiugaga, “MWATHANI arokûrîîrîria kîrî anthû baaku gwe Daudi.”

¹⁷Jonathani aratûma Daudi aciîtia rîa jaîrî akîrikithagia atî nî amwendeete tontû Jonathani nî eendeete Daudi o ta ûrîa aaciendeete wengwa.

¹⁸Rîu Jonathani aramwîra atîrî, “Rûûjû nîrîo mambura ja kûguûka kwa mweri, na ûkamenyekana ûtîku tontû gîtî gîaaku gîtîîthîrwa gîkarîri nî muntû.

¹⁹Aûke gûkamenyeewa bwega atî ûtîku, naagwe wîîte antû arîa waiciithîte ntukû îrîa mantû jaaku jaaragua, ûkare wiciithîte nyuma ya kîthûmba kîa maiga.

²⁰Nkaratha mîgwî îthatû rûteere rwaakîo, ta muntû ûkûratha cabaa.

²¹Naani ngatûma nthûûmba yaakwa mîîre ûjû, ‘Îta ûgacwee mîgwî.’ Nkëeja kwîîra nthûûmba îîu, ‘Raithîîria, mîgwî îrî rûteere rwaaku, mîoje,’ rîu wîîje tontû o ta ûrîa MWATHANI atûûraga mwoyo, ûtîîthîrwa ûrî ûgwatiine.

²²Îndî nkëeja kûmîîra, ‘Raithîîria, mîgwî îrî mbere yaaku,’ wîîte tontû MWATHANI nî akûrekeretie ûciîtîra.

²³Mantûûne jau twaranîria ûûni naagwe, MWATHANI nîwe mûkûûjî weetû mwanka kenya.”

²⁴Rîu Daudi araiciitha kîeniine. Mambura ja kûguûka kwa mweri jagûkinya, mûnene arakara nthî meetheene nîkenda arîa.

²⁵Mûnene arakarîra gîtî kîaawe kîrîa kîrî akuî na rûthingo o ta ûrîa aathithagia. Jonathani nawe arakara mbere yaawe berekeene. Abuneri arakara nthî rûteere rwa Saûlû îndî gîtî kîa Daudi gîtaarî na muntû.

²⁶Îndî Saûlû gûtî u auga ntukû îîu, tontû athûgaanagia atî kûrî ûntû bwagirîîtie Daudi kana oomba kwîthîrwa arî na mûgiro.

²⁷Ntukû ya ijîîrî nyuma ya mambura jau, gîtî kîa Daudi gîtaarî na muntû. Saûlû arooria mûtaana waawe Jonathani atîrî, “Nîkî tontû mûtaana wa Jesii atîreeja kîathoone îgoro na naarua?”

²⁸Jonathani aracokeria Saûlû, “Daudi nî aramberencere mwaa rûûtha nîkenda eeta Bethlehemu.

²⁹Arambîîrîre mûee rûûtha eete nîûntû nja kwaao gûkeethîrwa kûrî na kîgongwana na mûtaana wa ng'ina nî aamûûrîtie eethîrwe arî o. Aambûria këethîrwa nî mwendeete mwîtîkîîrie eete akoone ataana ba ng'ina. Gîkî nîkîo gîtûmi atîreeja meetheene ya mûnene.”

³⁰Saûlû araakanwa nî mûthûûro nîûntû bwa Jonathani na aramwîra atîrî, “Gwe mwana wa mûka ntûrûtû na ndemi, ga ntîkûmenya ûthuurîte mûtaana wa Jesii, agwîkîrithia nthao, na eekîrithia nyakwe ûrîa waagûciarîre nthao?

³¹Tontû rî, îgiita rîonthe rîrîa mûtaana wa Jesii agatûûra mwoyo nthîgûrûûne, ûgwe kana ûnene bwaaku bûtîkororika. Tontû bûû, tûmana areetwe kîrî ni tontû no mwanka akue.”

³²Rîu Jonathani aracokeria îthe atîrî, “Nîmbi îgatûma ooragwa? Nîatîa athithîtie?”

³³Îndî Saûlû aramûgera îtumo akîendaga kûmûûraga. Rîu, Jonathani aramenya atî îthe nî aabangîte kûûraga Daudi.

³⁴Jonathani arookîîra kuuma au meetheene athûûri na ang'enti mono. Ataarîa biakûrîa ntukû îîu ya ijîîrî ya mambura ja kûguûka kwa mweri tontû nî aithikîîrîte nîûntû bwa Daudi, ûrîa îthe aarî akûmwîkîrithia nthao.

³⁵Rûnene rûkîîrî, Jonathani araumagara na areeta kîeniine arîa baarîkanîtie na Daudi bagacemania. Jonathani beetanîrie na kaîjî.

³⁶Areera kaîjî kau atîrî, “Ûgîa ûgacwee mîgwî îrîa nkûratha.” O ûrîa kaîjî kau kogîîte, araratha mûgwî mbere yaako.

³⁷Rîrîa kaîjî gaakinyîre arîa mûgwî jûrîa Jonathani aarathîte jwaarî, arageeta akiugaga, “Mûgwî jûrî mbere yaaku?”

³⁸Jonathani areeta kaîjî kau arakeera, “Ûgakarakara, thithangia na mpwîî.” Rîu kaîjî kau karoothûrania mîgwî na kareeta kîrî Jonathani, mwathi waako.

³⁹Îndî kaîjî kau gûtî u kaijî, tiga Jonathani na Daudi bonka bamenyaga ûrîa baabangîte.

⁴⁰Jonathani arakanenkera mathaga jaawe ja ndwaa na arakeera atîrî, “Îta ûjacokie ntûûreene.”

⁴¹Rîrîa kaîjî geetîre, Daudi, arokîîra kuuma au rûteere rwa kîthûûmba kîa maiga, aramama nthî na kîu atirithîtie ûthiû nthî. Ningî arenamîîra Jonathani maita jathatû, rîu baracûûncana bakîrîranagîra, îndî Daudi ararîra nkûrûki.

⁴²Rîu Jonathani areera Daudi atîrî, “Îta na ûkiri, tontû tûgûciîtanîria tu-baîrî riîtweene rîa MWATHANI, atî ‘MWATHANI ae mûkûûjî waaku naani, na kîrî nchiarwa ciaakwa na ciaaku mwanka kenya.’” Rîu Daudi arookîîra araciîtîra nawe Jonathani aracoka ntûûreene.