Read KIMERU BIBLE PROTESTANT EDITION 1Sam 21 Bible Online

1Sam 21 - KIMERU BIBLE PROTESTANT EDITION bible

1Sam 21

¹ Daudi areeta Nobu kîrî Ahimeleki mûthînjîri-Mûrungu. Ahimeleki araumagara kûmûthagaana agîteetemaga na aramûûria atîrî, “Nîkî tontû ûrî wenka, na gûtî ûngî bûreejania nawe?”

²Daudi aracokeria Ahimeleki mûthînjîri-Mûrungu atîrî, “Mûnene nî ambîrîte ûntû, ambîîra atîrî, ‘Ûkeera muntû kinya ûrîkû ûntû bûû ngûgûtûma ûthithia, bûu ndakwîrîra.’ Naani nî mbîkîte kîatho gîa gûtirimana na nthaka antû ana.

³Nandî, nîmbi ûrî nayo? Nenkera mîgaate îtaano, kana gîntû kîngî kîrîa ûrî nakîo.”

⁴Mûthînjîri-Mûrungu aracokeria Daudi aramwîra atîrî, “Ntî na mûgaate jûrîa tûrîîjaga ntukû ingî, îndî kûrî na mûgaate jûmûtheru bunka akî nthaka iu ciethîrwa itîthengereete aka.”

⁵Daudi aracokeria mûthînjîri-Mûrungu aramwîra atîrî, “Tûtîthengereete aka o ta ûrîa wîthîre bweetû bûkari rîrîa twîtîte ndweene. Mîîrî ya nthaka ciaakwa nî îmîtheru, na kinya naarua no ûu nkûrûki.”

⁶ Rîu, mûthînjîri-Mûrungu aramûnenkera mîgaate îrîa mîtheru, tontû gûtaarî na mîgaate îngî tiga îrîa yariti antû aatheru nîkenda îngî îrîa îrî na mwanki îîkwa o.

⁷Ntukû îîu nî kwaarî na muntû weetagwa Doegi ûmwe wa nthûûmba cia Saûlû. Aaingîri au mbere ya MWATHANI. Nawe aarî wa kuuma Edomu na aarî mûrûngamîîri wa arîîthi ba Saûlû.

⁸Daudi arooria Ahimeleki atîrî, “Ûrî na îtumo kana rûchiû aja? Nî ûntû ntîreejîre na rûchiû rwaakwa kana mathaga jaakwa ja ndwaa, tontû mantû jarîa mûnene areendaga nthithia, jararî ja mpwîî.”

⁹ Mûthînjîri-Mûrungu aramûcokeria atîrî, “Rûchiû rwa Goliathû Mûfilisti, ûrîa wooragîîre kîgwanthîîne kîa Ela, rûrî aja nî rwoogi na nguû rwekwa rûteere rwa efodi. Ûkëenda kûrûjûkia, rûjûkie tontû gûtî rûngî ndî naru.” Daudi arauga atîrî, “Gûtî rûngî ta rûu; nenkera ru.”

¹⁰Daudi araciîtîra, aramatûka Saûlû kuuma ntuku îu, areeta kîrî Akishi mûnene wa Gathi.

¹¹ Nacio nthûûmba cia mûnene Akishi iramwîra, “Ûûjû tî Daudi mûnene wa nthî Israeli? Ûjû tîwe barainaga mantû jamwegiî bakiugaga, Saûlû akûûraga ngîrî ciaawe, îndî Daudi akûûraga ngiri makûmi jaawe?”

¹² Daudi areeka nteto iu nkoroone yaawe, na arakîra Akishi mûnene wa Gathi mono.

¹³ Aragarûra mûkariî jwaawe mbere yaao, aracieethia ta muntû wa nthû. Nî aakurunyaga akîandîkaga mpingîro cia ntûûra na agîtûûraga mata jakenamania na kîreru kîaawe.

¹⁴Akishi areera nthûûmba ciaawe atîrî, “Ningî nî bûkwona muntû ûûjû arî na nthû? Nîkî bwamûreeta kîrî ni?

¹⁵Ka mbagîte antû ba nthû tontû bwandeetera muntû ûûjû eeja kûthithia mantû ja nthû mbere yaakwa? Muntû ûûjû agákûrûka nyomba yaakwa?”