Read KIMERU BIBLE PROTESTANT EDITION 1Sam 22 Bible Online

1Sam 22 - KIMERU BIBLE PROTESTANT EDITION bible

1Sam 22

¹ Daudi nî aaumîre kûrîa aarî Gathi, aramatûka gîkurunguune kîrîa kîaarî ntûûreene ya Adulamu. Rîrîa ataana ba ng'ina na antû ba mûciî jwa îthe baaigîrue naarîa aarî, nî beetîre kîrî we.

²O muntû wonthe ûrîa wanyamarîîtue na ûrîa waarî na îraandû na ûrîa ûtang'anîri, bonthe nî boothûranîre kîrî we. Antû bau bonthe baarî ûû ta antû magana jana (400), nawe Daudi araa mûtongeeria waao.

³Rîu Daudi nî aaumîre au areeta Mizipe ya Moabu na areera mûnene wa Moabu atîrî, “Îtû ndakûromba wîtîkîîrie baaba na ntîî beeje bakarage aja gwaaku mwanka rîrîa nkaamenya ûrîa Mûrungu akanthithîria.”

⁴Daudi aratiga aciari baawe bakaraga na mûnene wa Moabu na baratûûra nawe ntukû cionthe irîa Daudi aakarîre giciithoone.

⁵Ningî kîroria Gadi nî kîeerîre Daudi atîrî, “Ûgákara aja giiciithoone, ûmagara wîîte nthîgûrû ya Juda.” Daudi arookîîra areeta mwitûûne jwa Herethi.

⁶Saûlû nî aaigîrue atî Daudi na antû barîa aarî nabo baakûmenyeka kûrîa baarî. Rîu Saûlû aakari nthî Gibea rungu rwa mûgumo antû gwookîîrîte na agwete îtumo. Nthûûmba ciaawe cionthe nî ciarûngi imûthiûrûkîrîte.

⁷Saûlû areera nthûûmba iu ciarûngi imûthiûrûkîrîte atîrî, “Thikîîreeni, buî antû ba Benjamini! Mûtaana wa Jesii nîka akabwaa o bwinthe ithaka na miuunda ya mîzabibû? Ka akabweethia atongeeria ba antû ngiri ba ndwaa na bangî ba antû îgana ba ndwaa?

⁸Nîmbi tontû bwinthe bûgûnkunyanîra? Gûtî we weenu wambîîra rîrîa mûtaana waakwa baagwatanîre na mûtaana wa Jesii! Gûtî we weenu ûmbigîrîkua kîaao kana ambîîra atî mûtaana waakwa nî aûjîîrîte nthûûmba yaakwa înkabîra ûjû gûkari naarua?”

⁹ Rîu Doegi ûrîa wa kuuma Edomu, ûrîa warûngami akuî na nthûûmba cia Saûlû, arauga, “Nî ndoonîre mûtaana wa Jesii etîte Nobu kîrî Ahimeleki mûtaana wa Ahitubu.

¹⁰Ahimeleki arooria MWATHANI ûrîa Daudi abuîri kûthithia. Rîu aranenkera Daudi biakûrîa na rûchiû rwa Goliathû ûrîa Mûfilisti.”

¹¹Mûnene Saûlû nî aatûmanîîre mûthînjîri-Mûrungu Ahimeleki mûtaana wa Ahitubu, amwe na antû ba ndûgû ciaao cionthe barîa baarî athînjîri-Murungu kûu Nobu. Bonthe bareeta kîrî mûnene.

¹²Saûlû areera Ahimeleki atîrî, “Thikîîra mûtaana wa Ahitubu.” Ahimeleki aramûcokeria, “Nî nthikîîrîte mwathi waakwa.”

¹³Saûlû aramûûria, “Nîkî tontû ûûgwe na mûtaana wa Jesii bûnkunyanîrîte? Nîkî tontû wamûrûmîrie irio na ûramûnenkera rûchiû na wamûûrîria nkuagaya kîrî Mûrungu? Rîu nî angarûkîte aambîrîria gûnkabîra ûjû gûkari naarua.”

¹⁴Rîu Ahimeleki aracokeria mûnene atîrî, “Gûtî ûngî kîrî nthûûmba ciaaku cionthe mwîtîkua ta Daudi. Nî mûthoni waaku na nî mûtongeeria wa asikarî barîa bagûkaragia na ningî nî eekîîri mono nî antû ba mûciî jwaaku.

¹⁵Nî mma naarua tîrîo rîaakwa rîa mbere kûûria Mûrungu nkuagaya nîûntû bwa Daudi. Tontû bûû, mûnene ûkánthûgaanîria ûntû bûbûthûûku ni nthûûmba yaaku kana ûthûgaanîria antû ba ndûgû ciaakwa, nîkwîthîrwa ntamenya noo mbi yegiî mûbango jûu jwa gûkûthiria.”

¹⁶Rîu mûnene areera Ahimeleki atîrî, “Gûtî nkaanja, no mwanka ûûragwe, amwe na antû ba ndûgû cieenu.”

¹⁷Saûlû areera akaria baawe barîa barûûngami bamûthiûrûkîte atîrî, “Ûrageni athînjîri-Mûrungu ba MWATHANI, tontû kinya bo nî baragwatanîîre na Daudi na bataambîîra Daudi nî aamatûkîre kinya këethîra nî baamenyaga mantû jau.” Îndî akaria ba mûnene bararega kûûraga athînjîri-Mûrungu ba MWATHANI.

¹⁸Rîu mûnene Saûlû areera Doegi oorage athînjîri-Mûrungu. Tontû bûû, Doegi ûu wa kuuma Edomu, arabooraga. Ntukû îîu ooragîre athînjîri-Mûrungu mîrongo înaana na bataano (85) barîa beekagîra nguû yeetagwa efodi.

¹⁹Saûlû aracoka araathana atî antû ba Nobu, ntûûra îrîa athînjîri-Mûrungu baatûûraga booragwe bonthe: arûme na aka, na twaana na tûkeenke, na ng'ombe na ntigiri na ng'ondu.

²⁰Îndî ûmwe wa ataana ba Ahimeleki weetagwa Abiathari aramatûka areeta kîrî Daudi.

²¹Abiathari areera Daudi ûrîa Saûlû aarî akûûraga athînjîri-Mûrungu ba MWATHANI.

²²Daudi aramûcokeria aramwîra atîrî, “Ntukû îrîa ndoonere Doegi, Mûedomu arî o, nî ndaamenyere atî gûtî nkaanja akeera Saûlû. Tontû bûû, nî ni ntûmîte antû ba mûciî jweenu bonthe booragwa.

²³Kara amwe naani na ûkáigua ûguaa. Saûlû nî akwenda gûtûûraga tu-baîrî; ûûgwe na ûûni. Îndî wakara amwe naani, ûtîîthîrwa ûrî ûgwatiine.”