Read KIMERU BIBLE PROTESTANT EDITION 1Sam 23 Bible Online

1Sam 23 - KIMERU BIBLE PROTESTANT EDITION bible

1Sam 23

¹Daudi nî eerîrwe atî Afilisti nî bakwithûkîra antû ba ntûûra ya Keila, na nî bakwiya irio birîa biaarî matîîriine.

²Rîu Daudi araromba MWATHANI akîûragia atîrî, “Mbîte nkaithûkîre Afilisti baba?” MWATHANI aramûcokeria, “Îî nthiî ûkarwee na Afilisti nîkenda ûtunyûkia ntûûra ya Keila.”

³Îndî asikarî ba Daudi baramwîra, “Gûkëethîrwa tûrî na ûguaa ûjû tûrî Juda, tûkaigua ûguaa bûng'ana tûkëeja gwîta Keila kûrwaa na njûûrî cia Afilisti?”

⁴Daudi araromba MWATHANI nkuagaya kaîrî. MWATHANI aramûcokeria atîrî, “Ûkîîra wîname Keila, nîûntû ngatûma ûûmbe Afilisti.”

⁵Rîu Daudi na asikarî baawe bareeta Keila na bararwaa na Afilisti. Barooraga Afilisti babaingî mono na barataa nyomoo ciaao cia ndîîthia. Ûu nîu Daudi aatunyûkîrie antû ba ntûûra ya Keila.

⁶Rîrîa Abiathari mûtaana wa Ahimeleki aamatûkîre, nî ajûkîrie nguû ya efodi areeta nayo kîrî Daudi kûu Keila.

⁷Saûlû akûmenya atî Daudi arî Keila nî augîre atîrî, “Mûrungu akûmûnenkanîra kîrî ni. Akwigwatithia wengwa tontû agûkûrûka ntûûra îrî na rûthingo na mpingîro îndiku.”

⁸Rîu Saûlû areeta asikarî baawe bonthe nîkenda beenama Keila bacîgîîria na baithûkîra Daudi na antû baawe.

⁹Rîrîa Daudi aamenyere atî Saûlû nî akûbanga ûrîa akamwithûkîra, areera Abiathari mûthînjîri-Mûrungu amûnenkere nguû îrîa ya efodi.

¹⁰Daudi araromba akiugaga atîrî, “Îgwe MWATHANI Mûrungu wa Israeli, ni nthûûmba yaaku nî mbigîîtue na mma atî Saûlû nî aabangîte kwîja ntûûra ya Keila, nîkenda amînyangia nîûntû bwaakwa, ni nthûûmba yaaku.

¹¹O u nî mma Saûlû akeeja o ta ûrîa ni nthûûmba yaaku mbigîîtue? Itû MWATHANI Mûrungu wa Israeli mbîîra ni nthûûmba yaaku.” MWATHANI aramûcokeria, “Nî mma akeeja.”

¹²Rîu Daudi areeta na mbere kûromba akîûragia atîrî, “A antû ba Keila bakanenkanîra na banenkanîre antû baakwa kîrî Saûlû?” MWATHANI aramûcokeria, “Îî bakabûnenkanîra.”

¹³Rîu Daudi na asikarî baawe ûû ta magana jatantatû, barauma Keila baraciîtîra. Rîrîa Saûlû aaigîrue atî Daudi akûmatûka auma Keila, aratigana na mûbango jwa gwîta kwithûkîra ntûûra îîu.

¹⁴Daudi arakara aiciithîte rwanda kûu nthî ya Zifu îrîa yaarî ya irîma. Saûlû nî ageragia kûmûcwaa ntukû cionthe îndî Mûrungu atanenkanîra Daudi kîrî we.

¹⁵Daudi araigua ûguaa akwona atî Saûlû nî akûmûcwaa amûûraga. Îgiita rîu Daudi aarî rwanda rwa Zifu akuî na Horeshi.

¹⁶Rîu Jonathani, mûtaana wa Saûlû, areeta kîrî Daudi kûu Horeshi. Ningî aramwîkîra inya akîmwîraga atî Mûrungu nî amûkarîtie,

¹⁷Areeta na mbere kûmwîra atîrî, “Ûkáigua ûguaa, tontû baaba Saûlû atîûmba gûkwona akûthithîria bûbûthûûku. Nî akûmenya na mma atî nîgwe ûkaa mûnene wa Israeli naani nî ni nkaa mûnini waaku.”

¹⁸ Daudi na Jonathani bareekanîra kîrîkanîro kîa gûtûûra barî acoore mbere ya MWATHANI. Rîu Jonathani araana nja kwaao na Daudi aratigwa kûu Horeshi.

¹⁹ Antû barîa batûûraga Zifu bareeta kîrî Saûlû kûu Gibea na baramwîra atîrî, “Nî mma Daudi nî aciithîte gweetû Horeshi, kîrîmeene kîa Hachila rûteere rwa ûmotho rwa rwanda rwa Jeshimoni.

²⁰Rîu njû ûthithie ûrîa ûkwenda, înama wîîje nthî yeetû naatuî tûkamûnenkanîra kîrî gwe!”

²¹Saûlû arabacokeria arabeera atîrî, “MWATHANI arobûtharima nîûntû bwa kûmbîîra!

²²Îteeni bûtuîrie o kaîrî na bûmenye gûntû kuungwa kûrîa arî na bûmenye këethîra kûrî muntû ûmwonete kûu. Nîkwîthîrwa nî mbigîîtue atî nî muntû ûrî na ûûme bwa kûthithia mantû mono.

²³Ningî bûraithîrie bwega bûmenye nîkû kuungwa aiciithaga. No mwanka bwîîje bûmenyithie mantû jataarîrîtie. Rîu, nîrîo ngeetania naabuî, na ëethîrwa arî gûntû kûu, nkamûcwaa kunthe kîrî antû ba nthîgûrû ya Juda.”

²⁴Tontû bûû bareetaga Zifu mbere ya Saûlû. Îgiita rîu Daudi na antû baawe nabo baarî rwanda rwa Maoni, Kîgwanthîîne kîa Araba kîrîa kîrî rûteere rwa ûmotho bwa Jeshimoni.

²⁵Nyumeene Saûlû na asikarî baawe bareeta gûcwaa Daudi. Rîrîa Daudi eerîrwe, areeta gûkara rwaareene rwa iiga kûu rwanda rwa Maoni. Saûlû akwigua ûu, arathingatana nawe akîmûcwaga.

²⁶Saûlû amwe na asikarî baawe baarî rûteere rûmwe rwa kîrîma nawe Daudi na asikarî baawe rûteere rûngî. Daudi na asikarî baawe nî baaciûmîtie bamatûka, tontû Saûlû na asikarî baawe nî baarî akuî kûbagwata.

²⁷O kagiita kau, muntû watûmi areeta kîrî Saûlû aramwîra atîrî, “Coka ntûti tontû Afilisti bakwîthûkîra nthîgûrû yeetû.”

²⁸Tontû bûû, Saûlû aratiga kwîngana na Daudi, aracoka kûrwaa na Afilisti. Antû au areetwa Iiga rîa gwitiira.

²⁹Kuuma au Daudi araitia Enigedi arakara ku aiciithîte.