Read KIMERU BIBLE PROTESTANT EDITION 1Sam 24 Bible Online

1Sam 24 - KIMERU BIBLE PROTESTANT EDITION bible

1Sam 24

¹Rîrîa Saûlû aacokîre aumîte kurwaa na Afilisti, nî eerîrwe atî Daudi arî rwanda rwa Enigedi.

²Nawe arajûkia antû baataare ngiri ithatû kuuma Israeli yonthe, areeta gûcwaa Daudi na antû baawe akuî na kûrîa gwîtagwa Maiga ja mbûri cia kîthaka.

³Beetîte barakinya antû kwaarî na nkanata cia ng'ondu. Antû au nî kwaarî na gîkurungu na Saûlû aratonya ku nîkenda aiteethia. Kûreethîrwa gîkurunguune kîu ndeene buru nîku Daudi na antû baawe baiciithîte.

⁴Rîu antû barîa baarî amwe na Daudi baramwîra atîrî, “Ntukû îîgûkinya îrîa MWATHANI aakwîrîte bwaayo, atîrî ‘Nkanenkanîra mûnthû waaku kîrî gwe, naagwe ûmûthithîrie o ûrîa ûkeenda.’” Daudi arookîîra areeta aceemeete, aragiita gîchoora kîa nguû ya Saûlû.

⁵Îndî nyumeene, Daudi araambîrîria kûthaangîka nkoroone nîûntû bwa kûgiita gîchoora kîa nguû ya Saûlû.

⁶Rîu Daudi areera antû baawe atîrî, “MWATHANI arongwata ni, ntîkeeje kûthithîria mwathi waakwa, mwîtûûrîrua maguta wa MWATHANI, ûntû bûbû; mûringithia na njara ciaakwa, nîûntû nî mwîtûûrîrua maguta wa MWATHANI.”

⁷Tontû bûû, Daudi ararigîîria antû baawe akîboonagia bakaithûkîra Saûlû. Saûlû nî ookîrîîre na araumagara gîkurunguune araciîtîra.

⁸Rîu Daudi kinya we nî ookîrîîre araumagara gîkurunguune na arathingatia Saûlû kajû, arauga, “Mwathi waakwa mûnene!” Rîrîa Saûlû aciûgûrîre, Daudi araturia maru, na areenamîîria ûthiû bwaawe mwanka nthî, aramwaa gîtîîo.

⁹Nyuma aramûûria, “Nîmbi îgûtûma wîîtîkia nteto cia antû barîa bagûkwîra atî Daudi nî agûcwaa gûkûthithîria ûthûûku?

¹⁰Naarua cionere wengwa ûrîa MWATHANI agûkûnenkanîrîte njareene ciaakwa rîrîa ûgûkarî gîkurunguune. Antû bamwe bambîîra nkûûrage, îndî ndarega gûkûûraga, ndauga, ‘Ntîûmba kûûraga mwathi waakwa, tontû nîwe mûnene ûrîa waaki maguta nî MWATHANI.’

¹¹Û tega itû baaba! Raithîîria woone gîchoora kîa rwambambio rwaaku, kîrîa ngiitîre antû a nkûûraga. Gîkî nî gîa gûkwonia atî ntî na mûbango jwa gûkûthithîria ûntû bûbûthûûku kana kûthûûkia waathani bwaaku. Ni ntîkûthûûkîtie kinya këethîra nî ûgûcwaa kûmbûraga.

¹²Ndiuga atî MWATHANI nîwe ûkagiita îgamba, oone nûû gatîgatî gaaku naani ûthûûkîtie. MWATHANI nîwe ûkandîîria îndî na bwaakwa ni ntîkorokûthithîria ûntû bûbûthûûku.

¹³Ririkana njuno ya karaja îrîa yugaga, ‘Ûthûûku bûthithagua nî antû barîa bathûûku.’ Îndî ni ntîkûthithîria ûntû bûbûthûûku.

¹⁴ Nandî rî, ûûni ndî ûû wa kûthingatwa nî mûnene wa Israeli akîenda kûmbûraga? Tîu nkari ta kurû înkuû kana kîroboto!

¹⁵MWATHANI nîwe ûgatwathûrana ûûni na ûgwe, agiite îgamba auge nî ûrîkû weetû ûthûûkîtie. MWATHANI nîwe ûgategeera mantû bwega nîkenda ankaria na antunyûkia kuuma kîrî gwe.”

¹⁶Daudi akûthiria kwaria nteto iu, Saûlû aramûûria, “Nî gwe wengwa ûkwaria mûtaana waakwa?” Rîu Saûlû arambîrîria kûrîra.

¹⁷Saûlû areera Daudi, “Gwe ûrî ûmwagîru nkûrûki yaakwa, tontû nî ûnthithîrîtie mantû jameega, îndî ni nkûthithîrîtie mantû jamathûûku.

¹⁸Naarua ûkwonania ûrîa ûnthithagîria bwega. Tontû ûtîmbûragîre rîrîa MWATHANI anenkanîîre kîrî gwe.

¹⁹Nî mma rîrîa muntû aagwatithania mûnthû waawe atîmûrekagîîria aciîtîra atîmûûragîte. Tontû bûû, MWATHANI arokûtharima nîûntû bwa ûrîa wanthithîria naarua.

²⁰Nandî, nî nkûmenya na mma atî nîgwe ûkaa mûnene wa Israeli, na atî nîgwe ûgeetithia ûnene bwa Israeli na mbere.

²¹Rîu itû nciîtîria riîtweene rîa MWATHANI ûmbîîre atî ûtîthiria nchiarwa ciaakwa mbîja kûrîria buru mûciîîne jwa Baaba.”

²²Tontû bûu, Daudi aramûciîtîria. Rîu Saûlû araana mûciî kwaawe, na Daudi na antû baawe baracoka kûrîa baiciithaga.