Read KIMERU BIBLE PROTESTANT EDITION 1Sam 25 Bible Online

1Sam 25 - KIMERU BIBLE PROTESTANT EDITION bible

1Sam 25

¹Samueli arakua. Aisraeli bonthe baroothûrana, baraithikîîra nîûntû bwa gîkuû kîaawe, baracoka baramûthika nja yaawe kûu Rama. Rîu Daudi arenama na areeta gûkara rwanda rwa Maoni.

²Kûu Maoni, nî kwaarî na muntû ûmwe warîthagia ndîîthia ciaawe akuî na ntûûra ya Karimeli. Nawe aarî gîtonga mono tontû nî aarî na ng'ondu ngiri ithatû (3,000) na mbûri ngiri îmwe (1,000). Îgiita rîu nî eenjaga ndîîtha ciaawe.

³Muntû ûu eetagwa Nabali nawe aarî wa mwîrîga jwa Kalebu. Nî aarî na mwekûrû ûmûthongi mono na ûmûûme weetagwa Abigaili. Îndî Nabali aarî muntû ûmûûî na wa ngoga.

⁴Daudi arî bûûrîîne, nî aigîîrue atî Nabali nî akwenja ndîîthia ciaawe.

⁵Tontû bûu aratûma nthaka îkûmi ciîta Karimeli kîrî Nabali kûmûkeethia,

⁶na bamwîra atîrî, “Daudi agûgûkeethia na akûrombera akiugaga ‘Thîîrî îtûûrage kîrî gwe na kîrî antû ba mûciî jwaaku na kîrî birîa bionthe ûrî nabio.’

⁷Nî araigîrue atî nî ûkwenja ndîîthia. Nî agûkûmenyithia arîîthi baaku nî barakaraga amwe naatuî, na atî tûtaabathithîria ûntû bûbûthûûku na gûtîbio biaao biaiwa kagiita kau konthe barakarîte Karimeli.

⁸Ûûria nthaka ciaaku nacio igakwîra. Nandî nî ngûkûromba ni Daudi mûtaana waaku amwe na nthûûmba iji ciaakwa ûtûthithîrie bwega ntukû îîjî beeja ya kîatho, ûbanenkere o kîrîa ûrî nakîo gîa kûrîa.”

⁹Antû bau bareeta na bareera Nabali ntûmwa îrîa baatûmi nayo nî Daudi. Rîu bareeteera.

¹⁰Nabali arabacokeria atîrî, “Daudi nûû? Mûtaana ûu wa Jesii nûû? Ntukû iji kûrî na nthûûmba inyiingî irîa imatûkîte kuuma kîrî athani baacio.

¹¹Ntîûmba kûjûkia mîgaate, na rûûjî na nyama irîa nthînjîrîte barîa bagûmpenjera ndîîthia nenkera antû ntîkûmenya kûrîa baumîte!.”

¹²Tontû bûû, nthaka iu cia Daudi iracoka na iramwîra ûrîa Nabali aabacokerie.

¹³Rîu Daudi arabeera atîrî, “O muntû nî acioge rûchiû rwaawe!.” Baraicioga, na kinya Daudi araicioga rûchiû rwaawe. Nabo baarî asikarî ta magana jana (400) barîa beetanîrie na Daudi, na barîa batigîrwe bakarîtie into biaao baarî magana jaîrî (200).

¹⁴Kagiiteene kau mûthaka ûmwe areera Abigaili, mwekûrû wa Nabali atîrî, “Daudi nî agûtûmîte nthûûmba ciaawe kuuma naarîa rwanda beeja gûkeethia na kwaria na mwathi weetû, îndî we abaruma.

¹⁵Ûmenye antû bau nî baatûmenyereere mono rîrîa twaarî nabo rwanda. Batatûthithîria ûntû bûbûthûûku kana gîntû kinya kîmwe gîeetû kîûra, tontû nî baatûkarîtie.

¹⁶Nabo baatûkaragia ûtukû na mûthenya îgiita rîonthe rîrîa twaarîîthîtie nthîthia.

¹⁷Nandî rî, itû thûgaania mantû jau na woone nîatîa ûkathithia. Tontû mantû ta jaja joomba kûreteera mwathi weetû thîîna amwe na antû ba nja yaawe bonthe. Nawe nî muntû ntîîrîka, gûtî we oomba kûthikîîra.”

¹⁸Rîu Abigaili arajûkangia mîgaate magana jaîrî (200), na ikiri biîrî bia ndibei na ng'ondu ithaano inthînje, na itheti biîrî bia mpîndî inkarange. Ningî arajûkia imaanja îgana (100) bia nzabibû injûmo na biûmbwa magana jaîrî bia nkûû impûmie. Araîkia ntigiri into biu bionthe,

¹⁹na areera nthaka ciaawe atîrî, “Îtageni bûrî mbere naani mbîjage ndî nyuma yeenu.” Îndî gûtî u eera mûkûrû waawe Nabali.

²⁰Rîrîa eetîte akarîrîte ntigiri yaawe, nî aakinyîre antû kwathiîki nî kîrîma. O rîo aratirimana na Daudi na antû baawe beetîte rûteere rûrîa aaumîte.

²¹Daudi nî aarî agûciîra atîrî, “Tuuge nî ngûgî ya ûtheri ndîraritaga gûkaria into bia muntû ûûjû bûûrîîne na gûtî noo kîmwe kîa bio kîaûra? Tega rîu andîa wega na ûthûûku!

²²Mûrungu nî ambûrage këethîra ntîthîrwa ndîkûûraga arûme baawe bonthe mbere ya gûkea rûûjû.”

²³Rîrîa Abigaili oonere Daudi, arakinya nthî na mpwîî kuuma kîrî ntigiri araigwîthia nthî akuî na magûrû ja Daudi, eenîkîte ûthiû bwaawe kwonania gîtîîo.

²⁴Aramwîra atîrî, “Itû mwathi waakwa, nthikîîra ni nthûûmba yaaku tontû ûthûûku bunthe nî ni nkaîra.

²⁵Ûkánogua mathûgaanio jaaku nî muntû ûûjû Nabali, tontû nî muntû ûrî mîkariî îmîthûûku na nî kîaa o ta ûrîa riîtwa rîaawe riugaga. Îndî ûmenye atî ni ntîroonere nthaka irîa ûratûmîte.

²⁶Nandî mwathi waakwa, menya atî MWATHANI ûrîa ûtûûraga mwoyo na ûrîa ûgwîkîte mwoyo, nîwe ûtwîre akûrigîrîtie ûtîkairîîrie na ûûraga anthû baaku. Nî nkûromba MWATHANI nkiugaga anthû baaku na bonthe barîa bakûthûgaanagîria ûthûûku barokanûkua o ta ûrîa Nabali agakanûkûa.

²⁷Ndî na kîewa, itû mwathi waakwa gîîtîkîre kînenkerwe nthaka ciaaku irîa ikûthingatîte.

²⁸Ndakwerenca ûndekere maatia jaakwa ni nthûûmba yaaku ya mûka. Ndî na mma atî ûkajûkia ûnene amwe na nchiarwa ciaaku, tontû bûû ndwaa irîa gwe ûkûrwa nî cia MWATHANI. Naagwe ûtîkorothithia ûntû bûbûthûûku ûtûûro bwaaku bunthe.

²⁹Muntû kinya ûrîkû akëeja kwîngana naagwe akîendaga gûkûûraga, MWATHANI Mûrungu waaku agagûkaria o ta ûrîa muntû akaragia into biaawe birîa birî gîtûmi mono. Îndî anthû baaku akabata kûraja o ta ûrîa muntû ateejaga nthûûngû na gîkûtha.

³⁰Rîrîa MWATHANI akoojûria jonthe jarîa akwîrîrîte, akûthithîrie bwega na akweethie mûnene wa Israeli,

³¹Mwathi waakwa ûtîîthîrwa ûrî na ûntû bwa gûtûma withikîîra kana bwa kwigambithîria ûthîîna nkoroone yaaku, tontû ûtîîthîrwa ûraganîte gûtî na gîtûmi kana wîthîrwa ûrairîîria gwengwa. Nîu rîrîa MWATHANI agakûtharima, ûkórîrua nî ni nthûûmba yaaku.”

³²Rîu Daudi areera Abigaili atîrî, “MWATHANI Mûrungu wa Israeli arokumua, we wagûtûma ûtirimana naani naarua!

³³MWATHANI arokûtharima na akatharima mathûgaanio jaaku tontû nî jameega. Nî bwega watûma ntiga kûûragana ndirîîria ningwa.

³⁴Nî ngûciîtia riîtweene rîa MWATHANI Mûrungu wa Israeli ûrîa ûtûûraga mwoyo, we ûrîa ûndigîrîîrie ntîrabûthiria. Këethîra tîka ûûgîangîre weeja gûtirimana naani, na mma ndîngîûraga antû ba Nabali bonthe gûgîkinya rûûjû rûkîîrî.”

³⁵Nîu Daudi areetîkîîria kûjûkia birîa Abigaili aamûreterete na arauga atîrî, “Aana gwaaku na thîîrî na ûkámaka tontû ndîkwigua na ngakûthithîria jau wambîîra.”

³⁶Abigaili agûcoka nja areethîra Nabali arî na kîatho gîkînene, ta kîa mûnene. Nabali nî agwîrîtue mono na nî oogiti. Abigaili ararega kûmwîra no atîa mwanka kûrakea rûûnene rûkîîrî.

³⁷Gûgûkîa rûûnene rûkîîrî, Nabali areethîrwa akwogitûka. Abigaili, mwekûrû waawe, aramwîra mantû jonthe. Tontû bûu Nabali araringwa nî nkoro na aroonja mwîrî.

³⁸Nabali agûkara antû a ntukû îkûmi aajîtue, MWATHANI araingîyia mûrimo, nawe Nabali arakua.

³⁹Rîrîa Daudi aaigîrue Nabali agûkua, arauga atîrî, “MWATHANI arokumua, we ûrîa wandîîria kîrumi kîrîa Nabali aandumîre na andigîîria ni nthûûmba yaawe ntîrathithia ûthûûku. MWATHANI agûkanûkia Nabali tontû bwa ûthûûku bwaawe.” Rîu Daudi aratûmana kîrî Abigaili akîmûûragia ae mwekûrû waawe.

⁴⁰Rîrîa nthûûmba cia Daudi cieetîre Karimeli kîrî Abigaili baramwîra atîrî, “Daudi atûtûma kîrî gwe nîkenda tûkwîjîra waa mwekûrû waawe.”

⁴¹Abigaili arookîîra na arenamîîria na aratiirithia ûthiû bwaawe nthî, arauga atîrî, “Ni nthûûmba yaawe no nthambagie magûrû ja nthûûmba ciaawe.”

⁴²Rîu Abigaili araithuranîra na mpwîî, amwe na aarî batano barîa baamûmenyagîîra. Araitia ntigiriine yaawe areetania nabo athingatîte antû barîa baatûmi nî Daudi, na kuuma rîu araa mûka wa Daudi.

⁴³Daudi aracoka aragûra Ahinoamu kuuma Jezereeli nabo bo baîrî baraa aka baawe.

⁴⁴ Kagiiteene kau Saûlû nî aarî akûnenkanîra Mikali mwarî waawe, ûrîa waarî mûka wa Daudi, kîrî Paliti mûtaana wa Laishi wa kuuma ntûûra ya Galimu.