Read KIMERU BIBLE PROTESTANT EDITION 1Sam 26 Bible Online

1Sam 26 - KIMERU BIBLE PROTESTANT EDITION bible

1Sam 26

¹ Rîu antû ba kuuma nthî ya Zifu bareeta kîrî Saûlû kûu Gibea, baramwîra atîrî, “Daudi nî aiciithîte kîrîmeene kîa Hachila kîrîa kîerekene na Jeshimoni.”

²O rîu, Saûlû amwe na asikarî ngiri ithatû (3,000) barîa bathuuri bareenama rwanda rwa Zifu gûcwaa Daudi.

³Saûlû araamba kambî kîrîmeene kîa Hachila kîrîa kîerekene na Jeshimoni rûteere rwa njîra. Daudi nî aarî rwanda rûu. Akûmenya Saûlû agûkinya kûu akîmûcwaaga,

⁴nî aatûmîre achûnkûûni, nabo baramenya nî mma Saûlû nî aarî nao.

⁵Rîu Daudi areeta antû au Saûlû aambîte kambî, na areethîra Saûlû na Abuna mûtaana wa Neri, ûrîa waarî mûtongeeria wa njûûrî cia Saûlû bamami. Saûlû aamami kambîîne ndeene na asikarî baawe barî oome bamûthiûrûkîrîte.

⁶Daudi arooria Ahimeleki, ûrîa Mûhiti, na Abishai mûtaana wa ng'ina wa Joabu, ûrîa ng'ina eetagwa Zeruia, atîrî, “Kîrî buî bu-baîrî rî, nî ûrîkû ûgeetania naani kambîîne ya Saûlû?” Abishai aramûcokeria, “Ngeetania naagwe.”

⁷Tontû bûû, Daudi na Abishai bareeta ûtukû bûu kambîîne ya Saûlû. Bareethîra Saûlû amami ndeene na îtumo rîaawe rîmuntîîri nthî akuî na kîongo kîaawe. Abuna na asikarî bau bangî nabo nî baamami bamûthiûrûkîte.

⁸Rîu Abishai areera Daudi atîrî, “Mûrungu akûnenkanîra mûnthû waaku kîrî gwe naarua. Tontû bûû, nandî mbîtîkîîria mûmuuntanîrie nthî na îtumo; nkamûmunta îmuunta rîmwe rîonka, na tî jaîrî.”

⁹Îndî Daudi aracokeria Abishai atîrî, “Ûtîbuîrîte kûmûûraga tontû gûtî we ûûmba kûûraga mwîtûûrîrua maguta wa MWATHANI arega gûkanûkua.”

¹⁰Daudi aracoka arauga atîrî, “MWATHANI ûrîa ûtwîîre mwoyo wengwa nîwe ûkamûûraga, kana akue îgiita rîaawe rîa gûkua rîakinya, kana akuîre ndweene.

¹¹ MWATHANI akorondekeeria mbûraga mwîtûrîrua maguta waawe. Îndî ga tûjûkie îtumo rîaawe na gîkiri kîaawe kîa rûûjî twîte.”

¹²Rîu Daudi arajûkia îtumo na gîkiri kîa rûûjî baraciîtîra. Bio biîrî biaarî akûî na kîongo gîa Saûlû. Gûtî muntû wa Saûlû kinya ûmwe woonîre kana amenya ûrîa gwakarîkîre kana ookîîra, tontû bonthe nî bamami toro îndito îrîa MWATHANI aatûmîte bamama.

¹³Daudi nî aaunûkîrie areeta rwongo rûrîa rûngî rwa kîguuru, araitia kîrîmeene îgûrû gataaria na njûûrî ya Saûlû.

¹⁴Daudi areeta njûûrî na Abuneri mûtaana wa Neri, na kajû gakanene akiugaga, “Abuneri, ka ûtîkûmbîtîka?” Rîu Abuneri aramûcokeria, “Nûû ûu ûgwîtana agîûkagia mûnene?”

¹⁵Daudi aramûcokeria aramwîra, “Abuneri, ka ûrî ntomûrûme ûkari? Kûrî ûngî taagwe ndeene ya Israeli? Nîatîa îndî, ûtîgûkarîtie mwathi waaku mûnene rîrîa muntû ûmwe akwîjîte kûmûûraga?

¹⁶Ûntû bûu wathithia tî bûbwega. Ndîciîtia na MWATHANI ûrîa ûtûûraga mwoyo atî baabuî bûbuîrîte kûûragwa bwinthe, tontû nî bûremi nî gûkaria mwathi weenu, mwîtûûrîrua maguta wa MWATHANI. Nandî rî, rîrîkû îtumo rîa mûnene na gîkiri kîa rûûjî kîrîa gîgûkari akuî na mûtwe jwaawe?”

¹⁷Saûlû aramenya atî kajû kau kaarî ka Daudi na aramûûria atîrî, “Daudi, nî kajû gaaku kau mwana waakwa?” Daudi aramûcokeria, “Îî nî kajû gaakwa mwathi waakwa mûnene!”

¹⁸Daudi aramûûria, “Nîmbi îgûtûma mwathi waakwa wingana na nthûûmba yaaku? Nîka nthithîtie atîa? Nî ûthûûku bûrîkû ndî nabu?

¹⁹Nandî mwathi waakwa mûnene, nî athikîîre ûrîa nthûûmba yaawe îkuuga. Gûkëeja kwîthîrwa nî MWATHANI ûgûûkaûkîtie ûrwaa naani, nî eetîkîîrie mûritîre kîewa. Îndî gûkëeja kwîthîrwa nî antû batûmîte ûthithia ûjû, baroogwatwa nî kîrumi kîa MWATHANI. Nîkwîthîrwa nî bampîngîte kuuma mbûragoone îrîa twaaerwe nî MWATHANI bambîîra mbîte ngatumîkîre mîrungu îngî.

²⁰Nandî itû ûkáreka nkuîra kwaitha, kûraaja kuuma ûkarieene bwa MWATHANI. Nîmbi îgûtûma gwe mûnene wa Israeli ûncwaa ni ûrîa nkari ta ndathi, ûmbûraga. Nîkî tontû ûkûnthooga ta nkanga ûkûthooga irîmeene?”

²¹Rîu Saûlû aramwîra, “Ni nî nthûûkîtie. Coka mûtaana waakwa Daudi. Ntîkorokûthithîria ûntû bûbûthûûku kaîrî, tontû gwe ûtîrambûraga naarua. Ni ndîraarî kîaa na nî nthûûkîtie mono.”

²²Daudi aramûcokeria, “Îtumo rîaaku rîrî aja gwe mûnene. Tûma ûmwe wa nthaka ciaaku arîjîre.

²³MWATHANI nî arîaga o muntû nîûntû bwa waagîru na gwîtîkîka kwaawe. Naarua MWATHANI nî agûkûnenkanîrîte kîrî ni, îndî ntîkûthithîîrie ûntû bûbûthûûku nîûntû gwe ûrî mwîtûrîrua maguta wa MWATHANI.

²⁴Atîrî, o ta ûrîa mbonere ûtûûro bwaaku bûrî bwa gîtûmi ndakûrekeeria naarua, MWATHANI aroona ûtûûro bwaakwa bûrî na gîtûmi akambonokia kuuma mîthangîkoone yonthe.”

²⁵Rîu Saûlû areera Daudi atîrî, “MWATHANI arokûtharima mûtaana waakwa Daudi. Ûroombanaga mantûûne jonthe jarîa ûkathithia!” Rîu Daudi araciîtîra bwaawe, nawe Saûlû araana nja kwaawe.