Read KIMERU BIBLE PROTESTANT EDITION 1Sam 27 Bible Online

1Sam 27 - KIMERU BIBLE PROTESTANT EDITION bible

1Sam 27

¹Daudi araciîra atîrî, “Ntukû îmwe Saûlû akambûraga. Nî kaaba nkamatûka ngeeta nthîgûrû ya Afilisti. Rîu Saûlû oomba kûnoga nî gûncwaa nthîgûrû ya Israeli, naani nkonoka kuuma kîrî we.”

²Tontû bûû, Daudi amwe na antû baawe magana jatantatû (600) barîa baarî amwe nawe bareeta kîrî Akishi mûtaana wa Maoki, mûnene wa Gathi.

³Daudi na arûme barîa baarî amwe nawe amwe na mîciî yaao baratûûra Gathi kûrîa mûnene Akishi aatwîîre. Daudi nî aarî na eekûrû baawe bobaîrî; Ahinoamu wa kuuma Jezereeli na Abigaili, ntigwa ya Nabali, kuuma Karimeli.

⁴Rîrîa Saûlû eerîrwe atî Daudi akûmatûka eeta Gathi, atamûcwîre kaîrî.

⁵Daudi areera Akishi atîrî, “Ûkëeja kwona kwagîrîte, mpa ntûûra îmwe ya nthî yaaku ntûûre ku. Tontû ni nthûûmba yaaku ntîkwona kûrî na gîtûmi nkara aja ntûûreene yaaku ya ûnene amwe naagwe.”

⁶Tontû bûû Akishi aranenkera Daudi ntûûra ya Zikilagi. Ntûûra îîu îtaragwa îrî ya anene ba Juda mwanka naarua tûrî.

⁷Daudi aratûûra nthîgûrûûne ya Afilisti antû a mwaka na mîeri îna.

⁸Daudi amwe na antû baawe nî baithûkagîra antû ba Geshuri na Girizi na Amaleki barîa baarî eene nthî îîu kuuma karaaja. Daudi na antû baawe nabo baithûkagîra nthî îîu mwanka Shuri, na bakeenama mwanka Misri.

⁹Bakooraga antû ba nthî îîu; aka na arûme. Ningî bagataa ng'ondu na ng'ombe na ntigiri na nkamîîra na kinya nguû. Rîu agacoka kîrî Akishi.

¹⁰Mûnene Akishi nawe akamûûria, “Nîkû withûkîîre naarua?” Daudi akamûcokeria, “Mbithûkîre antû ba rwanda rwa Juda.” Kana akauga, “Rwanda rwa Jerahimeeli,” kana akauga, “Rwanda rwa Akeni.”

¹¹Daudi ooragaga antû bonthe; aka na arûme, nîkenda gûtîonora muntû wa gwîta ntûûreene ya Gathi amenyithania ûrîa Daudi na antû baawe bathithîtie. Ûu nîu Daudi athithagia kagiita konthe karîa aakarîre nthîgûrû ya Afilisti.

¹²Akishi areetîkia Daudi akîthûgaanagia atî Daudi nî aathûûrîîtwe mono nî antû baao ba Israeli. Tontû bûû agatûûra akûmûtumîkagîra magiita jonthe.