Read KIMERU BIBLE PROTESTANT EDITION 1Sam 28 Bible Online

1Sam 28 - KIMERU BIBLE PROTESTANT EDITION bible

1Sam 28

¹Rîu Afilisti baroothûrania njûûrî ciaao cia ndwaa nîkenda barwaa na Israeli. Akishi, mûnene wa Gathi, areera Daudi atîrî, “Nî nkwenda ûmenya atî ûgwe na antû baaku bûkarwaa bûrî rûteere rwaakwa tweeta ndweene.”

²Daudi areetîkîîria akiugaga, “Ûkoona ûrîa ni nthûûmba yaaku nkathithia.” Akishi aramwîra, “Nî bwega! Naani ngakweethia mûnkaria ûnkaragie mwanka kenya.”

³ Îgiita rîu, Samueli nî aarî agûkua. Antû ba Israeli baraithikîîra nîûntû bwa gîkuû kîaawe na baramûthika kwaawe mûciî kûu Rama. Saûlû nî aarî akwîînga barîa baaringagia na barîa baranagîria na roho cia antû barîa baakuîre kuuma nthîgûrû ya Israeli.

⁴Njûûrî cia Afilisti iroothûrana iraamba kambî Shunemu. Saûlû nawe aroothûrania njûûrî cia Israeli îramba kambî yaao Giliboa.

⁵Rîrîa Saûlû oonere njûûrî ya Afilisti, aratemûka na araigua ûguaa bûbwingî.

⁶ Saûlû akûûria MWATHANI bûrîa akaathithia, MWATHANI ararega kûmûcokeria na njîra ya irooto kana ya gûtumîra Urimu kana ya iroria.

⁷Rîu Saûlû areera nthûûmba ciaawe, “Ncwîreni mûka ûrîa waranagîria na roho cia antû barîa baakuîre mbîte kîrî we nkoorie nkuagaya.” Nabo baramwîra atîrî, “Kûrî na mûka ûringagia kuû Endori.”

⁸Rîu Saûlû araigarûra atîkamenyeke na njîra ya gwîîkîra nguû ingî, areetania na arûme bangî baîrî kwa mûka ûu ûtukû. Agwîta aramwîra atîrî, “Ndakwerenca itû ndingîria, ûndeetere roho wa muntû ûrîa nkagweta riîtwa rîaawe.”

⁹Mûka ûu aramûcokeria, “Nî mma nî ûkûmenya ûrîa Saûlû athithîtie; nî ooragîte ariingia na antû barîa baranagîria na roho cia antû barîa baakuîre bathira Israeli. Nîmbi îndî îgûtûma ûnkûmîra mûtego nîkenda ûmbûragithia?”

¹⁰Rîu Saûlû aramûciîtîria arauga, “Nî ngûciîtia na MWATHANI ûrîa ûtûûraga mwoyo, atî ûtîkanûkia nîûntû bwa kûthithia ûu.”

¹¹Rîu mûka aramûûria “Nûû ûkwenda nkûretera?” Saûlû aramûcokeria, “Nî Samueli.”

¹²Rîrîa mûka oonere Samueli arauga mbu, aramwîra atîrî, “Nîkî tontû wampaîîria? Nî gwe Saûlû!”

¹³Mûnene aramwîra atîrî, “Ûgákîra! Nîmbi ûkwona?” Mûka ûu nawe aramûcokeria, “Ndîona roho yumîte kîrî barîa baakûîre.”

¹⁴Saûlû arooria, “Îrîonekana îkari atîa?” Mûka aracokia, “Îkari ta mûkûrû ûmûkûrû weekîrîte rwambambio.” Rîu Saûlû aramenya nî Samueli. Tontû bûu araturia maru, arenamîria na aratirithia ûthiû bwaawe nthî kwonania nî akûmûtîa.

¹⁵Samueli arooria Saûlû atîrî, “Nîmbi yatûma ûndagaragia na ûmbûkîîria?” Saûlû aramûcokeria, “Ka ndî thîîneene înene, tontû Afilisti nî bakûrwaa naani, na Mûrungu nî ambîrûkîrîte atiga gûncokeria na njîra ya iroria na ya irooto. Kîu nîkîo gîatûma ngwîîta nîkenda ûmbîîra ûrîa nkathithia.”

¹⁶Samueli aramûûria. “Nîmbi îgûtûma ûmbûûria ûrîa ûkathithia, o rîrîa MWATHANI akwîrûkîrîte na aa mûnthû waaku?

¹⁷ MWATHANI agûkûthithîria o ta ûrîa ambîîrîre nkwîîre: agûgûtuunya ûnene aanenkera mûtûûri waaku Daudi.

¹⁸ Tontû gwe nî waregîre kwaathîkîra MWATHANI na warega kûthiria Amaleki na into bionthe birîa baarî naabio. Kîu nîkîo gîtûmîte MWATHANI akûthithîria ûu naarua.

¹⁹Ningî MWATHANI agakûnenkanîra ûûgwe amwe na Israeli kîrî Afilisti. Rûûjû gwe amwe na ataana baaku, bûkeethîrwa bûrî amwe naani. Nayo njûûrî ya Israeli, MWATHANI akamînenkanîra kîrî Afilisti.”

²⁰O rîu Saûlû aragwa nthî araitambûrûkia amakîte mono nîûntû bwa nteto îrîa Samueli amwîrîre. Nawe ataarî na kainya mwîrî nîûntû atarûmîte gantû mûthenya junthe na ûtukû bunthe.

²¹Rîrîa mûka ûrîa waringagia eetîre kîrî Saûlû na aroona nî aamakîte, nî amwîrîre atîrî, “Ni nthûûmba yaaku nî nkwathîkîîre. Nî ciîkîre ûgwatiine ndathikîîra ûrîa ûmbîîrîre.

²²Naagwe nandî îtîkîîria nkûthithîrie tûbiakûrîa ûrîe ûgîte inya ya gwîta.”

²³Nawe ararega, arauga, “Ntîrîa ni.” Îndî asikarî baawe amwe na mûka ûu baramûkinyîîria, nawe areetîkîîria. Rîu arookîîra arakarîra gîtanda.

²⁴Mûka ûu nî aarî na njaû yaawe înoru. Aramîûraga ntûti aracoka arajûkia mûtu arakanda mîgaate îtî na gîntû gîa kwimbithia.

²⁵Aranenkera Saûlû na nthûûmba ciaawe biakûrîa biu nabo bararîa. Rîu barokîîra baraciîtîra o ûtukû bûu.