Read KIMERU BIBLE PROTESTANT EDITION 1Sam 29 Bible Online

1Sam 29 - KIMERU BIBLE PROTESTANT EDITION bible

1Sam 29

¹Njûûrî cia Afilisti iroothûrana kûu Afeki, na Aisraeli baraamba kambî akuî na kîthima kîrîa kîrî kîgwanthîîne gîa Jezereeli.

²Rîrîa atongeeria ba Afilisti bakûrûkîte barî mbere ya mbûûtû ciaao cia magana na mangiri, Daudi na asikarî baawe nî babathingatîte barî nyuma amwe na mûnene Akishi.

³Atongeeria bau ba mbûûtû cia Afilisti bakwoona Daudi na asikarî baawe, barooria, “Nîatîa Ahibirania baba bakûthithia aja?” Akishi arabacokeria, “Ûjû nî Daudi ûrîa waarî mûtongeeria wa njûûrî cia Saûlû, mûnene wa Israeli. Nî akarîte amwe naani kagiita gakaraaja mma, na ntamûgwata na yaatia mwanka naarua.”

⁴Îndî atongeeria bau ba asikarî ba Afilisti barathûrîîra Akishi, baramwîra, “Mwînge acoke ntûûreene îrîa wamweere. Tûtîtania nawe ndweene tontû oomba gûtûgarûkîra, akaa mûnthû. Gwe ga ûtîkwoona atî gûtî na njîra îngî înjega yaawe ya gûcokanîîra na mwathi waawe, Saûlû, tiga ya kûûraga antû beetû.

⁵ Ningî rî, ûûjû tî Daudi ûrîa bainaga ûntû bwaawe bakiugaga, ‘Saûlû akûûraga ngiri ciaawe, îndî Daudi akûûraga ngiri makûmi jaawe?’”

⁶Rîu Akishi areeta Daudi aramwîra atîrî, “Nî ngûciîtia na MWATHANI ûrîa ûtûûraga mwoyo atî, nî ûtwîîre ûrî mwîtîkua kîrî ni na ndîngîenda mono twîîtania naagwe ndweene îîjî tontû gûtî ûntû noo bûmwe bûbûthûûku ndoona kîrî gwe kuuma rîrîa weejîre kîrî ni mwanka naarua îîjî. Îndî atongeeria baakwa ba mbûûtû batîgûgwîtîkîîria.

⁷Tontû bûû, coka nandî waane na thîîrî ûtîkeeje kûthûûria atongeeria ba mbûûtû cia Afilisti.”

⁸Daudi arooria Akishi, “Nîatîa ndathithia? Nî ûntû bûrîkû bûbûthûûku ni nthûûmba yaaku ndaathithia kuuma rîrîa ndaambîrîîrie gûkwathîkîra mwanka nandî tontû ntîîtania naagwe kûrwaa na anthû baaku?”

⁹Akishi aramûcokeria, “Nî ngûîtîkania naagwe atî nî ûtwîîre ûmbathîkîrîte mono na ûtî ûntû nkûguutîrîkia, nîûntû ûkari ta mûraîka wa Mûrungu. Îndî amwe na bûu atongeeria ba mbûûtû cia Afilisti baraugîre atî ûtîtania nabo ndweene.”

¹⁰Rooka gûûkîîra rûkîîrî kainda na antû bonthe barîa ûrejanîtie nabo bwîcokere.

¹¹Tontû bûu Daudi na antû baawe bararooka gûcoka nthîgûrûûne ya Afilisti. Afilisti nabo bareeta Jezereeli.