Read KIMERU BIBLE PROTESTANT EDITION 1Sam 3 Bible Online

1Sam 3 - KIMERU BIBLE PROTESTANT EDITION bible

1Sam 3

¹Îgiiteene rîu Samueli aatumîkagîra MWATHANI atongeeretue nî Eli. MWATHANI ataragîria antû magiita jamaingî, na gûtaarî bioneki bibingî.

²Ûtukû bûmwe Eli, ûrîa meetho jaawe jaambîrîrîtie kûûra na atoonaga bwega, nî aamami kanyomba kaawe.

³Taawa îtaarî îkwora, nawe Samueli nî aamami nyomba ya MWATHANI, arîa Îthandûkû rîa kîrîkanîro rîaarî.

⁴Rîu MWATHANI areetana akiugaga, “Samueli! Samueli!” Samueli aracokia atîrî, “Ndî aja!”

⁵Aramatûka kîrî Eli, arauga, “Ndî aja, nîûntû ûkûmbîta.” Eli aramûcokeria, “Ntîragwîta, coka ûkamame.” Samueli aracoka aramama.

⁶MWATHANI areetana kaîrî, “Samueli!” Samueli arokîîra areeta kîrî Eli na aramwîra, “Ndî aja nîûntû ûkûmbîta.” Eli aramûcokeria, “Ntîragwîta mwana waakwa, coka ûkamame.”

⁷Îgiita rîu Samueli ataarî akûmenya MWATHANI, na ataarî akûgwuûrîrwa nteto cia MWATHANI.

⁸MWATHANI areeta Samueli kaîrî rîa jathatû. Samueli arokîîra areeta kîrî Eli, arauga, “Ndî aja nîûntû ûkûmbîta.” Rîu Eli araciûkîrwa atî nî MWATHANI weetaga mwana ûu.

⁹Tontû bûû, Eli areera Samueli, “Coka ûkamame, na agwîîta kaîrî uuge atîrî, ‘Aria MWATHANI, tontû nthûûmba yaaku nî îthikîrîte.’” Tontû bûû Samueli areeta aramama arîa aamamaga.

¹⁰MWATHANI areeta ararûngama o, agîîtanaga o ta ûrîa eetanaga mbere, “Samueli! Samueli!” Samueli aracokia, “Aria, nthûûmba yaaku nî îthikîrîte.”

¹¹Rîu MWATHANI areera Samueli, “Atîrî, ndî akuî kûthithia ûntû ndeene ya Israeli, bûrîa bûgatûma ûrîa ûkabwigua amaka.

¹²Ntukû îîu nîyo nkoojûria mantû jonthe jamaaî jaarîa mbugîîte jegiî mûciî jwa Eli kuuma ûntû bwa mbere mwanka bwa mûthia.

¹³Nî mwîrîte ngakanûkia antû ba mûciî jwaawe mwanka kenya, nîûntû bwa meeyia jarîa akûmenya. Tontû ataana baawe nî bateengûrîte Mûrungu na atîbakanie.

¹⁴Tontû bûû, nî ngûciîtîria mûciî jwa Eli na mma atî gûtî kîgongwana kana kîewa gîkîtheru kîûmba kwigithania mûciî jûu naani kenya.”

¹⁵Samueli nî aamamîre mwanka rûkîîrî; rîu ararugûra mîrango ya nyomba ya MWATHANI. Samueli nî aigagua ûguaa kwîra Eli mantû ja kîoneki kîu.

¹⁶Îndî Eli areeta Samueli aramwîra, “Mwana waakwa!” Samueli areetîka, “Yîî!”

¹⁷Eli aramûûria, “Nîatîa MWATHANI arakwîrîre? Menya ûmbitha. Mûrungu arogûkanûkia, këethîra ûkambitha jonthe jarîa arakwîrîre.”

¹⁸Tontû bûû, Samueli aramwîra jonthe na gûtîjo aamwithîre. Rîu Eli arauga, “Nîwe MWATHANI, nî athithie ûrîa akwona kwagîrîte.”

¹⁹Samueli nî eetîre na mbere gûkûra arî amwe na MWATHANI, nawe MWATHANI ataarekererie nteto cia Samueli irega kûûjûra.

²⁰Israeli yonthe kuuma Dani mwanka Beerisheba [1] nî yamenyîre atî Samueli nî aarî kîroria kîgwîtîkîka kîa MWATHANI.

²¹MWATHANI nî eetîre na mbere gûcionania kaîrî na kaîrî kûu Shilo. Tontû au nîo MWATHANI aacionanagia kîrî Samueli na njîra ya kûmwarîria. Rîrîa Samueli aaragîria antû ba Israeli, bonthe nî bamwigagua.