Read KIMERU BIBLE PROTESTANT EDITION 1Sam 31 Bible Online

1Sam 31 - KIMERU BIBLE PROTESTANT EDITION bible

1Sam 31

¹Afilisti nî baithûkîîre Aisraeli na bararwa nabo. Aisraeli babaingî nî booragîîrwe kîrîmeene kîa Giliboa na bangî baramatûka.

²Îndî Afilisti barabagwatagwata na barooraga ataana ba Saûlû; Jonathani na Abinadabu na Malikishua.

³Ndwaa îrang'enta mono rûteere rwa Saûlû, mwanka barîa baarathaga na mîgwî baramûgwatithania baramûratha bûbûûî mono.

⁴Rîu Saûlû areera mûkamati wa mathaga jaawe ja ndwaa atîrî, “Kûûra rûchiû rwaaku ûmuunte ûmbûrage, nîkenda biîjî bibi bia Afilisti bitîkeeje gûncikûûra na bambûraga.” Îndî mûkamati wa mathaga jaawe ja ndwaa ararega nîûntû nî aakîraga mono. Tontû bûû, Saûlû arakûûra rûchiû rwaawe araciaangîîra kîrî ru.

⁵Rîrîa mûkamati wa mathaga ja ndwaa oonere Saûlû agûkua, nawe araciaangîîra kîrî rûchiu rwaawe, kinya we arakua.

⁶Ûu nîu Saûlû na ataana baawe bo-bathatû na mûkamati ûu wa mathaga jaawe ja ndwaa na asikarî barîa baarî amwe na Saûlû baakuîre bonthe ntukû îîu.

⁷Rîrîa antû ba Israeli barîa baarî rwongo rûrîa rûngî rwa kîguuru kîa Jezereeli na barîa baarî bwa gaiti ka mûuro jwa Jorodani baaigîrue atî njûûrî ya Israeli îkûmatûka na Saûlû amwe na ataana baawe baakûûragwa, bareerûkîra ntûûra ciaao baramatûka. Afilisti bareeta, barataa ntûûra na baratûûra ku.

⁸Rûûnene, rîrîa Afilisti beetîre kûjûkia into bia antû barîa booragîte, bareethîra Saûlû na ataana baawe bo-bathatû bakwîrîte au kîrîmeene kîa Giliboa.

⁹Afilisti baragiita mûtwe jwa kiimba gîa Saûlû na barajûkia mathaga jaawe ja ndwaa. Baratûma antû nabio nthîgûrû ya Afilisti yonthe nîkenda bikonanua iromberoone bia mîrungu ya mîng'uanano na kîrî antû baao birî nteto injega.

¹⁰Bareeka mathaga jau kîromberoone kîa mûrungu jwaao jûrîa jweetagwa Ashitarothi, na baraamba mwîrî jwa Saûlû rûthingoone rwa ntûûra ya Bethishani.

¹¹Rîrîa antû ba Jabeshi-gileadi baigîrue ûrîa Afilisti baarî bakûthithîria Saûlû,

¹²nchamba ireeta ûtukû bunthe mwanka Bethishani. Igûkinya, iracurûûkia mîîrî ya Saûlû na ataana baawe kuuma rûthingoone rwa Bethishani. Baramiikia Jabeshi kûrîa baamîakîîrîrie.

¹³Barajûkia maîndîîndî barajathika gîtineene gîa kamûtî geetagwa Tamariski ndeene ya ntûûra îîu, na baraciata kûrîa biakûrîa ntukû mûgwanja.