Read KIMERU BIBLE PROTESTANT EDITION 1Sam 5 Bible Online

1Sam 5 - KIMERU BIBLE PROTESTANT EDITION bible

1Sam 5

¹Rîrîa Afilisti baataîre Îthandûkû rîa kîrîkanîro kîa Mûrungu, nî baarîkamatîre kuuma Ebenezeri mwanka Ashidodi.

²Rîrîa Afilisti baikîrie Îthandûkû rîa kîrîkanîro nyomba ya mûrungu jwaao Dagoni, bararîîka akuî na Dagoni.

³Antû ba Ashidodi bagûkîîra rûûnene rûkîîrî kainda, nî beethîîre mûng'uanano jwa Dagoni jûgwîte nthî na ûthiû mbere ya Îthandûkû rîa MWATHANI. Nabo barookîîria mûng'uanano jûu jwa Dagoni barajûcokia arîa jwakaraga.

⁴Îndî bagûkîîra rûûnene rûkîîrî kainda bareethîra mûng'uanano jwa Dagoni jûgwîte nthî na ûthîû mbere ya Îthandûkû rîa MWATHANI. Naju mûtwe jwa Dagoni na njara cio-ijîîrî ituîki ciaagwa mwariine; nî mwîrî kûu kûngî jwaatigi.

⁵Gîkî nîkîo gîtûmaga athînjîri-mûrungu ba Dagoni na bonthe barîa bakûrûkaga nyomba ya mûrungu jûu, barega gûkinyithia magûrû mwariine jwaayo au Ashidodi mwanka naarua tûrî.

⁶MWATHANI nî aakanûkîrie antû ba Ashidodi na antû barîa baankeene nabo na arabamakia mono na arabakanûkia baragwatwa nî mûrimo jwa maûûtî.

⁷Rîrîa antû ba Ashidodi boonîre ûrîa mantû jaakara, barauga, “Îthandûkû rîa kîrîkanîro kîa Mûrungu wa Israeli rîtîbuîrîte gûkara kîrî tuî nîûntû nî atûkanûkîtie na akanûkia Dagoni, mûrungu jweetû.”

⁸Tontû bûû, baratûmanîra na barothûrania athani bonthe ba Afilisti barabooria atîrî, “Nîatîa tûkûthithia na Îthandûkû rîa kîrîkanîro rîa Mûrungu wa Israeli?” Nabo baracokia atîrî, “Îthandûkû rîa kîrîkanîro kîa Mûrungu wa Israeli nî riikue Gathi.” Nabo bararikia kûu Gathi.

⁹Îndî bakûriikia kûu, MWATHANI nî aakanûkîrie antû ba ntûûra îîu na ûntû bûu bûrabamakia mono. Nî aathangîkîrie antû bonthe ba ntûûra îîu, babeethî na babakûrû, baragwatwa nî mûrimo jwa maûûtî.

¹⁰Rîu baraikia Îthandûkû rîa kîrîkanîro kûu Ekironi. Îndî rîrîa rîakiinyîre kûu Ekironi, antû ba Ekironi barookia mbu na barauga, “Bakûreeta Îthandûkû rîa Mûrungu wa Israeli kîrî tuî nîkenda atûthiria amwe na antû beetû.”

¹¹Tontû bûû, baratûmana, na baroothûrania athani ba Afilisti amwe, barabeera, “Riteeni Îthandûkû rîa kîrîkanîro kîa Mûrungu wa Israeli gûkû na bûrîcokie kûrîa rîaumîte rîtîkeeje gûtûthiria, tuî na antû beetû.” Tontû gîkuû nî kîaguaîîtie ntûûra îîu mono. Nîkwîthîrwa MWATHANI nî abakanûkîtie mono.

¹²Antû barîa bataakuîre baraimba maûûtî, na kîrîro kîa ntûûra îîu kîraigîîgua kunthe.