Read KIMERU BIBLE PROTESTANT EDITION 1Sam 6 Bible Online

1Sam 6 - KIMERU BIBLE PROTESTANT EDITION bible

1Sam 6

¹Îthandûkû rîa MWATHANI rîakarîre nthîgûrû ya Afilisti mîeri mûgwanja.

²Afilisti bareeta athînjîri-mîrungu na aringia, barabooria, “Tûkathithia atîa na Îthandûkû rîa MWATHANI? Twîreni tûkarîcokia narîa rîkaraga na mbi?”

³Barabacokeria, “Këethîra bûgacokia Îthandûkû rîa kîrîkanîro kîa Mûrungu wa Israeli, bûtîrîcokia ûtheri, bûkarîcokia na kîewa gîa kûthiria maatia jeenu. Rîu bûkoorua mîrimo yeenu na bûkomba kûmenya gîtûmi kîa abûkanûkia.”

⁴Nabo barooria, “Nî kîewa kîrîkû gîa kûthiria maatia tûkamwikîria?” Nabo baracokia, “Nî tûmîng'uanano tûtano tûkarî ta maûûtî twa thaabu, na tûmîng'uanano tûkari ta ngaara twa thaabu. O ta ûrîa athani ba Afilisti bang'ana, tontû mûrimo jûrîa jûrabûthangîkîtie nî jûrarî kinya kîrî athani bau.

⁵Tontû bûû, bûkathithia mîng'uanano ya maûûtî na ya ngaara irîa ciînyangagia nthî yeenu, na bûkumie Mûrungu wa Israeli, kwombîka agatiga kûbûkanûkia amwe na mîrungu yeenu na nthî yeenu.

⁶Nîmbi îgûtûma bûûmia nkoro cieenu ta ûrîa Amisri na Farao boomîrie nkoro ciaao? Rîrîa Mûrungu abakanûkîrie mono teeka batiganîre na Aisraeli bareeta?

⁷Nandî rî, tumeeni kagaarî gakeerû na bûjûkie ng'ombe ijîîrî îrîa itathekeerwa gîchooki; bûcitheekere kagaarîîne kau îndî bûcokie tûjaû twaacio nja.

⁸Rîu bûjûkie Îthandûkû rîa kîrîkanîro kîa MWATHANI bûrîkîre kagaarîîne. Ningî bwîkîre mîng'uanano îrîa ya thaabu îthandûkûûne na bûrîîke rûteere rwa Îthandûkû rîa kîrîkanîro. Mîng'uanano îîu îkeethîrwa îrî kîewa gîa kûthiria maatia bweenu. Rîu bûrekeerie kagaarî kau gaciîtîre.

⁹Bûraithîrie bwoone ûrîa kageeta. Gakëeja kûthingata njîra ya gwîta ntûûreene ya Bethishemeshi îrîa îrî nthîgûrû îrîa rîaumîre, rîu tûkamenya atî nî Mûrungu wa Israeli ûtûthithîrîtie mantû jaja jamathûûku. Îndî gakëeja kûrega kûthingata njîra îîu, tûkamenya atî tîwe ûtûkanûkîtie îndî nî mantû jatwîjîîrîte o ûu.”

¹⁰Barathithia o ûrîa beerîrwe, barajûkia ng'ombe ijîîrî îrîa ciaakamagwa baraithekeera kagaarîîne na baraingîra tûjaû twaacio nja.

¹¹Bareekîra Îthandûkû rîa MWATHANI kagaarîîne na kinya îthandûkû rîrîa rîaarî na mîng'uanano ya maûûtî na ngaara cia thaabu.

¹²Ng'ombe ireeta cierekerete Bethishemeshi ithingatîte njîra o îîu ikîanagia ciîtîte. Nacio itagarûka bwa ûrîo kana bwa ûmotho, na athani ba Afilisti bareeta baithingatîte nyuma mwanka mwankeene jwa Bethishemeshi.

¹³Antû ba Bethishemeshi nî baakethaga nkano ciaao kîgwanthîîne. Rîrîa baciûkîrie meetho baroona Îthandûkû rîa kîrîkanîro, nî baagwîrîrue mono.

¹⁴Kagaarî kareeta muundeene jwa Joshua wa Bethishemeshi kararûngama o. Iiga rîrînene nî rîarî o. Antû bau baraatûranga mbaaû cia kagaarî kau na barooraga ng'ombe iu na bararita irî kîgongwana kîa gwakîîria kîrî MWATHANI.

¹⁵Alawi barakinyithia nthî Îthandûkû rîa MWATHANI na ithandûkû rîu rîngî rîaarî na mîng'uanano ya thaabu. Barajeeka îgûrû rîa iiga rîu rînene. Rîu antû ba Bethishemeshi bararita biewa bia gwakîîria na igongwana bingî kîrî MWATHANI ntukû îîu.

¹⁶Rîrîa athani bo-batano ba Afilisti boonere ûu, baracoka Ekironi o ntukû îîu.

¹⁷Afilisti nî baatûmîre mîng'uanano îtaano ya maûûtî îthithîtue na thaabu îrî kîewa kîa kûthiria maatia jaao kîrî MWATHANI: mûng'uanano jûmwe nîûntû bwa Ashidodi, na jûngî nîûntû bwa Gaza, jûngî nîûntû bwa Ashikeloni, jûngî nîûntû bwa Gathi na jûngî nîûntû bwa Ekironi;

¹⁸Ningî nî baatûmîre ngaara cia thaabu kûringana na ntûûra cionthe cia Afilisti cia athani bau batano; ntûûra irîa ciairigîri na irîa itairigîri. Iiga rîu rînene rîrîa rîaarî muundeene jwa Joshua wa Bethishemeshi, rîrîa rîarîkîîri Îthandûkû rîa kîrîkanîro kîa MWATHANI, nîrîo mûkûûjî mwanka naarua îîjî.

¹⁹MWATHANI arooraga antû mîrongo mûgwanja ba Bethishemeshi, tontû nî baraithîrîîrie Îthandûkû rîa kîrîkanîro kîa MWATHANI ndeene. Antû nabo baraithikîîra nîûntû MWATHANI nî ooragîte antû mono.

²⁰Rîu antû ba Bethishemeshi barooria, “Nûû ûûmba kûrûngama mbere ya MWATHANI, Mûrungu Ûmûtheru? Nî kîrî ûû ageeta aume kîrî tuî?”

²¹Tontû bûu baratûmana kîrî atûûri ba Kiriathi-jearimu bakîbeeraga, “Afilisti bagûcokia Îthandûkû rîa kîrîkanîro kîa MWATHANI. Înameni bûrîîjîre bûriikie kweenu.”