Read KIMERU BIBLE PROTESTANT EDITION 1Sam 7 Bible Online

1Sam 7 - KIMERU BIBLE PROTESTANT EDITION bible

1Sam 7

¹ Rîu antû ba Kiriathi-jearimu bareeja barajûkia Îthandûkû rîa MWATHANI, barariikia nyomba ya muntû ûmwe weetagwa Abinadabu ûrîa watûûraga karîmeene. Baretûrîra Eleazari mûtaana waawe maguta nîkenda akamenyagîîra Îthandûkû rîa MWATHANI.

²Kuuma ntukû îrîa Îthandûkû rîa MWATHANI rîakinyîre Kiriathi-jearimu, nî rîakarîre kûu kagiita gakaraja, mîaka mîrongo îîrî. Îgiita rîu rîonthe Aisraeli bonthe nî barîragîra MWATHANI nîkenda abateethia.

³Samueli areera antû ba Israeli atîrî, “Bûkëethîra nîka bûcokete kîrî MWATHANI na nkoro cieenu cionthe, riteni mîrungu mîgeni na ya mûng'uanano jwa Ashitarothi kuuma gatîgatî keenu, na bûcokeere kîrî MWATHANI na bûmûthaathagie we wenka, nawe akabwoonokia kuuma kîrî Afilisti.”

⁴Tontû bûbû Aisraeli bararita mîrungu ya Baali na Ashitarothi gatagatîîne kaao, na baraathîkîra MWATHANI wenka.

⁵Rîu Samueli, arabeera, “Ûthûranieni antû ba Israeli bonthe Mizipa, naani nkaromba MWATHANI nîûntû bweenu.”

⁶Rîu baroothûrana Mizipa, na barataa rûûjî bararwîtûûra rûrî kîgongwana kîrî MWATHANI. Ningî baraciata biakûrîa mûthenya jûu junthe na barauga atîrî, “Nî twîîrîîtie MWATHANI.” Samueli araa mûgambi wa antû ba Israeli au Mizipa.

⁷Rîrîa Afilisti baigîrue atî antû ba Israeli nî baatirimanîte Mizipa, athani ba Afilisti nî beetîre kûrwaa na Israeli. Nabo Aisraeli bakwigua ûu barakîra Afilisti na

⁸bareera Samueli atîrî, “Ûgátiga gûkaîra MWATHANI Mûrungu weetû nîûntû bweetû, nîkenda atwonokia kuuma kîrî Afilisti.”

⁹Rîu Samueli arajûkia gatûrûme gagwonka arakaritîra MWATHANI konthe karî kîgongwana gîa gwakîîria. Samueli arakaîra MWATHANI nîûntû bwa Israeli, na MWATHANI aramûcokeria maromba jaawe.

¹⁰Rîrîa Samueli aaritaga kîgongwana kîa gwakîîria, Afilisti nî baakuîrîîrie Aisraeli nîkenda barwaa nabo. Îndî MWATHANI aragondokera Afilisti na kajû gakanene ta ka ngorogoro na arabangaratania. Aisraeli baraboomba ndweene.

¹¹Aisraeli barauma Mizipa barengana na Afilisti bakîboragaga mwanka ntûûra ya Bethikari.

¹²Rîu Samueli arajûkia iiga ararîrûngîka gatîgatî ka Mizipa na Sheni na ararîîta Ebenezeri[2] akiugaga “MWATHANI nîwe ûtûtethetie mwanka nandî.”

¹³Tontû bûû, Afilisti nî boombîrwe ndweene na bataaithûkîra nthîgûrû ya Israeli kaîrî. MWATHANI nî eetîre na mbere gûkanûkia Afilisti matukû jonthe jarîa Samueli aarî mwoyo.

¹⁴Ntûûra irîa Afilisti baarî bagûtaa kuuma Ekironi mwanka Gathi iracokerua Aisraeli. Aisraeli baratunyûkia nthîgûrû yaao kuuma kîrî Afilisti na kûragîa thîîrî gatîgatî kaao na Aamori.

¹⁵Samueli aratongeeria Aisraeli matukû jonthe ja ûtûûro bwaawe.

¹⁶Nî aathiûrûkanagia na ntûûra cia Betheli na Giligali na Mizipa mwaka o mwaka akîgambagîra Israeli.

¹⁷Nî aacokaga Rama nîûntû nja yaawe nîku yaarî, na kinya kûu nî aagambagîra Aisraeli. Ningî nî aakîîre MWATHANI kîritîro kîa igongwana kûu.