Read KIMERU BIBLE PROTESTANT EDITION 1Sam 8 Bible Online

1Sam 8 - KIMERU BIBLE PROTESTANT EDITION bible

1Sam 8

¹Samueli agûkûra, nî aeetherie ataana baawe agambi ba Israeli.

²Mûtaana waawe ûrîa mûkûrû eetagwa Joeli na wa baîrî ageetwa Abija. Bobaîrî baarî agambi kûu Beerisheba.

³Îndî ataana bau ba Samueli bataathingatîre mîîtîre yaawe. Nî baarî na îtenûka rîa ûtonga; bajûkagia nkukumo na bakarega kûgiita magamba na îota.

⁴Rîu akûrû bonthe ba Israeli baroothûrana bareeta kîrî Samueli Rama,

⁵ baramwîra, “Atîrî, ûgûkûra na ataana baaku batîkûthingata mîîtîre ta yaaku. Nandî tûthuurîre mûnene nîkenda atwaathaga ta mîgongo îngî.”

⁶Îndî ûntû bûu bwa kwenda kûthuurîrwa mûnene nîkenda abaathaga bûtaagwîrîrie Samueli. Tontû bûu, araromba MWATHANI.

⁷MWATHANI areera Samueli, “Thikîîra jonthe jarîa antû bagûkwîra, tontû tîgwe bakûrega îndî nî ni bakûrega mbîthîrwa ndî mûnene waao.

⁸Ka bagûkûthithîria o ta ûrîa batwîre kûnthithîria kuuma rîrîa ndaabaritîre Misri mwanka nandî; baambîrûkagîra bageeta kûthaathayia mîrungu îngî. Ûu nou bagûkûthithîria kinya gwe.

⁹Nandî thithia ûu bakwenda îndî ûbamenyithie carûrûkû ûrîa mûnene ûu ûkabaatha akabathithagîria.”

¹⁰Rîu Samueli areera antû barîa baamwîtagia mûnene nteto cionthe cia MWATHANI.

¹¹Arauga, “Jaja nîjo mûnene ûrîa bûkwenda abwatha akeethîrwa akîendaga: akajûkia ataana beenu abaeethie asikarî; bamwe bakaa eetithia ba ngaarî cia ndwaa, bangî eetithia ba mbarathi na bangî boogîage barî mbere ya ngaarî ciaawe cia ndwaa.

¹²Ningî akaithuurîra atongeeria ba ikundi bia asikarî ngiri na atongeeria ba ikundi bia asikarî mîrongo îtaano. Bangî ba kûmûrîmagîra miuunda yaawe na ba kûmûkethagîra biakûrîa biaawe. Akaeethia bangî aturi ba into biaawe bia ndwaa na bia ngaarî ciaawe cia ndwaa.

¹³Akajûkia aarî beenu bakûmûthithagîria marashi na bakûmûrugagîra na bakûmûkandagîra mîgaate.

¹⁴Akajûkia miuunda yeenu îrîa mîthongi na ajûkie miuunda yeenu ya mîzabibû na miuunda yeenu ya mîzeituni amînenkanîre kîrî nthûûmba ciaawe.

¹⁵Akajûkia gîchunchî kîmwe kuuma kîrî îkûmi kîa biakûrîa bieenu, na kîa miuunda yeenu, na anenkere atongeeria baawe na nthûûmba ciaawe.

¹⁶Akajûkia nthûûmba cieenu cia aka na arûme, na ng'ombe cieenu irîa njega na ntigiri cieenu, iritage ngûgî ciaawe.

¹⁷Akajûkia gîchunchî kîmwe kuuma kîrî îkûmi kîa ng'ondu na mbûri cieenu, naabuî bûkaa nkombo ciaawe.

¹⁸Îgiita rîu naabuî bûkaringa gîtuma nîûntû bwa mûnene weenu, ûrîa bwithuurîrîte, îndî MWATHANI atîthikîîra gîtuma kîeenu.”

¹⁹Rîu, antû bararega kûthikîîra Samueli îndî barauga, “Arî! Tuî tûrîenda mûnene wa gûtwaatha,

²⁰nîkenda kinya tuî tûkara ta mîgongo îngî, na mûnene weetû atwaathage na atûtongagîîrie ndweene na arûjage ndweene cieetû.”

²¹Rîrîa Samueli aathirîrie kûthikîîra nteto cionthe cia antû, areera MWATHANI cio.

²²MWATHANI areera Samueli atîrî, “Bathikîîre, na ûbathuurîre mûnene.” Rîu Samueli areera antû bonthe ba Israeli baane.