Read KIMERU BIBLE PROTESTANT EDITION 1Sam 9 Bible Online

1Sam 9 - KIMERU BIBLE PROTESTANT EDITION bible

1Sam 9

¹Nî kwaarî na muntû ûmwe waarî gîtonga na îgweta mono weetagwa Kishi. Aarî mûtaana wa Abieli. Abieli aarî mûtaana wa Zerori. Zerori aarî mûtaana wa Bekorathi. Bekorathi aarî mûtaana wa Afia kuuma mwîrîga jwa Benjamini.

²Kishi nî aarî na mûtaana weetagwa Saûlû. Saûlû aarî mûthaka ûmûthongi mono. Gûtî ntomûrûme waarî ûmûthongi nkûrûki yaawe kîrî Aisraeli bonthe. Ningî nî aarî ûmûraaja nkûrûki ya antû bonthe.

³Ntukû îmwe ntigiri cia Kishi, îthe wa Saûlû nî ciaûrîre. Kishi areera Saûlû atîrî, “Ûkîîra ûjûkie nthûûmba îmwe, bwîte bûgacwee ntigiri.”

⁴Nabo baragitanîîria nthîgûrû ya irîma ya Efuraimu na barakûrûkîîra nthîgûrû ya Shalisha, îndî batîcione. Ningî bareetîîra nthîgûrû ya Shalimu, îndî itaarî kinya nao. Baracoka bareetîîra nthîgûrû ya Benjamini îndî batacionere.

⁵Rîrîa baakinyîre nthîgûrû ya Zufu, Saûlû areera nthûûmba îrîa baarî nayo atîrî, “Tûcoke, baaba atîkeeje gûtiga kûthûgaania mantû ja ntigiri na ambîrîria kûmaka nîûntû bweetû.”

⁶Nthûûmba îîu îramûcokeria atîrî, “Kûrî na muntû wa Mûrungu ntûûreene îîjî na nî eekîîri mono; tontû jonthe jarîa augaga nî jakarîkaga. Twîte kîrî we; kwoombîka agatwîra njîra îrîa tûbuîrîte gwîta nayo.”

⁷Rîu Saûlû areera nthûûmba yaawe, “Îndî nîmbi tûkamwikîria tweeta? Gûtî mîgaate tûtigarîîtie na gûtî gîîntû kîngî tûrî nakîo kîrîa kîûmba gwikîrua muntû wa Mûrungu. Kana kûrî kîo?”

⁸Nthûûmba îramûcokeria, “Ndî na gîchunchî kîa bina gîa shekeli ya fetha, nkanenkera muntû wa Mûrungu kîo, atwîîre njîra îrîa tûgeeta nayo.”

⁹(Mbereene ndeene ya Israeli, rîrîa muntû eendaga kûmenya mantû kuuma kîrî Mûrungu, augaga, “Njû twîte kîrî mwoni mantû”, tontû ûrîa wîtagwa kîroria nandî, mbereene eetagwa mwoni mantû.)

¹⁰Saûlû aracokeria nthûûmba yaawe, “Ûkuuga bwega, njû twîte.” Rîu bareeta ntûûreene arîa muntû wa Mûrungu aarî.

¹¹Rîrîa baitîîtie karîma beeta ntûûreene îîu, baracemania na aarî baumagarîte beeta gûtaa rûûjî. Barabooria atîrî, “Mwoni mantû arî ku?”

¹²Nabo baracokia “Îî arî ku. Atîrî, arî o au mbere yeenu, îtangeeni. Agûkûrûka o nandî ntûûreene tontû antû barî na kîgongwana naarua antû arîa kûritagîrwa igongwana.

¹³Bwakûrûka ntûûreene akî bûkamwona mbere ya eeta antû arîa kûritagîrwa igongwana kûrîa biakûrîa. Antû batîrîa biakûrîa mbere ya akinya, tontû no mwanka atharime kîgongwana; nyuma ya bûu nîrîo barîa beeti bakaarîa.”

¹⁴Rîu Saûlû na nthûûmba yaawe bareeta ntûûreene, na bagîkûrûka ntûûreene ndeene, Samueli arabatirima aumagarîte eetîte antû arîa kwaritagîrwa igongwana.

¹⁵Ntukû îmwe mbere ya ntukû îrîa Saûlû eetîre kîrî Samueli, MWATHANI nî aarî akwîra Samueli atîrî,

¹⁶“Rûûjû, thaa o ta iji, ngatûma muntû kîrî gwe kuuma nthî ya mwîrîga jwa Benjamini. Naagwe ûkamwîtûûrîria maguta nîkenda aa mûnene wa antû baakwa ba Israeli. Akoonokia antû baakwa kuuma kîrî Afilisti tontû nî mboneete mîthangîko ya antû baakwa na nî mbigîtue kîrîro kîaao.”

¹⁷Rîrîa Samueli oonere Saûlû, MWATHANI aramwîra atîrî, “Ûûjû nîwe muntû ûrîa ndîrakwîragîra. Ûu nîwe ûkaatha antû baakwa.”

¹⁸Rîu Saûlû areeta akuî na Samueli au akuî na mpingîro aramûûria atîrî, “Itû mboonia arîa nyomba ya mwoni mantû îrî?”

¹⁹Samueli aracokeria Saûlû, “Nî ni mwoni mantû. Îtaga ûrî mbere yaakwa witagie antû arîa aritagîrwa igongwana tontû naarua ûkarîîjanîra naani. Rûûjû rûkîîrî ngakwîra jarîa ûkwenda na nkûrekeerie ûciîtîre.

²⁰Ûkámaka nîûntû bwa ntigiri cieenu irîa ciaûrîre ntukû ithatû ithiri nîûntû nî cionekete. Îndî nûû antû ba Israeli babaterue nîwe mono? Anga tî ûgwe na antû ba rûrîîjo rweenu?”

²¹Saûlû aramûcokeria, “Uga ûûni ntî wa mwîrîga jwa Benjamini, mwîrîga jûrîa mûnini kîrî mîîrîga ya Israeli? Nja yeetû îtî yuuga mwîrîgeene jwa Benjamini. Nîmbi, rîu îgûtûma ûmbarîria ûjû?”

²²Rîu Samueli araikia Saûlû na nthûûmba yaawe nyomba na araboonia arîa bakara nthî meetheene antû a gîtîîo arîa antû barîa beeti baarî. Antû bau beeti baarî ta antû mîrongo îthatû.

²³Samueli areera mûrugi, “Reete nyama irîa ndîrakûnenkeere, irîa ndîrakwîrîre ûûmbie.”

²⁴Rîu mûrugi arajûkia kûgûrû na gîchunchî kîrîa kîaarî îgûrû rîaaku, araciîka mbere ya Saûlû. Samueli arauga, “Raithîîria kîrîa gîkûûmbîtue, gîgwîkwa mbere yaaku. Rîa, tontû gîkûûmbîtue nîûntû bwaaku mwanka nandî nîkenda ûrîîjanîra amwe na ageni.” Rîu Saûlû ararîîjanîra na Samueli ntukû îîu.

²⁵Rîrîa beenamîre kuuma antû au aaritagîrwa igongwana, bareeta ntûûreene na barathuranîîra Saûlû antû a kûmama îgûrûgûrû[3] rîa nyomba, nawe aramama.

²⁶Rûkîîrî kainda gûgûkea, Samueli areeta Saûlû kûu aarî îgûrûgûrû rîa nyomba aramwîra, “Ûkîîra, nîkenda nkûringîîria ûciîtîra.” Tontû bûû, Saûlû arookîîra na bobaîrî bareetania njîreene.

²⁷Baumagaranîtie bwa oome ya ntûûra, Samueli areera Saûlû, “Îîra nthûûmba îîtage îrî mbere yeetû. Yaathiria gûkûrûka, ûrûngame aja nîkenda ngakûmenyithia rûteto rwa MWATHANI.”