Read mumuye Matiyu 12 Bible Online

Matiyu 12 - mumuye bible

Matiyu 12

¹Ka Diki Ɔ̃sɔnang zang Yahudi, Yeesɔ sɔɔ gbalang ɓɔɔ tɛɛ ka yeti jaa zee. Nyɔkɔ nyɔ zang ɓɔɔ ri mantɛ vuu ka bii ɓiɓɛ, a ri gaa tɔɔsung yuu zee lɔɔrɔnang, ri shaa kati.

²Ɓu doo ɓɔɔ zang Farisi ri zi naa weɓe, ri hɛ̃ɛ Yeesɔ tɔɔ, “Zirɛ, zang ɓɔɔ ri mantɛ vuu ka bii ɓaaɓɛ ri palɛ shonang ka Diki Ɔ̃sɔnang. Ri ta nyaa dannang tɔ.”

³A kasɛ ri nyaa tɔɔ, “Nɔɔ gã̀ vuu ɓɔɔ Dawuda palɛ ka diki ɓɔɔ nyɔkɔ nyɔ wu nɛɛ zang ɓɔɔ ri dũng wu gngn kpang ya?

⁴Naa ɓɔɔ wu daa ka yeti Gãa Laa, a tuu borodi ɓɔɔ zang dang nyaa nɛɛ zang ɓɔɔ ri dɔɔ vuu ka Gãa Laa kɔ ri shaa shɛ̃ɛning, a shaa nɛɛ zang ɓɔɔ ri nɛɛ wu kpang ya?”

⁵A Yeesɔ ti hɛ̃ɛ ri tɔkn tɔɔ, “Nɔɔ gã̀ gngn ka yeti labeenang Laa ɓɔɔ Musa bee ɓɛɛ kpang ya? Naa ɓɔɔ zang ɓɔɔ ri dɔ̀ɔ́ Laa vuu ri palɛ shonang ka yeti Gãa Laa, ka Diki Ɔ̃sɔnang zang Yahudi kpang ya? A Kpanti Laa ti kɔɔ kpang nɛɛ ri palɛ vuu ɓɔɔ shi kpang, kpang.

⁶N kɔɔ nɔɔ, zang ɓɔɔ ɓa Gãa Laa bannang katɔ, kagn nihn.

⁷Naa nɔɔ nɛɛ zi Ruu Laa ɓɔɔ kɔɔyi tɔɔ, ‘N kasɛ m ruu gn shɔnzang kɔnang, wu ruu vuu ɓɔɔ zang dɔɔ m kpang.’ Nɔɔ nɛɛ dɔng zang tɔ̃ɔ keɓe ruu kpang.

⁸Ka ruu nɔngkɔ, Jaa Shɔnzang kɔ kpanti Diki Ɔ̃sɔnang zang Yahudi.”

⁹A Yeesɔ seepaa nɛɛ nɔng kaɓa daa ka gãa zɔɔ kpalɛnang Yahudi.

¹⁰A zang ɓɔɔ náa ɓiɓɛ ɓakɛ katɔ kagn nɔngkɔ. A zang ɓɔɔ ri kãa ruu nɛɛ Yeesɔ, hɛ̃ɛ wu tɔɔ, “Labeenang Laa ɓɔɔ Musa beeyi kasɛ katɔ nɛɛ zang wu masɛ zang ka Diki Ɔ̃sɔnang ya?”

¹¹A Yeesɔ kasɛ ri nyaa tɔɔ, “Ɓu wi ka teteng manɛ, naa mã mɛ̀ɛrɛ́, gbete kɔ nwani, a mɛ̀ɛrɛ́ ɓiɓɛ shi ka yeti too ka Diki Ɔ̃sɔnang, yaa ka nɔngkɔ, zɔ̃ng kpang wiya?

¹²Shɔnzang ɓa mɛ̀ɛrɛ́ kpang ya? Ka ruu nɔngkɔ, Laa kasɛ katɔ nɛɛ ruu palɛ vuu tɔ̃ɔ ka Diki Ɔ̃sɔnang.”

¹³A Yeesɔ kɔɔ zang ɓɔɔ náa ɓakɛ katɔ tɔɔ, “Dĩi náa ɓaaɓɛ ta.” A dĩi náa ɓiɓɛ, a náa ɓiɓɛ nwang tɔ̃ɔ kaa tɔkn naa ɓɔɔ dang gbete.

¹⁴A zang Farisi ri nwangkɛ, ri daa tɔ̀ng zɔɔ kaa naa ɓɔɔ ri naa nyɔ wu vɔrɔ ɓɛɛ.

¹⁵Yeesɔ zi tɔ naa weɓe, a seepaa nɛɛ nɔng kaɓa, daayi. Zang dɔɔli ri dũuru wu ka knti, a masɛ zang ɓɔɔ vuu palɛ ri katɔ ka teteng ɓarɛ nandon.

¹⁶A shaarɛ ri nyaa nɛɛ, ri daa kɔɔ zang nɛɛ wukɔ Jaa Laa kpang.

¹⁷Vuu kɔ Yeesɔ palɛ ɓee, ɓèe ɓi kaa nyaa vuu ɓɔɔ Ishaya zang nyaa shonang Laa kɔɔ ka tĩng tɛ̃ɛ tɛ̃ɛ ɓɛɛ. Laa kɔɔyi tɔɔ,

¹⁸“Wee zang shonang mɛɛ ɓɔɔ n zɔ̃ngnɛ, n ti kasɛ ruu ɓiɓɛ gbãng gbãng kɔ. N a wu suru mɛɛ ditɔ, wu tusu zang doo laa ɓɔɔ ka koo keɓe piti, ruu ɓɔɔ niizang kati.

¹⁹Naa gàa nyaa ɓi kpang. Ti naa sãlɛ nyaa ɓi kpang. Zang ti naa tãa yee ɓiɓɛ ɓi ka gbalang kpang.

²⁰Ti naa ka lagaa ɓɔɔ lang katɔ kpang. Ti naa ningsi waa zàáng sɔɔ ɓɔɔ ning kana kpang. Wu ti yi tĩng nɛɛ Ruu Laa sasak, zang piti ri zi ruu ɓɔɔ niizang nɛɛ mani.

²¹Zang ɓɔɔ ri dũ̀ng Laa kpang naa shing gn ka nung ɓiɓɛ kɔ.”

²²A zang naa atɛ wu zang jĩng ringtang ɓɔɔ suru shi kpang ka bii ɓɛɛ, a nyaa ti nɔɔ wu katɔ ɓɛɛ. A Yeesɔ masɛ wu kati. A zang kaɓa gaayu yee rannang kaa nɛɛ nɔng zinang piti.

²³Zang piti ri mã naa ka danggn, ri tɔɔ “Zang keɓe ɓu Jaa zɔ̃ng Dawuda ka ya?”

²⁴Ɓɔɔ zang Farisi ri tãa naa weɓe, ri tɔɔ ɓarɛ nɛɛ “Yeesɔ nwangsɛ suru shi kpang ɓi nɛɛ, naa ɓɔɔ Bahazabu Kpanti suru shi kpang a wu ɓɛɛ.”

²⁵Yeesɔ zi vuu ɓɔɔ ri rɛ̃rɛ ɓi tɔ, a kɔɔ ri tɔɔ, “Naa zang ɓɔɔ kpanti ɓarɛ gbete ri nɛɛ basɛ zɔɔ, ri shàarɛ̀ ɓarɛ tɔ. Zang gari nɛɛ basɛ zɔɔ tɔ, gari ɓarɛ shàarɛ̀ ɓi tɔ. Zang ɓɔɔ ka yeti gãa gbete nɛɛ basɛ zɔɔ tɔ, ri naa nwang ɓi takpang kɔ doori.

²⁶Naa Sheetang nwangsɛ zang ɓiɓɛ, basɛ yuu ɓiɓɛ ɓi tɔ. Kpanti roonang ɓiɓɛ nwang ɓu kaa biya?

²⁷Naa n nwangsɛ suru shi kpang nɛɛ naa ɓɔɔ Bahazabu kpanti suru shi kpang a m, zang ɓɔɔ ri dũng nɔɔ ri nwangsɛ ɓi kaa nɛɛ naa viya? Ka ruu nɔngkɔ, vuu ɓɔɔ zang ɓɔɔ ri dũng nɔɔ ri palɛ, wukɔ tusu nɔɔ nɛɛ ruu manɛ ɓi niizang kpang.

²⁸A n nɛɛ nwangsɛ suru shi kpang nɛɛ Suru Laa, kpanti roonang Laa a bii manɛ tɔ.

²⁹“Zang daa biya ka gãa zang ɓɔɔ lakɛ dɔɔli zang see vuu ka gãa ɓiɓɛ viya? Zang mã wu katɔ ka gbongkarɛ, tɔɔ zang see vuu ka gãa ɓiɓɛ kati.

³⁰“Shɔnzang ɓɔɔ nɛɛ ǹ kpang, wukɔ zang ɓɔɔ shing jĩng nɛɛ ǹ kpang ɓɛɛ. Zang ɓɔɔ ti kpalɛ vuu nɛɛ n kpang, tantɛ ɓi katɔ kɔ jong.

³¹Ka ruu nɔngkɔ, n kɔɔ nɔɔ, vuu shi kpang nɛɛ yee ɓɔɔ shi kpang piti, ɓɔɔ zang rangnɛ, Laa yaa zang gbalang ɓi katɔ. Naa zang rang yee ɓɔɔ shi kpang ka yuu Suru Kpanti Laa, Laa yaa zang gbalang ɓi kpang dòndòng.

³²Zang ɓɔɔ nɛɛ ti rang yee shi kpang ka yuu Jaa Shɔnzang, Laa yaa wu gbalang ɓi katɔ. Naa zang ɓɔɔ rang yee shi kpang ka yuu Suru Laa, Laa yaa wu gbalang ka koo keɓe nɛɛ koo ɓɔɔ naa a ka tĩng ɓɛɛ kpang.

³³“Láa nɛɛ tɔ̃ɔ, ti naa ra jaa ɓi doo tɔ̃ɔ kɔ. Laa nɛɛ shi kpang, ti naa ra jaa ɓi doo shi kpang kɔ. Ka ruu ɓɔɔ, zang zi laa nung ɓi ka jaa ɓɔɔ wu ra ɓɛɛ.

³⁴Nɔkɔ shi kpang naa sɔkɔ pudi ɓi, nɔɔ palɛ biya, yee manɛ wu nwang ɓi kaa tɔ̃ɔ viya? Shɔnzang kɔɔ ɓi doo ruu ɓɔɔ ka yeti ɓiɓɛ kɔ.

³⁵Zang tɔ̃ɔ ti nwangsɛ ɓi doo vuu tɔ̃ɔ ɓɔɔ ka yeti ɓiɓɛ kɔ. Zang shi kpang ti nwangsɛ ɓi doo vuu shi kpang ɓɔɔ ka yeti ɓiɓɛ kɔ.

³⁶N kɔɔ nɔɔ, ka diki ɓɔɔ Laa naa jɛ̃ɛ zang ruu, naa jɛ̃ɛ zang ruu ɓi doo ka ruu yee shi kpang ɓɔɔ ri rangkɛ kɛɛm kɛɛm ɓɛɛ kɔ.

³⁷Laa naa yaa mɔɔ náa ɓi doo nɛɛ yee ɓɔɔ mɔɔ rang ka koo keɓe kɔ. Laa ti naa dɔng mɔɔ ruu ɓi doo nɛɛ yee ɓɔɔ mɔɔ rang ɓɛɛ kɔ.”

³⁸Ka teteng zang Farisi nɛɛ zang ɓɔɔ ri tusu zang labeenang kaɓa, zang ɓɔɔ ri kɔɔ Yeesɔ tɔɔ, “Maalang, ruu kàsɛ̀ nɛɛ mɔɔ tusu ruu vuu ɓɔɔ zang zirɛ zang mã naa ka danggn ɓɛɛ.”

³⁹Yeesɔ kasɛ ri nyaa tɔɔ, “Zang yeti shi kpang ɓɔɔ ri dũ̀ng Laa kpang ka koo jaa knti keɓe, kasɛ nɛɛ zang tusu ri vuu ɓɔɔ zang zirɛ, zang mã naa ka danggn ɓɛɛ. Zang tusu nɔɔ kpang. Zang tusu nɔɔ ɓɔɔ zang pálɛ́ ka bii Yunana, zang nyaa shonang Kpanti Laa ɓɛɛ.

⁴⁰Naa ɓɔɔ Yunana nwang ka yeti jaazĩi nɛɛ laagɛ̃ nɛɛ zĩi diki taati ɓɛɛ. Jaa Shɔnzang naa nwáng doo nɔngkɔ ka tipi dii, nɛɛ laagɛ̃, nɛɛ zĩi diki taati.

⁴¹Ka diki ɓɔɔ Laa naa jɛ̃ɛ zang ruu, zang Ninivi ri naa kɔɔ zang koo jaknti keɓe ruu vuu shi kpang ɓarɛ ditɔ. Ka ruu ɓɔɔ, zang Ninivi ri yaa vuu shi kpang ɓarɛ, ri kɔ̃sɔ yeti ka diki ɓɔɔ Yunana rang ri yee Laa ɓɛɛ. N kɔ̀ɔ́ nɔɔ, zang ɓɔɔ ɓa Yunana katɔ, kagn nihn.

⁴²“Ka diki ɓɔɔ Laa naa jɛ̃ɛ zang ruu, zang soro ɓɔɔ roo Kpanti ka tipi Sheeba, naa kɔɔ zang koo jaa knti ruu vuu shi kpang ɓarɛ ditɔ. Ka ruu ɓɔɔ, a nɛɛ koolaa ɓɔɔgn kpala kpala, nɛɛ wu naa tãa zũnang kpanti Sulemanu ɓɛɛ. N kɔɔ nɔɔ, zang ɓɔɔ ɓa kpanti Sulemanu katɔ, kagn nihn.”

⁴³“Naa zang nwangsɛ suru shi kpang ɓɔɔ ka bii zang tɔ, sɔɔrɔ nɔng ɓɔɔ mii kagn kpang. Kãarɛ nɔng ɓɔɔ wu ɔ̃sɔ kagn ɓɛɛ. Nɛɛ ĩi kpang,

⁴⁴wu ti kɔɔyi nɛɛ, ‘N gbãayu ka gãa gbaala mɛɛ tɔkn.’ Ɓɔɔ wu gbãayu, naa ĩi gãa waati, vuu kagn kpang. Zang kooro tɔ tɔ̃ɔ tɔ̃ɔ a zang ti kpalɛ vuu ɓɔɔ kagn tɔ tɔ̃ɔ tɔ̃ɔ.

⁴⁵Daayi, daa atɛ suru shi kpang ɓɔɔ ɓa wu shi kpang palɛnang katɔ manziti. A suru shi kpang manziti kaɓa, ri naa turɛ, ri nwang ka yeti zang kaɓa. Nwannang shɔnzang keɓe, naa ɓa ɓɔɔ tĩng shɔɔnang lasɛnang ɓi kaa tɔ. Vuu ɓɔɔ naa palɛ zang koo jaa knti keɓe, naa nwang nɔngkɔ.”

⁴⁶Yeesɔ rang yee doo naa nyaa nɛɛ zang ɓɔɔ ri kpalɛ zɔɔ ka bii ɓiɓɛ ɓɛɛ, a nàá Yeesɔ nɛɛ rɛɛ jaa nàá Yeesɔ ri shii ka biling. Ri kasɛ nɛɛ ri rang yee nɛɛ Yeesɔ.

⁴⁷A zang ɓɔɔgn kɔɔ Yeesɔ tɔɔ, “Nàá ɓaaɓɛ ri shii ka biling nɛɛ rɛɛ jaa nàá ɓaaɓɛ. Ri kasɛ nɛɛ ri rang yee nɛɛ mɔɔ.”

⁴⁸A Yeesɔ kasɛ wu nyaa tɔɔ “Ɓu wi nàá mɛɛ nɛɛ rɛɛ jaa nàá mɛɛ wiya?”

⁴⁹A tusu naa ka bii zang ɓɔɔ ri mantɛ vuu ka bii ɓiɓɛ, tɔɔ, “Zirɛ, zang keɓe rikɔ nàá mɛɛ nɛɛ rɛɛ jaa nàá mɛɛ.

⁵⁰Zang piti ɓɔɔ nɛɛ palɛ vuu ɓɔɔ Daa mɛɛ ɓɔɔ ka lapa kasɛ nɛɛ wu palɛ, wukɔ jaa nàá mɛɛ, nɛɛ nàá mɛɛ.”