Read mumuye Matiyu 17 Bible Online

Matiyu 17 - mumuye bible

Matiyu 17

¹Diki mangbete naa ɓa tɔ, Yeesɔ daa kaa nɛɛ rɛɛ Bituru, a ɓɔɔ Yakub nɛɛ jaa niiɓɛ Yɔhana kɔ shɛ̃ɛning ka kɔpɔ beebang.

²A bii Yeesɔ risi kaa naa ɓɔɔgn ka jĩng ɓarɛ. Waa nyaating ɓiɓɛ kɔlɔ kaa naa làa, a fɔ̃ɔrɔ ɓiɓɛ ti risi nwang ka puru shãa shãa.

³A ri zi Musa nɛɛ Iliya, ri rang yee kana nɛɛ Yeesɔ.

⁴Bituru kɔɔ Yeesɔ tɔɔ, “Kpanti, wee ruu ka nihn ɓee wukɔ tɔ̃ɔ. Mɔɔ nɛɛ kasɛ tɔ, ń wàa putali ka nihn taati. Ɓɔɔ ɓaaɓɛ gbete, ɓɔɔ Musa gbete, a ɓɔɔ Iliya ti gbete.”

⁵Bituru rang yee doo naa nyaa, sãmbong ɓɔɔ puru shãa shãa arɛ naa zuu ri kati. A ri tãa yee nɛɛ yeti sãmbong nɛɛ, “Wee Jaa mɛɛ ɓɔɔ yeti mɛɛ kasɛ gbãng gbãng kɔ. N tãa tĩnang ɓiɓɛ dɔɔli. Nɔɔ ɓaa shoo ka nyaa ɓiɓɛ ning.”

⁶Zang ɓɔɔ ri mantɛ vuu ka bii Yeesɔ, ɓɔɔ ri tãa naa weɓe, ri kaa vɔrɔ, a ri zuu nung ka dii.

⁷A Yeesɔ arɛ naa lee ri naa ka bii, a kɔɔ ri nɛɛ, “Nɔɔ seepaa ta. Nɔɔ kaa vɔrɔ kpang.”

⁸Ri tuu jĩng ka lapa, ri zi zang ɓɔɔ takpang, ri zi kaa Yeesɔ kɔ gbete.

⁹Ri shooro doo naa nɛɛ kɔpɔ, Yeesɔ shaarɛ ri nyaa nɛɛ, “Nɔ́ɔ kɔɔ zang ɓɔɔ vuu kɔ nɔɔ zi ɓee kpang, Kpanti Laa wu wisi Jaa Shɔnzang paa nɛɛ vɔrɔ ka gbongkarɛ.”

¹⁰A zang ɓɔɔ ri mantɛ vuu ka bii Yeesɔ, ri hɛ̃ɛ wu tɔɔ, “Ka ruu viya? Zang ɓɔɔ ri tusu zang vuu, kɔɔyi tɔɔ, Iliya kɔ gaayu anang shɔɔnang tɔ̀ɔ Kirisi wu arɛ viya?”

¹¹A Yeesɔ kasɛ ri nyaa tɔɔ, “Iliya kɔ a shɔɔnang niizang, wu naa shĩ̀lí vuu piti.

¹²A n kɔɔ nɔɔ, Iliya a tɔ, ri zi wu nung kpang. Ri palɛ wu vuu piti ɓɔɔ yeti ɓarɛ kasɛ ɓɛɛ. Ri naa dang Jaa Shɔnzang jĩng doo nɔngkɔ.”

¹³A zang ɓɔɔ ri mantɛ vuu ka bii ɓiɓɛ, ri zi kati, nɛɛ rang ri yee ɓi ka yuu Yɔhana ɓɔɔ palɛ zang batizima ɓɛɛ.

¹⁴Ri a tɔ ka nɔng ɓɔɔ zang kpalɛ zɔɔ gaagaa, a zang gbete naa a ka bii Yeesɔ, a tang ka tĩng ɓiɓɛ, kɔɔ wu tɔɔ,

¹⁵“Kpanti, gn jaa mɛɛ wu kɔng mɔɔ jong. Kɔnang ɓɔɔ mã zang katɔ, dang wu jĩng dɔɔli. Looro wu ka waa nɛɛ mii diki diki.

¹⁶N à nɛɛ wu ka bii zang ɓɔɔ ri mantɛ vuu ka bii ɓaaɓɛ, ri zunung ɓɔɔ ri masɛ wu kpang.”

¹⁷A Yeesɔ kɔɔ ri tɔɔ, “Nɔɔ zang shi kpang koo jaa knti kɔ shing danggn ka bii Laa kpang ɓee, nɔɔ nɛɛ n nwang nɛɛ nɔɔ saa nɛya? Nɔɔ nɛɛ ń mã danggn nɛɛ nɔɔ saa nɛya? Nɔɔ atɛ m jaa ta.”

¹⁸A Yeesɔ mangkɛ suru shi kpang, a suru shii kpang nwangnɛ. A kɔnang yaa jaa bii kaa tantɛnang.

¹⁹Zang ɓɔɔ ri mantɛ vuu ka bii Yeesɔ, ri naa arɛ, ri hɛ̃ɛ wu nɛɛ nwĩiri tɔɔ, “Rùu zunung nwangsɛnang ɓuru kpang ka ruu viya?”

²⁰A Yeesɔ kasɛ ri nyaa tɔɔ, “Ka ruu ɓɔɔ, nɔɔ shing danggn ka bii Laa rɛ̃rɛkɛ ɓɛɛ. N kɔɔ nɔɔ ruu ɓɔɔ niizang kɔ nwani, naa danggn ɓɔɔ nɔɔ shing ka bii Laa nɛɛ kagn tɔkɔlɔng naa jĩng vuu ɓɔɔ zang ɓaa nɛɛ masita, nɔɔ nɛ̀ɛ́ kɔɔ kɔpɔ keɓe katɔ, nɛɛ ‘Wɔɔ ta nɛɛ nihn, mɔɔ daa kaaɓa,’ nɛ̀ɛ́ ti wɔɔ katɔ. Vuu ɓɔɔ nɛɛ ɓa nɔɔ yuu palɛnang kagn kpang.”

²¹[Suru shi kpang ɓɔɔ naa weɓe, nwang ɓi jong waati kpang, zang nwangsɛ ɓi nɛɛ Laa gaanang, nɛɛ nyaalaa sennang.]

²²Zang ɓɔɔ ri mantɛ vuu ka bii ɓiɓɛ ri kpalɛ zɔɔ tɔ nandon ka Galili, a Yeesɔ kɔɔ ri ruu keɓe kati tɔɔ, “Zang ɓɔɔ naa tuu m ɓɔɔ n Jaa Shɔnzang ditɔ naa a zang.

²³Ri naa nyɔ m vɔrɔ. Laa naa wisi m paa ka lee ɓɔɔ diki daa taati ɓɛɛ.” Ɓɔɔ zang ɓɔɔ ri mantɛ vuu ka bii Yeesɔ ri tãa naa weɓe, yeti ɓarɛ lasɛ dɔɔli.

²⁴Yeesɔ naa a tɔ Kafanahu nɛɛ zang ɓɔɔ ri mantɛ vuu ka bii ɓiɓɛ. Zang ɓɔɔ ri talɛ saka gãa Laa, ri arɛ ri naa hɛ̃ɛ Bituru tɔɔ, “Maalang manɛ shu saka gãa Laa ɓi kpang ya?”

²⁵A Bituru kasɛ ri nyaa tɔɔ, “Shu katɔ.” A Bituru naa yaa ri, a ka yeti gãa, a Yeesɔ kɔ naa gaa tɔɔsung yee rannang kaa shɔɔnang nɛɛ wu. Yeesɔ tɔɔ, “Mɔɔ zi ɓu bɛ̀ɛ́ ka yeti ɓaaɓɛ viya, Siman? Kpanti ɓɔɔ ka koo keɓe, ri ta saka tipi ɓu ka naa wiya? Ri ta ka naa wujɛ ɓarɛ ya, kɔ ka naa zang zanti?”

²⁶A Bituru kasɛ wu nyaa tɔɔ, “Ri ta ka naa zang zanti.” A Yeesɔ kɔɔyi tɔɔ, “Ka ruu nɔngkɔ, wujɛ shu ɓarɛ kpang.

²⁷A ka ruu ɓɔɔ rùu nɛ̀ɛ́ lasɛ ri yeti ɓɛɛ, dita ka mii waapo, mɔɔ daa loo galong. Tuu jaazĩi ɓɔɔ mɔɔ gaayu yinang mɔɔ puu nyaa ɓiɓɛ. Mɔɔ wàlɛ́ saka ɓɔɔ daa ɓɔ̀ɔ́ gãa Laa shunang ɓaaɓɛ nɛɛ ɓɔɔ mɛɛ piti ditɔ ka nyaa ɓiɓɛ. Tuu saka kaɓa, mɔɔ a ri, ka ruu ɓaaɓɛ nɛɛ ɓɔɔ mɛɛ.”