Read mumuye Matiyu 18 Bible Online

Matiyu 18 - mumuye bible

Matiyu 18

¹Ka diki kaɓa, zang ɓɔɔ ri mantɛ vuu ka bii Yeesɔ ri arɛ, ri hɛ̃ɛ wu tɔɔ, “Ɓu wi zang bang ka nɔng ɓɔɔ Laa roo kpanti wiya?”

²A Yeesɔ ɓaa jaa tɔkɔlɔng nyaa, a shing wu ka teteng ɓarɛ.

³A kɔɔ ri tɔɔ, “N kɔɔ nɔɔ ruu ɓɔɔ niizang kɔ nwani, naa nɔɔ risi yuu manɛ, nɔɔ nwang naa wujɛ seseere kpang, nɔɔ naa daa nɔng ɓɔɔ Laa roo kpanti kagn kpang.

⁴Ka ruu nɔngkɔ, zang piti ɓɔɔ sɔɔrɔ yuu ɓiɓɛ a nwang kaa naa jaa tɔkɔlɔng keɓe, wukɔ zang bang ka nɔng ɓɔɔ Laa roo kpanti ɓɛɛ.

⁵Zang piti ɓɔɔ ta jaa tɔkɔlɔng ɓɔɔ naa weɓe ka ruu nung mɛɛ, ta nkɔ.

⁶“Zang piti ɓɔɔ nɛɛ shing jaa tɔkɔlɔng ka teteng wujɛ seseere ɓɔɔ ri shing danggn ka bii mɛɛ a ri yaa danggn shinnang, jĩng dannang zang kaɓa ɓa ɓɔ̀ɔ zang nɛɛ mã̀ wu ree bang ka turu, zang tasɛ wu ka yeti sàá mii waapo katɔ.

⁷Jĩng dannang kagn yuu koo keɓe, ka ruu vuu ɓɔɔ nwãarɛ zang ka yeti ɓiɓɛ ɓɛɛ. Vuu ɓɔɔ naa weɓe, a ɓi katɔ, a jĩng dannang kagn yuu shɔnzang ɓɔɔ vuu keɓe a nɛɛ bii ɓiɓɛ ɓɛɛ.

⁸“Náa ɓaaɓɛ kɔ nɛɛ dɔ̃ mɔɔ, mɔɔ palɛ vuu shi kpang, dɔng katɔ mɔɔ tasɛ. Nɛɛ ti doo ɓaaɓɛ kɔ nɛɛ dɔ̃ mɔɔ jong, mɔɔ ti dɔngnɛ mɔɔ tasɛ. Daa nɔng suru bii ɓɔɔ waa nyaa kpang nɛɛ naa dang gbete, nɛɛ doo dang gbete gbã̀ágbãa, ka nung ɓɔɔ zang nɛɛ daa tasɛ mɔɔ nɛɛ naa ziti ɓaaɓɛ, nɛɛ doo ziti ɓaaɓɛ nandon, ka waa ɓɔɔ wàa nyaa kpang ɓɛɛ.

⁹Jĩng ɓaaɓɛ kɔ nɛɛ dɔ̃ mɔɔ nɛɛ mɔɔ palɛ vuu shi kpang, zɔ̃ng katɔ mɔɔ tasɛ. Daa nɔng suru bii ɓɔɔ waa nyaa kpang nɛɛ jĩng dang gbete gbã̀ágbãa, ka nung ɓɔɔ zang nɛɛ daa tasɛ mɔɔ nɛɛ jĩng ziti ɓaaɓɛ piti, ka nɔng waa bang ɓɛɛ.

¹⁰“Nɔɔ palɛ tɔ̃ɔ, nɔ́ɔ pɛ̃́ɛrɛ̀ jaa tɔkɔlɔng gbete ka teteng wujɛ keɓe nɛɛ jĩng gɔɔnang kpang. N kɔɔ nɔɔ, zang nyaa shonang Laa ɓɔɔ ɓarɛ, ɓɔɔ ri ka lapa, ri pɛ̃ɛrɛ ɓi waa nyaating Daa mɛɛ ɓɔɔ ka lapa diki diki.

¹¹Jaa Shɔnzang arɛ nɛɛ wu naa ta ɓi yuu zang ɓɔɔ ri ning katɔ ɓɛɛ.

¹²“Nɔɔ zi ɓu bɛ̀ɛ́ ka yeti manɛ viya? Naa shɔnzang mã mɛ̀ɛrɛ́ laa maani, a ɓɔɔ gbete ning ka teteng ɓarɛ, palɛ biya? Yaa ɓɔɔ laa dɛ̃ɛti tu kopi tu mandɛ̃ɛti kaɓa ka kɔpɔ ka nɔngkɔ ka gbongkarɛ, wu daa kãa ɓɔɔ gbete ɓɔɔ ning ɓɛɛ kpang ya?

¹³N kɔɔ nɔɔ ruu ɓɔɔ niizang kɔ nwani, nɛɛ ĩi tɔ, tĩnang ɓɔɔ wu tãa ka ruu ɓiɓɛ, ɓa ɓɔɔ wu tãa ka yuu ɓɔɔ laa dɛ̃ɛti tu kopi tu mandɛ̃ɛti ɓɔɔ ning kpang kaɓa katɔ.

¹⁴Daa manɛ ɓɔɔ ka lapa, nwang doo nɔngkɔ. Kasɛ nɛɛ jaa tɔkɔlɔng gbete ka teteng wujɛ seseere keɓe, wu shaarɛ kpang.

¹⁵“Ɓaazung nɛɛ palɛ mɔɔ vuu shi kpang, daa ka bm ka gbongkarɛ, mɔɔ daa kɔɔ wu vuu shi kpang ɓɔɔ wu palɛ mɔɔ ɓɛɛ. Nɛɛ ɓaa shoo tɔ ka nyaa ɓaaɓɛ, mɔɔ ta yuu ɓiɓɛ tɔ.

¹⁶Nɛɛ ɓaa shoo ka nyaa ɓaaɓɛ kpang, mɔɔ ti daayi, mɔ́ɔ daa ɓaa zang gbete kɔ zang ziti ɓɔɔgn nyaa, ka ruu ɓɔɔ, zang ziti kɔ taati nɛɛ kɔɔ nyaa gbete ka yuu ruu, ruu keɓe ɓi niizang kɔ ɓɛɛ.

¹⁷Nɛɛ ti tãa nyaa zang kaɓa kpang kɔ doori, tɔ̀ɔ mɔɔ daa kɔɔ zang Laa ɓɔɔ nimbang kati. Nɛɛ ɓaa shoo ka nyaa zang Laa ɓɔɔ nimbang kpang kɔ doori, tɔ̀ɔ mɔɔ yaa wu nɔngkɔ, naa ɓɔɔ mɔɔ yaa zang ɓɔɔ dũng Laa kpang ɓɛɛ, kɔ zang ɓɔɔ ta saka tipi ɓɛɛ.

¹⁸“N kɔɔ nɔɔ ruu ɓɔɔ niizang kɔ nwani, vuu piti ɓɔɔ nɔɔ bɛ̃ɛ ka koo keɓe, zang bɛ̃ɛ ɓi katɔ kɔ doori ka lapa. Vuu ɓɔɔ nɔɔ ti kasɛ nɛɛ zang palɛ ka koo keɓe, zang ti kasɛ ɓi katɔ kɔ doori ka lapa.

¹⁹“Nɔɔ ɓaa shoo ta, nɔ́ɔ tãa tɔkn. Naa zang ziti ka teteng manɛ ri mã̀ zɔɔ naa ka yuu vuu piti ɓɔɔ ri gaayi, Daa mɛɛ ɓɔɔ ka lapa palɛ ri katɔ.

²⁰Ka ruu ɓɔɔ, nɔng ɓɔɔ zang ziti, kɔ zang taati ri kpalɛ zɔɔ kagn, ka ruu nung mɛɛ, n kagn teteng ɓarɛ ɓɛɛ.”

²¹Bituru naa arɛ hɛ̃ɛ Yeesɔ tɔɔ, “Kpanti, naa manzung palɛ m vuu shi kpang diki diki, n yaa wu gbalang doo nɛya? Nung dakn manziti ya?”

²²A Yeesɔ kasɛ wu nyaa tɔɔ, “N kɔɔ mɔɔ, wu dakn manziti kpang, ɓi dakn laa taati tu kopi dakn manziti.

²³Ka ruu ɓɔɔ, kpanti ɓɔɔ Laa rooyi, nwang naa yɔɔ kpanti ɓɔɔ tɔɔ wu zili saka ɓɔɔ wu alɛ zang shonang ɓiɓɛ nyaa kɔ́pɔ́ ɓɛɛ.

²⁴Gaa tɔɔsung saka ɓiɓɛ gãnang kana. A zang atɛ wu zang gbete ɓɔɔ ta saka ka naa ɓiɓɛ jaka labang kopi a naa walɛ saka ɓɔɔ wu sɔɔrɔ wu nɔng kaa takpang ɓɛɛ.

²⁵A yɔɔ kpanti kɔɔ zang nɛɛ, zang mãlɛ́ wu ta nɛɛ soro ɓiɓɛ, nɛɛ wujɛ ɓiɓɛ, nɛɛ vuu gãa ɓiɓɛ piti, tɔɔ zang sɔɔrɔ wu saka ɓiɓɛ nɔng.

²⁶A zang shonang kaɓa tang ka tĩng kpanti, a gaa wu tɔɔ, ‘Dabang mɛɛ, n zɔ̃ɔrɔ mɔɔ katɔ, shii ka gbongkarɛ, n sɔ̀ɔrɔ́ mɔɔ saka ɓaaɓɛ ditɔ nandon.’

²⁷A zang shonang kaɓa, gn ɓiɓɛ kɔng kpanti, a kpanti yàa wu saka ɓɔɔ wu ta nyaa kɔ́pɔ́ kati, nɛɛ wu dita.

²⁸“Zang shonang kaɓa naa nwang tɔ ka biling, a naa ɓee yuu nɛɛ ɓeesang shonang ɓɔɔ gbete, ɓɔɔ ta saka nyaa kɔ́pɔ́ jaka gbete ka naa ɓiɓɛ ɓɛɛ. Yi wu ka vɔ̃ɔrɔ tap, nɛɛ wu sɔɔrɔ wu saka ɓiɓɛ ɓɔɔ wu ta ɓɛɛ ta.

²⁹A ɓeesang shonang kaɓa, tang ka tĩng ɓiɓɛ, a bakɛ wu tɔɔ, ‘Shii ka gbongkarɛ, n sɔ̀ɔrɔ́ mɔɔ saka ɓaaɓɛ ditɔ nandon.’

³⁰A kasɛ kpang, a tuu ɓeesang daa loo ka sãa, nɛɛ wu sɔɔrɔ wu saka ɓiɓɛ ɓɔɔ wu ta nyaa kɔ́pɔ́ ka gbongkarɛ.

³¹“Ɓu doo ɓɔɔ ɓeesang shonang ɓɔɔgn ri zi vuu ɓɔɔ wu palɛ naa weɓe, yeti ɓarɛ lasɛ dɔɔli, a ri daa kɔɔ kpanti ɓarɛ vuu ɓɔɔ yɔɔ kaɓa palɛ nandon.

³²A kpanti ɓarɛ, ɓaa wu nyaa, kɔɔ wu tɔɔ, ‘Yɔɔ keɓe, yeti ɓaaɓɛ shi kpang. N yàa mɔɔ saka ɓɔɔ mɔɔ ta nyaa kɔ́pɔ́ tɔ nandon, ka ruu ɓɔɔ mɔɔ gaa m katɔ ɓɛɛ.

³³Ka ruu vi, gn ɓaasang shonang kɔng mɔɔ jong naa ɓɔɔgn ɓaaɓɛ kɔng m, mɔɔ yàa wu saka ɓɔɔ wu ta nyaa kɔ́pɔ́ ka naa ɓaaɓɛ kpang viya?’

³⁴A gnvɔ shaa kpanti, kpanti tuu wu a zang ɓɔɔ ri mã zang ka sãa ɓɛɛ, nɛɛ wu sɔɔrɔ wu saka ɓiɓɛ ɓɔɔ wu ta nyaa kɔ́pɔ́ ka gbongkarɛ nandon.

³⁵N kɔɔ nɔɔ, Daa mɛɛ ɓɔɔ ka lapa, naa palɛ nɔɔ doo nɔngkɔ gbete, gbete, nɔɔ nɛɛ yàa zɔɔ gbalang ka yeti manɛ kpang ɓɛɛ.”