Read mumuye Matiyu 20 Bible Online

Matiyu 20 - mumuye bible

Matiyu 20

¹“Kpanti roonang Laa nwang naa yɔɔ jaa laa inabi ɓɔɔ nwang nɛɛ gãndi zãngzãng, nɛɛ wu daa kãa zang shonang ɓɔɔ ri naa palɛ wu shonang ka jaa ɓiɓɛ ɓɛɛ.

²Ri kà zɔɔ laa nɛɛ zang shonang nɛɛ, wu naa shu ri saka ɓɔɔ zang shu zang ka ruu shonang diki gbete ɓɛɛ. A dɔ̃ ri ka jaa ɓiɓɛ, nɛɛ ri dita, ri daa palɛ wu shonang.

³Làa naa yuu táà, ti daa ĩi zang shonang ɓɔɔ ri nwalɛ waati ka nyaa lumang,

⁴a kɔɔ ri tɔɔ, ‘Nɔɔ dita jong nɔɔ daa palɛ m shonang ka jaa mɛɛ, tɔ̀ɔ n a nɔɔ vuu ɓɔɔ daa naa katɔ ɓɛɛ.’ A zang shonang kaɓa ri daa kati.

⁵A yɔɔ jaa kaɓa ti naa paarɛ zang shonang kãanang nɛɛ laagɛ̃ a ɓɔɔ kaa naa ɓɔɔ laa kpɛ̃ɛ tɔ ɓɛɛ. A ti palɛ doo naa ɓɔɔ tĩng shɔɔnang kɔ.

⁶Ti naa daa nɛɛ laarang tɔkn, a daa ĩi zang shonang ɓɔɔgn, ri shiiri tɔ. A hɛ̃ɛ ri tɔɔ, ‘Nɔɔ shiiri waati ka ruu vi, doo nɛɛ gãndi sasak viya?’

⁷A zang shonang ri kasɛ wu nyaa tɔɔ, ‘Ka ruu ɓɔɔ, zang ɓɔɔ ɓaa ruu nyaa shonang palɛnang kpang ɓɛɛ.’ A kɔɔ ri tɔɔ, ‘Nɔɔ dita jong nɔɔ daa palɛ shonang ka jaa mɛɛ.’

⁸“Kaa nɛɛ làa nyaa vàa, yɔɔ jaa kɔɔ zang bang zang shonang, ɓiɓɛ tɔɔ, ‘Ɓaa zang shonang nyaa ta, mɔɔ shu ri saka shonang ɓarɛ. Gaayu nɛɛ zang doo knti kɔ shɔɔnang, tɔ̀ɔ mɔɔ naa hangsɛ nyaa ka nɛɛ zang ɓɔɔ ri a tĩng shɔɔnang ɓɛɛ.’

⁹A zang shonang ɓɔɔ ri gaayu jaa lannang nɛɛ laarang naa arɛ, zang shu ri saka ɓɔɔ zang shu zang ka ruu shonang diki gbete ɓɛɛ.

¹⁰A zang ɓɔɔ ri gaayu jaa lannang tĩng shɔɔnang, naa arɛ, ri kɔɔ nɛɛ naa, saka ɓarɛ, naa ɓa ɓɔɔ zang ɓɔɔ ri a doo knti ɓi katɔ. Zang shu ri doo saka ɓɔɔ zang shu zang ka ruu shonang diki gbete ɓɛɛ kɔ.

¹¹Ri ta saka shonang ɓarɛ tɔ, a ri gɔ̃ɔrɔ yee nɛɛ yɔɔ jaa nɛɛ,

¹²‘Zang ɓɔɔ ri a doo knti, ri palɛ shonang diki bee kpang, mɔɔ shu rùu ɓɔɔ ruu dang jĩng, laa ti nyɔ ruu sasak, saka nɛɛ ri nyaa kiiri, ka ruu viya?’

¹³A yɔɔ jaa kasɛ zang gbete ɓarɛ nyaa tɔɔ, ‘Masang, n mulu mɔɔ katɔ kpang. Mɔkɔ kasɛ nɛɛ n shu mɔɔ saka ɓɔɔ zang a zang ka ruu shonang diki gbete kpang ya?

¹⁴Dita nɛɛ saka ɓaaɓɛ. Nkɔ tiisi n a zang doo knti, naa ɓɔɔ n a mɔɔ ɓɛɛ.

¹⁵N daa naa ɓɔɔ n palɛ vuu ɓɔɔ yeti mɛɛ kasɛ nɛɛ vuu mɛɛ kpang ya? Gnvɔ shàá mɔɔ ka ruu tɔ̃ɔ ɓɔɔ n palɛ ɓɛɛ ya?’ ”

¹⁶A Yeesɔ naa hangsɛ nyaa kati tɔɔ, “Ka ruu nɔngkɔ, zang doo knti kɔ naa raa zang tĩng. Zang tĩng ri ti raa zang knti.”

¹⁷Yeesɔ daa kana Urushalima, a ɓaa nyaa ka zang ɓɔɔ ri mantɛ vuu ka bii ɓiɓɛ kopi tu ziti dang gbete, a kɔɔ ri tɔɔ,

¹⁸“Rùu daa kana Urushalima, zang ɓɔɔ naa nyɔ yuu mɛɛ, ɓɔɔ n Jaa Shɔnzang ditɔ ka naa zang bang bang zang ɓɔɔ ri dɔɔ vuu ka gãa Kpanti Laa, nɛɛ zang ɓɔɔ ri tusu zang vuu ɓɛɛ. Ri naa jɛ̃̀ɛ m ruu ɓɔɔ zang naa nyɔ m vɔrɔ kagn ɓɛɛ kati.

¹⁹Tɔ̀ɔ, ri naa tuu m, ri a zang ɓɔɔ ri dũng Laa kpang, nɛɛ tɔ̀ɔ ri kpaa m, ri nyɔ m nɛɛ gbãa, tɔ̀ɔ ri daa ɓaa m naa ka laa. A Kpanti Laa naa wisi m paa ka lee ɓɔɔ diki daa taati ɓɛɛ.”

²⁰A soro Zebedi nɛɛ, wujɛ ɓiɓɛ ɓɔɔ varɛ, naa tang ka tĩng Yeesɔ, a gaa vuu ka naa ɓiɓɛ.

²¹Yeesɔ hɛ̃ɛ wu tɔɔ, “Mɔɔ kasɛ viya?” A nàá rɛɛ Yakubu kɔɔ wu tɔɔ, “N tɔɔ mɔɔ kasɛ, wujɛ mɛɛ ziti keɓe, ɓɔɔ gbete wu nwang ka naa nakn ɓaaɓɛ, ɓɔɔ gbete wu ti nwang ka naa nagang ɓaaɓɛ, ka diki ɓɔɔ mɔɔ naa roo kpanti ɓɛɛ.”

²²A Yeesɔ kɔɔ rɛɛ Yakubu nɛɛ Yɔhana tɔɔ, “Nɔɔ zi vuu ɓɔɔ nɔɔ gaa kpang. Nɔɔ naa zunung jĩng dannang katɔ jong naa ɓɔɔ n naa dang ɓɛɛ ya?” A ri kasɛ Yeesɔ nyaa tɔɔ, “Ruu zunung katɔ.”

²³Yeesɔ kɔɔ ri tɔɔ, “Nɔɔ dang jĩng ɓi katɔ nɔngkɔ, a ɓɔɔ nwannang ka naa nakn, nɛɛ naa nagang mɛɛ, ɓi nkɔ a zang naa kpang. Nɔng nwannang keɓe, ɓi ɓɔ̀ɔ́ zang ɓɔɔ Daa mɛɛ palɛ ri ɓɛɛ.”

²⁴Ɓɔɔ zang ɓɔɔ ri mantɛ vuu ka bii Yeesɔ ɓɔɔ yaa kopi, tãa naa weɓe, gnvɔ shàa ri nɛɛ rɛɛ Yakubu nɛɛ Yɔhana dɔɔli.

²⁵A Yeesɔ ɓaa ri nyaa, kɔɔ ri tɔɔ, “Nɔɔ zi tɔ nɛɛ, rɛɛ kpanti zang ɓɔɔ ri dũng Laa kpang, nɛɛ zang bang bang ɓarɛ, ri kasɛ nɛɛ zang zirɛ nɛɛ, rikɔ zang bang.

²⁶A ɓɔɔ manɛ ɓi nɔngkɔ kpang. Shɔnzang ɓɔɔ kasɛ nɛɛ wu nwang zang bang ka teteng manɛ piti, wukɔ wu nwang zang shonang jong.

²⁷Shɔnzang ɓɔɔ ti kasɛ nɛɛ wu naa nwang ka tĩng, wukɔ wu nwang jaafoo manɛ jong.

²⁸Naa ɓɔɔ n Jaa Shɔnzang n arɛ, nɛɛ zang shong m shonang kpang, n arɛ nɛɛ n shong m zang kɔ jong, n ti mãlɛ́ bii mɛɛ ka ruu zang dɔɔli nɛɛ tɔɔ n ta yuu ɓarɛ.”

²⁹Yeesɔ ri seepaa daanang nɛɛ Gari Jeriko nɛɛ zang ɓɔɔ ri mantɛ vuu ka bii ɓiɓɛ, a zang dɔɔli ri dũng wu ka knti.

³⁰Zang jĩng ringtang ziti ɓɔɔ ri nwang ka nyaa gbalang, ri tãayi nɛɛ Yeesɔ tɛɛ kana, a ri mɛɛ nyaa ka lapa nɛɛ, “Kpanti, Jaa Dawuda, gn ɓuru wu kɔng mɔɔ jong.”

³¹A zang ɓɔɔ ri dũng Yeesɔ ka knti, mangkɛ ri, nɛɛ ri vɔ̃ nyaa ta. Ri mɛɛ nyaa nabm tɔkn ka lapa nɛɛ, “Kpanti, Jaa Dawuda, gn ɓuru wu kɔng mɔɔ jong.”

³²A Yeesɔ shiiyi, ɓaa ri nyaa, a hɛ̃ɛ ri tɔɔ, “Nɔɔ kasɛ nɛɛ n pàlɛ̀ nɔɔ viya?” A ri kasɛ wu nyaa tɔɔ,

³³“Kpanti, ruu kasɛ mɔɔ pùu ruu jĩng jong, ruu zi nɔng.”

³⁴Gn ɓarɛ kɔng Yeesɔ, a lee naa ka jĩng ɓarɛ. Jĩng ɓarɛ tantɛ kaa puunang, ri zi nɔng, a ri dũng Yeesɔ kati.