Read mumuye Matiyu 23 Bible Online

Matiyu 23 - mumuye bible

Matiyu 23

¹A Yeesɔ kɔɔ zang ɓɔɔ ri kpalɛ zɔɔ, nɛɛ zang ɓɔɔ ri mantɛ vuu ka bii ɓiɓɛ tɔɔ,

²“Zang ɓɔɔ ri tusu zang labeenang Laa, nɛɛ zang Farisi, rikɔ tèng doo Musa.

³“Ka ruu nɔngkɔ, nɔɔ ɓaa shoo, ka vuu ɓɔɔ, ri kɔɔ nɔɔ tɔ̃ɔ tɔ̃ɔ, tɔ̀ɔ nɔ́ɔ palɛ vuu piti ɓɔɔ ri kɔɔ nɔɔ kati. A nɔ́ɔ pálɛ̀ vuu ɓɔɔ ri palɛ manɛ kpang, ka ruu ɓɔɔ, ri pálɛ̀ vuu ɓɔɔ ri kɔɔ nɛɛ nyaa ɓarɛ kpang ɓɛɛ.

⁴Ri ĩi zang nyaa ka vuu ɓɔɔ kpãa katɔ palɛnang, a ri kasɛ nɛɛ ri lee naa ɓarɛ kagn kpang.

⁵Vuu piti ɓɔɔ ri palɛ, ri palɛ ɓarɛ ka ruu ɓɔɔ, tɔ̀ɔ, zang zi ri kati ɓɛɛ. Ri pu jaa baajaa ɓɔɔ ri tɛ̃ɛ Ruu Laa ɓarɛ kagn nɛɛ koo zaa nwɛ̃ɛri pokoto pokoto, ri mã kaa waa nyaating ɓarɛ. Ri ti hãlɛ ɓarɛ fɔ̃ɔrɔ ɓɔɔ nyaa ɓiɓɛ beebang beebang ɓɛɛ.

⁶Ri kasɛ nwannang ka nɔng ɓɔɔ zang bang ri nwalɛ ka nɔng ɓɔɔ zang kpalɛ zɔɔ kagn zang shaa vuu shaanang nɛɛ ɓɔɔ ka gãa zɔɔ kpalɛnang zang Yahudi ɓɛɛ.

⁷Ri ti kasɛ nɛɛ zang jeere ri nyaa ka nɔng piti ɓɔɔ zang kpalɛ zɔɔ ɓɛɛ. Ri ti kasɛ nɛɛ zang ɓaarɛ ri nɛɛ maalang.

⁸“Zang wu ɓàa nɔɔ manɛ nɛɛ ‘Maalang kpang.’ Ka ruu ɓɔɔ, Maalang manɛ ɓi gbete kɔ nwani ɓɛɛ. Nɔɔ manɛ kaa naa jaa nàá zɔɔ kɔ nandon.

⁹Nɔ́ɔ ti ɓàa zang ɓɔɔ nɛɛ, ‘Dada, ka koo keɓe kpang’ Ka ruu ɓɔɔ, Daa manɛ ɓi gbete kɔ nwani ɓɛɛ. Nɔng nwannang ɓiɓɛ ɓi ti ka lapa.

¹⁰Zang ri ti ɓaarɛ nɔɔ nɛɛ, ‘Zang bang kpang.’ Ka ruu ɓɔɔ zang bang manɛ ɓi gbete kɔ nwani ɓɛɛ. Zang bang kaɓa wukɔ Kirisi.

¹¹Shɔnzang bang ɓɔɔ ka teteng manɛ piti wukɔ wu raa zang ɓɔɔ shong nɔɔ jong.

¹²Shɔnzang ɓɔɔ tɔɔ wu tuu yuu ɓiɓɛ piti, zang naa sɔɔrɔ wukɔ yuu jong ka dii. A zang ɓɔɔ sɔɔrɔ yuu ɓiɓɛ ka dii, zang naa tuu wukɔ jong ka lapa.

¹³“Vuu gn kɔnang kagn yuu manɛ zang ɓɔɔ tusu zang vuu nɛɛ zang Farisi, nɔɔ ɓɔɔ nɔɔ nwãarɛ zang nɛɛ vuu palɛnang ɓɛɛ. Ka ruu ɓɔɔ nɔɔ nɔ̀ɔ́ zang gbalang ɓɔɔ zang zi kagn nɛɛ Laa wukɔ Kpanti ɓɛɛ. Nɔɔ ta wu kpang, a nɔɔ ti yàa zang ɓɔɔ ri kasɛ wu tanang katɔ gbalang kpang ɓɛɛ.

¹⁴Vuu gn kɔnang kagn yuu manɛ, zang ɓɔɔ tusu zang vuu nɛɛ zang Farisi. Nɔɔ zang ɓɔɔ nɔɔ nwãarɛ zang nɛɛ vuu palɛnang ɓɛɛ, ka ruu ɓɔɔ, nɔɔ mulu suvɔ ɓɛɛ. Nɔɔ ti gaa Laa sasak, nɛɛ tɔɔ zang zi nɔɔ kati ɓɛɛ. Ka ruu nɔngkɔ, Kpanti Laa naa dang nɔɔ jĩng ditɔ dɔɔli, ɓa ɓɔ̀ɔ́ zang piti.

¹⁵“Vuu gn kɔnang kagn yuu manɛ, zang ɓɔɔ tusu zang vuu, nɛɛ zang Farisi. Nɔɔ ɓɔɔ nɔɔ nwãarɛ zang nɛɛ vuu palɛnang ɓɛɛ, ka ruu ɓɔɔ, nɔɔ rakɛ ka yuu tipi, nɛɛ yuu mii waapo piti, ka nɔng ɓɔɔ nɔɔ kãa zang gbete ɓɔɔ dũng knti manɛ ɓɛɛ. Nɔɔ nɛɛ ĩi tɔ, nɔɔ risi wu, wu nwang zang ɓɔɔ ɓa nɔɔ vuu shi kpang palɛnang katɔ dakn ziti, ɓɔɔ daa nɛɛ nɔɔ ning ka waa bang.

¹⁶“Vuu gn kɔnang kagn yuu manɛ, zang jĩng ringtang ɓɔɔ tusu zang gbalang ɓɛɛ. Nɔɔ kɔɔyi tɔɔ, ‘Naa zang tũng Laa nɛɛ Gãa Laa, vuu ɓɔɔ ɓi kagn kpang. A naa shɔnzang tũng Laa nɛɛ zinariya ɓɔɔ ka yeti Gãa Laa, wu palɛ vuu ɓɔɔ wu tũng ɓɛɛ ta.’

¹⁷Nɔɔ shoko zang jĩng ringtang. Ɓu vi bang viya? Zinariya ya, kɔ Gãa Laa ɓɔɔ risi zinariya keɓe nwang vuu Laa ɓɛɛ?

¹⁸Nɔɔ ti kɔɔyi nɛɛ ‘Naa shɔnzang tũng Laa nɛɛ nɔng ɓɔɔ zang dɔ́ɔ Kpanti Laa vuu kagn, vuu ɓɔɔ ɓi kagn kpang. A náa shɔnzang tũng Laa nɛɛ vuu ɓɔɔ ka yuu ɓiɓɛ, zang wu palɛ vuu ɓɔɔ wu tũng ɓɛɛ ta.’

¹⁹Nɔɔ zang jĩng ringtang, ɓu vi bang viya? Vuu ɓɔɔ zang a Kpanti Laa ka nɔng ɓɔɔ zang dɔ́ɔ Kpanti Laa vuu ɓɛɛ ya? Kɔ nɔng ɓɔɔ zang dɔɔ Kpanti Laa vuu, ɓɔɔ risi vuu keɓe, ɓɔɔ zang dɔɔ Kpanti Laa nwang vuu Laa ɓɛɛ ya?

²⁰Ka ruu nɔngkɔ, shɔnzang ɓɔɔ nɛɛ tũng Laa nɛɛ nɔng ɓɔɔ zang dɔɔ Kpanti Laa vuu, tũng Laa ɓi nɛɛ vuu ɓɔɔ ka yuu ɓiɓɛ kɔ nandon.

²¹Zang ɓɔɔ nɛɛ ti tũng Laa nɛɛ Gãa Laa, tũng Laa ɓi nɛɛ Gãa Laa nɛɛ Laa ɓɔɔ nwang kagn ɓɛɛ.

²²Zang ɓɔɔ nɛɛ tũng Laa nɛɛ lapa, tũng ɓi nɛɛ laa nwannang Kpanti Laa, nɛɛ Laa ɓɔɔ nwang ka yuu ɓiɓɛ ning.

²³“Vuu gn kɔnang kagn yuu manɛ zang ɓɔɔ tusu zang vuu nɛɛ zang Farisi, nɔɔ ɓɔɔ nɔɔ nwãarɛ zang nɛɛ vuu palɛnang ɓɛɛ. Nɔɔ a Kpanti Laa vuu gbete ka yeti kopi vuu ɓɔɔ nɔɔ langkɛ naa rɛɛ zitaa, nɛɛ seteng, a ɓɔɔ yaaji kɔ̃ɔlaa ɓɛɛ katɔ nandon. A nɔɔ dũng ruu bang ɓɔɔ ka yeti labeenang Kpanti Laa ɓɛɛ kpang. Kpanti Laa kasɛ nɛɛ nɔɔ jɛ̃ɛ zang ruu tɔ̃ɔ. Nɛɛ gn zang wu ti kɔng nɔɔ katɔ, nɛɛ nɔɔ ti kɔɔ ruu ɓɔɔ niizang ɓɛɛ. Nɔɔ palɛ vuu keɓe nɛɛ ɓɔɔ nimbang ning.

²⁴Zang jĩng ringtang ɓɔɔ tusu zang gbalang ɓɛɛ. Nɔɔ yàkɛ́ vuu seseere ɓɔɔ naa pũng, ka mii ɓoonang manɛ, a nɔɔ mã vuu bang, ɓɔɔ naa napo kɔ jong.

²⁵“Vuu gn kɔnang kagn yuu manɛ zang ɓɔɔ tusu zang vuu nɛɛ zang Farisi. Nɔɔ ɓɔɔ nɔɔ nwãarɛ zang nɛɛ vuu palɛnang ɓɛɛ. Nɔɔ nwang naa waka, nɛɛ gbanti ɓɔɔ zang sɔɔ dakn biling kɔ shɛ̃ɛning, a yeti ɓiɓɛ tɔ̀ɔ ɓi katɔ ɓɛɛ. Yeti manɛ nwang doo nɔngkɔ. Yeti manɛ ɓi ɓangge nɛɛ yuu kasɛnang kɔ shɛ̃ɛning.

²⁶Yɔɔ Farisi kɔ jĩng ringtang ɓi, gaayu nɛɛ yeti juwa, nɛɛ gbanti kɔ sɔɔnang shɔɔnang, tɔɔ dakn ɓarɛ wu pu kaa jong.

²⁷“Vuu gn kɔnang kagn yuu manɛ zang ɓɔɔ tusu zang vuu, nɛɛ zang Farisi. Nɔɔ ɓɔɔ nɔɔ nwãarɛ zang nɛɛ vuu palɛnang ɓɛɛ. Ka ruu ɓɔɔ nɔɔ, nwang naa, yuu sàa ɓɔɔ zang mãarɛ, zang nwãa kponsi puru ka bii ɓarɛ, tɔ̀ɔ, ri shi kaa nɛɛ biling ɓɛɛ. A yeti ɓarɛ ɓi kaka shɔnzang ɓɔɔ ri vɔlɔ nɛɛ vuu ɓɔɔ pũlu katɔ kɔ shɛ̃ɛning.

²⁸Nɔɔ nwang doo nɔngkɔ. Nɔɔ nwang zang tɔ̃ɔ ka jĩng zang, a vuu ɓɔɔ ka yeti manɛ, ɓi zang nwãarɛnang nɛɛ vuu shi kpang kɔ shɛ̃ɛning.

²⁹“Vuu gn kɔnang kagn yuu manɛ zang ɓɔɔ tusu zang vuu, nɛɛ zang Farisi. Nɔɔ ɓɔɔ nɔɔ nwãarɛ zang nɛɛ vuu palɛnang ɓɛɛ, ka ruu ɓɔɔ nɔɔ gbarɛ mãanang yuu sàá zang nyaa shonang Kpanti Laa, nɛɛ ɓɔɔ zang ɓɔɔ ri palɛ vuu tɔ̃ɔ.

³⁰A nɔɔ ti kɔɔyi nɛɛ, ‘Naa ruu nɛɛ nwang jong ka diki daa ɓuru ɓɔɔ ka tĩng, ruu nɛɛ yí naa ɓuru ka zang nyaa shonang Laa nyɔnang nɛɛ ri kpang.’

³¹Ka ruu nɔngkɔ, nɔɔ tusu zang nɛɛ nɔɔ zi tɔ, nɛɛ nɔkɔ wujɛ zɔ̃ng zang ɓɔɔ ri nyɔkɔ zang nyaa shonang Kpanti Laa ɓɛɛ.

³²Nɔɔ hangsɛ nyaa vuu shi kpang ɓɔɔ daa manɛ ri yaa ɓɛɛ ta.

³³“Sɔkɔ keɓe, nɔkɔ wujɛ sɔkɔ pudi ɓi. Nɔɔ naa wɔ daanang ka yeti waa bang ɓu kaa biya?

³⁴Ka ruu nɔngkɔ, n shong nɔɔ zang nyaa shonang Laa ditɔ, nɛɛ zang ɓɔɔ zũng katɔ nɛɛ zang ɓɔɔ tusu zang vuu ɓɛɛ. Nɔɔ naa nyɔkɔ ɓɔɔ ditɔ, nɔɔ ti ɓaarɛ ɓɔɔ naa ka laa. Nɔɔ ti naa nyɔkɔ ɓɔɔ nɛɛ gbãa ka gãa zɔɔ kpalɛnang manɛ. Nɔɔ ti naa hingki ɓɔɔ nɛɛ rɛɛ gari manɛ piti.

³⁵Tɔ̀ɔ, jĩng dannang zang ɓɔɔ ri nyɔ̀kɔ̀ zang tɔ̃ɔ, ɓɔɔ ka koo keɓe piti, wu nwang ka yuu manɛ. Zang tɔ̃ɔ ɓɔɔ gaayu nɛɛ bii Habila, a naa a ka yuu Zakariya jaa Berikiya ɓɔɔ nɔɔ nyɔ ka teteng Gãa Laa nɛɛ nɔng ɓɔɔ zang dɔɔ Laa vuu kagn ɓɛɛ.

³⁶N kɔɔ nɔɔ ruu ɓɔɔ niizang kɔ nwani, jĩng dannang ɓɔɔ ka ruu vuu keɓe piti, naa nwang ɓi ka yuu zɔ̃ng doo jaa knti keɓe kɔ.

³⁷“Zang Urushalima, zang Urushalima, nɔkɔ nyɔkɔ zang nyaa shonang Laa. A nɔɔ ti luku zang ɓɔɔ zang shong ka bii manɛ nɛɛ tari. Diki ɓɔɔ n tɔɔ, n kpalɛ nɔɔ yuu ka zɔɔ, naa ɓɔɔ nàá kn kpalɛ jaa seseere ɓiɓɛ ka dii nasãng daa kaa nɛya? A nɔɔ kasɛ kpang.

³⁸Zang naa yaa nɔɔ gãa ɓɔɔ ka Urushalima ditɔ, wu raa dãzãa.

³⁹N kɔɔ nɔɔ tɔɔ, nɔɔ naa paasɛ m zinang tɔkn, nɔɔ nɛɛ naa kɔɔ tɔ nɛɛ, ‘Laa wu a zang ɓɔɔ a ka nung Kpanti Laa tĩnang tãanang ɓɛɛ.’ ”