Read mumuye Matiyu 25 Bible Online

Matiyu 25 - mumuye bible

Matiyu 25

¹“Ka diki kaɓa kpanti roonang Laa naa nwang naa ruu rɛɛ ja soo kopi ɓɔɔ ri daa kn sinyɛ shaanang ɓɛɛ. Ri yaka waa zàáng sɔɔ nɛɛ ri daa ɓee sinyɛ ɓeevɛ yuu.

²Ka teteng ja soo kopi kaɓa, ɓɔɔ maani zũng kpang, a ɓɔɔ maani zũng ɓarɛ katɔ.

³Ɓɔɔ zũng kpang maani kaɓa, daa ɓarɛ nɛɛ nung waa ka zàáng kpang.

⁴A ɓɔɔ zũng katɔ maani kaɓa, daarɛ ɓarɛ nɛɛ nung waa ka zàáng ning.

⁵“Ri daa nwang tɔ, a sinyɛ ɓeevɛ a pati kpang, a hingro naa yiki ri.

⁶Kaa nɛɛ teteng gãmbang, zang sãa nyaa ka lapa, nɛɛ, ‘Sinyɛ ɓeevɛ a kana, nɔɔ nwang ta, nɔɔ kpisi wu yuu.’

⁷“A rɛɛ ja soo kopi kaɓa ri seepaa, ri gisi waa ɓɔɔ ka zàáng sɔɔ ɓarɛ.

⁸A ja soo maani ɓɔɔ zũng kpang kaɓa, kɔɔ rɛɛ ɓeesang ɓɔɔ zũng katɔ nɛɛ, ‘Nɔɔ kàsɛ̀ rùu nung manɛ jong, ka ruu ɓɔɔ waa zàáng sɔɔ ɓuru ning kana ɓɛɛ.’

⁹“A, rɛɛ ja soo maani ɓɔɔ zũng katɔ kaɓa, kɔɔ ri tɔɔ, ‘Nung ɓuru, daa ɓɔɔ ruu basɛ nɛɛ nɔɔ kpang. Nɔɔ dita, nɔ́ɔ daa hoo ɓɔɔ manɛ ka naa zang ɓɔɔ ri mãlɛ́ ɓɛɛ.’

¹⁰“Ja soo maani ɓɔɔ zũng kpang kaɓa, ri daa tɔ nɔng nung hoonang, a sinyɛ ɓeevɛ naa a ka knti ɓarɛ. Ja soo maani ɓɔɔ ri kpalɛ bii tɔ kaɓa, ri daa ɓarɛ kaa nɛɛ wu, ka nɔng ɓɔɔ zang shaa kn sinyɛ ɓɛɛ. A zang ku nyaa gãa kati.

¹¹“Knti nɛɛ tɔɔ wu bee tɔkɔlɔng, ja soo maani ɓɔɔ ri daa nung waa zàáng sɔɔ ɓarɛ hooronang, ri naa arɛ. Ri ɓaa nyaa nɛɛ, ‘Sinyɛ ɓeevɛ, puu ruu nyaa gãa jong.’

¹²“Sinyɛ ɓeevɛ kasɛ ri nyaa tɔɔ, ‘N kɔɔ nɔɔ katɔ kɔ nwani, n zi nɔɔ nung kpang.’ ”

¹³A Yeesɔ hangsɛ nyaa tɔɔ, “Nɔɔ shing danggn kagn, ka ruu ɓɔɔ nɔɔ zi diki nɛɛ laa ɓɔɔ n gbãayu kpang ɓɛɛ.”

¹⁴“Kpanti roonang Laa, naa nwang naa ruu yɔɔ ɓɔɔ tɔɔ wu daa zanti, a ɓaa nyaa ka zang shonang ɓiɓɛ, yàa ri vuu naa ɓiɓɛ ɓɛɛ.

¹⁵Yɔɔ kaɓa, a zang shonang ɓiɓɛ ɓɔɔ gbete saka jaka maani, ti a zang gbete jaka ziti, a ti a zang gbete jaka gbete ka naa zũnnang ɓarɛ. A seepaa daa zanti kati.

¹⁶Zang shonang yɔɔ gbete ɓɔɔ ta saka jaka maani kaɓa, tuu saka ɓiɓɛ daa hooro vuu ɓɔɔ wu naa mãlɛ́ nɛɛ mani tantɛnang. A naa walɛ jaka ɓɔɔgn nɔ́ng maani.

¹⁷A zang gbete ɓɔɔ ta saka jaka ziti, ti daa walɛ ɓɔɔgn nɔ́ng ziti.

¹⁸A, zang gbete ɓɔɔ ta jaka gbete kaɓa, daayi daa gbãa tipi, a waasɛ saka yɔɔ gãa ɓiɓɛ kagn.

¹⁹“Diki bee tɔ, a yɔɔ gãa rɛɛ zang shonang kaɓa naa gbãayu kati. A ɓaa ri nyaa, hɛ̃ɛlɛ ri vuu ɓɔɔ ri palɛ nɛɛ saka ɓɔɔ wu alɛ ri ɓɛɛ kati.

²⁰A zang shonang ɓiɓɛ ɓɔɔ wu a wu jaka maani, arɛ naa a wu kaa jaka kopi. A kɔɔ wu tɔɔ, ‘Kpanti, mɔɔ a m jaka maani, n walɛ ɓɔɔgn tɔ nɔ́ng maani.’

²¹“Yɔɔ gãa ɓiɓɛ tɔɔ, ‘Nn hn, mɔɔ zang shonang tɔ̃ɔ ɓɔɔ ɓaa shoo ka nyaa zang, ti palɛ vuu tɔ̃ɔ ɓɛɛ. Mɔɔ palɛ vuu tɔ̃ɔ, ka vuu ɓɔɔ tɔkɔlɔng, n shing mɔɔ ka yuu vuu ɓɔɔ dɔɔli ɓɛɛ. A ta, mɔɔ tãa tĩnang nɛɛ n.’

²²“A zang shonang yɔɔ gãa gbete ɓɔɔ yɔɔ a wu jaka ziti, ti arɛ kɔɔ wu tɔɔ, ‘Kpanti, mɔɔ a m jaka ziti n walɛ ɓɔɔgn tɔ nɔ́ng ziti.’

²³“Yɔɔ gãa ɓiɓɛ tɔɔ, ‘Nn hn zang shonang tɔ̃ɔ ɓɔɔ ɓaa shoo ka nyaa zang, ti palɛ vuu tɔ̃ɔ ɓɛɛ. Mɔɔ palɛ vuu tɔ̃ɔ ka vuu ɓɔɔ tɔkɔlɔng, n shing mɔɔ ka yuu ɓɔɔ dɔɔli ɓɛɛ. A ta, mɔɔ tãa tĩnang nɛɛ n.’

²⁴“A zang shonang yɔɔ gbete, ɓɔɔ yɔɔ a wu jaka gbete naa arɛ kɔɔ wu tɔɔ, ‘Kpanti, n zi tɔ, mɔɔ kpãa nyaa ɓaa katɔ, mɔɔ yée vuu ɓáa ka nɔng ɓɔɔ mɔɔ ɓáa kpang ɓɛɛ, mɔɔ ti kpalɛ vuu ɓáa ka nɔng ɓɔɔ mɔɔ vang jĩng vuu kpang ɓɛɛ.

²⁵Ka ruu nɔngkɔ, n kaa vɔrɔ, a n daayi, n daa waasɛ saka ɓaaɓɛ ka tipi. Vuu ɓaaɓɛ keɓe, ta, ta.’

²⁶“A yɔɔ gãa ɓiɓɛ kasɛ wu nyaa tɔɔ, ‘Mɔɔ ɓáa zang shonang ɓɔɔ shi kpang ɓɛɛ. Mɔɔ lagn dɔɔli. Mɔɔ zi tɔ nɛɛ n yée vuu ka nɔng ɓɔɔ n ɓaa kpang. N ti kpalɛ vuu ka nɔng ɓɔɔ n vang kpang.

²⁷A ka ruu vi, mɔɔ shìng m saka mɛɛ ka gãa ɓɔɔ zang shing saka kagn kpang viya? Wee n gbãayu, n nɛɛ naa ta kaa nɛɛ ɓɔɔ zang gisi zang ka yuu ɓiɓɛ ning, kpang ya?’

²⁸“A raa jĩng kɔɔ zang ɓɔɔ ri shiiri ɓɛɛ tɔɔ, ‘Nɔɔ ta saka ɓɔɔ ka naa ɓiɓɛ ta, nɔ́ɔ a zang shonang ɓɔɔ, ɓɔɔ ɓiɓɛ kopi ɓɛɛ,

²⁹ka ruu ɓɔɔ, zang piti ɓɔɔ vuu ɓiɓɛ kagn zang naa gisi wu ɓɔɔgn ditɔ tɔkn, tɔ̀ɔ ɓɔɔ ɓiɓɛ wu shang kati. A zang piti ɓɔɔ vuu ɓiɓɛ kagn dɔɔli kpang, vuu ɓɔɔ ka naa ɓiɓɛ tɔkɔlɔng, zang naa ta ditɔ.’

³⁰A yɔɔ kpanti kɔɔ zang tɔkn nɛɛ ‘Nɔɔ tasɛ zang shonang shi kpang keɓe ta ka biling, ka nɔng ɓɔɔ tɔ̀ɔ katɔ ɓɛɛ. Ka nɔng ɓɔɔ zang naa kaayi, zang shaa nyaa kagn kpaaka kpaaka ɓɛɛ.’ ”

³¹“Ka diki ɓɔɔ Jaa Shɔnzang naa a ka naa bannang ɓiɓɛ, nɛɛ zang nyaa shonang Laa ɓɔɔ ri ka lapa piti, naa nwang ka yuu laa nwannang Kpanti ɓiɓɛ.

³²Zang naa kpalɛ zang ɓɔɔ ka koo keɓe ditɔ ka bii ɓiɓɛ nandon, tɔɔ, wu shɛ̃ɛrɛ zang ɓiɓɛ kaa naa ɓɔɔ jagãng shɛ̃ɛrɛ mɛ̀ɛrɛ́ nɛɛ teteng jàa ɓɛɛ.

³³Wu naa kpalɛ mɛ̀ɛrɛ́ ka naa nakn, jàa ɓi kaa naa nagang ɓiɓɛ.

³⁴Kpanti wu naa kɔɔ zang ɓɔɔ ri ka naa nakn ɓiɓɛ nɛɛ, ‘Zang ɓɔɔ Daa mɛɛ a ri tĩnang tãanang tɔ ɓɛɛ, nɔɔ a ta nɔ́ɔ ta vuu tɔ̃ɔ ɓɔɔ Daa mɛɛ shĩili nɔɔ, doo ka diki ɓɔɔ wu gaayu koo keɓe mãanang ɓɛɛ.

³⁵Ka ruu ɓɔɔ, nyɔkɔ nyɔ m, nɔɔ a m vuu shaanang ɓɛɛ. Sutu ti mãa m nyaa, nɔɔ a m vuu ɓoonang. N ti a zanti, nɔɔ ta m ka gãa manɛ.

³⁶N nwang bii waati, a nɔɔ hãa m fɔ̃ɔrɔ. Kɔnang yi m, nɔɔ gãng jĩng ka n. Zang mã m ka sãa, a nɔɔ lengke jĩng ka n ɓɛɛ.’

³⁷“A zang ɓiɓɛ kaɓa, naa kasɛ wu nyaa nɛɛ, ‘Kpanti, nyɔkɔ nyɔ mɔɔ gn vi, ruu zi mɔɔ, a ruu a mɔɔ vuu shaanang viya? Sutu ti mã mɔɔ nyaa gn vi, ruu a mɔɔ vuu ɓoonang viya?

³⁸Mɔɔ ti á zanti gn vi, ruu zi mɔɔ, a ruu ta mɔɔ ka gãa ɓuru viya? Mɔɔ ti nwang bii waati gn vi, ruu ti hãa mɔɔ fɔ̃ɔrɔ viya?

³⁹Kɔnang ti yi mɔɔ gn vi, a zang ti mã mɔɔ gn vi ka sãa, a ruu zirɛ, ruu daa leng jĩng ka mɔɔ viya?’

⁴⁰“A Kpanti naa kasɛ ri nyaa nɛɛ, ‘N kɔɔ nɔɔ ruu ɓɔɔ niizang kɔ nwani, vuu piti ɓɔɔ nɔɔ palɛ zang gbete ɓɔɔ wukɔ tɔkɔlɔng ka teteng rɛɛ manzung keɓe, nɔɔ pàlɛ̀ nkɔ.’

⁴¹“A naa kɔ̀ɔ́ zang ɓɔɔ ka naa nagang ɓiɓɛ nɛɛ, ‘Zang ɓɔɔ Kpanti Laa ku nɔɔ nyaa tɔ ka bii, ka ruu vuu shi kpang manɛ ɓɛɛ, nɔɔ dita yeti waa ɓɔɔ Laa palɛ ka ruu Kpanti suru shi kpang nɛɛ zang nyaa shonang ɓiɓɛ ɓɛɛ.

⁴²Ka ruu ɓɔɔ, nyɔkɔ nyɔ m, nɔɔ a m vuu shaanang kpang ɓɛɛ. Sutu ti mã m nyaa, nɔɔ ti a m vuu ɓoonang kpang.

⁴³N a zanti, nɔɔ ti ta m ka gãa manɛ kpang. N nwang bii waati, nɔɔ hãa m fɔ̃ɔrɔ kpang. Kɔnang yi m, a zang ti mã m ka sãa nɔɔ lengke jĩng ka n kpang.’

⁴⁴“A ri naa kasɛ wu nyaa doo nɔngkɔ nɛɛ, ‘Kpanti Laa, ruu zi mɔɔ gn vi nyɔkɔ nyɔ mɔɔ katɔ, sutu mãa mɔɔ, bii ɓaaɓɛ ti waati, a ruu yi mɔɔ naa ka bii kpang viya? Mɔɔ ti a zanti gn vi, a ruu ta mɔɔ ka gãa ɓuru kpang viya? Kɔnang ti palɛ mɔɔ gn vi, ruu ti zi mɔɔ gn vi ka sãa a ruu lengke jĩng ka mɔɔ kpang viya?’

⁴⁵“A Kpanti naa kasɛ ri nyaa nɛɛ, ‘N kɔɔ nɔɔ ruu ɓɔɔ niizang kɔ nwani, vuu piti ɓɔɔ nɔɔ palɛ zang ɓɔɔ wukɔ tɔkɔlɔng ka teteng rɛɛ manzung keɓe kpang, nɔɔ palɛ nkɔ kpang.’

⁴⁶“Ri naa daa ɓarɛ ka nɔng jĩng dannang ɓɔɔ waa nyaa kpang ɓɛɛ. A zang ɓiɓɛ kaɓa, ri naa wàlɛ́ ɓarɛ kaa suru bii ɓɔɔ waa nyaa kpang ɓɛɛ.”