Read mumuye Matiyu 26 Bible Online

Matiyu 26 - mumuye bible

Matiyu 26

¹Yeesɔ hangsɛ nyaa yee keɓe rannang tɔ nandon, a kɔɔ zang ɓɔɔ ri mantɛ vuu ka bii ɓiɓɛ tɔɔ,

²“Nɔɔ zi tɔɔ, diki ɓɔɔ zang shaa nyaalaa Pasika yaa lɛ̀ɛ́ kaa ziti. Zang naa yi m ɓɔɔ n Jaa Shɔnzang, zang a zang ɓɔɔ ri naa ɓaa m naa ka laa ɓɛɛ.”

³Zang bang bang zang ɓɔɔ ri dɔɔ vuu ka Gãa Laa, nɛɛ zang bang bang zang Yahudi ri kpalɛ zɔɔ ka yeti gãa Kayifa, Kpanti zang ɓɔɔ ri dɔɔ vuu ka Gãa Laa.

⁴A ri tɔ̀ng zɔɔ ka naa ɓɔɔ ri yi Yeesɔ nɛɛ nwĩiri, ri nyɔ wu ɓɛɛ.

⁵Ri kɔɔ zɔɔ tɔɔ, “Rúu palɛ ka diki ɓɔɔ zang shaa nyaalaa Pasika kpang, ka ruu ɓɔɔ zang nɛɛ pálɛ̀ nyaa ɓɛɛ.”

⁶Diki ɓɔ̀ɔ́gn Yeesɔ ka Bɛtani, ka gãa Siman ɓɔɔ bɛ̀ɛ́ vuu bii shaa wu katɔ ɓɛɛ.

⁷A jaa soro ɓɔ̀ɔ́gn, a nɛɛ nung tũurunang ɓɔɔ shaa nyaa dɔɔli, ka zàáng nung ɓɔɔ shi dɔɔli ɓɛɛ, a tũngku Yeesɔ ka yuu bɛ̀ɛ́ shaa vuu shaanang.

⁸Ɓɔɔ zang ɓɔɔ ri mantɛ vuu ka bii Yeesɔ ri zi naa weɓe, gnvɔ shaa ri, ri tɔɔ, “Zang lasɛ nung keɓe ka ruu viya?

⁹Zang nɛ̀ɛ́ màlɛ̀ nung keɓe saka gaagaa, tɔɔ zang alɛ zang ɓɔɔ vuu ka naa kpang ɓɛɛ.”

¹⁰Yeesɔ ti zi vuu ɓɔɔ ri kɔɔ ɓi tɔ. A kɔɔ ri tɔɔ, “Nɔɔ kóngsò jaa soro keɓe ka ruu viya? Jaa soro keɓe pàlɛ́ m vuu ɓɔɔ tɔ̃ɔ.

¹¹Nɔɔ nwálɛ̀ manɛ nɛɛ zang ɓɔɔ vuu ka naa kpang diki diki, a n nwáng nɛɛ nɔɔ sasak kpang.

¹²Nung kɔ jaa soro tũngku m ka bii ɓee, tũuru m kaa nung vɔrɔ kɔ nwani.

¹³N kɔɔ nɔɔ ruu ɓɔɔ niizang kɔ nwani, nɔng ɓɔɔ zang naa rang tɔ̃ɔ Kpanti Laa kagn koo keɓe piti, zang naa kɔɔ ruu vuu kɔ jaa soro keɓe palɛ ɓɛɛ ditɔ. Ka ruu ɓɔɔ, danggn jaa soro keɓe nɛ̀ɛ́ ning zang ɓɛɛ.”

¹⁴A zang gbete ka teteng zang ɓɔɔ ri mantɛ vuu ka bii Yeesɔ ɓɔɔ zang ɓaa wu nɛɛ Yahuda Isikariyoti, daa ka bii zang bang bang zang ɓɔɔ ri dɔɔ vuu ka Gãa Laa,

¹⁵a hɛ̃ɛ ri tɔɔ, “Naa n a nɔɔ Yeesɔ, nɔɔ a m viya?” A ri gã saka ɓɔɔ zang palɛ nɛɛ azurufa bmati tu kopi, nɛɛ ri naa a wu.

¹⁶A Yahuda gaa tɔɔsung gbalang kãanang ɓɔɔ wu naa mãlɛ́ zang Yeesɔ kaa nɛɛ diki kaɓa kɔ.

¹⁷Ka diki ɓɔɔ zang gaayu shaanang nyaalaa borodi ɓɔɔ zang tɛ̃ɛ yisi kagn kpang, zang ɓɔɔ ri mantɛ vuu ka bii Yeesɔ ri a ka bii ɓiɓɛ, a ri hɛ̃ɛ wu tɔɔ, “Mɔɔ kasɛ nɛɛ ruu pàlɛ́ mɔɔ vuu shaanang ɓɔɔ mɔɔ naa shaa ka nyaalaa Pasika ka niya?”

¹⁸A Yeesɔ kɔɔ ri tɔɔ, “Nɔɔ daa ka bii shɔnzang ɓɔɔ ka gari, nɔɔ daa kɔɔ wu nɛɛ ‘Maalang tɔɔ, diki mɛɛ a tɔ naabm, ka ruu nɔngkɔ, n kasɛ n tɔɔ, n shaa vuu shaanang nyaalaa Pasika nɛɛ zang ɓɔɔ ri mantɛ vuu ka bii mɛɛ ka gãa ɓaaɓɛ.’ ”

¹⁹A zang ɓɔɔ ri mantɛ vuu ka bii Yeesɔ, ri daa palɛ ka naa ɓɔɔ Yeesɔ kɔɔ ri ɓɛɛ. Ri palɛ vuu shaanang Pasika kati.

²⁰Yeesɔ naa nwang tɔ ka nɔng vuu shaanang nɛɛ zang ɓɔɔ ri mantɛ vuu ka bii ɓiɓɛ nɛɛ laarang,

²¹ri shaa vuu shaanang kana, a Yeesɔ kɔɔ ri tɔɔ, “N kɔɔ nɔɔ ruu ɓɔɔ niizang kɔ nwani, shɔnzang gbete ɓɔɔ kagn teteng manɛ, naa mãlɛ́ m ditɔ.”

²²Ɓɔɔ zang ɓɔɔ ri mantɛ vuu ka bii Yeesɔ, ri tãa naa weɓe, yeti ɓarɛ lasɛ dɔɔli. A ri gaa tɔɔsung Yeesɔ hɛ̃ɛlɛnang kati nɛɛ, “Ɓu wiya maalang? Nkɔ ya?”

²³A kasɛ ri nyaa tɔɔ, “Shɔnzang ɓɔɔ hãa naa nɛɛ n ka gbanti, wukɔ naa nyɔ yuu mɛɛ.

²⁴Jaa Shɔnzang naa vɔ katɔ naa ɓɔɔ Labeenang Kpanti Laa kɔɔ ɓɛɛ. A jĩng dannang kagn yuu zang ɓɔɔ naa nyɔ yuu Jaa Shɔnzang ɓɛɛ. Zang nɛɛ yi zang kaɓa kpang kɔ gbã̀ágbãa, wukɔ nɛɛ daa wu.”

²⁵A Yahuda ɓɔɔ nyɔ yuu Yeesɔ hɛ̃ɛ wu tɔɔ, “Nkɔ ya maalang?” A Yeesɔ kasɛ wu nyaa tɔɔ, “Nn, mɔkɔ.”

²⁶Ri shaa vuu shaanang kana, a Yeesɔ tuu borodi zãa Kpanti Laa, a shalɛ a zang ɓɔɔ ri mantɛ vuu ka bii ɓiɓɛ kati. A kɔɔ ri tɔɔ, “Nɔɔ tá ta nɔɔ shaayi. Weɓe yɔpɔ bii mɛɛ kɔ.”

²⁷A ti tuu juwa, a zãa Kpanti Laa, a ri kati. Kɔɔ ri tɔɔ, “Nɔɔ tá ta, nɔɔ ɓooro ka yuu manɛ nandon.

²⁸Wee zĩi mɛɛ ɓɔɔ naa tusu zang nɛɛ nyaa shɔɔ ɓɔɔ Laa kɔɔ zang, naa nwang kaa niizang ɓɛɛ. Zĩi mɛɛ ɓɔɔ n tɛ̃ɛ ka ruu zang dɔɔli, nɛɛ tɔ̀ɔ Laa wu kɔsɔ ri vuu shi kpang ɓarɛ kati ɓɛɛ.

²⁹N kɔɔ nɔɔ, n naa ɓoo mii jĩng laa inabi tɔ̀ɔ́ nɛɛ nɔɔ tɔkn kpang, n naa ɓoo kaa ɓɔɔ shɔɔ ɓɔɔ ruu daa ɓoo nɛɛ nɔɔ ka nɔng ɓɔɔ Daa mɛɛ roo Kpanti ɓɛɛ.”

³⁰A ri naa gaa soo, ri daa kaa Kɔpɔ Zeetung.

³¹A Yeesɔ kɔɔ ri tɔɔ, “Lɛɛkɔ nɛɛ zĩi, nɔɔ naa yuku ditɔ nandon nɔɔ yaa m. Laa kɔɔ nɔngkɔ ka yeti labeenang ɓiɓɛ tɔɔ, “ ‘N nyɔ jagãng vɔrɔ ditɔ, tɔɔ mɛ̀ɛrɛ́ ri naa tantɛ kati.’

³²“N nɛɛ seepaa tɔ nɛɛ sàa, nɔɔ naa ĩi m kaa nɛɛ Galili.”

³³A Bituru kɔɔ wu tɔɔ, “Naa ri yuku doo piti ri yaa mɔɔ, n yaa mɔɔ m kpang.”

³⁴Yeesɔ kɔɔ wu tɔɔ, “N kɔɔ mɔɔ ruu ɓɔɔ niizang kɔ nwani, ɓɔɔ kn naa ɓaa nyaa lɛɛkɔ nɛɛ zĩi keɓe, bɛ̀ɛ́ mɔɔ laa nyaa tɔ daa doo taati, nɛɛ mɔɔ zi m nung ɓáa kpang.”

³⁵Bituru ti kɔɔ Yeesɔ tɔkn, tɔɔ, “Naa zang tɔɔ zang nyɔ m doo katɔ nɛɛ mɔɔ ning piti, n laa nyaa ɓaaɓɛ m kpang.” Zang ɓɔɔ ri mantɛ vuu ka bii Yeesɔ ɓɔɔ, ri ti kɔɔ doo nɔngkɔ nandon.

³⁶Yeesɔ naa a kaa nɛɛ zang ɓɔɔ ri mantɛ vuu ka bii ɓiɓɛ ka nɔng ɓɔɔ zang ɓaa nɛɛ Gesemani ɓɛɛ. A kɔɔ ri tɔɔ, “Nɔɔ nwang ka nihn, n daa gaa doo Kpanti Laa ka kaaɓa.”

³⁷A Yeesɔ daa nɛɛ Bituru, nɛɛ wujɛ Zebedi ɓɔɔ ziti ɓɛɛ. A bii soo wu, gaa tɔɔsung rɛ̃rɛnang kati.

³⁸Yeesɔ kɔɔ ri tɔɔ, “Bii soo m tɔ nung vɔrɔ gbete. Nɔɔ nwang ka nihn, nɔ́ɔ gãng jĩng nɛɛ n ning.”

³⁹Yeesɔ daa tɔ ka tĩng tɔkɔlɔng, a zuu kaa nɛɛ buru ka tipi, a gaa Kpanti Laa tɔɔ, “Daa mɛɛ, gbalang nɛɛ kagn, kɔsɔ m jĩng dannang keɓe katɔ. Palɛ vuu ɓɔɔ yeti ɓaaɓɛ kasɛ ɓɛɛ, wu vuu ɓɔɔ yeti mɛɛ kasɛ ɓɛɛ kpang.”

⁴⁰A naa gbãayu ĩi zang taati ɓɔɔ ri mantɛ vuu ka bii ɓiɓɛ kaɓa, hingro yiki ri tɔ. A hɛ̃ɛ Bituru tɔɔ, “Nɔɔ zunung ɓɔɔ nɔɔ gãng jĩng nɛɛ n naa gbete kpang ya?

⁴¹Nɔɔ gãng jĩng kagn, nɔɔ ti gaa Kpanti Laa, ka ruu ɓɔɔ Sheetang nɛ̀ɛ́ nwãarɛ nɔɔ ɓɛɛ. Suru bii manɛ kasɛ ɓi katɔ, a bii manɛ kɔ lakɛ ɓi kaa takpang.”

⁴²A Yeesɔ ti paarɛ tɔkn, daa gaa Kpanti Laa tɔɔ, “Daa mɛɛ, mɔɔ nɛɛ tɔɔ jĩng dannang keɓe wu ɓa kpang, n dàng katɔ, wu ti nwang naa ɓɔɔ mɔɔ kasɛ ɓɛɛ.”

⁴³A Yeesɔ ti gbãayu naa ĩi ri, hingro yiki ri tɔ tɔkn, ka ruu ɓɔɔ hingro kpiti ri jĩng tɔ dɔɔli ɓɛɛ.

⁴⁴Yeesɔ ti yaa ri, daa nɔng Laa gaanang daa kaa doo taati. Ti daa paasɛ doo nyaa gbete ɓɔɔ wu kɔɔ tĩng shɔɔnang kɔ.

⁴⁵A gbãayu naa ĩi zang ɓɔɔ ri mantɛ vuu ka bii ɓiɓɛ kati. A hɛ̃ɛ ri tɔɔ, “Nɔɔ rooyi, nɔɔ ɔ̃̀sɔ́ manɛ doo naa ya? Nɔɔ zirɛ, laa yaa kaa tɔkɔlɔng. Zang a zang ɓɔɔ ri palɛ vuu shi kpang Jaa Shɔnzang tɔ.

⁴⁶Nɔɔ seepaa ta ruu gbãayu. Nɔɔ zirɛ, zang ɓɔɔ nyɔ yuu mɛɛ kɔ a kana ɓa.”

⁴⁷Yeesɔ rang yee doo naa nyaa, a Yahuda zang gbete ka teteng zang kopi tu ziti ɓɔɔ ri mantɛ vuu ka bii ɓiɓɛ a kati. Yahuda a nɛɛ zang dɔɔli ɓɔɔ rɛɛ zang bang bang zang ɓɔɔ ri dɔ́ɔ vuu ka Gãa Laa, nɛɛ zang bang bang zang Yahudi ri shong ɓɛɛ ning. Zang kaɓa, ri see yere bang, nɛɛ labasaa ka naa ning.

⁴⁸Yahuda ɓɔɔ nyɔ yuu Yeesɔ, kɔɔ ri tɔ, ka tĩng nɛɛ, “Zang ɓɔɔ n daa kɔng wu, wukɔ Yeesɔ. Nɔ́ɔ yi wu.”

⁴⁹Yahuda ri naa shɛ̃ɛ nɔng tɔ a sharɛ daa kɔng Yeesɔ. A kɔɔyi tɔɔ, “Mɔɔ nwang tɛya Maalang?”

⁵⁰Yeesɔ kasɛ wu nyaa tɔɔ, “Palɛ vuu ɓɔɔ atɛ mɔɔ tà masang.” A zang ɓɔɔ ri a nɛɛ Yahuda ri tɛɛyi, ri daa yi Yeesɔ kati.

⁵¹Zang Yeesɔ ɓɔɔ gbete, zɔ̃ng yere bang ɓiɓɛ, wɔng shoo jaafoo kpanti zang ɓɔɔ ri dɔɔ vuu ka Gãa Laa nɛɛ mani kak.

⁵²A Yeesɔ kɔɔ wu tɔɔ, “Hãa yere bang ɓaaɓɛ ta ka kpãa, ka ruu ɓɔɔ zang piti ɓɔɔ zɔ̃ng yere bang, naa vɔ ɓi doo nɛɛ wukɔ ɓɛɛ.

⁵³Mɔɔ zi kpang nɛɛ naa n gàa Daa mɛɛ, shong m zang nyaa shonang ɓiɓɛ ɓɔɔ ri ka lapa ɓɔɔ ɓa tìng kopi tu ziti katɔ tantɛnang kpang ya?

⁵⁴A n nɛɛ palɛ tɔ nɔngkɔ, Ruu Laa ɓɔɔ kɔɔyi tɔɔ, vuu keɓe naa nwang ditɔ naa weɓe, nwang kaa bɛ̀ɛ́ niizang viya?”

⁵⁵A Yeesɔ raa jĩng, hɛ̃ɛ zang ɓɔɔ ri a wu yinang tɔɔ, “Nɔɔ see yere bang nɛɛ labasaa ka naa gaagaa, nɛɛ nɔɔ naa yi ɓu nkɔ naa zang shɔngɓɔ ya? N nwalɛ ka yeti Gãa Laa kɔ diki diki, n tusu zang vuu, nɔɔ yi m kpang.

⁵⁶Vuu kɔ zang palɛ ɓée, ɓee ɓi kaa nyaa vuu ɓɔɔ rɛɛ zang nyaa shonang Laa ri bèe ka yeti labeenang Laa ka tĩng tɛ̃ɛ tɛ̃ɛ ɓɛɛ.” A zang ɓɔɔ ri mantɛ vuu ka bii ɓiɓɛ, ri yuku nandon ri yaa wu.

⁵⁷A zang ɓɔɔ ri yi Yeesɔ ri daa kaa nɛɛ wu ka bii Kayifa, kpanti zang ɓɔɔ ri dɔɔ vuu ka Gãa Laa ɓɛɛ. Zang ɓɔɔ ri tusu zang vuu nɛɛ zang bang bang zang Yahudi ri kpalɛ zɔɔ tɔ ka nɔngkɔ.

⁵⁸Bituru dũuru wu ka knti katara sasak, daa nɛɛ wu ka dàbang Kayifa. A Bituru turɛ daa nwang nɛɛ zang ɓɔɔ ri gãng jĩng ka gãa, nɛɛ tɔɔ wu zi naa ɓɔɔ zang hangsɛ nyaa ruu keɓe kati.

⁵⁹A zang bang bang zang ɓɔɔ ri dɔɔ vuu ka Gãa Laa, nɛɛ rɛɛ zang dɔɔli ɓɔɔ ri doo zang ruu jɛ̃ɛnang kɔ, ri kãa gbalang ɓɔɔ ri zɛ̃ɛ wu nyaa, tɔ̀ɔ ri nyɔ wu kati ɓɛɛ.

⁶⁰Zang sèé dɔɔli ri kɔɔrɔ ruu see ka yuu ɓiɓɛ, a nyaa ɓarɛ daa gbete kpang. Nɛɛ knti, zang sèé ziti ɓɔɔgn, ri naa seepaa kati. Ri a ka tĩng zang ɓɔɔ ri jɛ̃ɛ ruu ɓɛɛ.

⁶¹Ri tɔɔ, “Yɔɔ keɓe kɔɔyi tɔɔ, wu zunung ɓɔɔ wu jili Gãa Laa ka tipi, wu mãa ɓɔɔgn ka diki taati katɔ.”

⁶²A Kpanti zang ɓɔɔ ri dɔɔ vuu ka Gãa Laa, seepaa hɛ̃ɛ Yeesɔ tɔɔ, “Mɔɔ kasɛ nyaa ka ruu kɔ zang kɔɔ ka yuu ɓaaɓɛ ɓee kpang ya?”

⁶³Yeesɔ ti ãa nyaa ɓi kagn kpang. A Kpanti zang ɓɔɔ ri dɔɔ vuu kà Gãa Laa, kɔɔ wu tɔɔ, “N zɔ̃ɔrɔ mɔɔ katɔ nɛɛ Kpanti Laa ɓɔɔ ningkãari ɓɛɛ, kɔɔ ruu jong. Mɔkɔ Kirisi Jaa Kpanti Laa ɓɔɔ naa a ɓɛɛ ya?”

⁶⁴A Yeesɔ kasɛ wu nyaa kati tɔɔ, “Nn nkɔ. N kɔɔ nɔɔ, nɔɔ naa zi m ɓɔɔ n Jaa Shɔnzang ditɔ ka naa nakn Kpanti Laa ɓɔɔ palɛ vuu piti ɓɛɛ. Nɔɔ ti naa zi naa ɓɔɔ n a ka yeti sãmbong ditɔ.”

⁶⁵Ɓɔɔ kpanti zang ɓɔɔ ri dɔɔ vuu ka Gãa Laa tãa naa weɓe, lɔɔsɔ fɔ̃ɔrɔ ɓɔɔ ka bii ɓiɓɛ. A kɔɔyi tɔɔ, “Yɔɔ keɓe kɔɔ ruu shi kpang tɔ, tuu yuu ɓiɓɛ, nɛɛ wu Jaa Laa. Ruu kasɛ zang ɓɔɔ wu kɔɔ rùu vuu ɓɔɔ wu palɛ ɓɛɛ takpang. Nɔɔ tãa vuu shi kpang ɓɔɔ wu kɔɔ kãntang keɓe tɔ nɛɛ shoo manɛ.

⁶⁶Nɔɔ zi ɓu bɛ̀ɛ́ ka yeti manɛ viya?” Ri kasɛ wu nyaa tɔɔ, “Dàa ɓɔɔ zang nyɔ wu vɔrɔ tɔ.”

⁶⁷A ri tùlù wu sisãa ka jĩng, ri ti ma wu nɛɛ naa tung, a zang ɓɔɔ ri ti nyɔ wu nɛɛ naa.

⁶⁸Ri kpaa wu tɔɔ, “Kirisi, ɓàa ruu núng zang ɓɔɔ nyɔ mɔɔ ta.”

⁶⁹Ka laa kaɓa, Bituru nwang doo ka dàbang Kayifa. A jaa shonang zang soro tɔkɔlɔng naa arɛ kɔɔ Bituru tɔɔ, “Mɔɔ ɓáa doo zang ɓɔɔ dũng Yeesɔ yɔɔ Galili kɔ.”

⁷⁰A Bituru laa nyaa ruu keɓe ka tĩng ɓarɛ nandon tɔɔ, “N zi vuu kɔ mɔɔ rang yee ka yuu ɓiɓɛ m kpang.”

⁷¹Bituru naa seepaa daa nwang kaa nyaa gãa naabm, a jaa shonang zang soro tɔkɔlɔng ɓɔɔgn ti naa zi wu. A kɔɔ zang ɓɔɔ ri shiiri ɓɛɛ tɔɔ, “Bɛ̀ɛ́ yɔɔ keɓe nwang ɓi doo nɛɛ Yeesɔ yɔɔ Nazara kɔ.”

⁷²A Bituru ti laa nyaa tɔkn nɛɛ Laa tũnnang ning tɔɔ, “N zi yɔɔ keɓe nung m kpang.”

⁷³Laa nɛɛ tɔɔ wu ɓa tɔkɔlɔng, zang ɓɔɔ ri shiiri ka nɔng kaɓa, ri arɛ. Ri kɔɔ Bituru tɔɔ, “Mɔɔ doo zang ɓiɓɛ kɔ niizang. Náa yee ɓɔɔ mɔɔ rang ka yeti nyaa ɓaaɓɛ, wukɔ nwangsɛ mɔɔ yuu.”

⁷⁴A Bituru kɔɔ ri nɛɛ Laa tũnnang ning tɔɔ, “N zi yɔɔ keɓe nung m kpang. N nɛɛ suu sèé, Laa wu palɛ m vuu ɓɔɔ wu kasɛ ɓɛɛ.” A kǹ naa ɓaa nyaa kaa tantɛnang.

⁷⁵A Bituru naa kpaa danggn ruu ɓɔɔ Yeesɔ kɔɔ wu tɔɔ, “Ɓɔɔ kǹ naa ɓáa nyaa, bɛ̀ɛ́ mɔɔ laa nyaa mɛɛ tɔ daa doo taati.” A Bituru nwangnɛ, daa kaa ka biling zɛ̃ɛzɛ̃ɛ.