Read mumuye Matiyu 7 Bible Online

Matiyu 7 - mumuye bible

Matiyu 7

¹“Nɔ́ɔ jɛ̃̀ɛ zang ruu kpang, tɔ̀ɔ, Kpanti Laa wu ti naa jɛ̃ɛ nɔɔ ruu kaa takpang kɔ doori.

²Ka ruu ɓɔɔ, naa ɓɔɔ nɔɔ jɛ̃̀ɛ zang ruu, Kpanti Laa naa jɛ̃ɛ nɔɔ doo nɔngkɔ ɓɛɛ. Waka ɓɔɔ nɔɔ mã zang vuu nɛɛ mani, Laa naa mã nɔɔ manɛ, doo nɛɛ wukɔ.

³“Ka ruu vi, mɔɔ shing jĩng ka zũng laa ɓɔɔ ka jĩng ɓaazung kɔ shɛ̃ɛning, mɔɔ yee laa ɓáa ka lawaa bang ɓɔɔ ka jĩng ɓaaɓɛ kpang viya?

⁴Mɔɔ kɔɔ ɓaazung ɓu ka biya, nɛɛ, ‘N kaaɓi n zɔ̃ng mɔɔ zũng laa tɔkɔlɔng ɓɔɔ ka jĩng ɓaaɓɛ, a mɔɔ yaa lawaa ɓɔɔ bang ka jĩng ɓaaɓɛ, ka nɔngkɔ viya?’

⁵Mɔkɔ nwãarɛ zang nɛɛ vuu palɛnang ɓi, zɔ̃́ng lawaa bang, ɓɔɔ ka jĩng ɓaaɓɛ ka gbongkarɛ, tɔ̀ɔ, mɔɔ zi nɔng kaa tɔ̃ɔ, mɔɔ sha zũng laa ɓɔɔ ka jĩng ɓaazung kati.

⁶“Nɔ́ɔ a zaa vuu ɓɔɔ zang a Laa ɓɛɛ kpang. Ka ruu ɓɔɔ ri naa raa jĩng ri yi nɔɔ ɓɛɛ. Nɔ́ɔ ti tàsɛ̀ gãnya vutu jasang palɛnang kpang. Ka ruu ɓɔɔ ri nɛɛ nàalɛ́ nɛɛ doo ɓɛɛ.

⁷“Nɔɔ gaa ta ka naa Laa, a nɔɔ katɔ. Nɔɔ kãa ta, nɔɔ ti ĩi katɔ. Nɔɔ ɓáa nyaa ta, Laa kasɛ nɔɔ nyaa katɔ.

⁸Ka ruu ɓɔɔ, zang piti ɓɔɔ gaa vuu ka naa ɓiɓɛ, walɛ katɔ ɓɛɛ. Zang piti ɓɔɔ kãayi ti ĩi katɔ. Zang piti ɓɔɔ ɓáa wu nyaa, kasɛ wu nyaa katɔ ɓɛɛ.

⁹“Zang ɓɔɔ nàá jaa ɓiɓɛ gàa vuu shaanang ka naa ɓiɓɛ, ka teteng manɛ, tuu tari a wu wiya?

¹⁰Naa jaa ɓiɓɛ ti gaa jaazĩi, a wu sɔkɔ katɔ wiya?

¹¹Ɓɔɔ nɔɔ shi kpang, naa nɔɔ zunung ɓɔɔ nɔɔ a wujɛ manɛ vuu ɓɔɔ tɔ̃ɔ katɔ, Daa manɛ ɓɔɔ ka lapa, a zang ɓɔɔ ri gaa wu vuu tɔ̃ɔ ɓi kpang ya?

¹²Ka ruu nɔngkɔ, vuu ɓɔɔ nɔɔ kasɛ nɛɛ zang ri palɛ nɔɔ, nɔɔ palɛ ri doo nɔngkɔ. Ruu keɓe kɔ, Labeenang Laa ɓɔɔ Musa beeyi nɛɛ vuu ɓɔɔ zang nyaa shonang Laa ri kɔɔ ka tĩng tɛ̃ɛ tɛ̃ɛ ɓɛɛ.

¹³“Nɔɔ tú nɛɛ nyaa gãa ɓɔɔ tɔ̃ntɔ̃rɔng ɓɛɛ, ka ruu ɓɔɔ, nyaa gãa ɓɔɔ daa ka nɔng vɔrɔ, bang ɓi katɔ ɓɛɛ. Gbalang ɓɔɔ zang daa nɔng vɔrɔ kaɓa nɛɛ mani, ti kpãa ɓi kpang. “Zang ɓɔɔ ri tú nɛɛ nyaa gãa keɓe dɔɔli.

¹⁴Gbalang ɓɔɔ zang daa nɔng suru bii ɓɔɔ waa nyaa kpang nɛɛ mani, kpãa dɔɔli, nyaa gãa ɓɔɔ zang daa nɔng ɓi ti tɔ̃ntɔ̃rɔng. Zang ɓɔɔ ri ĩi gbalang kaɓa, ri shang kpang.

¹⁵“Nɔɔ gãng jĩng ka zang sèé ɓɔɔ ri tɔɔ, ri zang nyaa shonang Laa ɓɛɛ. Ri a ka bii manɛ náa mɛ̀ɛrɛ́ ɓɔɔ pálɛ̀ zang vuu kpang ɓɛɛ, a yeti ɓarɛ nwang naa zaa wisi ɓɔɔ jĩng raa ri katɔ ɓɛɛ.

¹⁶Nɔɔ zi ri núng ka vuu ɓɔɔ ri palɛ ɓɛɛ. Zang hã́ mangɔrɔ katɔ ka kɔkɔ gbantang ya? Zang ti hã jaa sĩiri katɔ nɛɛ bii daapaajong ya?

¹⁷Laa ɓɔɔ tɔ̃ɔ, ra jaa ɓi doo tɔ̃ɔ kɔ. Laa shi kpang, ti ra jaa ɓi doo shi kpang kɔ.

¹⁸Laa tɔ̃ɔ, ra jaa shi kpang ɓi jong kpang. A ɓɔɔ shi kpang ti ra jaa ɓɔɔ tɔ̃ɔ ɓi doo kpang kɔ.

¹⁹Laa piti ɓɔɔ ra jaa tɔ̃ɔ kpang, zang dɔngnɛ, zang tasɛ ka waa.

²⁰Ka ruu nɔngkɔ, nɔɔ zi ri nung ka vuu ɓɔɔ ri palɛ ɓɛɛ.

²¹“Wu zang piti ɓɔɔ ri ɓaarɛ m nɛɛ, ‘Kpanti, Kpanti’ kɔ naa daa nɔng ɓɔɔ Laa roo kpanti kpang. Ɓi zang ɓɔɔ ri palɛ vuu ɓɔɔ Daa mɛɛ ɓɔɔ ka lapa kasɛ ɓɛɛ kɔ, ri daayi.

²²Zang dɔɔli ri naa kɔɔ m ka diki ɓɔɔ, Laa naa jɛ̃ɛ zang ruu nɛɛ, ‘Kpanti, rùu kɔɔ zang Ruu Laa wu nɛɛ nung ɓaaɓɛ kɔ kpang ya? Ruu ti nwangsɛ suru shi kpang nɛɛ bii zang, a ɓɔɔ shonang bang ɓɔɔ ruu palɛ, zang mã naa ka danggn nɛɛ nung ɓaaɓɛ kɔ kpang ya?’

²³A n naa kɔɔ ri m dɔ̃ɔ gbete nɛɛ, ‘N zi nɔɔ m gn, gn kpang. Nɔɔ dita kaaɓa, zang shi kpang kiɓi.’

²⁴“Zang piti ɓɔɔ tãa ruu mɛɛ keɓe, a ti palɛ vuu ɓɔɔ wu tãayi, nwang naa zang zũnang ɓɔɔ mãa gãa ɓiɓɛ ka yuu pɛngkɛ ɓɛɛ.

²⁵Mii naa arɛ, kpaa gaagaa, a jasung ti naa rarɛ, zĩiti gãa, zĩiti gãa, gãa ɓiɓɛ watɛ kpang, ka ruu ɓɔɔ, loo doo ɓiɓɛ ka yuu pɛngkɛ ɓɛɛ.

²⁶A shɔnzang ɓɔɔ tãa ruu mɛɛ keɓe, a palɛ vuu ɓɔɔ wu tãa kpang, nwang naa zang ɓɔɔ zũng kpang ɓɔɔ mãa gãa ɓiɓɛ ka yuu seseele ɓɛɛ.

²⁷Mii naa arɛ, kpaa gaagaa, jasung ti naa rarɛ, zĩiti gãa, zĩiti gãa, gãa ɓiɓɛ ji gbusuk jinang ɓiɓɛ shing baabii dɔɔli.”

²⁸Ɓɔɔ Yeesɔ naa hangsɛ nyaa ruu keɓe kɔɔnang tɔ, zang ɓɔɔ ri kpalɛ zɔɔ ri mã naa ka danggn, ka ruu vuu tusunang ɓiɓɛ.

²⁹Ka ruu ɓɔɔ, tusu zang vuu naa shɔnzang ɓɔɔ Laa a wu naa ɓɛɛ. Wu náa ɓɔ̀ɔ́, zang ɓarɛ ɓɔɔ tusu ri labeenang Laa ɓɛɛ kpang.