Read mumuye Matiyu 8 Bible Online

Matiyu 8 - mumuye bible

Matiyu 8

¹Ɓɔɔ Yeesɔ naa shooro tɔ nɛɛ kɔpɔ, a zang dɔɔli ri dũuru wu ka knti.

²A zang ɓɔɔ vuu bii shaa katɔ, arɛ naa tang nɛɛ gutu ka tĩng ɓiɓɛ, a kɔɔ wu tɔɔ, “Kpanti, mɔɔ nɛɛ kasɛ katɔ mɔɔ zunung ɓɔɔ mɔɔ masɛ m katɔ.”

³A Yeesɔ dĩi naa, lee zang vuu bii kati. A kɔɔ wu tɔɔ, “N kasɛ̀ɛ́ tɔ, vuu bii ɓaaɓɛ wu waa nyaa ta.” A vuu bii yàa yɔɔ nɔng kaa tantɛnang.

⁴A Yeesɔ kɔɔ wu tɔɔ, “Mɔ́ɔ daa kɔɔ zang ɓɔɔ kpang. Daayi, mɔ́ɔ daa tusu zang ɓɔɔ dɔ́ɔ vuu ka Gãa Laa, bii ɓaaɓɛ. Mɔɔ ti dɔ̀ɔ Kpanti Laa vuu ɓɔɔ Musa dang nyaa ɓɛɛ, tɔ̀ɔ, zang ri zi kagn, nɛɛ vuu bii ɓaaɓɛ waa nyaa tɔ.”

⁵Yeesɔ shɛ̃ɛ Kafanahu tɔ, a yɔɔ zang bang sɔɔja naa a ka bii ɓiɓɛ, nɛɛ Yeesɔ wu yi wu naa jong bii.

⁶A kɔɔ Yeesɔ tɔɔ, “Kpanti, zang shonang mɛɛ bii ɓiɓɛ vɔ katɔ, roo ka gãa, dang jĩng dɔɔli.”

⁷A Yeesɔ kɔɔ wu tɔɔ, “N daa ditɔ, ń daa masɛ wu.”

⁸A yɔɔ zang bang sɔɔja naa risi nyaa, kɔɔ Yeesɔ tɔɔ, “Kpanti, n daa naa ɓɔɔ, mɔɔ tuu doo ɓaaɓɛ, mɔɔ a ka gãa mɛɛ kpang. Rang yee kɔ shɛ̃ɛning, bii valɛ zang shonang mɛɛ katɔ.

⁹Ka ruu ɓɔɔ, n nwang m ka naa zang ɓɛɛ. A zang sɔɔja ɓɔɔ ri ti kagn naa mɛɛ kɔ doori. Naa n kɔɔ ɓɔɔ gbete, n tɔɔ ‘Dita’, daa katɔ. Naa n ti kɔɔ ɓɔɔgn nɛɛ, ‘Arɛ’, ti a katɔ. Naa n ti kɔɔ zang shonang mɛɛ nɛɛ, ‘Palɛ veɓe’, ti palɛ katɔ.”

¹⁰Ɓɔɔ Yeesɔ tãa yee ɓɔɔ yɔɔ rang naa weɓe, mã naa ka danggn. A kɔɔ zang dɔɔli ɓɔɔ ri dũuru wu tɔɔ, “N kɔɔ nɔɔ ruu ɓɔɔ niizang kɔ nwani, n zi zang Isirela ɓɔɔ shing danggn ka bìí Kpanti Laa gngn naa zang zanti keɓe kpang.

¹¹N kɔɔ nɔɔ, zang zanti dɔɔli naa a nɛɛ paa ɓɔɔ laa nwang nɔng, a ɓɔɔ nɛɛ dii ɓɔɔ laa hãa nyaa kagn, naa nwàng nɛɛ rɛɛ Ibirayi nɛɛ Ishaaku, a ɓɔɔ Yakubu ka nɔng vuu shaanang, ka nɔng ɓɔɔ Laa roo Kpanti ɓɛɛ.

¹²A zang naa nwangsɛ kaa zang ɓɔɔ ri shing danggn nɛɛ rikɔ naa daa ka nɔng ɓɔɔ Laa roo Kpanti ɓɛɛ jong, zang tasɛ ri ka nɔng ɓɔɔ tɔ̀ɔ katɔ ɓɛɛ. Ka nɔng ɓɔɔ ri naa kaayi ri ti shaa nyaa kagn kpaaka, kpaaka ɓɛɛ.”

¹³A Yeesɔ kɔɔ yɔɔ zang bang sɔɔja tɔɔ, “Dita, vuu keɓe nwang ditɔ, naa ɓɔɔ mɔɔ shing danggn ka bìí Laa ɓɛɛ.” A bii valɛ zang shonang yɔɔ ɓɔɔ roo kɔnang ka gãa ɓɛɛ, kaa tantɛnang ka laa ɓɔɔ Yeesɔ rang yee nɛɛ wu ɓɛɛ.

¹⁴Yeesɔ naa a ka gãa Bituru, a zi Bituru ɓeekpeng ɓɔɔ yi soro Bituru roo tɔ ka latãng, bii zàa wu katɔ.

¹⁵A Yeesɔ lee Bituru ɓeekpeng nɛɛ naa, a bii ɓɔɔ zàa wu, yaa wu nɔng kati. A Bituru ɓeekpeng seepaa, gaa tɔɔsung ɓɔɔ wu kãa Yeesɔ vuu shaanang kati.

¹⁶Ka diki kaɓa nɛɛ laarang, zang átɛ́ wu zang ɓɔɔ suru shi kpang ka bii ɓarɛ, a nwàngsɛ̀ ri suru shi kpang ɓarɛ kaa nɛɛ yee ɓɔɔ wu rang ɓɛɛ kɔ shɛ̃ɛning. A ti masɛ zang ɓɔɔ vuu palɛ ri katɔ nandon.

¹⁷Vuu kɔ Yeesɔ palɛ ɓee, ɓèe ɓi kaa nyaa vuu ɓɔɔ Ishaya zang nyaa shonang Laa kɔɔ ka tĩng tɛ̃ɛ tɛ̃ɛ ɓɛɛ. Ishaya kɔɔyi tɔɔ, “Zang kaɓa kɔ naa masɛ ruu, wu ti naa see kɔnang ɓuru.”

¹⁸Yeesɔ zi zang ɓɔɔ ri kpalɛ zɔɔ ka bii ɓiɓɛ gaagaa, a kɔɔ zang ɓɔɔ ri mantɛ vuu ka bii ɓiɓɛ nɛɛ, ri ta rang ri daa ka nyaa rang dang.

¹⁹A zang gbete ka teteng zang ɓɔɔ ri tusu zang labeenang Laa, arɛ naa kɔɔ Yeesɔ tɔɔ, “Maalang, nɔng ɓɔɔ mɔɔ daa piti, n daa nɛɛ mɔɔ ning.”

²⁰Yeesɔ kɔɔ wu tɔɔ, “Yeng roonang yaka jĩngti kagn, a saara jaaning ti kagn, a nɔng ɓɔɔ naa Jaa Shɔnzang shing yuu ɓiɓɛ kagn, ɓi kaa tɔ̀ɔ́ kagn kpang.”

²¹A zang gbete ka teteng zang ɓɔɔ ri dũng Yeesɔ, kɔɔ wu tɔɔ, “Kpanti, yaa m ta, n daa gbãa daa mɛɛ ka gbongkarɛ.”

²²A Yeesɔ kasɛ wu nyaa tɔɔ, “Dũng m ta, mɔɔ yaa zang ɓɔɔ ri walɛ Suru Laa gn kpang ka nɔngkɔ, ri gbãa zɔɔ ka naa ɓarɛ.”

²³Yeesɔ vang tɔ ka yeti tonsi, a zang ɓɔɔ ri mantɛ vuu ka bii ɓiɓɛ, naa vang kaa jong nɛɛ wu.

²⁴Ri daa kana, a jasung bang naa seepaa rannang ka yuu waapo. A mii ɓɔɔ gɔnsɔ zɔɔ, kpalɛ ka bii tonsi. Tonsi nɛɛ wu ɔ̃ɔ katɔ. A Yeesɔ roo ɓi kaa tɔ.

²⁵A zang ɓɔɔ ri mantɛ vuu ka bii ɓiɓɛ ri hingsi wu, ri kɔɔ wu tɔɔ, “Ta rùu jong Kpanti, rùu ɔ̃ɔ kana.”

²⁶Yeesɔ kɔɔ ri tɔɔ, “Zang kɔ shing danggn ka bii Laa rɛ̃rɛkɛ ɓee, nɔɔ káa vɔrɔ vi nɔngkɔ viya?” A seepaa mangkɛ jasung nɛɛ mii ɓɔɔ gɔnsɔ zɔɔ ɓɛɛ, a ri kàa kati.

²⁷Zang ɓɔɔ ri mantɛ vuu ka bii ɓiɓɛ, ri mã naa ka danggn, ri tɔɔ, “Ɓi lɛ̀ɛ́ zang viya, jasung nɛɛ mii ɓɔɔ gɔnsɔ zɔɔ ɓaa shoo ka nyaa ɓiɓɛ nɔngkɔ viya?”

²⁸Yeesɔ ta rang tɔ ka dang ka tipi zang Ganasara, a zang ziti ɓɔɔ suru shi kpang ka bii ɓarɛ, a ka bii ɓiɓɛ nɛɛ nɔng yusàa ɓɔɔ zang gbã́lɛ̀ vɔrɔ kagn ɓɛɛ. Ri raa jĩng dɔɔli, ka ruu nɔngkɔ, shɔnzang gbete ɓɔɔ tɛɛ gbalang kaɓa kpang.

²⁹Ri sãa nyaa ka lapa nɛɛ, “Rúu ɓaaɓɛ hãa kagn nɛɛ rùu ya, Jaa Laa? Diki a gn kpang, mɔɔ arɛ, nɛɛ mɔɔ naa dang ruu jĩng kaa naa talang ya?”

³⁰Ka laa kaɓa, gãnya ɓɔɔ ri shaa kagn nɔngkɔ nɛɛ dalɛ kàá gaagaa.

³¹A suru shi kpang ri gàa Yeesɔ tɔɔ, “Mɔɔ nɛɛ tɔɔ mɔɔ nwangsɛ ruu katɔ, hing ruu ta, ruu daa ka bii gãnya kɔ ri shaa ɓa.”

³²A Yeesɔ kɔɔ ri tɔɔ, “Nɔɔ dita.” A ri nwangkɛ, ri daa hãlɛ nyaa ka bii gãnya ɓɔɔ ri shaa ka dalɛ ɓɛɛ. A gãnya kɔ gaagaa ɓa, yuku nɛɛ nyaa gãnggãng kɔ soo nyaa katɔ ɓa, a ri daa ɔ̃ɔrɔ ka yeti mii waapo nandon, ri vɔlɔ kati.

³³Zang ɓɔɔ ri shaa gãnya, ri yuku, ri daa ka gari, ri daa kɔɔ zang vuu ɓɔɔ pálɛ̀ gãnya, nɛɛ vuu ɓɔɔ Yeesɔ palɛ zang ɓɔɔ suru shi kpang ka bii ɓarɛ ɓɛɛ nandon.

³⁴A zang gari ri nwangkɛ nandon, ri daa ka bii Yeesɔ. Ri daa zi wu tɔ, a ri bakɛ wu ri tɔɔ, “Dita, mɔɔ yaa ruu tipi ɓuru.”