Read mumuye Maraku 1 Bible Online

Maraku 1 - mumuye bible

Maraku 1

¹Wee naa ɓɔɔ Ruu Tɔ̃ɔ Yeesɔ Kirisi Jaa Laa gaayu ɓɛɛ.

²Gaayu ka naa ɓɔɔ zang bee ka yeti labeenang Ishaya, zang nyaa shonang Laa ɓɛɛ. “Laa tɔɔ, “ ‘N shong zang shonang mɛɛ, ɓɔɔ palɛ mɔɔ gbalang ditɔ ka tĩng ɓaaɓɛ.’ ”

³“Zang ɓɔɔ kagn, rang yee Laa ka yeti waala tɔɔ. ‘Kpanti a kaa tɔ, nɔɔ palɛ wu gbalang ta. Nɔɔ shiiri wu katɔ ɓororo.’ ”

⁴A Yɔhana naa nwáng nyaa palɛ zang batizima ka waala. Kɔɔ zang Ruu Laa nɛɛ, “Nɔɔ yaa vuu shi kpang manɛ ta, nɔ́ɔ kɔ̃sɔ yeti, tɔɔ n palɛ nɔɔ batizima. Laa wu yaa nɔɔ gbalang vuu shi kpang manɛ kati.”

⁵A zang dɔɔli nɛɛ tipi Yahudi nɛɛ zang ɓɔɔ ka Urushalima, ri daa ka bii ɓiɓɛ. Ri kɔɔrɔ Laa vuu shi kpang ɓarɛ, a Yɔhana palɛ ri batizima ka mii rang Urudung.

⁶Yɔhana hãa fɔ̃ɔrɔ ɓɔɔ zang palɛ nɛɛ shãngti vuu vaa ɓɔɔ zang ɓaa nɛɛ hòlòng ɓɛɛ. A ti mã guruji ka sãng ɓiɓɛ. Vuu shaanang ɓiɓɛ ɓi ti zɔɔrɔ nɛɛ warɛ.

⁷Kɔɔ zang tɔɔ “Zang ɓɔɔ a ka knti mɛɛ ɓa m katɔ nɛɛ bannang. N daa naa ɓɔɔ n sɔ̃ ka tĩng ɓiɓɛ, n kãlɛ soo koodoo ɓiɓɛ kpang.

⁸N palɛ nɔɔ batizima m nɛɛ mii, naa palɛ nɔɔ ɓi nɛɛ Suru Laa.”

⁹Diki nɛɛ tɔɔ wu bee tɔkɔlɔng, Yeesɔ a kaa nɛɛ Nazara ɓɔɔ ka tipi Galili, a Yɔhana palɛ wu batizima ka mii rang Urudung.

¹⁰Ɓɔɔ Yeesɔ nwang nɛɛ mii hn, a zi lapa puuyi, Suru Laa shooro kana, ka yuu ɓiɓɛ naa koro.

¹¹A ri ti tãa yee nɛɛ lapa tɔɔ, “Mɔkɔ jaa mɛɛ ɓɔɔ n kasɛ gbãng gbãng kɔ.”

¹²A Suru Laa tantɛ wu dɔ̃nang ka waala.

¹³Nwáng ka waala diki laa ziti, a Sheetang gãsɛ wu kaa sasak. Ka nɔng kaɓa vuu kpaasi kagn nɔngkɔ, a zang nyaa shonang Kpanti Laa ɓɔɔ ka lapa, ri arɛ, ri yi wu naa ka bii.

¹⁴Ka knti ɓɔɔ zang mã Yɔhana tɔ ka sãa, Yeesɔ naa a ka tipi Galili kɔɔrɔ zang Ruu Tɔ̃ɔ Kpanti Laa tɔɔ,

¹⁵“Diki a tɔ, diki ɓɔɔ Laa roo Kpanti yaa kaa naabm. Nɔɔ kɔ̃sɔ yeti manɛ ta, nɔ́ɔ shing danggn ka Ruu Tɔ̃ɔ Laa.”

¹⁶Yeesɔ ra kana nyaa mii waapo Galili, a zi rɛɛ Siman nɛɛ jaa niiɓɛ Anduru ri vang jang jaazĩi kana mii, ka ruu ɓɔɔ, ri ɓarɛ zang jaazĩi yinang ɓɛɛ.

¹⁷A Yeesɔ ɓaa ri nyaa tɔɔ “Nɔɔ arɛ nɔɔ dũng m. N tusu nɔɔ naa ɓɔɔ nɔɔ ɓaa zang nyaa ri a ka bii mɛɛ ɓɛɛ.”

¹⁸A ri yaa jang ɓarɛ tantɛnang, ri dũng wu.

¹⁹Yeesɔ nɛɛ tɔɔ wu daa ka tĩng tɔkɔlɔng, zi Yakub nɛɛ jaa niiɓɛ Yɔhana wujɛ Zebedi, ri gbarɛ jang jaazĩi ɓarɛ ka yeti tonsi.

²⁰A ti tantɛ ri nyaa ɓaanang. Ri yaa daa ɓarɛ Zebedi ka yeti tonsi nɛɛ zang ɓɔɔ ri palɛ ri shonang, a ri dũng wu.

²¹A ri daa ka gari Kafanahu. A Diki Ɔ̃sɔnang naa arɛ, Yeesɔ daa ka gãa zɔɔ kpalɛnang zang Yahudi, a gáa zang tɔɔsung vuu tusunang kati.

²²Zang ɓɔɔ ri tãa vuu ɓɔɔ wu tusu, ri mã naa ka danggn, ka naa ɓɔɔ, wu tusu vuu ɓɛɛ, ka ruu ɓɔɔ, tusu ri vuu ɓi naa ɓɔɔgn. Tùsù zang ɓi naa zang ɓɔɔ ri tusu zang vuu ɓɛɛ kpang.

²³Ka laa kaɓa, zang ɓɔɔ suru shi kpang ka bii ɓiɓɛ kagn yeti gãa zɔɔ kpalɛnang ɓarɛ. A mɛɛ nyaa tɔɔ.

²⁴“Mɔɔ kãa vi ka bii ɓuru viya? Yeesɔ yɔɔ Nazara? Mɔɔ arɛ nɛɛ mɔɔ naa nyɔkɔ ruu katɔ ya? N zi mɔɔ nung tɔ, mɔkɔ zang tɔ̃ɔ ɓɔɔ à nɛɛ bii Laa ɓɛɛ.”

²⁵A Yeesɔ mangkɛ suru shi kpang tɔɔ, “Voo nyaa ta! Nwáng ta mɔɔ yàa wu bii.”

²⁶A suru shi kpang tuu wu, loo wu ka tipi, a mɛɛ nyaa ka lapa, a nwangnɛ yaa wu bii kati.

²⁷Zang piti ri mã naa ka danggn. Ri hɛ̃ɛlɛ zɔɔ ka naa ɓarɛ, tɔɔ, “Ɓi lɛ̀ɛ́ vuu tusunang kiya? Yɔɔ keɓe mangkɛ suru shi kpang, a ri ti ɓaa shoo ka nyaa ɓiɓɛ.”

²⁸A nyaa Yeesɔ baa nɔng kaa tantɛnang ka tipi Galili nandon.

²⁹Ɓɔɔ rɛɛ Yeesɔ nwang nɛɛ gãa zɔɔ kpalɛnang zang Yahudi hn, ri daa kaa nɛɛ rɛɛ Yakub nɛɛ Yɔhana ka gãa rɛɛ Siman Anduru.

³⁰Ka diki kaɓa Siman ɓeekpeng ɓɔɔ yi ɓeeso roo ka tipi, ka ruu ɓɔɔ, bii zaa wu katɔ ɓɛɛ. A zang kɔɔ Yeesɔ kati.

³¹A Yeesɔ arɛ yi wu naa, a wisi wu paa. Bii ɓɔɔ zaa wu, yaa wu nɔng kati. A Bituru ɓeekpeng seepaa a atɛ ri vuu shaanang kati.

³²Nɛɛ laarang bɛ̀ɛ́ laa hãa nyaa tɔ dii, zang atɛ wu zang kɔnang nɛɛ zang ɓɔɔ suru shi kpang ka bii ɓarɛ ɓɛɛ kaa dɔɔli.

³³Zang gari, ri kpalɛ zɔɔ ka nyaa gãa ɓɔɔ wu kagn ɓɛɛ dɔɔli.

³⁴A Yeesɔ masɛ zang ɓɔɔ vuu palɛ ri ka zɔ̃ng zɔ̃ng ɓɛɛ dɔɔli. A ti nwangsɛ suru shi kpang nɛɛ bii zang dɔɔli. Yàa suru shi kpang gbalang ɓɔɔ ri rang yee ɓɛɛ kpang, ka ruu ɓɔɔ, ri zi wu nung tɔ ɓɛɛ.

³⁵A Yeesɔ seepaa nɛɛ yuu gãndi, yaa gãa, daa ka nɔng ɓɔɔ zang kagn kpang daa gaa Laa ka nɔngkɔ.

³⁶A Siman ri see zɔɔ nɛɛ zang ɓɔɔ ri nɛɛ wu, ri kãa wu.

³⁷Ri daa ĩi wu tɔ, a ri kɔɔ wu tɔɔ, “Zang piti ri kãa mɔkɔ.”

³⁸A Yeesɔ kasɛ ri nyaa tɔɔ, “Rúu daa nɔɔ rɛɛ gari ɓɔɔ ka tĩng ɓuru naabm ta, tɔ̀ɔ n daa rang yee Laa kaa jong nɔngkɔ, ka ruu ɓɔɔ, n a ka ruu yee Laa kɔ rannang ɓɛɛ.”

³⁹A rakɛ ka tipi Galili nandon, rang zang yee Laa ka gãa zɔɔ kpalɛnang zang Yahudi, a ti nwàngsɛ̀ zang dɔɔli suru shi kpang.

⁴⁰A yɔɔ ɓɔɔ vuu bii shaa katɔ, arɛ naa tang nɛɛ gutu, gaa wu tɔɔ “Mɔɔ nɛɛ kasɛ katɔ, mɔɔ zunung ɓɔɔ mɔɔ masɛ m katɔ.”

⁴¹A gn yɔɔ kɔng Yeesɔ dɔɔli, Yeesɔ dĩi naa lee wu, a kɔɔyi tɔɔ “N kasɛ tɔ, vuu bii ɓaaɓɛ wu yaa mɔɔ nɔng ta.”

⁴²A vuu bii yaa yɔɔ nɔng kaa tantɛnang.

⁴³A Yeesɔ shaarɛ wu nyaa gbãng gbãng, a kɔɔ wu tɔɔ,

⁴⁴“Mɔ́ɔ daa kɔɔ zang ɓɔɔ kpang. Daayi mɔɔ daa tusu zang ɓɔɔ ri dɔɔ vuu vaa ka Gãa Laa, bii ɓaaɓɛ. Tɔ̀ɔ mɔɔ ti dɔɔ Kpanti Laa vuu ɓɔɔ Musa dang nyaa ɓɛɛ. Tɔ̀ɔ zang ri zi kagn nɛɛ vuu bii ɓaaɓɛ yaa mɔɔ nɔng tɔ.”

⁴⁵Yɔɔ ɓɔɔ vuu bii shaa kaɓa, daayi daa kɔ̀ɔrɔ̀ zang vuu ɓɔɔ Yeesɔ pàlɛ̀ wu ɓi doo nɛɛ mani. Ka ruu nɔngkɔ, Yeesɔ walɛ gbalang ɓɔɔ wu nwang bii ka dalɛ, wu daa gari ɓɔɔgn takpang. Nwalɛ kaa nɔng ɓɔɔ zang kagn kpang ɓɛɛ. Zang ti daa bii Yeesɔ ɓi doo nɛɛ mani, nɛɛ nɔng piti, piti.