Read mumuye Maraku 12 Bible Online

Maraku 12 - mumuye bible

Maraku 12

¹A Yeesɔ rang ri yee kaa nɛɛ nyaa vuu jeenang tɔɔ, “Yɔɔ ɓɔɔgn shɔlɔ laa inabi ka jaa ɓiɓɛ, a mang gbãng ɓee nyaa jaa nɔng kiiri, kiiri. Ti palɛ nɔng ɓɔɔ zang kãng jĩng laa inabi kagn, a ti waa putali ɓɔɔ zang shii kagn zang gãng jĩng ka jaa ɓɛɛ. A yàa zang nɛɛ ri gãng jĩng kagn. Seepaa daa zanti ka koolaa ɓɔɔgn.

²Diki jĩng laa inabi hãnang naa raa bii, a yɔɔ naa ɓaa nyaa ka zang shonang ɓiɓɛ gbete a shong wu ka bii zang ɓɔɔ wu yaa ri jaa, nɛɛ wu daa ta wu jĩng laa ka naa ɓarɛ.

³Ri yi zang shonang yɔɔ, ri nyɔ wu, a ri sɔɔrɔ wu naa waati.

⁴A yɔɔ jaa ti paasɛ zang shonang ɓiɓɛ ɓɔɔgn shonang tɔkn. Ri shing wu nyaa vuu waa ka yuu, a ri pàlɛ́ wu vuu yusɛ̃ɛ.

⁵A yɔɔ ti naa shong zang ɓɔɔgn tɔkn, a ri ti nyɔ wu vɔrɔ. Yɔɔ jaa kaɓa shongko zang nɔngkɔ gaagaa, ri nyɔkɔ ɓɔɔ nɛɛ gbãa waati, a ri ti nyɔkɔ ɓɔɔ vɔrɔ ka tipi.

⁶“Zang ɓɔɔ naa wu shongnɛ, yaa kaa jaa gbete ɓiɓɛ, ɓɔɔ wu kasɛ ruu ɓiɓɛ gbãng gbãng kɔ shɛ̃ɛning. A naa shong kaa wukɔ nɛɛ knti, nɛɛ naa kasɛ, ri tãa kaa nyaa jaa ɓiɓɛ kɔ.

⁷“Ɓu doo ɓɔɔ zang ɓɔɔ yɔɔ yaa ri jaa ka naa ri zi jaa yɔɔ a kana, ri tɔ̀ng zɔɔ ka naa ɓarɛ tɔɔ, ‘Wee jaa ɓɔɔ naa shaa vuu vɔ ɓiɓɛ kɔ, nɔɔ a ta, ruu nyɔ wu vɔrɔ, tɔ̀ɔ, vuu vɔ ɓiɓɛ wu nwang kaa ɓɔɔ ɓuru.’

⁸A ri seepaa, ri yi jaa yɔɔ, ri nyɔ wu vɔrɔ, ri daa tasɛ wu ka nyaa jaa biling.

⁹“A Yeesɔ hɛ̃ɛ zang ɓɔɔ ri shiiri tɔɔ, ‘Naa yɔɔ jaa kaɓa naa arɛ, palɛ zang ɓɔɔ wu yaa ri jaa ɓiɓɛ ka naa biya?’ Ri kasɛ Yeesɔ nyaa tɔɔ, ‘Yɔɔ jaa kaɓa naa nyɔkɔ zang ɓɔɔ wu yaa ri jaa ka naa kaɓa vɔrɔ. Tɔ̀ɔ, wu yàa zang ɓɔɔgn jaa kati.’

¹⁰A Yeesɔ ti hɛ̃ɛ ri tɔkn tɔɔ, “ ‘Nɔɔ gã yee keɓe gngn kpang ya? Laa kɔɔyi tɔɔ Tari ɓɔɔ zang jaka mãanang ri bɛ̃ɛyi, wukɔ naa ràa tari ɓɔɔ yiti jaka ɓɛɛ kati.

¹¹Kpanti Laa kɔ palɛ veɓe. Ɓɔɔ jĩng ɓuru, ɓi kaa vuu ɓɔɔ ruu mã naa ka danggn ɓɛɛ.’ ”

¹²Zang bang bang, zang Yahudi nɛɛ ri yi Yeesɔ katɔ, ka ruu ɓɔɔ, ri zi tɔ ka yeti ɓarɛ nɛɛ, Yeesɔ rang nyaa vuu jeenang ɓiɓɛ ka yuu ɓarɛ kɔ ɓɛɛ. A ri yaa wu, ri daayi, ka ruu ɓɔɔ, ri kaa vɔrɔ zang ɓɔɔ kpalɛ zɔɔ gaagaa ɓɛɛ.

¹³A ri shong zang Farisi nɛɛ zang ɓɔɔ ri dũng knti kpanti Hiridu, nɛɛ ri daa yi wu ka yee ɓɔɔ wu rang ɓɛɛ.

¹⁴A ri arɛ, ri hɛ̃ɛ Yeesɔ tɔɔ, “Maalang, ruu zi tɔ mɔɔ suu sèé ɓaa kpang, ruu ɓaaɓɛ hãa ɓi kagn nɛɛ vuu ɓɔɔ shɔnzang rɛ̃rɛ ɓɛɛ kpang, ka ruu ɓɔɔ, mɔɔ ti shɛ̃ɛrɛ zang ɓaa kpang ɓɛɛ. Mɔɔ mung zang ɓaa dɔ̃ɔ gbete ɓɛɛ. Mɔɔ tusu zang ɓaa vuu ɓɔɔ niizang ɓɔɔ Laa kasɛ nɛɛ zang ri palɛ ɓɛɛ. Kɔɔ ruu jong, daa naa ɓɔɔ ruu shu kpanti Kayisa saka tipi katɔ ya, kɔ ruu shu kpang?”

¹⁵Yeesɔ ti zi vuu ɓɔɔ ri mang ka yeti ɓarɛ ɓi tɔ. A kɔɔ ri tɔɔ, “Nɔɔ gã̀sɛ́ m ka ruu viya? Nɔɔ atɛ m dinari karɛ n zirɛ.”

¹⁶A ri atɛ wu gbete. A Yeesɔ hɛ̃ɛ ri tɔɔ, “Wee ɓu waa nyaating, nɛɛ nung wiya?” A ri kasɛ wu nyaa tɔɔ, “Ɓɔ̀ɔ́ kpanti Kayisa.”

¹⁷A Yeesɔ kɔɔ ri tɔɔ, “Vuu ɓɔɔ nɛɛ ɓɔɔ Kayisa, nɔɔ a wu, nɔɔ ti a Kpanti Laa vuu ɓiɓɛ.” Ɓɔɔ ri tãa naa weɓe, ri mã naa ka danggn, ka ruu nyaa ɓɔɔ wu kasɛ ɓɛɛ.

¹⁸A zang Saduki ɓɔɔ ri tɔɔ zang nɛɛ vɔ tɔ Laa naa wisi zang paa ɓi tɔɔ nɛɛ sàa kpang, arɛ naa hɛ̃ɛ wu ruu.

¹⁹Ri tɔɔ, “Musa bee ruu tɔɔ, zang nɛɛ vɔrɛ, nɛɛ yaa soro ɓiɓɛ jaa kagn kpang, ɓeezung wu sɔɔrɔ soro ɓiɓɛ katɔ, wu yi ɓeezung jaa.

²⁰Zang varɛ ɓɔɔgn, nàá ɓarɛ yi ri manziti. Jamari shing soro, a vɔrɛ yaa soro, yi jaa nɛɛ wu kpang. A ɓeezung ɓɔɔ pãng ka dakn ɓiɓɛ, naa sɔɔrɔ soro ɓiɓɛ, a ti vɔrɛ, yi jaa nɛɛ wu kpang.

²¹A zang ɓɔɔ pãng ka dakn zang ɓɔɔ doo knti kaɓa, ti vɔrɛ, yi jaa nɛɛ wu kpang.

²²Dɔ̃lɔ nɔngkɔ ka yuu ɓarɛ zang manziti kaɓa nandon, ri yiki jaa nɛɛ wu kpang. A jaa soro kaɓa naa vɔ kaa nɛɛ knti.

²³Ka diki ɓɔɔ Laa naa wisi zang paa nɛɛ sàa, jaa soro kaɓa naa nwang ɓu kaa soro wi ka teteng ɓarɛ gbete wiya? Ka ruu ɓɔɔ, ri shĩili wu katɔ kɔ nandon ɓɛɛ.”

²⁴A Yeesɔ kasɛ ri nyaa tɔɔ, “Nɔɔ ning gbalang katɔ, ka ruu ɓɔɔ, nɔɔ zi labeenang Laa, nɛɛ náa ɓɔɔ Laa palɛ vuu nɛɛ mani kpang ɓɛɛ.

²⁵Laa nɛɛ wisi zang paa tɔ nɛɛ saa, zang shing soro ɓi takpang. Zang ti naa a zang wujɛ soro ɓi takpang nɛɛ zang gee ri kpang. Zang naa nwalɛ ɓi ka naa zang nyaa shonang Kpanti Laa ɓɔɔ ka lapa ɓɛɛ.

²⁶“Ka ruu zang paa wisinang nɛɛ saa, nɔɔ gã gngn ka yeti labeenang Musa kpang ya? Ka nɔng ɓɔɔ zang bèe ruu waa ɓɔɔ shaa jaa laa ɓɛɛ. Zang bee ka nɔngkɔ nɛɛ, Laa kɔɔ Musa tɔɔ, wukɔ Laa Ibirayi, nɛɛ ɓɔɔ Ishaaku, nɛɛ ɓɔɔ Yakubu.

²⁷Zang keɓe ri vɔlɔ tɔ doo tɛ̃ɛ tɛ̃ɛ, wee Laa ɓàa yuu ɓiɓɛ, nɛɛ wu Laa ɓarɛ ɓɛɛ, ruu zi ka wukɔ nɛɛ zang wísí ri paa tɔ nɛɛ saa. Ka ruu ɓɔɔ, Laa ɓi Làá zang ɓɔɔ vɔ katɔ kpang, ɓi Làá zang ɓɔɔ ningkãari ɓɛɛ. Nɔɔ ning gbalang katɔ dòndòng.”

²⁸A shɔnzang gbete ka teteng zang ɓɔɔ ri tusu zang vuu, arɛ naa ĩi ri, ri laa nyaa nɛɛ zɔɔ, a ti tãa naa ɓɔɔ Yeesɔ kasɛ zang nyaa tɔ̃ɔ tɔ̃ɔ ɓɛɛ, hɛ̃ɛ Yeesɔ tɔɔ, “Ka teteng nyaa ɓɔɔ Laa dangnɛ, ɓu wi bang wiya?”

²⁹A Yeesɔ kasɛ nyaa tɔɔ, “Ɓɔɔ bang, wukɔ tɔɔ nɛɛ ‘Nɔɔ ɓaa shoo ta zang Isirela, Kpanti Laa ɓuru wukɔ Laa gbete.

³⁰Mɔ́ɔ kasɛ Kpanti Laa ɓaaɓɛ nɛɛ yeti ɓaaɓɛ nandon, nɛɛ suru bii ɓaaɓɛ nandon, nɛɛ rɛ̃rɛnang ɓaaɓɛ nandon, nɛɛ kaka ɓaaɓɛ nandon.’

³¹Ɓɔɔ ɓang knti ɓiɓɛ keɓe ‘Mɔ́ɔ kasɛ ruu shɔnzang doo naa ɓɔɔ mɔɔ kasɛ yuu ɓaaɓɛ kɔ.’ Nyaa ɓɔɔ Laa dangnɛ, ɓɔɔ ɓa rɛɛ weɓe kagn kpang.”

³²A yɔɔ ɓɔɔ tusu zang vuu kaɓa, kɔɔ wu tɔɔ, “Mɔɔ kasɛ nyaa tɔ tɔ̃ɔ, maalang. Naa ɓɔɔ mɔɔ kɔɔyi niizang kɔ. Kpanti Laa wukɔ Laa gbete, Laa ɓɔ̀ɔ́gn kpang, wukɔ gbete.

³³Laa kasɛ, nɛɛ zang wu kasɛ ruu ɓiɓɛ nɛɛ yeti gbete, nɛɛ rɛ̃rɛnang ɓiɓɛ nandon, nɛɛ kaka ɓiɓɛ nandon, zang wu ti kasɛ shɔnzang doo naa ɓɔɔ zang kasɛ yuu zang kɔ. Nyaa dannang keɓe dũnnang, ɓa ɓɔɔ zang dɔɔrɔ Laa vuu katɔ.”

³⁴Ɓɔɔ Yeesɔ zi naa ɓɔɔ wu kasɛ nyaa nɛɛ zũnang ning, kɔɔ wu tɔɔ, “Yaa ɓɔɔ mɔɔ ta Laa wu nwang Kpanti ɓaaɓɛ kaa tɔkɔlɔng.” Zang ɓɔɔ naa paasɛ wu ruu hɛ̃ɛnang ɓɔɔgn takpang.

³⁵Ɓɔɔ Yeesɔ tusu zang vuu doo naa ka Gãa Laa, a hɛ̃ɛ zang tɔɔ, “Zang ɓɔɔ ri tusu zang vuu, ri kɔɔ ɓu ka ruu vi nɛɛ Kirisi jaa zɔ̃ng Dawuda viya?

³⁶Suru Laa kɔɔ nɛɛ nyaa Dawuda tɔɔ, “ ‘Kpanti Laa kɔɔ Kpanti mɛɛ tɔɔ, “Nwang ka naa nakn mɛɛ, n shing zang ɓɔɔ ri shing jĩng nɛɛ mɔɔ kpang ditɔ, mɔɔ naa ri nɛɛ doo ɓaaɓɛ.” ’

³⁷Dawuda nɛɛ yuu ɓiɓɛ nɛɛ ɓaa wu nɛɛ Kpanti, ráa jaa ɓiɓɛ ɓi kaa biya?” Zang ɓɔɔ ri kpalɛ zɔɔ ka bii ɓiɓɛ gaagaa, ri ɓaa shoo kaa ruu ɓɔɔ wu kɔɔ ɓɛɛ, nɛɛ tĩnang tãanang ning.

³⁸Ɓɔɔ wu tusu zang vuu doo naa, kɔɔyi tɔɔ, “Nɔɔ gãng jĩng ka zang ɓɔɔ ri tusu zang vuu ɓɛɛ ning. Ri kasɛ nɛɛ ri rakɛ nɛɛ fɔ̃ɔrɔ beebang, nɛɛ tɔɔ zang jeere ri nyaa ka lumang.

³⁹Ri ti kasɛ nwannang ka nɔng tɔ̃ɔ, tɔ̃ɔ ka gãa zɔɔ kpalɛnang zang Yahudi nɛɛ nɔng ɓɔɔ zang shĩili zang bang bang, ka nɔng ɓɔɔ zang kpalɛ zɔɔ kagn, zang shaa vuu shaanang ɓɛɛ.

⁴⁰Ri mulu suvɔ, ri talɛ vuu ɓɔɔ ka naa ɓarɛ nandon. Ri ti gaa Laa sasak nɛɛ tɔ̀ɔ, zang zi ri kati. Ka ruu nɔngkɔ, jĩng dannang ɓɔɔ Kpanti Laa naa dang ri naa ɓa ɓɔɔ zang piti katɔ.”

⁴¹Yeesɔ nwang tɔ naabm ka nɔng ɓɔɔ zang looro saka kagn ka Gãa Laa ɓɛɛ, pɛ̃ɛrɛ naa ɓɔɔ zang looro saka ɓɛɛ. Zang vuu naa, ri dɔɔli, ri looro saka kana gaagaa.

⁴²A suvɔ ɓɔɔ vuu ka naa kpang arɛ naa loo saka tɔkɔlɔng.

⁴³Yeesɔ ɓaa nyaa ka zang ɓɔɔ ri mantɛ vuu ka bii ɓiɓɛ, kɔɔ ri tɔɔ, “N kɔɔ nɔɔ ruu ɓɔɔ niizang kɔ nwani, suvɔ kɔ vuu ka naa kpang ɓee, vuu ɓɔɔ looyi kɔ ɓa ɓɔɔ zang piti ɓɔɔ ri looro saka ka nɔng kaɓa ɓɛɛ.

⁴⁴Ka ruu ɓɔɔ, zang piti ri nwangsɛ saka ɓarɛ ka yeti vuu naa ɓarɛ ɓɔɔ gaagaa ɓɛɛ. Suvɔ ɓɔɔ vuu naa ɓiɓɛ kpang keɓe, atɛ ɓi vuu naa ɓiɓɛ ɓɔɔ wu wàlɛ́ vuu shaanang nɛɛ mani kɔ nwani nandon.”