Read mumuye Maraku 13 Bible Online

Maraku 13 - mumuye bible

Maraku 13

¹Ɓɔɔ wu nwang doo naa nɛɛ Gãa Laa, zang gbete ka teteng zang ɓɔɔ ri mantɛ vuu ka bii ɓiɓɛ kɔɔ wu tɔɔ, “Maalang, zi tari kɔ jĩng lòonang kagn kpang, nɛɛ gãa tɔ̃ɔ tɔ̃ɔ ɓɔɔ zang mãarɛ ɓee.”

²A Yeesɔ kasɛ wu nyaa tɔɔ, “Mɔɔ zi gãa kɔ zang mãarɛ tɔ̃ɔ tɔ̃ɔ ɓee tɔ waa? Zang naa yaa tari ɓɔɔ pãng ka yuu zɔɔ gbete kpang. Zang naa jili ɓi ditɔ ka tipi nandon.”

³Yeesɔ naa nwang tɔ ka tipi, ka Kɔpɔ Zeetung, raa jĩng ka Gãa Laa ka dang. Bituru nɛɛ Yakub nɛɛ Yɔhana, a ɓɔɔ Anduru ri naa hɛ̃ɛ wu ruu bɛ̀ɛ́ wu ka bm.

⁴Ri tɔɔ, “Kɔɔ ruu diki ɓɔɔ vuu keɓe naa palɛ ɓɛɛ jong. Ɓu vi naa tùsú ruu nɛɛ diki ɓɔɔ vuu keɓe palɛ kagn a tɔ viya?”

⁵A Yeesɔ gaa ri tɔɔsung ruu kɔɔnang kati tɔɔ, “Nɔɔ gãng jĩng kagn, zang ɓɔɔ nɛɛ nwãarɛ nɔɔ”

⁶Zang dɔɔli naa a ditɔ nɛɛ nung mɛɛ, ri naa kɔɔyi nɛɛ “Rikɔ zang ɓɔɔ naa a ɓɛɛ” Ri nwãarɛ zang dɔɔli.

⁷Nɔɔ nɛɛ tãayi zang nɛɛ kɔɔrɔ nɛɛ zang takɛ sĩiri ka nɔng naabm, nɛɛ ruu sĩiri ɓɔɔ zang ta kpala kpala, bii wu sɔɔ nɔɔ kpang. Vuu keɓe naa palɛ ɓi ditɔ, ɓi gn diki ɓɔɔ koo waa nyaa ɓɛɛ kpang.

⁸Zang tipi ɓɔɔgn ri naa gaa nyaa ditɔ nɛɛ zang tipi ɓɔɔgn. Kpanti ɓɔɔgn, wu ti naa gaa nyaa nɛɛ kpanti ɓɔɔgn. Tipi naa ruutu ditɔ ka tipi koolaa dɔɔli, nyɔkɔ ti naa nwang ditɔ. Vuu keɓe ɓi doo jĩng dannang gaayu, naa ɓɔɔ jaa gaa zang yuu kɔnang ɓɛɛ.

⁹Nɔɔ shing yuu manɛ tɔ̃ɔ tɔ̃ɔ, ka ruu ɓɔɔ, zang naa a nɔɔ zang ɓɔɔ ri jɛ̃ɛ ruu ditɔ ɓɛɛ. Zang naa nyɔ nɔɔ ditɔ ka gãa zɔɔ kpalɛnang zang Yahudi. Zang naa atɛ nɔɔ ditɔ ka tĩng rɛɛ gɔmna nɛɛ rɛɛ kpanti ka ruu mɛɛ, tɔ̀ɔ, nɔ́ɔ kɔɔ ri Ruu Laa kati.

¹⁰Zang naa rǎng zang ɓɔɔ ka rɛɛ tipi ɓɔɔ ka koo keɓe Ruu Tɔ̃ɔ Laa ditɔ gbongkarɛ nandon, tɔ̀ɔ, koo wu naa waa nyaa kati.

¹¹Zang nɛɛ atɛ nɔɔ tɔ ka nɔng ɓɔɔ zang jɛ̃ɛ zang ruu, nɔɔ rɛ̃rɛ vuu ɓɔɔ nɔɔ naa kɔɔ zang ɓɛɛ kpang. Zang nɛɛ hɛ̃ɛ nɔɔ tɔ, nɔɔ kɔɔ zang vuu ɓɔɔ Laa a nɔɔ ɓɛɛ, ka ruu ɓɔɔ, ɓi nɔkɔ rang yee kpang, ɓi Suru Laa rang nɛɛ nyaa manɛ ɓɛɛ.

¹²Zang naa a zang rɛɛ ɓeezung ditɔ nɛɛ zang wu nyɔ vɔrɔ. Daa zang, ri ti naa a zang wujɛ ɓarɛ ditɔ nɛɛ zang nyɔ ri vɔrɔ. Wujɛ ri ti naa shii varɛ ditɔ nɛɛ zang ɓɔɔ ri yi ri ɓɛɛ, ri shingnɛ, nɛɛ zang nyɔ ri vɔrɔ.

¹³Zang piti, ri ti naa bɛ̃ɛ nɔɔ ditɔ ka ruu mɛɛ, shɔnzang ɓɔɔ mã danggn sasak wukɔ naa wɔrɛ.

¹⁴“Nɔɔ nɛɛ zi vuu baabii shíi tɔ ka nɔng ɓɔɔ daa ɓɔɔ wu shii kagn kpang, [zang ɓɔɔ gã vuu keɓe, wu zi kati.] Zang ɓɔɔ ka tipi Yahudi ri yurɛ, ri daa ka kɔpɔ.

¹⁵Zang ɓɔɔ ka yuu sãa wu shooro nɛɛ wu dàa ya vuu ɓɔɔ ka yeti gãa kpang.

¹⁶Zang ɓɔɔ ka jaa wu ti gbãayu tɔ̀ɔ́, nɛɛ wu naa tuu fɔ̃ɔrɔ bii zuunang ɓiɓɛ kpang.

¹⁷Zang soro ɓɔɔ jaa ka yeti, nɛɛ ɓɔɔ jaa ka naa ka diki kaɓa, ri naa nwáng vuu gn kɔnang.

¹⁸Nɔɔ gaa Laa nɛɛ, vuu keɓe wu palɛ nɛɛ gãmbang guusi kpang.

¹⁹Ka ruu ɓɔɔ, jĩng dannang bang kagn diki kaɓa ɓɛɛ. Zang zi jĩng dannang ɓɔɔ naa weɓe gngn ka koo keɓe doo gbete kpang. Zang naa paasɛ jĩng dannang ɓɔɔ naa weɓe zinang ti takpang.

²⁰Kpanti Laa nɛɛ sɔɔrɔ diki keɓe ka knti tɔkɔlɔng kpang, shɔnzang ɓɔɔ nɛɛ wɔ kagn gbete gãagãa kpang. Kpanti Laa naa sɔ́ɔrɔ̀ diki keɓe, ka ruu zang ɓiɓɛ ɓɔɔ wu shɛ̃ɛrɛ ɓɛɛ.

²¹“Zang ɓɔɔ nɛɛ kɔɔ nɔɔ nɛɛ, Kirisi kagn nihn, kɔ ka kaaɓa, nɔ́ɔ yee laa manɛ kagn kpang.

²²Ka ruu ɓɔɔ, zang ɓɔɔ ri naa ɓaa yuu ɓarɛ nɛɛ Kirisi, nɛɛ zang ɓɔɔ ri naa suu sèé nɛɛ ri zang nyaa shonang Laa, naa alɛ ditɔ. Ri naa tusu vuu bang bang, ɓɔɔ zang zirɛ zang mã naa ka danggn, nɛɛ tɔ̀ɔ ri nwãarɛ zang kati. Naa ri nɛɛ zunung zang ɓɔɔ Laa shɛ̃ɛrɛ ri nwãarɛnang katɔ, ri nɛ̀ɛ́ nwãarɛ ri katɔ.

²³Nɔɔ gãng jĩng kagn, n kɔɔ nɔɔ vuu keɓe tɔ piti ka tĩng.

²⁴“Jĩng dannang kaɓa nɛɛ waa nyaa tɔ, laa kɔ ruu zi ka lapa ɓee, naa tɔ̀ɔ́ katɔ. Shala ti naa yakɛ nɔng takpang.

²⁵Sang ri ti naa shili nɛɛ lapa. Vuu piti ɓɔɔ ka lapa ti naa rùutú katɔ.

²⁶Tɔ̀ɔ, zang naa zi Jaa Shɔnzang kati ka ɓɔɔ wu a ka yeti sãmbong, nɛɛ naa vuu palɛnang ɓiɓɛ, nɛɛ bannang ɓiɓɛ ɓɛɛ.

²⁷Wu naa shong zang nyaa shonang Laa ɓɔɔ ka lapa kati, ri kpàlɛ̀ wu zang ɓɔɔ Laa shɛ̃ɛrɛ katɔ ka dĩiri koo piti.

²⁸“Nɔɔ mantɛ vuu ka bii laa sĩiri. Nasãng laa sĩiri nɛɛ lɔɔ gɔpɔ tɔ, ɓɔɔ shɔɔ nɛɛ lusu kana, nɔɔ zi tɔ nɛɛ, nɔng guusi a naabm tɔ.

²⁹Nɔɔ nɛɛ ti zi vuu kɔ n kɔɔrɔ ɓee, nɛɛ palɛ kina naa weɓe, nɔɔ zí katɔ nɛɛ diki Jaa Shɔnzang a naabm tɔ gbang gbang.

³⁰N kɔɔ nɔɔ ruu ɓɔɔ niizang kɔ nwani, vuu keɓe naa palɛ ditɔ niizang gbongkarɛ nandon, tɔ̀ɔ, zang koo jaa knti keɓe, naa ɓa kati.

³¹Lapa nɛɛ tipi ri naa shaarɛ ditɔ, ruu mɛɛ shaarɛ ɓi kpang.

³²“Zang ɓɔɔ zi diki nɛɛ laa ɓɔɔ n gbãayu kagn gbete kpang. Zang nyaa shonang Kpanti Laa ɓɔɔ ka lapa, nɛɛ ɓɔɔ n Jaa Laa piti, ruu zi kpang, Kpanti Laa kɔ zi gbete.

³³Nɔɔ palɛ tɔ̃ɔ, nɔɔ gãng jĩng kagn. Ka ruu ɓɔɔ, nɔɔ zi diki kaɓa kpang ɓɛɛ.

³⁴Diki ɓɔɔ Jaa Shɔnzang gbãayu kagn, nwang naa zang ɓɔɔ tɔɔ wu daa zanti, yáa gãa ɓiɓɛ ka naa zang shonang ɓiɓɛ ɓɛɛ. Basɛ ri vuu ɓɔɔ ri naa palɛ ka knti ɓɛɛ katɔ nandon. A ti kɔɔ zang ɓɔɔ gãng jĩng ka nyaa gãa, nɛɛ wu gãng jĩng tɔ̃ɔ tɔ̃ɔ.

³⁵Gãng jĩng kagn, ka ruu ɓɔɔ, mɔɔ zi diki ɓɔɔ yɔɔ gãa naa gbãayu kagn kpang ɓɛɛ. A nɛɛ laarang ya, nɛɛ teteng gãmbang ya, kɔ naa ɓɔɔ kn gaayu nyaa ɓaanang ya, kɔ nɛɛ gãndi zang zang ya, nɔɔ zi kpang.

³⁶Naa yɔɔ nwang nyaa wɔɔli, wu naa ĩi nɔɔ, nɔɔ roo katɔ kpang.

³⁷Vuu kɔ n kɔɔ ɓee, n kɔɔ zang piti. Nɔɔ shing jĩng kagn tɔ̃ɔ.”