Read mumuye Maraku 15 Bible Online

Maraku 15 - mumuye bible

Maraku 15

¹Ɓɔɔ nɔng naa gãntɛ, zang bang bang, zang ɓɔɔ ri dɔɔ vuu ka Gãa Laa, nɛɛ zang bang bang zang Yahudi, nɛɛ zang ɓɔɔ ri tusu zang vuu, nɛɛ zang piti ɓɔɔ ri doo zang ruu jɛ̃ɛnang kɔ ɓɛɛ, ri mã nyaa ka zɔɔ. Ri mã Yeesɔ, a ri daa nɛɛ wu, ri daa a wu Gɔmna Bilatu.

²Bilatu hɛ̃ɛ Yeesɔ tɔɔ, “Mɔkɔ kpanti zang Yahudi ya?” A Yeesɔ kasɛ wu nyaa tɔɔ, “Nn, nkɔ.”

³A zang bang bang zang ɓɔɔ ri dɔɔ vuu ka Gãa Laa, ri zɛ̃ɛ wu nyaa ka vuu dɔɔli.

⁴A Bilatu ti hɛ̃ɛ tɔkn tɔɔ, “Mɔɔ ãa nyaa kagn kpang ya? Mɔɔ tãa vuu kɔ zang kɔɔrɔ ka yuu ɓaaɓɛ ɓee kpang ya?”

⁵Yeesɔ ti ãa nyaa ɓi kagn kpang. Vuu kɔ Yeesɔ palɛ ɓa, kpãa Bilatu nyaa ka yeti dɔɔli.

⁶Ka diki ɓɔɔ zang shaa vuu shaanang nyaalaa ɓɔɔ zang kpaa danggn diki ɓɔɔ Laa tɛɛ ɓɛɛ, Gɔmna yàarɛ́ zang tipi ɓiɓɛ shɔnzang gbete ɓɔɔ zang mã ka sãa, ɓɔɔ ri kasɛ ɓɛɛ naa katɔ.

⁷Ka diki kaɓa, yɔɔ ɓɔɔ zang ɓaa nɛɛ Baraba kagn sãa, nɛɛ zang ɓɔɔ ri nyɔ zang vɔrɔ ka diki ɓɔɔ zang palɛ nyaa ɓɛɛ.

⁸A zang ɓɔɔ ri kpalɛ zɔɔ, ri naa kɔɔ Bilatu tɔɔ, Bilatu wu pàlɛ́ ri vuu ɓɔɔ wu pàlɛ̀ ri ka diki nyaalaa ɓɛɛ ta.

⁹A Bilatu hɛ̃ɛyi tɔɔ, “Nɔɔ kasɛ nɛɛ n yaa nɔɔ Kpanti zang Yahudi naa ya?”

¹⁰Bilatu hɛ̃ɛ ri nɔngkɔ, ka ruu ɓɔɔ, zi ɓi tɔ nɛɛ, zang bang bang zang ɓɔɔ ri dɔɔ vuu ka Gãa Laa, ri atɛ wu Yeesɔ ka ruu sũnyaa ɓɛɛ.

¹¹A zang bang bang zang ɓɔɔ ri dɔɔ vuu ka Gãa Laa, ri dɔ̃lɔ zang ɓɔɔ ri kpalɛ zɔɔ nyaa nɛɛ, ri kɔɔyi nɛɛ Bilatu wu yaa ri Baraba kɔ naa jong.

¹²Bilatu ti hɛ̃ɛ ri tɔkn tɔɔ, “Nɔɔ nɛɛ n palɛ vi nɛɛ zang ɓɔɔ nɔɔ ɓaa nɛɛ Kpanti Yahudi viya?”

¹³Ri goo nyaa tɔkn tɔɔ, “Yaa wu ta zang ɓa wu naa ka laa.”

¹⁴Bilatu hɛ̃ɛ ri tɔɔ, “Ka ruu viya? Vuu shi kpang ɓɔɔ wu palɛ ɓu viya?” Ri ti goo nyaa gbãng gbãng ka lapa nandon nɛɛ, “Yaa wu ta, zang ɓaa wu naa ka laa.”

¹⁵Bilatu kasɛ nɛɛ wu pàlɛ́ zang ɓɔɔ ri kpalɛ zɔɔ vuu ɓɔɔ ri kasɛ ɓɛɛ, a yaa ri Baraba naa. A kɔɔ zang ɓiɓɛ nɛɛ ri nyɔ Yeesɔ nɛɛ gbãa. A á ri Yeesɔ kati nɛɛ zang daa ɓaa wu naa ta ka laa.

¹⁶A zang sɔɔja ri yi wu, ri daa kaa nɛɛ wu ka yeti gãa Gɔmna. A ri kpalɛ sɔɔja ɓɔɔ nimbang kaa nandon.

¹⁷A ri lu wu fɔ̃ɔrɔ nyaa pɛɛrɛ ɓɔɔ ta bii nwɛ̃ɛri purusũng naa ɓɔɔ rɛɛ kpanti ri lu ɓɛɛ. Ri ti tí kɔkɔ naa vuu yuu kãnang kpanti, ri hãa wu ka yuu.

¹⁸Ri tang ka tĩng ɓiɓɛ, ri jeere wu nyaa kati tɔɔ, “Kpanti zang Yahudi wu nwang dòndòng.”

¹⁹Ri nyɔ wu nɛɛ labalang ka yuu, ri ti tùlù wu sisãa ka bii, a ri tang ka tĩng ɓiɓɛ, ri kpãa wu kati.

²⁰Ri kpaa wu tɔ, a ri zɔ̃ng fɔ̃ɔrɔ nyaa pɛɛrɛ nwɛ̃ɛri kaɓa, ri hãa wu fɔ̃ɔrɔ ɓiɓɛ tɔkn. Ri nwangsɛ wu kaa biling, ri daa ka nɛɛ wu, nɛɛ ri daa ɓa wu naa kaa laa.

²¹Ka gbalang, ri ɓee yɔɔ tipi Kiranɛ ɓɔɔ zang ɓaa wu nɛɛ Siman bɛɛ nɛɛ wu a ka gari. Ri yi wu nɛɛ gbãng gbãng ning, nɛɛ wu tuu laa ɓɔɔ zang daa ɓaa Yeesɔ naa kagn ɓɛɛ. Yɔɔ keɓe kɔ dáa rɛɛ Alezanda nɛɛ Rufu.

²²A ri a kaa nɛɛ Yeesɔ ka nɔng ɓɔɔ zang ɓaa nɛɛ Golgota ɓɛɛ, [Dĩiri nung keɓe, ɓi nɔng ɓɔɔ nwang yuu zɔ̃ɔpi ɓɛɛ.]

²³Ri a wu sàa ɓɔɔ zang nwɛ̃ɛtɛ nɛɛ vuu ɓɔɔ zang ɓaa nɛɛ muru ɓɛɛ, nɛɛ wu ɓooyi, a ɓoo kpang.

²⁴A ri ɓaa wu naa ka laa. Ri shaa laa nɛɛ ri zi naa ɓɔɔ ri basɛ fɔ̃ɔrɔ ɓiɓɛ nɛɛ mani ɓɛɛ. A ri basɛ fɔ̃ɔrɔ ɓiɓɛ ka nɔng ka naa ɓarɛ.

²⁵Ri ɓaa wu naa ka laa ka saka mandɛ̃ɛti ɓɔɔ gãndi ɓɛɛ.

²⁶Ri bee vuu shi kpang ɓɔɔ ri tɔɔ Yeesɔ kɔɔyi ka yuu paa laa ɓɔɔ zang ɓaa wu naa kagn ɓɛɛ. Ri beeyi tɔɔ, “Kpanti zang Yahudi.”

²⁷Ri ɓáa zang ziti ɓɔɔ ri ta zang vuu nɛɛ ɓangge naa jong laa ka kagn Yeesɔ. Ɓɔɔ gbete ka nakn Yeesɔ, a ɓɔɔ gbete ka nagang ɓiɓɛ.

²⁸[Vuu keɓe nwang kaa naa ɓɔɔ zang nyaa shonang Kpanti Laa bee ka tĩng tɛ̃ɛ tɛ̃ɛ ɓɛɛ. Zang nyaa shonang Laa beeyi tɔɔ, “Wu naa vɔ nɛɛ zang ɓɔɔ palɛ vuu shi kpang ɓɛɛ.”]

²⁹Zang ɓɔɔ ri tɛɛ gbalang, ri rang wu nyaa gɛ̃gɛ̃ɛ, ri ti waa yuu ɓarɛ, ri kɔɔ wu tɔɔ, “Mɔɔ tɔɔ mɔɔ zunung ɓɔɔ mɔɔ jili Gãa Laa, mɔɔ mãa ɓɔɔgn ka diki taati katɔ.

³⁰Ta yuu ɓaaɓɛ ta, mɔɔ shooro ka tipi nɛɛ laa kɔ zang ɓaa mɔɔ naa kagn ɓi.”

³¹Zang bang bang zang ɓɔɔ ri dɔɔ vuu ka Gãa Laa, nɛɛ zang ɓɔɔ ri tusu zang vuu, ri ráng Yeesɔ ka naa ɓarɛ, ri ti kpaa wu jong. Ri kɔɔ zɔɔ, ri tɔɔ, “Ta yuu zang ɓɔɔgn, zunung ɓɔɔ wu ta yuu ɓiɓɛ ɓi kpang.

³²Náa Kirisi Kpanti Isirela shooro nɛɛ laa kɔ zang ɓaa wu naa kagn ɓee, rùu shing danggn katɔ bii ɓiɓɛ.” Zang ɓɔɔ ri ta zang vuu nɛɛ ɓangge, ɓɔɔ zang ɓaa ri naa ka laa ka kagn Yeesɔ, ri rang wu nyaa gɛ̃gɛ̃ɛ jong.

³³Laa kaa dãngdãng yuu, a nɔng tɔɔ ka tipi kaɓa nandon, saka taati palɛ nɛɛ mani.

³⁴Saka taati naa palɛ tɔ, Yeesɔ mɛɛ nyaa ka lapa nɛɛ, “Eloyi, Eloyi lama sabatani.” Dĩiri yee keɓe ɓi, “Laa mɛɛ, Laa mɛɛ, mɔɔ yaa m ka ruu viya?”

³⁵Zang ɓɔɔ ka teteng zang ɓɔɔ ri shiiri ka nɔng kaɓa, ɓɔɔ ri tãa naa weɓe, ri kɔɔyi tɔɔ, “Nɔɔ ɓaa shoo ta nɔɔ tãayi, ɓaa nyaa kana Iliya.”

³⁶A zang gbete yurɛ daa hãa vuu ɓoɓoro ka saa ɓɔɔ gbang katɔ, a mã ka laa, a dɔ̃̀ wu ka nyaa nɛɛ wu ɓooyi. A kɔɔyi tɔɔ, “Nɔɔ shii ta gbongkarɛ, ruu zirɛ, Iliya nɛɛ a ditɔ, wu witi wu ka tipi ɓɛɛ.”

³⁷A Yeesɔ mɛɛ nyaa ka lapa, a vɔ kati.

³⁸A fɔ̃ɔrɔ ɓɔɔ zang ku nɔng tɔ̃ɔ ɓɔɔ ka Gãa Laa nɛɛ mani, lɔɔsɔ kaa nɛɛ paa daa nɔng ka dii.

³⁹Ɓɔɔ yɔɔ zang bang sɔɔja ɓɔɔ shii ka tĩng Yeesɔ zi naa ɓɔɔ Yeesɔ vɔ ɓɛɛ, kɔɔyi tɔɔ, “Yɔɔ keɓe, Jaa Laa kɔ niizang.”

⁴⁰Zang soro ɓɔɔ kagn, ri shiiri nɛɛ nɔng beebang, ri pɛ̃ɛrɛ vuu ɓɔɔ zang palɛ Yeesɔ ɓɛɛ. Ka teteng zang soro kaɓa, Marayamu Magadaliya nɛɛ Marayamu nàá rɛɛ Yakub ɓɔɔ wujaa nɛɛ Yose, a ɓɔɔ jaa soro ɓɔɔ zang ɓaa nɛɛ Salomi, ri kagn.

⁴¹Zang soro keɓe kɔ ri dũuru Yeesɔ ka knti, a ri ti yi wu naa ka bii, ka diki ɓɔɔ wu ka Galili ɓɛɛ. Zang soro ɓɔɔgn ɓɔɔ ri a nɛɛ wu ka Urushalima gaagaa, kagn nɔng kɔ doori.

⁴²Nɛɛ laarang ka diki kaɓa, ka lee ɓɔɔ zang Yahudi ri kpalɛ bii, ka ruu ɓɔɔ, ɓuru kaa Diki Ɔ̃sɔnang ɓɛɛ.

⁴³Yusufu yɔɔ Arimataya ɓɔɔ zang a wu bannang dɔɔli, ka teteng zang ɓɔɔ jɛ̃ɛ ruu ɓɛɛ. Yusufu shing jĩng ka diki ɓɔɔ Laa naa roo Kpanti ɓɛɛ, mã danggn, daa gaa vɔrɔ Yeesɔ ka naa Gɔmna Bilatu.

⁴⁴Ɓɔɔ Bilatu tãayi nɛɛ Yeesɔ vɔ tɔ, kpãa wu ka yeti dɔɔli naa ɓɔɔ vɔ pati ɓɛɛ. A shong zang nɛɛ zang daa ɓàa wu nyaa ka zang bang sɔɔja kaɓa. A naa hɛ̃ɛ wu nɛɛ Yeesɔ vɔ tɔ ya?

⁴⁵Ɓɔɔ Bilatu naa tãa nɛɛ nyaa zang bang sɔɔja kaɓa nɛɛ Yeesɔ vɔ tɔ, yàa Yusufu gbalang vɔrɔ Yeesɔ tuunang kati.

⁴⁶A Yusufu hoo fɔ̃ɔrɔ nyaa pɛɛrɛ puru kati. A witi vɔrɔ Yeesɔ ka tipi, kãng kaa nɛɛ fɔ̃ɔrɔ, a daa wɔɔ wu ka yeti saa ɓɔɔ zang ɓee ka tari bang ɓɔɔ shii doo paa ɓɛɛ. A jĩiri tari, ku nyaa saa kaa nɛɛ mani.

⁴⁷Marayamu Magadaliya nɛɛ Marayamu nàá Yose, ri zi nɔng ɓɔɔ zang wɔɔ vɔrɔ Yeesɔ kagn ɓɛɛ kati.