Read mumuye Maraku 16 Bible Online

Maraku 16 - mumuye bible

Maraku 16

¹Diki Ɔ̃sɔnang naa ɓa tɔ, Marayamu Magadaliya nɛɛ Marayamu nàá Yakubu, a ɓɔɔ Salomi, ri hoo nung ɓɔɔ a sɛ̃ɛ tɔ̃ɔ ɓɛɛ, nɛɛ ri daa tũuru vɔrɔ Yeesɔ ka bii.

²Nɔng naa gãntɛ tɔ gbete ka knti Diki Ɔ̃sɔnang bɛ̀ɛ́ laa nwang tɔ, rɛɛ Marayamu ri daa kana yuu sàa.

³Ri rangkɛ kana naa ɓarɛ ka gbalang nɛɛ, “Ɓu wi daa jĩiri ruu tari ɓɔɔ ka nyaa sàa ɓɛɛ jong wiya?” Ka ruu ɓɔɔ, tari bìí bang dɔɔli ɓɛɛ. Ɓɔɔ ri pɛ̃ɛrɛ nyaa sàa hn, ri zirɛ zang jĩiri tari bìí tɔ.

⁵Ri tu ka yeti sàa, a ri zi jasang ɓɔɔ hãa fɔ̃ɔrɔ puru nwang tɔ ka naa nakn. A ri mã naa danggn.

⁶A yɔɔ jasang kaɓa kɔɔ ri tɔɔ, “Nɔ́ɔ mã naa ka danggn kpang.” Nɔɔ kãa Yeesɔ yɔɔ Nazara ɓɔɔ zang ɓaa wu naa ka laa ɓɛɛ. Tɔ̀ɔ́ nɔng kpang, zang wisi wu paa tɔ. Nɔɔ pɛ̃ɛrɛ nɔng ɓɔɔ zang wɔɔ wu kagn ɓɛɛ.

⁷Nɔɔ dita nɔɔ daa kɔɔ Bituru, nɛɛ rɛɛ ɓeezung ɓɔɔ ri mantɛ vuu ka bii Yeesɔ kɔ doori nɛɛ, “Yeesɔ kɔ shɛ̃ɛ Galili shɔɔnang. Ri daa zi wu ka nɔngkɔ, naa ɓɔɔ wu kɔɔ ri ɓɛɛ.”

⁸Vuu keɓe kpãa rɛɛ Marayamu ka yeti dɔɔli, bii ti zaa ri katɔ. A ri nwangkɛ, ri yuku, ri daayi. Ri ãa zang nyaa ka bii gbete kpang, ka ruu ɓɔɔ, ri kaa vɔrɔ ɓɛɛ.

⁹[Yeesɔ seepaa tɔ nɛɛ sàa, ka lee ɓɔɔ nɔng gãntɛ tɔ gbete ka knti Diki Ɔ̃sɔnang zang Yahudi, nɛɛ gãndi zang zang, a naa nwang nyaa ka bii Marayamu Magadaliya, ɓɔɔ wu nwangsɛ suru shi kpang ka bii ɓiɓɛ manziti ɓɛɛ, kɔ shɔɔnang.

¹⁰A Marayamu daayi daa kɔɔ zang ɓɔɔ bɛ̀ɛ́ ri nwálɛ́ nɛɛ Yeesɔ ɓɛɛ kati. Marayamu daa ĩi ri, bɛ̀ɛ́ ri kaa nyavɔ doo naa.

¹¹Ɓɔɔ ri tãayi nɛɛ nyaa Marayamu nɛɛ Yeesɔ doo ningkãari, nɛɛ Marayamu ti zi wu jĩng tɔ ka bii, ri tɔɔ, ruu keɓe ɓi niizang kpang.

¹²Ka knti weɓe, Yeesɔ naa nwang nyaa kaa tɔkn nɛɛ bii naa ɓɔɔgn ka bìí zang ziti ɓɔɔ ri dũng knti ɓiɓɛ bɛ̀ɛ́ ri a nɛɛ Urushalima, ri daa ka jaa gari.

¹³A ri gbãayu ri daa kɔɔ rɛɛ ɓeezung. A rɛɛ ɓeezung tɔɔ, ruu keɓe ɓi niizang kpang.

¹⁴Kaa nɛɛ knti, Yeesɔ naa nwang nyaa ka bii zang kopi tu gbete ɓɔɔ ri mantɛ vuu ka bii ɓiɓɛ, bɛ̀ɛ́ ri shaa doo vuu shaanang. A mangkɛ ri, ka ruu ɓɔɔ, ri shing danggn nɛɛ, wu doo ningkãari kpang ɓɛɛ. Ri ti kasɛ vuu ɓɔɔ zang ɓɔɔ ri zi wu tɔ, ri kɔɔ ri kpang ɓɛɛ.

¹⁵A kɔɔ ri tɔɔ, “Nɔɔ dita ka koo piti, nɔɔ daa rang zang piti, Ruu Tɔ̃ɔ Kpanti Laa.

¹⁶Zang ɓɔɔ nɛɛ tarɛ, nɛɛ shing danggn katɔ, a zang nɛɛ palɛ wu batizima, wukɔ naa walɛ suru bii ɓɔɔ waa nyaa kpang ɓɛɛ. Zang ɓɔɔ nɛɛ ti tãayi, a shing danggn kpang, Laa naa jɛ̃ɛ wukɔ ruu.

¹⁷Laa naa a zang ɓɔɔ ri shing danggn ka bii ɓiɓɛ naa vuu palɛnang ɓɔɔ zang zirɛ, zang mã naa ka danggn ditɔ. Ri naa nwangsɛ suru shi kpang nɛɛ nung mɛɛ. Ri ti naa rangkɛ yee nɛɛ nyaa koo ɓɔɔgn.

¹⁸Naa ri yi sɔkɔ nɛɛ naa, kɔ ri ɓoo zɔ̃pɔ ɓɔɔ nyɔ zang katɔ, palɛ ri vuu ɓɔɔ kpang. Ri naa shing naa ɓarɛ ka bii zang ɓɔɔ vuu palɛ ri katɔ, bii zang kɔnang, wu ti yaa ri nɔng.”

¹⁹Kpanti Yeesɔ hangsɛ ri nyaa yee rannang tɔ, Laa tuu wu kaa ningkãari daa nɔng ka lapa. A daa nwáng ka naa nakn Kpanti Laa.

²⁰A zang ɓɔɔ ri mantɛ vuu ka bii Yeesɔ ri daa kati, ri daa rang yee Laa kaa nɛɛ nɔng piti, piti. A Kpanti Yeesɔ ti palɛ shonang nɛɛ ri ning. Tusu zang nɛɛ yee ɓɔɔ zang ɓɔɔ ri mantɛ vuu ka bii ɓiɓɛ ri rangnɛ, ɓi niizang kɔ nwani. Ka ruu ɓɔɔ, zang zi ka vuu ɓɔɔ ri palɛ ɓɔɔ zang zirɛ zang mã naa ka danggn ɓɛɛ.]