Read mumuye Maraku 3 Bible Online

Maraku 3 - mumuye bible

Maraku 3

¹Diki ɓɔɔgn, Yeesɔ daa ka gãa zɔɔ kpalɛnang zang Yahudi tɔkn, a yɔɔ ɓɔɔ naa ɓiɓɛ ɓakɛ katɔ kagn nɔngkɔ.

²Zang ɓɔɔ ri kãa ruu nɛɛ Yeesɔ. Ri shu wu jĩng ka bii, nɛɛ Yeesɔ nɛɛ masɛ zang kɔ naa ɓakɛ katɔ tɔ, ka Diki Ɔ̃sɔnang, tɔɔ ri walɛ vuu shi kpang ɓɔɔ ri naa kɔɔ ka yuu ɓiɓɛ kati.

³A Yeesɔ ɓaa yɔɔ ɓɔɔ naa ɓakɛ katɔ kaɓa nyaa tɔɔ, “Arɛ mɔɔ naa shii ka tĩng zang piti ka nihn.”

⁴A Yeesɔ hɛ̃ɛ ri tɔɔ, “Labeenang Laa ɓɔɔ Musa beeyi kasɛ katɔ, nɛɛ ruu palɛ tɔ̃ɔ ka Diki Ɔ̃sɔnang ya, kɔ nɛɛ ruu palɛ vuu shi kpang? Nɛɛ ruu ta yuu zang ya, kɔ nɛɛ ruu nyɔ zang vɔrɔ katɔ kɔ jong?” Ri ãa nyaa kpang.

⁵Gnvɔ shaa Yeesɔ, a Yeesɔ shu ri jĩng kɔ shɛ̃ɛning ka bii, ka ruu yuu taarɛnang ɓarɛ. A raa jĩng kɔɔ yɔɔ ɓɔɔ naa ɓakɛ katɔ tɔɔ, “Dĩi naa ɓaaɓɛ ta.” A yɔɔ dĩi naa ɓiɓɛ, naa ɓiɓɛ nwang tɔ̃ɔ kaa tɔkn.

⁶A ɓɔɔ zang Farisi ri zi naa weɓe, ri nwangkɛ, ri daa tɔ̀ng zɔɔ nɛɛ zang ɓɔɔ ri dũng Hiridu kaa naa ɓɔɔ ri naa nyɔ Yeesɔ ɓɛɛ.

⁷A Yeesɔ naa daa kaa nɛɛ zang ɓɔɔ ri mantɛ vuu ka bii ɓiɓɛ ka nyaa mii waapo. Zang dɔɔli ri dũng wu nɛɛ tipi Galili a ɓɔɔ nɛɛ tipi Yahudi

⁸nɛɛ gari Urushalima nɛɛ tipi Idumiya, nɛɛ tipi ɓɔɔ rang Urudung ka wu nɛɛ paa ɓɔɔ laa nwangnɛ mani ɓɛɛ, nɛɛ ɓɔɔ kiiri rɛɛ gari Taya nɛɛ Sidong nyaa ka teteng ɓɛɛ. Zang dɔɔli keɓe, ri a ka bii Yeesɔ, ka ruu ɓɔɔ, ri tãa ruu vuu ɓɔɔ wu palɛ ɓɛɛ.

⁹Zang ɓɔɔ ri kpalɛ zɔɔ ka bii Yeesɔ ri shang dɔɔli, ka ruu nɔngkɔ, Yeesɔ kɔɔ zang ɓɔɔ ri mantɛ vuu ka bii ɓiɓɛ nɛɛ ri pàlɛ̀ wu tonsi katɔ pati, ka ruu ɓɔɔ zang nɛɛ màasɛ́ wu ɓɛɛ.

¹⁰Yeesɔ masɛ zang tɔ dɔɔli, ka ruu nɔngkɔ, zang ɓɔɔ kɔnang ka bii ɓarɛ ning, ri béng zang nɛɛ tɔ̀ɔ, ri daa lee Yeesɔ naa ka bii.

¹¹Zang ɓɔɔ suru shi kpang kagn bii ɓarɛ nɛɛ zi Yeesɔ tɔ, ri ti tang nɛɛ gutu ka tĩng ɓiɓɛ, ri sãlɛ nyaa nɛɛ “Mɔkɔ Jaa Laa.”

¹²Yeesɔ wu ti mangkɛ suru shi kpang nɛɛ ri tusu zang nɛɛ wukɔ Jaa Laa kpang.

¹³A Yeesɔ naa vangnɛ daa ka kɔpɔ, a ɓaarɛ zang ɓɔɔ wu kasɛ katɔ nyaa, a ri daa ka bii ɓiɓɛ.

¹⁴A shɛ̃ɛrɛ zang kopi tu ziti kati. Nɛɛ ri nwang nɛɛ wu, nɛɛ wu shong ri, ri daa rang zang yee Laa.

¹⁵Nɛɛ wu ti a ri naa ɓɔɔ ri nwangsɛ suru shi kpang nɛɛ mani, ka bii zang ɓɛɛ.

¹⁶Nung zang kopi tu ziti ɓɔɔ Yeesɔ shɛ̃ɛrɛ keɓe. Siman ɓɔɔ (wu naa ɓaa nɛɛ Bituru ɓɛɛ.)

¹⁷A ɓɔɔ Yakub jaa Zebedi nɛɛ jaa niiɓɛ Yɔhana ɓɔɔ wu ɓaa ri nung ɓɔɔgn nɛɛ Buwanaji ɓɛɛ. (Dĩiri nung keɓe, ɓi zang ɓɔɔ yeti ɓarɛ nwang naa shala mii ɓɛɛ.)

¹⁸A ɓɔɔ Anduru, nɛɛ Filibu, nɛɛ Batolomi, nɛɛ Matiyu nɛɛ Tooma, nɛɛ Yakub jaa Alifaya, nɛɛ Tadayu, nɛɛ Siman ɓɔɔ kasɛ nɛɛ tipi ɓarɛ wu gbãayu nɛɛ knti kpang ɓɛɛ,

¹⁹a ɓɔɔ Yahuda Isikariyoti ɓɔɔ nyɔ yuu Yeesɔ ka naa zang ɓɔɔ ri kasɛ ruu Yeesɔ kpang ɓɛɛ.

²⁰Yeesɔ naa daa tɔ yeti gãa, a zang dɔɔli ri ti kpalɛ zɔɔ tɔkn ka bii ɓiɓɛ. Walɛ gbalang ɓɔɔ wu shaa vuu nɛɛ zang ɓɔɔ ri mantɛ vuu ka bii ɓiɓɛ takpang.

²¹Ɓɔɔ rɛɛ ɓeezung ri tãa naa weɓe, ri daayi, nɛɛ ri daa gɔ̃ wu kaa tɔ, ka ruu ɓɔɔ, zang kɔɔyi tɔɔ, “shoko ta wu tɔ ɓɛɛ.”

²²A zang ɓɔɔ ri tusu labeenang ɓɔɔ Musa beeyi, ɓɔɔ ri a nɛɛ Urushalima, ri kɔɔyi tɔɔ “Bahazabu kagn bii ɓiɓɛ. Nwangsɛ suru shi kpang ɓi nɛɛ naa ɓɔɔ kpanti suru shi kpang a wu ɓɛɛ.”

²³A Yeesɔ ɓaa ri nyaa, kɔɔ ri ruu kaa nɛɛ nyaa vuu jeenang tɔɔ, “Sheetang nwangsɛ sheetang ɓi biya?”

²⁴Naa zang ɓɔɔ kpanti ɓarɛ gbete ri basɛ zɔɔ, ri shaarɛ ɓarɛ tɔ.

²⁵Zang ɓɔɔ ka yeti gãa gbete, nɛɛ basɛ zɔɔ tɔ, ri naa shaarɛ ɓarɛ kaa tɔ.

²⁶Naa sheetang ti bàsɛ̀ bii ɓiɓɛ, nwàng ɓi takpang. Shaarɛ ɓi kaa tɔ kɔ nwani.

²⁷“Zang ɓɔɔ daa gãa shɔnzang ɓɔɔ lakɛ dɔɔli, wu see vuu ɓiɓɛ kpang. Mã̀ zang ɓɔɔ lakɛ dɔɔli kaɓa ka gbongkarɛ, tɔ̀ɔ wu walɛ gbalang ɓɔɔ wu see vuu ɓiɓɛ kati.

²⁸“N kɔɔ nɔɔ ruu ɓɔɔ niizang kɔ nwani, Laa yàá zang gbalang vuu shi kpang piti ɓɔɔ zang palɛ, nɛɛ yee shi kpang ɓɔɔ zang ráng ɓɛɛ katɔ nandon,

²⁹zang ɓɔɔ rang yee ɓɔɔ shi kpang ka yuu Suru Kpanti Laa, Laa yaa wu gbalang ɓi kpang dòndòng. Pálɛ́ vuu shi kpang ɓɔɔ Laa yaa zang gbalang kpang ɓi tɔ.”

³⁰Yeesɔ kɔɔ ri naa weɓe, ka ruu ɓɔɔ, ri kɔɔyi tɔɔ, “Suru shi kpang kagn bii ɓiɓɛ ɓɛɛ.”

³¹Yeesɔ rang yee doo naa nyaa, a niiɓɛ nɛɛ rɛɛ jaa niiɓɛ ri naa shii ka biling, a ri shong zang nɛɛ zang daa ɓaa wu nyaa.

³²Zang ɓɔɔ ri kpalɛ zɔɔ ka bii ɓiɓɛ gaagaa ri kiiri wu nyaa ka teteng ɓɛɛ, ri kɔɔ wu tɔɔ, “Naaɓɛ nɛɛ rɛɛ jaa naaɓɛ, ri ɓaa mɔɔ nyaa ka biling. Ri kasɛ nɛɛ ri rang yee nɛɛ mɔɔ.”

³³A Yeesɔ kasɛ ri nyaa tɔɔ, “N kaaɓi n tusu nɔɔ zang ɓɔɔ n ɓaa ri nɛɛ naa mɛɛ nɛɛ rɛɛ jaa nàá mɛɛ ɓɛɛ.”

³⁴A raa jĩng pɛ̃ɛrɛ zang ɓɔɔ ri kpalɛ zɔɔ ka bii ɓiɓɛ, a kɔɔyi tɔɔ, “Naa mɛɛ kɔ, ri nɛɛ rɛɛ jaa nàá mɛɛ ɓee.”

³⁵“Zang ɓɔɔ nɛɛ palɛ vuu ɓɔɔ Daa mɛɛ ɓɔɔ ka lapa kasɛ nɛɛ wu palɛ, wukɔ naa mɛɛ nɛɛ rɛɛ jaa nàá mɛɛ.”