Read mumuye Maraku 4 Bible Online

Maraku 4 - mumuye bible

Maraku 4

¹Diki nɛɛ tɔɔ bee tɔkɔlɔng, Yeesɔ naa gaa tɔɔsung vuu tusunang kaa tɔkn, ka nyaa mii waapo Galili. Zang ɓɔɔ ri kpalɛ zɔɔ ka bii ɓiɓɛ ri dɔɔli, ka ruu nɔngkɔ, Yeesɔ vang tonsi daa nwang kagn yuu mii. Zang ɓɔɔ ri kpalɛ zɔɔ nandon ri ti shiiri ɓarɛ ka nyaa dang gãnggãng.

²A tusu ri vuu dɔɔli nɛɛ nyaa vuu jeenang tɔɔ nɛɛ,

³nɔɔ ɓaa shoo ta, nɔ́ɔ tãayi, “Zang jaa lannang ɓɔɔgn, nɛɛ wu dàa vang jĩng vuu ka jaa ɓiɓɛ.

⁴Vang jĩng vuu kana, a jĩng vuu ɓɔɔ ri shili ka gbalang, a jaaning ri ti arɛ ri naa yakɛ.

⁵Jĩng vuu ɓɔɔ ri ti shili ka yuu pɛngkɛ ɓɔɔ zũng tapuru kagn dɔɔli kpang ɓɛɛ. Ri tantɛ takɛnang, ka ruu ɓɔɔ zũng tipi wu dɔɔli kpang ɓɛɛ.

⁶A laa naa tuuyi, ri tɔɔrɔ, ri waatɛ, ka ruu ɓɔɔ shɔng ɓarɛ daa tipi dii kpang ɓɛɛ.

⁷Jĩng vuu ɓɔɔ ri ti shili ka teteng kɔkɔ. A kɔkɔ bangkɛ mulu ri. Ka ruu nɔngkɔ, ri tasɛ yuu kpang.

⁸Jĩng vuu ɓɔɔ shili ka tipi tɔ̃ɔ, a ri bangkɛ, ri tasɛ yuu. Ri shing jĩng ɓɔɔ bmati tu kopi, ɓɔɔ laa taati, a ɓɔɔ laa maani.”

⁹A Yeesɔ naa hangsɛ nyaa tɔɔ “Zang ɓɔɔ shoo ɓiɓɛ nɛɛ kagn, wu tãayi.”

¹⁰Ɓɔɔ Yeesɔ kaa bm, zang ɓɔɔ ri mantɛ vuu ka bii ɓiɓɛ nɛɛ, zang ɓɔɔ ri tãa vuu ɓɔɔ wu kɔɔyi, ri hɛ̃ɛ wu dĩiri ruu ɓɔɔ wu kɔɔrɔ ri nɛɛ nyaa vuu jeenang ɓɛɛ kati.

¹¹Yeesɔ kɔɔ ri tɔɔ, “Laa a nɔɔ kɔ naa zinang ruu ɓɔɔ zang waasɛ katɔ ka yuu kpanti ɓɔɔ Laa rooyi ɓɛɛ, a vuu piti, zang tusu zang ɓɔɔ ri dũng Laa kpang ɓarɛ nɛɛ nyaa vuu jeenang.

¹²“Kaa ruu ɓɔɔ, ‘Tɔ̀ɔ, ri shu jĩng nɛɛ ri pɛ̃ɛrɛ vuu, ri zi kpang, ri ti ɓaa shoo, ɓaa shoo, ri zi vuu ɓɔɔ kagn yeti ɓiɓɛ kpang. Naa nɛɛ nɔngkɔ kpang, ri nɛɛ gbãayu tɔ, Laa nɛɛ yaa ri gbalang vuu shi kpang ɓarɛ tɔ.’ ”

¹³A Yeesɔ hɛ̃ɛ ri tɔɔ, “Nɔɔ zi dĩiri nyaa vuu jeenang, keɓe kpang ya? A nɔɔ naa zi, dĩiri nyaa vuu jeenang ɓɔɔ ɓi ka biya?

¹⁴Zang ɓɔɔ vang jĩng vuu kaɓa, rang ɓi Ruu Laa.

¹⁵Zang ɓɔɔ ri nwang naa jĩng vuu ɓɔɔ shili ka gbalang ɓɛɛ. Ri tãa Ruu Laa, a sheetang arɛ naa ta Ruu Laa ɓɔɔ ri tãa ɓɛɛ tantɛnang.

¹⁶Zang ɓɔɔ ri ti nwang ɓarɛ naa jĩng vuu ɓɔɔ shili ka yuu pɛngkɛ ɓɛɛ. Ri tãa Ruu Laa, a ri ta tantɛnang nɛɛ yeti gbete.

¹⁷Ri zi vuu ɓɔɔ ka yeti ruu kaɓa tɔ̃ɔ tɔ̃ɔ kpang, ka ruu nɔngkɔ, ri mã danggn ka naa lapa kɔ shɛ̃ɛning. A jĩng dannang naa seepaa ka ruu Kpanti Laa, ri tantɛ Ruu Laa yaanang.

¹⁸Zang ɓɔɔ ri ti nwang ɓarɛ naa jĩng vuu ɓɔɔ ka yeti kɔkɔ ɓɛɛ. Ri tãa Ruu Laa,

¹⁹a rɛ̃rɛnang ka yuu vuu ɓɔɔ ka koo keɓe nɛɛ vuu naa kasɛnang, nɛɛ vuu piti ɓɔɔ yeti zang kasɛ, naa mulu Ruu Laa ɓɔɔ ka yeti ɓarɛ kati, a ruu bii naa nwàng ri vuu kaa takpang.

²⁰Zang ɓɔɔ ri nwang ɓarɛ naa jĩng vuu ɓɔɔ shili ka tipi tɔ̃ɔ ɓɛɛ. Ri tãa Ruu Laa, ri tarɛ, Ruu Laa nwang ri vuu tɔ̃ɔ, ri naa nwang ka naa jĩng vuu ɓɔɔ ra jaa bmati tu kopi, ɓɔɔ laa taati, a ɓɔɔ laa maani ɓɛɛ.”

²¹A Yeesɔ kɔɔ ri tɔkn tɔɔ, “Zang ɓɔɔ kagn atɛ waa zàáng sɔɔ, wu zuu nɛɛ pɛntɛng, kɔ wu shing ka dii ɓonla ya? Shing wu ka nɔng ɓɔɔ zang shing waa zàáng sɔɔ kagn lapa kpang ya?

²²Vuu piti ɓɔɔ zang waasɛ katɔ, zang naa nwangsɛ ditɔ. Vuu piti ɓɔɔ zang zi dĩiri ɓiɓɛ kpang, zang naa zi ditɔ.

²³Zang ɓɔɔ shoo ɓiɓɛ nɛɛ kagn, wu tãayi.”

²⁴A Yeesɔ kɔɔ ri tɔɔ, “Nɔɔ shing jĩng ka vuu ɓɔɔ nɔɔ tãa ɓɛɛ ning. Naa ɓɔɔ nɔɔ jɛ̃ɛ zang ruu, Laa naa jɛ̃ɛ nɔɔ doo nɔngkɔ. Ɓɔɔ Laa naa jɛ̃ɛ nɔɔ, ɓa ɓɔɔ ɓarɛ ɓi kaa tɔ.

²⁵Zang ɓɔɔ vuu ɓiɓɛ kagn, zang gisi wu ɓɔɔgn tɔkn. Zang ɓɔɔ vuu ɓiɓɛ kagn kpang, zang naa ta ɓɔɔ ka naa ɓiɓɛ tɔkɔlɔng ditɔ.”

²⁶A ti kɔɔyi tɔɔ, “Kpanti roonang Laa nwang naa zang ɓɔɔ vang jĩng vuu ka jaa ɓiɓɛ ɓɛɛ.

²⁷Shɔnzang kaɓa rooyi nɔng wu gãntɛ, wu ti seepaa diki diki, zi naa ɓɔɔ jĩng vuu kaɓa takɛ, wu ti bang ɓɛɛ kpang.

²⁸Ɓi tipi palɛ vuu, vuu ti tarɛ. Gaayu nɛɛ lagbãng, wu ti naa nwangsɛ yuu, tɔɔ wu shing jĩng kati.

²⁹Jĩng vuu nɛɛ zũng tɔ, wu ya jangsi, wu kpayi, ka ruu ɓɔɔ, diki vuu yeenang a tɔ ɓɛɛ.”

³⁰A ti kɔɔ ri tɔkn tɔɔ, “Rùu gã̀sɛ́ Kpanti roonang Laa ɓu nɛɛ viya? Ruu tusu naa ɓɔɔ nwangsɛ ɓu kaa nɛɛ nyaa vuu jeenang kiya?

³¹Nwang naa jĩng vuu ɓɔɔ zang ɓaa nɛɛ masita ɓɛɛ. Wukɔ tɔkɔlɔng piti ka teteng jĩng vuu ɓɔɔ zang ɓarɛ ka tipi ɓɛɛ.

³²Zang nɛɛ ɓaa tɔ, naa bangnɛ, vãarɛ nasãng bang, bang, jaaning ri ti naa kɔ̃lɔ saara kagn.”

³³Yeesɔ rang ri yee nɛɛ nyaa vuu jeenang ɓɔɔ naa weɓe dɔɔli, ka naa ɓɔɔ ri zunung ɓɔɔ ri zi vuu ɓɔɔ kagn katɔ ɓɛɛ.

³⁴Kɔɔ ri ruu kagn nɛɛ nyaa waati gbete kpang. Rang ri yee nɛɛ nyaa vuu jeenang kɔ nandon, nɛɛ nwang tɔ nɛɛ zang ɓɔɔ ri mantɛ vuu ka bii ɓiɓɛ ka bm, wu nwangsɛ ri dĩiri ruu ɓɔɔ wu rang nɛɛ nyaa vuu jeenang kati nandon.

³⁵Ka diki kaɓa nɛɛ laarang, Yeesɔ kɔɔ zang ɓɔɔ ri mantɛ vuu ka bii ɓiɓɛ tɔɔ, “Rúu ta nɔɔ waapo ta ka dang.”

³⁶Ri yaa zang ɓɔɔ ri kpalɛ zɔɔ kati, a ri vang tonsi ɓɔɔ Yeesɔ nwang kagn, ri daa nɛɛ wu. Tonsi ɓɔɔ kagn nɔngkɔ.

³⁷A jasung seepaa rannang kati. Jasung ti vãlɛ mii kana yeti tonsi, tonsi nɛɛ wu ɔ̃ɔ kaa tɔ.

³⁸Yeesɔ roo ɓi katɔ ka knti tonsi. Shing yuu ɓiɓɛ ka laa yuu pãnnang. A ri hingsi wu, ri hɛ̃ɛ wu tɔɔ, “Maalang ruu ɔ̃ɔ kana ruu ɓaaɓɛ hãa ɓi kagn kpang ya?”

³⁹A Yeesɔ seepaa mangkɛ jasung, a kɔɔ mii ɓɔɔ gɔnsɔ zɔɔ ɓɛɛ tɔɔ, “Shii kikiri, mɔɔ gɔnsɔ takpang.” A jasung shii kaa kikiri.

⁴⁰A hɛ̃ɛ ri nɛɛ, “Nɔɔ kaa vɔrɔ ka ruu viya? Nɔɔ shing danggn gn kpang ya?”

⁴¹Ri mã naa ka danggn, a ri hɛ̃ɛlɛ zɔɔ kaa naa ɓarɛ tɔɔ, “Wee ɓi lɛ̀ɛ́ zang viya? Jasung nɛɛ mii waapo ri ɓaa shoo ka nyaa ɓiɓɛ wiya?”