Read mumuye Maraku 6 Bible Online

Maraku 6 - mumuye bible

Maraku 6

¹Yeesɔ seepaa nɛɛ nɔng kaɓa, daa ka gari ɓiɓɛ. Zang ɓɔɔ ri mantɛ vuu ka bii ɓiɓɛ, ri ti daa kaa nɛɛ wu ning.

²Ka Diki Ɔ̃sɔnang zang Yahudi, Yeesɔ gaa tɔɔsung vuu tusunang ka gãa zɔɔ kpalɛnang zang Yahudi. Zang piti ɓɔɔ ti tãa vuu ɓɔɔ wu tusu, ri mã naa ka danggn. Ri hɛ̃ɛyi tɔɔ, “Yɔɔ keɓe zi vuu keɓe ɓi biya nɔngkɔ viya? Laa a wu zũnang vi nɔngkɔ viya? Zunung ɓɔɔ wu palɛ vuu ɓɔɔ ruu zirɛ ruu mã naa ka danggn katɔ.

³Wee ɓu zang ɓɔɔ seere laa ɓɛɛ kpang ya? Wu Marayamu kɔ niiɓɛ kpang ya? Wu ti rɛɛ Yakub nɛɛ Yose nɛɛ Yahuda nɛɛ Siman kɔ jaa niiɓɛ kpang ya? Wu ti rɛɛ jaa niiɓɛ ɓɔɔ soro kɔ nɛɛ ruu ka nihn kpang ya?” Gnvɔ shaa ri, ri bɛ̃ɛ wu kati.

⁴A Yeesɔ kɔɔ ri tɔɔ, “Zang a zang nyaa shonang Laa bannang ka nɔng ɓɔɔgn piti, zang gari ɓiɓɛ, nɛɛ rɛɛ ɓeezung, nɛɛ zang yeti gãa ɓiɓɛ kɔ ri a wu bannang ɓi kpang shɛ̃ɛning.”

⁵Yeesɔ walɛ gbalang ɓɔɔ wu palɛ vuu ɓɔɔ zang zirɛ zang mã naa ka danggn ka nɔngkɔ kpang. Masɛ zang tɔkɔlɔng ɓɔɔ wu shing ri naa ka yuu ɓɛɛ kɔ shɛ̃ɛning.

⁶Yeesɔ mã naa ka danggn, ka ruu ɓɔɔ, ri shing danggn ka bii ɓiɓɛ kpang ɓɛɛ. A daarɛ ka gari ɓɔɔgn daa tusu zang vuu kati.

⁷A ɓaa nyaa ka zang ɓɔɔ ri mantɛ vuu ka bii ɓiɓɛ kopi tu ziti, a ɓakɛ ri kaa ziti, ziti, shongko ri. A ti a ri naa ɓɔɔ ri nwangsɛ suru shi kpang nɛɛ mani ɓɛɛ.

⁸Shaarɛ ri nyaa tɔɔ, ri tuu vuu ɓɔɔ ri daa zanti nɔng ka naa ɓarɛ kpang, ri tuu labalang kɔ shɛ̃ɛning. Nɛɛ ri tuu vuu shaanang nɛɛ duku ka naa ɓarɛ kpang. Nɛɛ ri ti daa nɛɛ saka ka naa ɓarɛ kpang.

⁹Kɔɔ ri nɛɛ ri hãa koodoo katɔ. Nɛɛ ri ti hãa fɔ̃ɔrɔ ziti ka bii kpang.

¹⁰A ti kɔɔ ri tɔɔ, “Gãa ɓɔɔ nɔɔ nɛɛ daa kagn piti, nɔ́ɔ nwang ka nɔngkɔ, diki ɓɔɔ nɔɔ seepaa nɛɛ nɔng kaɓa wu a nɛɛ mani.

¹¹Nɔng piti ɓɔɔ zang nɛɛ ta nɔɔ kagn kpang, a ri ti kasɛ nɛɛ ri ɓaa shoo ka nyaa manɛ kpang. Nɔɔ nɛɛ yaa nɔng kaɓa kaa tɔ, nɔ́ɔ waa zũng tapuru ɓɔɔ ka doo manɛ katɔ. Tɔ̀ɔ, zang zi kati nɛɛ ruu manɛ hãa ɓi tɔ̀ɔ́gn kpang, ɓi kaa ruu ɓarɛ.”

¹²A ri daa rang zang yee Laa kati. Ri kɔɔ zang tɔ́ɔ, zang ri yaa vuu shi kpang ɓarɛ ta, ri kɔ̃sɔ yeti ɓarɛ.

¹³Ri ti nwangsɛ suru shi kpang dɔɔli. A ri ti tungku zang kɔnang dɔɔli nung ka yuu. A ri masɛ ri kati.

¹⁴Hiridu ɓɔɔ roo kpanti ka Galili tãa nyaa vuu ɓɔɔ Yeesɔ palɛ nandon, ka ruu ɓɔɔ, nyaa Yeesɔ baa nɔng tɔ nandon ɓɛɛ. Zang ɓɔɔ ri kɔɔyi tɔɔ, “Zang wisi Yɔhana ɓɔɔ pàlɛ́ zang batizima paa tɔ nɛɛ saa ka ruu nɔngkɔ walɛ naa vuu ɓɔɔ zang zirɛ zang mã naa ka danggn palɛnang.”

¹⁵A zang ɓɔɔ ri ti kɔɔ ɓarɛ nɛɛ, “Ɓi Iliya.” Zang ɓɔɔ ri ti kɔɔyi nɛɛ, “Ɓi zang nyaa shonang Laa ɓɔɔgn naa ɓɔɔ gbete ɓɔɔ ka tĩng ɓɛɛ.”

¹⁶Ɓɔɔ Hiridu tãa naa weɓe, kɔɔyi tɔɔ, “Yɔhana ɓɔɔ n dɔng yuu ɓiɓɛ zang wisi wukɔ paa nɛɛ saa.”

¹⁷Hiridu kɔ shong zang nɛɛ zang daa yi Yɔhana zang mãrɛ, zang loo wu ka sãa, ka ruu Hirodiya soro jaa diiɓɛ Filibu ɓɔɔ wu ta ɓɛɛ.

¹⁸Ka ruu ɓɔɔ, Yɔhana kɔ̀ɔrɔ́ Hiridu tɔɔ, “Daa naa ɓɔɔ mɔɔ ta soro jaa daaɓɛ kpang ɓɛɛ.”

¹⁹Hirodiya mang Yɔhana ɓɔɔ pàlɛ́ zang batizima ka yeti, kasɛ nɛɛ wu nyɔ wu vɔrɔ katɔ, a walɛ gbalang kpang.

²⁰Ka ruu ɓɔɔ, Hiridu kaa vɔrɔ Yɔhana katɔ, ti zi tɔ nɛɛ Yɔhana ɓi zang tɔ̃ɔ ɓɔɔ palɛ vuu ɓɔɔ daa bii katɔ ɓɛɛ. Ka ruu nɔngkɔ Hiridu yiti Yɔhana tɔ̃ɔ tɔ̃ɔ, kasɛ nɛɛ vuu ɓɔɔ wu lee Yɔhana naa ka bii kpang. Hiridu ɓaa shoo katɔ ka nyaa Yɔhana tɔ̃ɔ tɔ̃ɔ, a yèé Yɔhana kpãa wu ka yeti dɔɔli.

²¹Hirodiya naa walɛ gbalang vuu ɓɔɔ wu kongso ka yeti ɓiɓɛ nɛɛ Yɔhana ka lee ɓɔɔ diki ɓɔɔ zang yi Hiridu kagn raa bii ɓɛɛ. Ka diki kaɓa, kpanti Hiridu gaarɛ zang bang bang ɓiɓɛ, nɛɛ zang bang bang zang sɔɔja, nɛɛ zang Galili ɓɔɔ vuu naa ɓarɛ kagn dɔɔli, nɛɛ ri naa shaa vuu shaanang.

²²A jaa Hirodiya ɓɔɔ soro arɛ naa sɔ dang. Dang ɓɔɔ jaa sɔɔrɛ daa kpanti Hiridu nɛɛ zang ɓɔɔ wu gaarɛ ka yeti dɔɔli, ka ruu nɔngkɔ, kpanti kɔɔ jaa tɔɔ, “Gaa vuu piti ɓɔɔ mɔɔ kasɛ, n a mɔɔ katɔ.” A tũng jaa Laa tɔ̀ɔ,

²³“Vuu ɓɔɔ mɔɔ gaa ka naa mɛɛ piti, n a mɔɔ katɔ. Naa mɔɔ gaa m nɛɛ n basɛ tipi ɓɔɔ n roo kpanti kagn ziti, n a mɔɔ dang gbete, n a mɔɔ katɔ.”

²⁴A jaa nwangnɛ daa hɛ̃ɛ niiɓɛ tɔɔ, “N daa gaa ɓu viya?” Niiɓɛ kɔɔ wu tɔ̀ɔ, “Daayi mɔɔ gaa yuu kporontong Yɔhana ɓɔɔ pàlɛ́ zang batizima ɓɛɛ.”

²⁵A jaa làabìi gbãayu kaa tantɛnang daa ka bii kpanti kɔɔ wu tɔ̀ɔ, “N kasɛ mɔɔ a m yuu kporontong Yɔhana ɓɔɔ palɛ zang batizima ka yeti pɛntɛng kãntang keɓe.”

²⁶Ɓɔɔ kpanti tãa naa weɓe, yeti ɓiɓɛ lasɛ dɔɔli a zi vuu ɓɔɔ wu palɛ takpang. Ka ruu ɓɔɔ, tũng jaa Laa tɔ ka shoo zang piti ɓɔɔ wu gaarɛ ɓɛɛ. Kasɛ nɛɛ wu yaa nyaa ɓɔɔ wu kɔɔ jaa ɓɛɛ takpang.

²⁷A kpanti shong sɔɔja gbete ka teteng sɔɔja ɓɔɔ ri gãng jĩng ka wu, nɛɛ wu daa atɛ wu yuu Yɔhana. A yɔɔ daayi, daa dɔng yuu Yɔhana ka sãa.

²⁸Atɛ yuu kporontong Yɔhana ka pɛntɛng, a á jaa kati. Jaa ti tuuyi daa a niiɓɛ.

²⁹A zang ɓɔɔ ri mantɛ vuu ka bii Yɔhana ri tãa nyaa, ri arɛ ri naa tuu bii vɔrɔ Yɔhana, ri daa gbãa kati.

³⁰Zang kopi tu ziti ɓɔɔ ri mantɛ vuu ka bii Yeesɔ kaɓa, ri gbãayu ka bii ɓiɓɛ, a ri kɔɔ wu vuu piti ɓɔɔ ri palɛ nɛɛ ɓɔɔ ri tusu ɓɛɛ.

³¹A Yeesɔ kɔɔ ri tɔɔ, “Nɔɔ a ta ruu daa ɔ̃sɔ tɔkɔlɔng ka nɔng ɓɔɔ zang kagn kpang ɓɛɛ.” Yeesɔ kɔɔ ri nɔngkɔ ka ruu zang ɓɔɔ ri álɛ̀ ka bii ɓarɛ gaagaa ɓɛɛ. Zang ɓɔɔ ri a kana, zang ɓɔɔ ri ti daa kana. Ri walɛ gbalang ɓɔɔ ri shaa vuu shaanang takpang.

³²Ri vang tonsi, ri daa ka nɔng ɓɔɔ zang kagn kpang ɓɛɛ.

³³Zang dɔɔli zi ri, ri daa kana, a ri zi ri nung kaa tantɛnang. Ri yuku nɛɛ gari ɓarɛ piti piti, ri daa shɛ̃ɛ nɔng ka tĩng ɓarɛ.

³⁴Yeesɔ nwang tɔ nɛɛ yeti tonsi, a zi zang ɓɔɔ ri kpalɛ zɔɔ gaagaa, a gn ɓarɛ kɔng wu, ka ruu ɓɔɔ, ri nwáng naa mɛ̀ɛrɛ́ ɓɔɔ jagãng kagn kpang ɓɛɛ. A Yeesɔ gaa ri yuu vuu tusunang kaa zɔ̃ng zɔ̃ng.

³⁵Laa hãa nyaa kana, a zang ɓɔɔ ri mantɛ vuu ka bii ɓiɓɛ, ri naa kɔɔ wu tɔɔ, “Maalang, laa ɓa tɔ, gãa ti ki nihn kpang.

³⁶Yaa zang naa ta, zang ɓu wu daa hoo vuu shaanang ɓiɓɛ ka gari ɓɔɔ ka nihn naabm ɓɛɛ.”

³⁷A kasɛ ri nyaa tɔɔ, “Nɔɔ a ri vuu shaanang ta, ri shaayi.” A ri hɛ̃ɛ wu tɔɔ, “Ruu daa hoo borodi nung jaka ziti, ruu naa a ri ya?”

³⁸Yeesɔ hɛ̃ɛ ri tɔɔ, “Borodi manɛ yaa kaa nɛya? Nɔɔ dita nɔɔ zirɛ.” A ri daa zirɛ, ri kɔɔ wu tɔɔ, “Yaa kaa maani nɛɛ jaazĩi ziti.”

³⁹A Yeesɔ kɔɔ zang ɓɔɔ ri mantɛ vuu ka bii ɓiɓɛ nɛɛ ri kɔɔ zang ta, zang ri kusu zɔɔ, ri nwalɛ ka yuu wisi bɛbɛtɛ ɓɔɔ ka nɔngkɔ.

⁴⁰A zang kusu zɔɔ ɓɔɔ laa maani, ɓɔɔ laa ziti tu kopi, zang nwalɛ.

⁴¹A Yeesɔ see borodi maani, nɛɛ jaazĩi ziti kaɓa, tuu jĩng ka lapa zãa Laa, a shalɛ, a zang ɓɔɔ ri mantɛ vuu ka bii ɓiɓɛ ɓɛɛ, nɛɛ ri alɛ zang ta. A ti basɛ jaazĩi ziti kaɓa ka yuu zang piti.

⁴²Zang ri shaayi, buru ɓarɛ yirɛ.

⁴³A zang ɓɔɔ ri mantɛ vuu ka bii Yeesɔ, ri kpalɛ borodi nɛɛ jaazĩi ɓɔɔ zang yaarɛ knti saang kopi tu ziti.

⁴⁴Zang varɛ ɓɔɔ ri shaa vuu kaɓa ri labang maani.

⁴⁵A kɔɔ zang ɓɔɔ ri mantɛ vuu ka bii ɓiɓɛ tantɛnang nɛɛ ri vang tonsi ta ri daa gari Bɛsɛda ɓɔɔ ka nyaa rang dang ɓɛɛ ka tĩng. Nɛɛ wu jee zang ɓɔɔ ri kpalɛ zɔɔ doo nyaa ka gbongkarɛ.

⁴⁶Jée zang nyaa tɔ, a naa seepaa daa ka kɔpɔ, nɛɛ wu daa gaa Laa.

⁴⁷Kaa nɛɛ laarang, zang ɓɔɔ ri mantɛ vuu ka bii Yeesɔ ri shɛ̃ɛ teteng mii waapo tɔ, Yeesɔ ɓi ti doo ka bm ka tipi.

⁴⁸A zi zang ɓɔɔ ri mantɛ vuu ka bii ɓiɓɛ, ri dang jĩng kana nɛɛ tonsi zaanang, ka ruu ɓɔɔ, jasung raa jĩng ka bii ɓarɛ kɔ jong ɓɛɛ. A Yeesɔ ra ka yuu paa mii nɛɛ yuu gãndi. Nɛɛ wu ɓa ri katɔ,

⁴⁹a ri zi wu, ra kana yuu paa mii, ri kɔɔ nɛɛ naa raanang, ri mɛɛ nyaa ka lapa.

⁵⁰Ka ruu ɓɔɔ, ri zi wu, a bii kaa ri vɔrɔ nandon ɓɛɛ. A Yeesɔ rang yee kaa tantɛnang nɛɛ ri tɔɔ, “Ɓi nkɔ, nɔ́ɔ kaa vɔrɔ kpang.”

⁵¹A Yeesɔ vang kaa yeti tonsi, a jasung ɓɔɔ rarɛ vɔ̃ nyaa kati. Zang ɓɔɔ ri mantɛ vuu ka bii ɓiɓɛ ri mã naa ka danggn.

⁵²Ka ruu ɓɔɔ, ri zi dĩiri ruu ɓɔɔ Yeesɔ tusu nɛɛ borodi kaɓa gn kpang ɓɛɛ, a ri ti kasɛ nɛɛ ri ta vuu ɓɔɔ zang tusu ri ka yeti ɓarɛ kpang ɓɛɛ.

⁵³Ri ta mii tɔ, ri naa a ka tipi Janesara. A ri mã tonsi ɓarɛ ka nyaa gãnggãng ka nɔngkɔ.

⁵⁴Ɓɔɔ ri nwang nɛɛ yeti tonsi hn, zang tantɛ Yeesɔ nung zinang.

⁵⁵A zang yuku, zang daarɛ ka gari ɓarɛ nandon. A zang gaa tɔɔsung zang kɔnang seerenang ka vuu roonang ɓarɛ, zang daa nɛɛ ri ka nɔng piti ɓɔɔ zang tãa nyaa nɛɛ Yeesɔ kagn ɓɛɛ.

⁵⁶Nɔng piti ɓɔɔ zang tãa nyaa nɛɛ Yeesɔ kagn, ka yeti gari ɓɔɔ bang nɛɛ ɓɔɔ tɔkɔlɔng, nɛɛ nɔng ɓɔɔ zang rooro gãa waati piti, zang ãatɛ zang kɔnang ka teteng gari, ri wɔɔrɔ ri ka nɔng ɓɔɔ zang kpalɛ zɔɔ kagn ɓɛɛ. Ri gaa wu nɛɛ wu yáa zang kɔnang jong, ri lee naa kaa nyaa fɔ̃ɔrɔ ɓiɓɛ. Zang ɓɔɔ ri lee naa ka nyaa fɔ̃ɔrɔ ɓiɓɛ, kɔnang ɓarɛ yàa ri nɔng.