Read mumuye Maraku 9 Bible Online

Maraku 9 - mumuye bible

Maraku 9

¹A kɔɔ ri tɔɔ, “N kɔɔ nɔɔ ruu ɓɔɔ niizang kɔ nwani, zang ɓɔɔ kagn teteng zang kɔ ri shiiri ɓee, ri zǐ Kpanti ɓɔɔ Laa roo ɓɛɛ ka gbongkarɛ tɔ̀ɔ, ri vɔrɛ.”

²Diki mangbete naa ɓa tɔ, Yeesɔ see rɛɛ Bituru nɛɛ Yakub, a ɓɔɔ Yɔhana kɔ shɛ̃ɛning daa nɛɛ ri ka kɔpɔ ɓɔɔ bee dɔɔli ɓɛɛ. A bii Yeesɔ risi kaa náa ɓɔɔgn ka jĩng ɓarɛ.

³Fɔ̃ɔrɔ ɓiɓɛ risi nwáng kaa puru shãa shãa. Zang fɔ̃ɔrɔ sɔɔnang ɓɔɔ sɔɔ fɔ̃ɔrɔ wu puu naa weɓe kagn koo keɓe kpang.

⁴A ri zi Iliya nɛɛ Musa, ɓɔɔ bɛ̀ɛ́ ri vɔlɔ tɔ ɓɛɛ, ri rang yee kana nɛɛ Yeesɔ.

⁵Bituru kɔɔ Yeesɔ tɔɔ, “Kpanti, wee ruu ka nihn wukɔ tɔ̃ɔ. Mɔɔ nɛɛ kasɛ tɔ, ruu waa putali taati ka nihn, ɓɔɔ ɓaaɓɛ gbete, ɓɔɔ Musa gbete, a ɓɔɔ Iliya ti gbete.”

⁶Bituru kɔɔ nɔngkɔ, ka ruu ɓɔɔ, zi vuu ɓɔɔ wu kɔɔ takpang, bii kaa ri vɔrɔ dɔɔli.

⁷A sãmbong arɛ naa zuu ri kati. Ri ti tãa yee nɛɛ yeti sãmbong tɔɔ, “Wee jaa mɛɛ ɓɔɔ yeti mɛɛ kasɛ gbãng gbãng kɔ, nɔɔ ɓaa shoo ka nyaa ɓiɓɛ ning.”

⁸Ɓɔɔ ri raa jĩng hn, ri zi zang ɓɔɔ takpang, ri zi kaa Yeesɔ kɔ nɛɛ ri gbete.

⁹Ri shóorò doo naa nɛɛ kɔpɔ, Yeesɔ shaarɛ ri nyaa nɛɛ, “Nɔɔ kɔɔ zang ɓɔɔ vuu kɔ nɔɔ zi ɓɛɛ kpang, Laa nɛɛ wisi Jaa Shɔnzang paa tɔ ka vɔrɔ, nɔɔ kɔɔ zang kati.”

¹⁰Ri vɔ̃ nyaa kaa naa ɓɔɔ Yeesɔ kɔɔ ri ɓɛɛ. Ri hɛ̃ɛlɛ zɔɔ dĩiri ruu ɓɔɔ Yeesɔ kɔɔ ri nɛɛ Laa naa wisi wu paa ditɔ ka vɔrɔ ɓɛɛ.

¹¹A ri hɛ̃ɛ Yeesɔ tɔɔ, “Ka ruu vi zang ɓɔɔ ri tusu zang vuu ri kɔɔyi tɔɔ, Iliya kɔ gaayu anang shɔɔnang tɔ̀ɔ, Kirisi wu arɛ viya?”

¹²Yeesɔ kasɛ ri nyaa tɔɔ, “Iliya kɔ a shɔɔnang niizang, tɔ̀ɔ, wu shĩili vuu ka tɔkn waasɛ̃. A ti hɛ̃ɛ ri nɛɛ, a ka ruu vi zang beeyi tɔɔ, Jaa Shɔnzang naa dang jĩng ditɔ, zang ti naa bɛ̃ɛ wu viya?

¹³N kɔɔ nɔɔ Iliya a tɔ, ri palɛ wu vuu piti ɓɔɔ yeti ɓarɛ kasɛ. Ri palɛ wu naa ɓɔɔ zang bee ka yeti labeenang Laa ɓɛɛ.”

¹⁴Ri naa a tɔ bii zang nimbang ɓɔɔ ri mantɛ vuu ka bii Yeesɔ ɓɛɛ, a ri zi zang ɓɔɔ ri kpalɛ zɔɔ gaagaa ka bii ɓarɛ. Zang ɓɔɔ ri tusu zang vuu ti laa nyaa kana nɛɛ ri.

¹⁵Ɓu doo ɓɔɔ zang ɓɔɔ ri kpalɛ zɔɔ ri zi Yeesɔ hn, ri mã naa ka danggn. Ri tãa tĩnang dɔɔli, a ri yurɛ ri daa kpisi wu yuu ri jee wu nyaa kati.

¹⁶A Yeesɔ hɛ̃ɛ zang ɓɔɔ ri mantɛ vuu ka bii ɓiɓɛ tɔɔ, “Nɔɔ rangkɛ ɓu ruu vi nɛɛ ri viya?”

¹⁷Zang gbete ka yeti zang ɓɔɔ ri kpalɛ zɔɔ, kasɛ wu nyaa tɔɔ, “Maalang, n atɛ mɔɔ jaa mɛɛ ɓɔɔ suru shi kpang nɔɔ wu nyaa katɔ, rang yee takpang ɓɛɛ.

¹⁸Nɔng ɓɔɔ naa mã wu kagn, loo wu ka tipi. Puru ti pú wu nɛɛ nyaa kpung, kpung. Wu ti sháa tãri kpaaka, kpaaka. Wu ti shiiri wu gbatagbata. N gaa zang ɓɔɔ ri mantɛ vuu ka bii ɓaaɓɛ, nɛɛ ri nwangsɛ suru shi kpang keɓe, ri zunung kpang.”

¹⁹A Yeesɔ pɛ̃ɛrɛ zang ɓɔɔ ri mantɛ vuu ka bii ɓiɓɛ, a kɔɔ ri tɔɔ, “Nɔɔ zang koo jaa knti keɓe, ɓɔɔ nɔɔ shing danggn ka bii Laa kpang ɓee, nɔɔ nɛɛ ń nwang nɛɛ nɔɔ saa nɛya? Nɔɔ nɛɛ n mã danggn nɛɛ nɔɔ saa nɛya? Nɔɔ atɛ m jaa bìí ta.”

²⁰A ri atɛ wu jaa kati. Ɓu doo ɓɔɔ suru shi kpang zi Yeesɔ hn, mã jaa, jaa watɛ ka tipi. Jaa jĩiri ka tipi, puru pu jaa nɛɛ nyaa kpung, kpung.

²¹A Yeesɔ hɛ̃ɛ daa jaa tɔɔ, “Diki ɓɔɔ kɔnang keɓe gaa wu yuu bee tɔ ya?” A kasɛ Yeesɔ nyaa tɔɔ, “Gaa wu yuu bee doo tɔkɔlɔng.”

²²“Diki ɓɔ̀ɔ́gn loo wu ka waa, diki ɓɔ̀ɔ́gn ti loo wu ka mii, nɛɛ tɔ̀ɔ wu nyɔ wu vɔrɔ kati. Mɔɔ nɛɛ zunung katɔ, gn ɓuru wu kɔng mɔɔ, mɔɔ yi ruu naa kagn, mɔɔ màsɛ̀ ruu wu.”

²³Yeesɔ kɔɔ wu tɔɔ, mɔkɔ nɛɛ zunung danggn shinnang katɔ jong. Zang piti ɓɔɔ shing danggn ka bii Laa, vuu ɓɔɔ kpãa wu ɓi kagn kpang.

²⁴A dáa jaa mɛɛ nyaa ka lapa nabm tantɛnang tɔɔ, “N shing danggn tɔ, yi m naa kagn. N shing danggn ka bii ɓaaɓɛ gbãng gbãng.”

²⁵A ɓɔɔ Yeesɔ zi zang ɓɔɔ gaagaa ri yuku ri a ka bii ɓiɓɛ, mangkɛ suru shi kpang, kɔɔ wu tɔɔ, “Suru shi kpang kɔ nɔɔ jaa nyaa nɛɛ shoo ɓee, n kɔɔ mɔɔ nwang ta mɔɔ yaa wu bii. Mɔɔ paasɛ anang tɔ̀ɔ́ bii ɓiɓɛ kpang.”

²⁶A suru shi kpang mɛɛ nyaa ka lapa, a mã jaa tɔ̃ɔ, tɔ̃ɔ, a nwangnɛ yàa jaa bii kati. Jaa roo ka tipi ɓoromang naa zang ɓɔɔ vɔ tɔ ɓɛɛ, ka ruu nɔngkɔ, zang dɔɔli ka teteng zang ɓɔɔ ri kpalɛ zɔɔ ri kɔɔyi tɔ jaa vɔ tɔ.

²⁷A Yeesɔ yi jaa ka naa, a yì jaa naa ka bii, a jaa seepaa kati.

²⁸Yeesɔ daa tɔ ka yeti gãa ka bm, a zang ɓɔɔ ri mantɛ vuu ka bii ɓiɓɛ, ri hɛ̃ɛ wu tɔɔ, “Ruu zunung nwangsɛnang ɓuru kpang ka ruu viya?”

²⁹A Yeesɔ kasɛ ri nyaa tɔɔ, “Suru shi kpang ɓɔɔ naa weɓe nwáng ɓi jong waati kpang, zang nwangsɛ ɓi nɛɛ Laa gaanang.”

³⁰A Yeesɔ nɛɛ zang ɓɔɔ ri mantɛ vuu ka bii ɓiɓɛ, ri seepaa nɛɛ nɔng kaɓa, ri naa sɔɔ kaa nɛɛ tipi Galili. Yeesɔ kasɛ nɛɛ zang gbete wu zi nɔng ɓɔɔ wu kagn kpang.

³¹Ka ruu ɓɔɔ, tusu zang ɓɔɔ ri mantɛ vuu ka bii ɓiɓɛ vuu ɓɛɛ. A kɔɔ ri tɔɔ, “Zang naa tuu Jaa Shɔnzang ditɔ, zang a zang. Ri naa nyɔ wu vɔrɔ. Zang nɛɛ nyɔ wu vɔrɔ tɔ, Laa naa wisi wu paa ka lee ɓɔɔ diki daa taati ɓɛɛ.”

³²A zang ɓɔɔ ri mantɛ vuu ka bii Yeesɔ ri zi dĩiri vuu ɓɔɔ Yeesɔ kɔɔ ri ɓɛɛ kpang. Ri tɔɔ ri hɛ̃ɛ wu, ri kaa vɔrɔ.

³³Ri naa a tɔ ka Kafanahu, Yeesɔ naa hɛ̃ɛ zang ɓɔɔ ri mantɛ vuu ka bii ɓiɓɛ, ka yeti gãa ɓɔɔ wu nwang kagn tɔɔ, “Ɓaasi nɔɔ kɔɔrɔ ɓu nɛɛ vi ka gbalang viya?”

³⁴Ri kasɛ Yeesɔ nyaa takpang, ka ruu ɓɔɔ, bɛ̀ɛ́ ri laa nyaa nɛɛ ɓu wi bang ka teteng ɓarɛ wiya ɓɛɛ?

³⁵A Yeesɔ nwang ka tipi, kɔɔ zang ɓɔɔ ri mantɛ vuu ka bii ɓiɓɛ kopi tu ziti tɔɔ, “Zang ɓɔɔ kasɛ nɛɛ wu nwang zang bang, wukɔ wu risi yuu ɓiɓɛ naa zang wujaa ɓɔɔ palɛ zang shonang jong.”

³⁶A Yeesɔ ɓaa nyaa ka jaa tɔkɔlɔng, a shing ka teteng ɓarɛ. A naa tuu jaa kaɓa ka naa ɓiɓɛ, a kɔɔ ri tɔɔ,

³⁷“Zang ɓɔɔ ta jaa ɓɔɔ tɔkɔlɔng ɓɔɔ naa weɓe ka nung mɛɛ, tà nkɔ. Zang ɓɔɔ nɛɛ ti ta m, ta ɓi nkɔ shɛ̃ɛning kpang, ta m nɛɛ zang ɓɔɔ shong m ɓɛɛ ning.”

³⁸Yɔhana kɔɔ wu tɔɔ, “Maalang, ruu zi zang ɓɔɔ kagn nwangsɛ suru shi kpang nɛɛ nung ɓaaɓɛ, a ruu zãa wu. Ka ruu ɓɔɔ, wu ɓi nɛɛ ruu kpang ɓɛɛ.”

³⁹A Yeesɔ kɔɔ ri tɔɔ, “Nɔ́ɔ zãa wu kpang, ka ruu ɓɔɔ, zang ɓɔɔ nɛɛ palɛ vuu ɓɔɔ zang zirɛ, zang mã naa ka danggn nɛɛ nung mɛɛ, ti raa nyaa tantɛnang, wu naa rang yee shi kpang ka yuu mɛɛ tɔkn kpang.

⁴⁰Zang ɓɔɔ kasɛ ruu ɓuru katɔ, wukɔ zang ɓuru.

⁴¹N kɔɔ nɔɔ ruu ɓɔɔ niizang kɔ nwani, zang ɓɔɔ nɛɛ a nɔɔ mii ɓoonang, ka ruu ɓɔɔ, zang ɓaa nɔɔ nɛɛ zang ɓɔɔ dũng Kirisi ɓɛɛ, naa ta vuu tɔ̃ɔ ɓɔɔ Laa shing wu ɓɛɛ ditɔ.

⁴²“Zang ɓɔɔ palɛ jaa gbete ka teteng wujɛ seseere kɔ ri shing danggn ka bii mɛɛ ɓee, palɛ vuu shi kpang, jĩng ɓɔɔ zang kaɓa naa dangnɛ ɓa ɓɔɔ zang nɛɛ mã ree bang ka turu ɓiɓɛ, zang tasɛ wu ka yeti mii waapo katɔ.

⁴³Ka ruu nɔngkɔ, naa ɓaaɓɛ nɛɛ dɔ̃ mɔɔ, nɛɛ mɔɔ palɛ vuu shi kpang, dɔng katɔ, mɔɔ tasɛ. Daa nɔng suru bii ɓɔɔ waa nyaa kpang nɛɛ naa dang gbete gbã̀ágbãa, ka nung ɓɔɔ zang nɛɛ daa tasɛ mɔɔ nɛɛ naa ziti ɓaaɓɛ ka yeti waa bang ɓɔɔ ning kpang ɓɛɛ. [

⁴⁴Ka nɔng kaɓa, jaagn ɓɔɔ shaa bii ɓarɛ, vɔ ɓi kpang ɓɛɛ. Waa ɓɔɔ ti shaa ri zang ningsi ɓi kpang ɓɛɛ.]

⁴⁵Doo ɓaaɓɛ kɔ nɛɛ dɔ̃ mɔɔ, nɛɛ mɔɔ palɛ vuu shi kpang, dɔng ta mɔɔ tasɛ. Daa nɔng suru bii ɓɔɔ waa nyaa kpang nɛɛ doo dang gbete gbã̀ágbãa, ka nung ɓɔɔ zang nɛɛ daa tasɛ mɔɔ nɛɛ doo ziti ɓaaɓɛ ka yeti waa ɓɔɔ ning ɓi kpang ɓɛɛ. [

⁴⁶Ka nɔng kaɓa jaagn ɓɔɔ shaa bii ɓarɛ, vɔ ɓi kpang ɓɛɛ. Waa ɓɔɔ ti shaa ri zang ningsi ɓi kpang ɓɛɛ.]

⁴⁷Jĩng ɓaaɓɛ kɔ nɛɛ dɔ̃ mɔɔ, nɛɛ mɔɔ palɛ vuu shi kpang, zɔ̃ng ta mɔɔ tasɛ. Daa nɔng ɓɔɔ Laa roo Kpanti nɛɛ jĩng dang gbete gbã̀ágbãa, ka nung ɓɔɔ zang tasɛ mɔɔ nɛɛ jĩng ɓaaɓɛ ziti piti ka waa ɓɔɔ ning ɓi kpang ɓɛɛ.

⁴⁸Ka nɔng kaɓa, jaagn ɓɔɔ shaa bii ɓarɛ, vɔ ɓi kpang ɓɛɛ. Waa bìí zang ti ningsi ɓi kpang ɓɛɛ.

⁴⁹“Zang naa raa zang, zang nwang zang tɔ̃ɔ nɛɛ waa, naa ɓɔɔ zang raa vuu ɓɔɔ zang dɔɔ Laa wu nwang tɔ̃ɔ nɛɛ tãa ɓɛɛ.

⁵⁰“Tãa ɓi tɔ̃ɔ. Naa lanang tãa nɛɛ takpang, zang palɛ bɛɛ nɛɛ mani wu la tɔkn viya? Tãa ɓɔɔ shing zang, nɛɛ zang nwáng ka nyaa zɔɔ, wu nwang ka bii manɛ ning. Nɔɔ ti nwang ka nyaa zɔɔ nɛɛ zɔɔ.”